ಮುಖದ ಸೌಂದರ್ಯ ಹೆಚ್ಚಿಸಲು ಮಹಿಳೆಯರು ನಿಯಮಿತವಾಗಿ ಬ್ಯೂಟಿ ಪಾರ್ಲರ್ಗಳಿಗೆ ಭೇಟಿ ನೀಡುವುದು ಸಾಮಾನ್ಯ. ಅದರಲ್ಲೂ ಹುಬ್ಬುಗಳಿಗೆ ಶೇಪ್ ನೀಡಲು ಮಾಡುವ ಐಬ್ರೋ ಥ್ರೆಡ್ಡಿಂಗ್ ಬಹುತೇಕ ಎಲ್ಲರಿಗೂ ರೂಢಿಯಾಗಿದೆ. ಆದರೆ ಈ ಸರಳವಾಗಿ ಕಾಣುವ ಪ್ರಕ್ರಿಯೆಯಲ್ಲೂ ಒಂದು ಸಣ್ಣ ನಿರ್ಲಕ್ಷ್ಯ ನಿಮ್ಮ ಆರೋಗ್ಯಕ್ಕೆ ಭಾರೀ ಅಪಾಯವನ್ನುಂಟುಮಾಡಬಹುದು ಎಂಬುದನ್ನು ನೀವು ಊಹಿಸಿರಲಿಲ್ಲವೇನೋ. ಇತ್ತೀಚೆಗೆ ವೈದ್ಯರು ಹಂಚಿಕೊಂಡಿರುವ ಒಂದು ಶಾಕಿಂಗ್ ಪ್ರಕರಣ ಈ ಕುರಿತು ಗಂಭೀರ ಎಚ್ಚರಿಕೆ ನೀಡುತ್ತಿದೆ.
ವೈದ್ಯರೊಬ್ಬರು ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಂಡಿರುವ ವಿಡಿಯೋದಲ್ಲಿ, ಬ್ಯೂಟಿ ಪಾರ್ಲರ್ನಲ್ಲಿ ನಡೆದ ಐಬ್ರೋ ಥ್ರೆಡ್ಡಿಂಗ್ ಒಂದು ಯುವತಿಯ ಲಿವರ್ ಫೇಲ್ಯೂರ್ಗೆ ಕಾರಣವಾಯಿತು ಎಂದು ತಿಳಿಸಿದ್ದಾರೆ. ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ..
ಏನಿದು ಆ ಶಾಕಿಂಗ್ ಪ್ರಕರಣ?
ವೈದ್ಯರ ಪ್ರಕಾರ, ಸುಮಾರು ಕೆಲ ತಿಂಗಳ ಹಿಂದೆ 28 ವರ್ಷದ ಮಹಿಳೆಯೊಬ್ಬರು ಆಸ್ಪತ್ರೆಗೆ ದಾಖಲಾಗಿದ್ದರು. ಅವರಲ್ಲಿ ತೀವ್ರ ಆಯಾಸ, ವಾಕರಿಕೆ, ಆಹಾರದ ಆಸಕ್ತಿ ಕಡಿಮೆಯಾಗುವುದು ಹಾಗೂ ಕಣ್ಣುಗಳು ಹಳದಿ ಬಣ್ಣಕ್ಕೆ ತಿರುಗಿರುವುದು ಕಂಡು ಬಂದಿದೆ. ವೈದ್ಯಕೀಯ ಪರೀಕ್ಷೆ ನಡೆಸಿದಾಗ ಆಕೆಗೆ ಲಿವರ್ ಫೇಲ್ಯೂರ್ ಆಗಿರುವುದು ದೃಢಪಟ್ಟಿತ್ತು.
ಆದರೆ ಆ ಮಹಿಳೆಗೆ ಮದ್ಯಪಾನ ಮಾಡುವ ಅಭ್ಯಾಸ ಇರಲಿಲ್ಲ. ಲಿವರ್ಗೆ ಹಾನಿ ಮಾಡುವ ಯಾವುದೇ ಔಷಧಗಳನ್ನೂ ಸೇವಿಸುತ್ತಿರಲಿಲ್ಲ. ಹಾಗಾದರೆ ಲಿವರ್ ಹಾನಿಗೆ ಕಾರಣವೇನು ಎಂಬ ಪ್ರಶ್ನೆ ವೈದ್ಯರನ್ನು ಗೊಂದಲಕ್ಕೆ ಸಿಲುಕಿಸಿತ್ತು…
ಆ ಮಹಿಳೆ ನಿಯಮಿತವಾಗಿ ಬ್ಯೂಟಿ ಪಾರ್ಲರ್ನಲ್ಲಿ ಐಬ್ರೋ ಥ್ರೆಡ್ಡಿಂಗ್ ಮಾಡಿಸುತ್ತಿದ್ದಳು. ಇದು ಅವಳ ಆರೋಗ್ಯ ಸಮಸ್ಯೆಗೆ ಕಾರಣವಾಗಿತ್ತು ಎಂಬುದು ಬೆಳಕಿಗೆ ಬಂದಿದೆ.
ಥ್ರೆಡ್ಡಿಂಗ್ ಲಿವರ್ಗೆ ಹೇಗೆ ಅಪಾಯ?
ವೈದ್ಯರ ವಿವರಣೆಯಂತೆ, ಅನೇಕ ಬ್ಯೂಟಿ ಪಾರ್ಲರ್ಗಳಲ್ಲಿ ಒಂದೇ ದಾರವನ್ನು ಹಲವರ ಮೇಲೆ ಮರುಬಳಕೆ ಮಾಡಲಾಗುತ್ತದೆ. ಥ್ರೆಡ್ಡಿಂಗ್ ಪ್ರಕ್ರಿಯೆ ವೇಳೆ ಚರ್ಮದ ಮೇಲೆ ಕಣ್ಣಿಗೆ ಕಾಣದಷ್ಟು ಸಣ್ಣ ಗಾಯಗಳು ಅಥವಾ ಮೈಕ್ರೋ-ಕಟ್ಗಳು ಉಂಟಾಗುತ್ತವೆ. ಈ ಗಾಯಗಳ ಮೂಲಕ ಸೋಂಕುಗಳು ದೇಹದೊಳಗೆ ಪ್ರವೇಶಿಸಬಹುದು.
ಒಂದೇ ದಾರವನ್ನು ಈಗಾಗಲೇ ಹೆಪಟೈಟಿಸ್ ಬಿ ಅಥವಾ ಹೆಪಟೈಟಿಸ್ ಸಿ ಸೋಂಕಿತ ವ್ಯಕ್ತಿಯ ಮೇಲೆ ಬಳಸಿದ್ದರೆ, ಆ ವೈರಸ್ಗಳು ಮುಂದಿನ ವ್ಯಕ್ತಿಗೆ ಹರಡುವ ಅಪಾಯ ಬಹಳ ಜಾಸ್ತಿ. ಈ ವೈರಸ್ಗಳು ನೇರವಾಗಿ ಲಿವರ್ ಮೇಲೆ ದಾಳಿ ಮಾಡುತ್ತವೆ ಮತ್ತು ನಿಧಾನವಾಗಿ ಲಿವರ್ ಫೇಲ್ಯೂರ್ಗೆ ಕಾರಣವಾಗುತ್ತವೆ.
ಹೆಪಟೈಟಿಸ್ ಬಿ ಮತ್ತು ಸಿ ಸೋಂಕಿನ ಲಕ್ಷಣಗಳು ತಕ್ಷಣ ಕಾಣಿಸಿಕೊಳ್ಳುವುದಿಲ್ಲ. ವಾರಗಳು ಅಥವಾ ತಿಂಗಳುಗಳ ಬಳಿಕವೇ ಸಮಸ್ಯೆ ತೀವ್ರವಾಗುತ್ತದೆ. ನಂತರ ಲಿವರ್ಗೆ ಅಪಾರ ಹಾನಿ ಸಂಭವಿಸಿರುತ್ತದೆ.
ಪಾರ್ಲರ್ಗೆ ಹೋಗುವಾಗ ಈ ವಿಷಯಗಳನ್ನು ಮರೆಯಬೇಡಿ
ವೈದ್ಯರು ನೀಡುವ ಪ್ರಮುಖ ಸಲಹೆಗಳು ಹೀಗಿವೆ.
-
ಬ್ಯೂಟಿ ಪಾರ್ಲರ್ನಲ್ಲಿ ಐಬ್ರೋ ಥ್ರೆಡ್ಡಿಂಗ್ ಮಾಡುವ ಮೊದಲು, ಯಾವಾಗಲೂ ಹೊಸ ಮತ್ತು ಸ್ವಚ್ಛವಾದ ದಾರವನ್ನೇ ಬಳಸುತ್ತಾರಾ? ಎಂದು ಖಚಿತಪಡಿಸಿಕೊಳ್ಳಿ. ಇದನ್ನು ಪ್ರಶ್ನಿಸಲು ಹಿಂಜರಿಯಬೇಡಿ.
-
ಒಂದು ವೇಳೆ ಪಾರ್ಲರ್ ಸ್ವಚ್ಛತೆಯ ವಿಷಯದಲ್ಲಿ ನಿರ್ಲಕ್ಷ್ಯ ತೋರಿಸಿದರೆ, ಅಂತಹ ಸ್ಥಳಗಳನ್ನು ತಕ್ಷಣವೇ ತಪ್ಪಿಸಿ. ಸೌಂದರ್ಯಕ್ಕಿಂತ ಆರೋಗ್ಯ ಮುಖ್ಯ.
-
ಥ್ರೆಡ್ಡಿಂಗ್ ಬಳಿಕ ನಿರಂತರ ಆಯಾಸ, ವಾಂತಿ ಭಾವನೆ, ದೌರ್ಬಲ್ಯ, ಗೊಂದಲ ಅಥವಾ ಕಣ್ಣು/ಚರ್ಮ ಹಳದಿ ಬಣ್ಣಕ್ಕೆ ತಿರುಗಿದರೆ ಅದನ್ನು ಸಾಮಾನ್ಯ ಎಂದು ನಿರ್ಲಕ್ಷಿಸಬೇಡಿ.
-
ಈ ರೀತಿಯ ಲಕ್ಷಣಗಳು ಕಂಡುಬಂದರೆ ತಕ್ಷಣವೇ ವೈದ್ಯರನ್ನು ಸಂಪರ್ಕಿಸಿ ಮತ್ತು ಲಿವರ್ ಪರೀಕ್ಷೆ ಮಾಡಿಸಿಕೊಳ್ಳಿ.
ಸೌಂದರ್ಯಕ್ಕಿಂತ ಆರೋಗ್ಯ ಮುಖ್ಯ
ಸುಂದರವಾಗಿ ಕಾಣಬೇಕು ಎಂಬುದು ಸಹಜ ಆಸೆ. ಆದರೆ ಅದಕ್ಕಾಗಿ ನಿಮ್ಮ ಆರೋಗ್ಯವನ್ನು ಅಪಾಯಕ್ಕೆ ತಳ್ಳುವುದು ಯಾವತ್ತೂ ಸರಿಯಲ್ಲ. ಸ್ವಲ್ಪ ಜಾಗ್ರತೆ, ಸ್ವಚ್ಛತೆಯ ಬಗ್ಗೆ ಪ್ರಶ್ನಿಸುವ ಧೈರ್ಯ ಮತ್ತು ಸುರಕ್ಷಿತ ಪಾರ್ಲರ್ ಆಯ್ಕೆ ಮಾಡಿದರೆ ಈ ರೀತಿಯ ಗಂಭೀರ ಸಮಸ್ಯೆಗಳನ್ನು ಸುಲಭವಾಗಿ ತಪ್ಪಿಸಬಹುದು.
