ಬಿಗ್ ಬಾಸ್ ಕನ್ನಡ ಸೀಸನ್ 12ರ ಮನೆಯಲ್ಲಿ ಹದಿನಾಲ್ಕನೇ ವಾರದ ಎಲಿಮಿನೇಷನ್ ಪ್ರಕ್ರಿಯೆ ಮುಕ್ತಾಯಗೊಂಡಿದೆ. ಕಳೆದ ವಾರ ಮಾಳು ಮತ್ತು ಸೂರಜ್ ಅವರ ಅನಿರೀಕ್ಷಿತ ಹೊರಹೋಗುವಿಕೆಯಿಂದ ಸ್ತಬ್ಧವಾಗಿದ್ದ ಬಿಗ್ ಬಾಸ್ ಮನೆಯಲ್ಲಿ, ಈ ವಾರ ಸ್ಪಂದನಾ ಅವರ ಎವಿಕ್ಷನ್ ನಡೆದಿದೆ. ಮನೆಯ ಸದಸ್ಯರಿಂದ ಲಕ್ಕಿ ಗರ್ಲ್ ಎಂದೇ ಗುರುತಿಸಿಕೊಂಡಿದ್ದ ಸ್ಪಂದನಾ ಅವರ ಬಿಗ್ ಬಾಸ್ ಪಯಣ ಈ ವಾರ ಮುಗಿದಿದೆ.
ಕೊನೆಗೂ ಕೈಕೊಟ್ಟ ಅದೃಷ್ಟ
ಸ್ಪಂದನಾ ಅವರ ಎಲಿಮಿನೇಷನ್ ವೀಕ್ಷಕರಿಗೆ ಅಷ್ಟೇನೂ ಅಚ್ಚರಿ ಮೂಡಿಸಲಿಲ್ಲ. ಕಳೆದ ವಾರವೇ ಅವರು ಮನೆಯಿಂದ ಹೊರಹೋಗುವ ಅಂಚಿನಲ್ಲಿದ್ದರು. ಮಾಳು ಮತ್ತು ಸ್ಪಂದನಾ ಬಾಟಮ್ ಟು ಹಂತದಲ್ಲಿದ್ದಾಗ, ಮಾಳು ಎಲಿಮಿನೇಟ್ ಆಗಿ ಸ್ಪಂದನಾ ಸೇಫ್ ಆಗಿದ್ದರು. ಆಗ ಮನೆಯ ಸದಸ್ಯರೆಲ್ಲರೂ ಸ್ಪಂದನಾ ಅವರ ಅದೃಷ್ಟದ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದರು. ಆದರೆ, ಈ ವಾರ ನಾಮಿನೇಟ್ ಆಗಿದ್ದ ಸ್ಪಂದನಾ ಅವರಿಗೆ ಜನರ ವೋಟ್ ಮತ್ತು ಅದೃಷ್ಟ ಎರಡೂ ಕೈ ಹಿಡಿಯಲಿಲ್ಲ.
ಸರಳವಾಗಿ ಮುಗಿದ ಎವಿಕ್ಷನ್ ಪ್ರಕ್ರಿಯೆ
ಸಾಮಾನ್ಯವಾಗಿ ಕಿಚ್ಚ ಸುದೀಪ್ ಅವರು ಎಲಿಮಿನೇಷನ್ ಪ್ರಕ್ರಿಯೆಯನ್ನು ಯಾವುದಾದರೂ ಟಾಸ್ಕ್ ಅಥವಾ ಆಕ್ಟಿವಿಟಿ ಮೂಲಕ ಕುತೂಹಲಕಾರಿಯಾಗಿ ನಡೆಸುತ್ತಿದ್ದರು. ಆದರೆ ಈ ಬಾರಿ ಯಾವುದೇ ಹೈ-ಡ್ರಾಮಾ ಇಲ್ಲದೆ ಬಹಳ ಸರಳವಾಗಿ ಎವಿಕ್ಷನ್ ಮುಗಿಯಿತು. ಅಂತಿಮ ಹಂತದಲ್ಲಿ ರಾಶಿಕಾ ಮತ್ತು ಸ್ಪಂದನಾ ಉಳಿದುಕೊಂಡಿದ್ದರು. ಕೊನೆಯಲ್ಲಿ ಸುದೀಪ್ ಅವರು ಸ್ಪಂದನಾ ಹೆಸರನ್ನು ಘೋಷಿಸುವ ಮೂಲಕ ಮನೆಯಿಂದ ಹೊರಬರುವಂತೆ ಸೂಚಿಸಿದರು.
ಸ್ಪಂದನಾ ಅವರು ಬಿಗ್ ಬಾಸ್ ಮನೆಯಲ್ಲಿ ಒಬ್ಬ ಸಭ್ಯ ಸ್ಪರ್ಧಿಯಾಗಿ ಗುರುತಿಸಿಕೊಂಡಿದ್ದರು. ಯಾರೊಂದಿಗೂ ಅನಗತ್ಯ ಜಗಳಕ್ಕೆ ಇಳಿಯದೆ, ಎಲ್ಲರೊಂದಿಗೆ ನಗುಮುಖದಿಂದಲೇ ಬೆರೆತಿದ್ದರು. ಧನುಶ್ ಮತ್ತು ಕಾವ್ಯಾ ಅವರೊಂದಿಗೆ ಆತ್ಮೀಯ ಬಾಂಧವ್ಯ ಹೊಂದಿದ್ದ ಅವರು, ರಘು ಮತ್ತು ಗಿಲ್ಲಿ ಅವರಿಗೂ ಉತ್ತಮ ಸ್ನೇಹಿತೆಯಾಗಿದ್ದರು. ಆದರೆ, ಕಳೆದ ಕೆಲವು ವಾರಗಳಿಂದ ರಕ್ಷಿತಾ ಶೆಟ್ಟಿ ಅವರೊಂದಿಗೆ ಸ್ಪಂದನಾ ಮುನಿಸಿಕೊಂಡಿದ್ದರು. ಇವರಿಬ್ಬರ ಜಗಳ ಚರ್ಚೆಗೆ ಕಾರಣವಾಗಿತ್ತು.
ವೇದಿಕೆಯ ಮೇಲೆ ಕಿಚ್ಚ ಸುದೀಪ್ ಎದುರು ನಿಂತ ಸ್ಪಂದನಾ ಭಾವುಕರಾದರು. ಮನೆಯಿಂದ ಹೊರಬಂದು ಕೆಲವೇ ನಿಮಿಷಗಳಾಗಿವೆ, ಆದರೆ ಈಗಲೇ ನನಗೆ ಬಿಗ್ ಬಾಸ್ ಮನೆಯ ನೆನಪು ಕಾಡುತ್ತಿದೆ ಎಂದು ಬೇಸರ ವ್ಯಕ್ತಪಡಿಸಿದರು. ಸುದೀಪ್ ಅವರು ಸ್ಪಂದನಾ ಅವರ ಆಟವನ್ನು ಮೆಚ್ಚಿ, ಅವರ ಮುಂದಿನ ಭವಿಷ್ಯಕ್ಕೆ ಶುಭ ಹಾರೈಸಿ ಬೀಳ್ಕೊಟ್ಟರು.
