ನ್ಯೂಯಾರ್ಕ್: ಅಮೆರಿಕದ ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್ (JD Vance) ಅವರ ಓಹಿಯೋದ ಸಿನ್ಸಿನಾಟಿ ನಿವಾಸದ ಮೇಲೆ ಭಾನುವಾರ ಮುಂಜಾನೆ ಗುಂಡಿನ ದಾಳಿ ನಡೆದಿದ್ದು, ಇಡೀ ವಿಶ್ವದ ಗಮನ ಸೆಳೆದಿದೆ. ವೆನೆಜುವೆಲಾದ ಅಧ್ಯಕ್ಷರ ಬಂಧನದಂತಹ ಅಂತರರಾಷ್ಟ್ರೀಯ ಸಂಘರ್ಷಗಳ ನಡುವೆಯೇ ಈ ದಾಳಿ ನಡೆದಿರುವುದು ಹಲವು ಅನುಮಾನಗಳಿಗೆ ಕಾರಣವಾಗಿದೆ.
ಘಟನೆಯ ವಿವರ:
ಭಾನುವಾರ ಮುಂಜಾನೆ ಸುಮಾರು 12.15ರ ಸುಮಾರಿಗೆ ಅಪರಿಚಿತ ವ್ಯಕ್ತಿಯೊಬ್ಬ ಜೆ.ಡಿ. ವ್ಯಾನ್ಸ್ ಅವರ ಮನೆಯ ಸಮೀಪ ಅನುಮಾನಾಸ್ಪದವಾಗಿ ಓಡಾಡುತ್ತಿದ್ದನು. ಈ ವೇಳೆ ನಡೆದ ಗುಂಡಿನ ದಾಳಿಯಿಂದಾಗಿ ಮನೆಯ ಕಿಟಕಿ ಗಾಜುಗಳು ಚೂರಾಗಿವೆ. ಘಟನೆಯ ಸಮಯದಲ್ಲಿ ವ್ಯಾನ್ಸ್ ಮತ್ತು ಅವರ ಕುಟುಂಬದವರು ಮನೆಯಲ್ಲಿ ಇರಲಿಲ್ಲ ಎಂಬುದು ತಿಳಿದುಬಂದಿದ್ದು, ಶಂಕಿತ ವ್ಯಕ್ತಿ ಮನೆಯ ಆವರಣದೊಳಗೆ ಪ್ರವೇಶಿಸಲು ಸಾಧ್ಯವಾಗಿಲ್ಲ ಎಂದು ಫೆಡರಲ್ ಕಾನೂನು ಜಾರಿ ಮೂಲಗಳು ದೃಢಪಡಿಸಿವೆ. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸದ್ಯ ಒಬ್ಬ ವ್ಯಕ್ತಿಯನ್ನು ವಶಕ್ಕೆ ಪಡೆದಿರುವ ಪೊಲೀಸರು, ಇದು ಉದ್ದೇಶಪೂರ್ವಕ ಹತ್ಯೆಯ ಯತ್ನವೇ ಅಥವಾ ಇತರೆ ಕಾರಣಗಳೇನಾದರೂ ಇವೆಯೇ ಎಂಬುದನ್ನ ತನಿಖೆ ನಡೆಸುತ್ತಿದ್ದಾರೆ.
ಅಂತರರಾಷ್ಟ್ರೀಯ ಸಂಘರ್ಷದ ನೆರಳು ?
ಅಮೆರಿಕ ಸರ್ಕಾರವು ಇತ್ತೀಚೆಗಷ್ಟೇ ವೆನೆಜುವೆಲಾದ ಅಧ್ಯಕ್ಷರನ್ನು ಬಂಧಿಸಿ ಅಂತರರಾಷ್ಟ್ರೀಯ ಕಾನೂನು ಉಲ್ಲಂಘಿಸಿದೆ ಎಂಬ ಟೀಕೆಗಳು ವ್ಯಕ್ತವಾಗುತ್ತಿರುವ ಬೆನ್ನಲ್ಲೇ ಈ ದಾಳಿ ಸಂಭವಿಸಿದೆ. ಹೀಗಾಗಿ, ಈ ದಾಳಿಯ ಹಿಂದೆ ವಿದೇಶಿ ಶಕ್ತಿಗಳ ಕೈವಾಡವಿದೆಯೇ ಎಂಬ ಆಯಾಮದಲ್ಲೂ ತನಿಖಾ ಸಂಸ್ಥೆಗಳು ಗಮನ ಹರಿಸಿವೆ. ಆದರೆ, ಈ ಬಗ್ಗೆ ಶ್ವೇತಭವನ ಅಥವಾ ಸೀಕ್ರೆಟ್ ಸರ್ವೀಸ್ ಇನ್ನೂ ಯಾವುದೇ ಅಧಿಕೃತ ಹೇಳಿಕೆ ನೀಡಿಲ್ಲ.
Cincinnati police and Secret Service agents responded to JD Vance’s home last night
Picture reportedly shows SMASHED WINDOW at VP’s Ohio home pic.twitter.com/B8gtAVzK2X
— RT (@RT_com) January 5, 2026
ಕಡುಬಡತನದಿಂದ ಬೆಳೆದು ಬಂದ ಜೆ.ಡಿ. ವ್ಯಾನ್ಸ್
ಜೆ.ಡಿ. ವ್ಯಾನ್ಸ್ ಅವರ ಜೀವನಗಾಥೆ ಅತ್ಯಂತ ಸ್ಫೂರ್ತಿದಾಯಕವಾಗಿದೆ. 1984ರಲ್ಲಿ ಓಹಿಯೋದ ಬಡ ಕುಟುಂಬವೊಂದರಲ್ಲಿ ಜನಿಸಿದ ಇವರ ಬಾಲ್ಯ ಅತ್ಯಂತ ಕಷ್ಟಕರವಾಗಿತ್ತು. ಅವರ ಚಿಕ್ಕ ವಯಸ್ಸಿನಲ್ಲೇ ಪೋಷಕರು ವಿಚ್ಛೇದನ ಪಡೆದಿದ್ದರು. ತಾಯಿ ಮಾದಕ ವ್ಯಸನಕ್ಕೆ ತುತ್ತಾದ ಕಾರಣ, ವ್ಯಾನ್ಸ್ ತಮ್ಮ ಅಜ್ಜ-ಅಜ್ಜಿಯ ಆಶ್ರಯದಲ್ಲಿ ಬೆಳೆದರು.
ತಮ್ಮ ಕಹಿ ಬಾಲ್ಯದ ನೆನಪುಗಳನ್ನು ಅವರು “ಹಿಲ್ಬಿಲ್ಲಿ ಎಲಿಜಿ” (Hillbilly Elegy) ಎಂಬ ಪ್ರಸಿದ್ಧ ಪುಸ್ತಕದಲ್ಲಿ ಬರೆದುಕೊಂಡಿದ್ದಾರೆ. ಬಡತನ, ತಾಯಿಯ ಕಷ್ಟಗಳು ಮತ್ತು ಅಜ್ಜಿಯ ಮನೆಯಲ್ಲಿ ಕಳೆದ ದಿನಗಳೇ ಅವರನ್ನು ಇಂದು ಅಮೆರಿಕದ ಎರಡನೇ ಅತ್ಯುನ್ನತ ಸ್ಥಾನಕ್ಕೆ ತಂದು ನಿಲ್ಲಿಸಿವೆ. ಸಿನ್ಸಿನಾಟಿಯಲ್ಲಿರುವ ಇವರ 2.3 ಎಕರೆ ವಿಸ್ತೀರ್ಣದ ನಿವಾಸವು ಸುಮಾರು $1.4 ಮಿಲಿಯನ್ ಮೌಲ್ಯದ್ದಾಗಿದ್ದು, ಅಮೆರಿಕದ ಯಶಸ್ವಿ ವ್ಯಕ್ತಿಗಳಲ್ಲಿ ಒಬ್ಬರಾಗಿ ಅವರು ಗುರುತಿಸಿಕೊಂಡಿದ್ದಾರೆ. ಸದ್ಯ ಈ ದಾಳಿಯು ಅಮೆರಿಕದ ಆಂತರಿಕ ಭದ್ರತೆ ಮತ್ತು ಉನ್ನತ ನಾಯಕರ ಸುರಕ್ಷತೆಯ ಬಗ್ಗೆ ಹೊಸ ಚರ್ಚೆಯನ್ನು ಹುಟ್ಟುಹಾಕಿದೆ.
