ವೇದಾಂತ ರಿಸೋರ್ಸಸ್ ಲಿಮಿಟೆಡ್ ಅಧ್ಯಕ್ಷ ಅನಿಲ್ ಅಗರ್ವಾಲ್ ಅವರಿಗೆ ಜೀವನದ ಅತ್ಯಂತ ಕಠಿಣ ಕ್ಷಣ ಎದುರಾಗಿದೆ. ಅವರ ಪ್ರಿಯ ಪುತ್ರ ಅಗ್ನಿವೇಶ್ ಅಗರ್ವಾಲ್ (49) ಅಮೆರಿಕದಲ್ಲಿ ಸ್ಕೀಯಿಂಗ್ ಅಪಘಾತದ ನಂತರ ಚಿಕಿತ್ಸೆ ಪಡೆಯುತ್ತಿದ್ದ ವೇಳೆ ಹಠಾತ್ ಹೃದಯಾಘಾತದಿಂದ ಜನವರಿ 7, 2026ರಂದು ನಿಧನರಾದರು. ನ್ಯೂಯಾರ್ಕ್‌ನ ಮೌಂಟ್ ಸಿನಾಯ್ ಆಸ್ಪತ್ರೆಯಲ್ಲಿ ಚೇತರಿಕೆಯ ಹಾದಿಯಲ್ಲಿದ್ದ ಅಗ್ನಿವೇಶ್ ಅವರಿಗೆ ಅನಿರೀಕ್ಷಿತವಾಗಿ ಹೃದಯಾಘಾತ ಸಂಭವಿಸಿ ಚಿಕಿತ್ಸೆ ಫಲಕಾರಿಯಾಗದೇ ಕೊನೆಯುಸಿರೆಳೆದರು.
ಈ ದುಃಖದ ಸಮಯದಲ್ಲಿ ಅನಿಲ್ ಅಗರ್ವಾಲ್ ಅವರು ತಮ್ಮ ಸಂಪತ್ತಿನ ಶೇಕಡಾ 75 ಭಾಗವನ್ನು ಸಮಾಜ ಸೇವೆಗೆ ದಾನ ಮಾಡುವ ಹಿಂದಿನ ವಾಗ್ದಾನವನ್ನು ಮರು ಘೋಷಿಸಿದ್ದಾರೆ. “ಇದು ನನ್ನ ಜೀವನದ ಅತ್ಯಂತ ಕತ್ತಲಿನ ದಿನ” ಎಂದು ಭಾವುಕವಾಗಿ ‘ಎಕ್ಸ್’ನಲ್ಲಿ ಬರೆದ ಅನಿಲ್ ಅಗರ್ವಾಲ್, “ಪ್ರೀತಿಯ ಮಗ ಅಗ್ನಿವೇಶ್ ತುಂಬಾ ಬೇಗ ನಮ್ಮನ್ನು ಬಿಟ್ಟು ಹೋದ. ಅವನು ಕೇವಲ 49 ವರ್ಷದೊಡ್ಡವನು, ಆರೋಗ್ಯವಂತ, ಜೀವಂತಿಕೆಯಿಂದ ತುಂಬಿದ್ದ ಮತ್ತು ಕನಸುಗಳನ್ನು ಹೊಂದಿದ್ದ. ಅಮೆರಿಕದಲ್ಲಿ ಸ್ಕೀಯಿಂಗ್ ಅಪಘಾತದ ನಂತರ ಚೇತರಿಸಿಕೊಳ್ಳುತ್ತಿದ್ದ. ಕೆಟ್ಟದ್ದು ಹಿಂದೆ ಸರಿದಿದೆ ಎಂದು ಭಾವಿಸಿದ್ದೆವು. ಆದರೆ ವಿಧಿಯಾಟ ಬೇರೆಯಾಗಿತ್ತು” ಎಂದು ದುಃಖ ವ್ಯಕ್ತಪಡಿಸಿದ್ದಾರೆ.
ಅಗ್ನಿವೇಶ್ ಅವರು 1976ರ ಜೂನ್ 3ರಂದು ಬಿಹಾರದ ಪಾಟ್ನಾದಲ್ಲಿ ಜನಿಸಿದ್ದರು. ಮೇಯೋ ಕಾಲೇಜ್‌ನಲ್ಲಿ ಶಿಕ್ಷಣ ಪಡೆದ ಅವರು ಫುಜೈರಾ ಗೋಲ್ಡ್ ಸ್ಥಾಪಿಸಿ, ಹಿಂದೂಸ್ತಾನ್ ಜಿಂಕ್ ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದರು. ವೇದಾಂತ ಗ್ರೂಪ್‌ನಲ್ಲಿ ಮುಖ್ಯ ಪಾತ್ರ ವಹಿಸಿದ್ದ ಅಗ್ನಿವೇಶ್ ಸ್ಪೋರ್ಟ್ಸ್‌ಮ್ಯಾನ್, ಸಂಗೀತಗಾರ ಮತ್ತು ನಾಯಕರಾಗಿ ಗುರುತಿಸಿಕೊಂಡಿದ್ದರು. ಅವರು ಸರಳ, ಉಷ್ಣ ಹೃದಯಿ ಮತ್ತು ಮಾನವೀಯತೆಯಿಂದ ಕೂಡಿದ್ದರು ಎಂದು ಅನಿಲ್ ಸ್ಮರಿಸಿದ್ದಾರೆ.
ಪುತ್ರನ ನಿಧನದ ನಂತರ ಅನಿಲ್ ಅಗರ್ವಾಲ್ ಅವರು ತಮ್ಮ ಸಂಪತ್ತಿನ ಮುಕ್ಕಾಲು ಭಾಗವನ್ನು (ಸುಮಾರು 3 ಬಿಲಿಯನ್ ಡಾಲರ್ ಅಂದಾಜು 27,000 ಕೋಟಿ ರೂಪಾಯಿ) ದಾನ ಮಾಡುವುದಾಗಿ ಮರು ಘೋಷಿಸಿದ್ದಾರೆ. ಇದು ಮಗನೊಂದಿಗೆ ಹಂಚಿಕೊಂಡ ಕನಸುಗಳನ್ನು ನನಸು ಮಾಡುವ ಉದ್ದೇಶದಿಂದ. ಅಗ್ನಿವೇಶ್ ಸದಾ ಸ್ವಾವಲಂಬಿ ಭಾರತದ ಕನಸು ಕಾಣುತ್ತಿದ್ದರು. ಯಾವ ಮಗು ಹಸಿವಿನಿಂದ ಮಲಗಬಾರದು, ಶಿಕ್ಷಣದಿಂದ ವಂಚಿತರಾಗಬಾರದು, ಪ್ರತಿ ಮಹಿಳೆ ಸ್ವಾವಲಂಬಿಯಾಗಬೇಕು ಮತ್ತು ಯುವಕರಿಗೆ ಉದ್ಯೋಗ ಸಿಗಬೇಕು ಎಂಬುದು ಅವರ ನಂಬಿಕೆಯಾಗಿತ್ತು. ಈ ಕಾರಣಕ್ಕಾಗಿ ಸಂಪತ್ತಿನ ಶೇ.75ನ್ನು ಸಮಾಜಕ್ಕೆ ಹಿಂತಿರುಗಿಸುವ ಮಾತು ಕೊಟ್ಟಿದ್ದೆ ಎಂದು ಅನಿಲ್ ತಿಳಿಸಿದ್ದಾರೆ.
ಪ್ರಧಾನಿ ನರೇಂದ್ರ ಮೋದಿ ಸೇರಿ ಹಲವು ಗಣ್ಯರು ಅಗ್ನಿವೇಶ್ ನಿಧನಕ್ಕೆ ಸಂತಾಪ ಸೂಚಿಸಿದ್ದಾರೆ. ಅನಿಲ್ ಅಗರ್ವಾಲ್ ಅವರಿಗೆ ಮತ್ತು ಕುಟುಂಬಕ್ಕೆ ಈ ದುಃಖವನ್ನು ಸಹಿಸುವ ಶಕ್ತಿ ದೊರೆಯಲಿ.
