ಜೊಮಾಟೊ-ಸ್ವಿಗ್ಗಿ ಬಿಗ್ ಪ್ಲಾನ್: ಪ್ರತಿಭಟನೆ ನಡುವೆಯೂ ಡೆಲಿವರಿ ಬಾಯ್ಸ್‌ಗೆ ಸಿಗಲಿದೆ ಬಂಪರ್ ಆಫರ್‌..!

ಬೆಂಗಳೂರು: ದೇಶಾದ್ಯಂತ ಗಿಗ್ ಮತ್ತು ಪ್ಲಾಟ್‌ಫಾರ್ಮ್ ಕಾರ್ಮಿಕರು ತಮ್ಮ ಹಕ್ಕುಗಳಿಗಾಗಿ ಪ್ರತಿಭಟನೆ ನಡೆಸುತ್ತಿರುವ ಬೆನ್ನಲೆ, ಸ್ವಿಗ್ಗಿ (Swiggy) ಮತ್ತು ಜೊಮಾಟೊ (Zomato) ಹೊಸ ವರ್ಷದ ಸಂಭ್ರಮಾಚರಣೆಯ ಸಮಯದಲ್ಲಿ ತನ್ನ ಕಾರ್ಯಾಚರಣೆಯನ್ನು ಸುಗಮಗೊಳಿಸಲು ಮುಂದಾಗಿವೆ. ವರ್ಷಾಂತ್ಯದ ದಿನಗಳಲ್ಲಿ ಆರ್ಡರ್‌ಗಳ ಸಂಖ್ಯೆ ಹೆಚ್ಚಾಗಿರುವುದರಿಂದ,  ವಿತರಣಾ ವಿಳಂಬವನ್ನು (delivery late) ತಪ್ಪಿಸಲು ಮತ್ತು ರೈಡರ್‌ಗಳ ಕೊರತೆಯನ್ನು ಕಡಿಮೆಗೊಳಿಸಲು ಎರಡೂ ಕಂಪನಿಗಳು ಭಾರಿ ಪ್ರೋತ್ಸಾಹಧನ ಘೋಷಿಸಿವೆ.

ಕಡಿಮೆ ವೇತನ, ದೀರ್ಘ ಕೆಲಸದ ಅವಧಿ, ಅಪಘಾತ ವಿಮೆಯ ಕೊರತೆ ಮತ್ತು ಸಾಮಾಜಿಕ ಭದ್ರತೆಯಂತಹ ಮೂಲಭೂತ ಸೌಕರ್ಯಗಳಿಗಾಗಿ ಕಾರ್ಮಿಕ ಸಂಘಟನೆಗಳು ಪ್ರತಿಭಟನೆಗೆ ಕರೆ ನೀಡಿವೆ. ಈ ಪ್ರತಿಭಟನೆಯು ಹೊಸ ವರ್ಷದ ಹಿಂದಿನ ದಿನದಿಂದ (New Year’s Eve) ಆಹಾರ ವಿತರಣಾ ವ್ಯವಸ್ಥೆಯ ಮೇಲೆ ಪರಿಣಾಮ ಬೀರಬಹುದು ಎಂಬ ಆತಂಕ ಕಂಪನಿಗಳಲ್ಲಿದೆ.

ಜೊಮಾಟೊ ನೀಡುತ್ತಿರುವ ಆಫರ್‌ಗಳೇನು ?

ಜೊಮಾಟೊ ತನ್ನ ವಿತರಣಾ ಪಾಲುದಾರರಿಗೆ ಸಂಜೆ 6 ರಿಂದ ಮಧ್ಯರಾತ್ರಿ 12 ರವರೆಗಿನ ‘ಪೀಕ್ ಅವರ್ಸ್’ನಲ್ಲಿ ವಿಶೇಷ ಪಾವತಿಗಳನ್ನು ಘೋಷಿಸಿದೆ.

• ಪ್ರತಿ ಆರ್ಡರ್‌ಗೆ ಹಣ: ಈ ಅವಧಿಯಲ್ಲಿ ಪ್ರತಿ ಆರ್ಡರ್‌ಗೆ ಸುಮಾರು 120 ರಿಂದ 150 ರೂಪಾಯಿಗಳವರೆಗೆ ಹಣ ನೀಡಲಾಗುತ್ತಿದೆ.

• ದೈನಂದಿನ ಗಳಿಕೆಯ ಭರವಸೆ: ಡೆಲಿವೆರಿ ಬಾಯ್‌ನ ಲಭ್ಯತೆ ಹಾಗೂ ಆತನ ಆರ್ಡರ್ ಸಂಖ್ಯೆಗೆ ಅನುಗುಣವಾಗಿ, ದಿನಕ್ಕೆ 3,000 ರೂಪಾಯಿಗಳ ಗಳಿಕೆಯ ಭರವಸೆಯನ್ನು ಕಂಪನಿ ನೀಡಿದೆ.

• ದಂಡ ಮನ್ನಾ: ಹಬ್ಬದ ಸಮಯದಲ್ಲಿ ಆರ್ಡರ್ ನಿರಾಕರಣೆ ಅಥವಾ ರದ್ದತಿ ಮಾಡಿದರೆ ವಿಧಿಸಲಾಗುತ್ತಿದ್ದ ದಂಡವನ್ನು ತಾತ್ಕಾಲಿಕವಾಗಿ ಮನ್ನಾ ಮಾಡಲಾಗಿದೆ. ಇದು ರೈಡರ್‌ಗಳಿಗೆ ಯಾವುದೇ ಆತಂಕವಿಲ್ಲದೆ ಕೆಲಸ ಮಾಡಲು ನೆರವಾಗಲಿದೆ.

ಸ್ವಿಗ್ಗಿ ತನ್ನ ರೈಡರ್‌ಗಳನ್ನು ಸೆಳೆಯಲು ಡಿಸೆಂಬರ್ 31 ಮತ್ತು ಜನವರಿ 1 ರ ಅವಧಿಯಲ್ಲಿ ವಿತರಣಾ ಕಾರ್ಮಿಕರಿಗೆ ಒಟ್ಟು 10,000 ರೂಪಾಯಿಗಳವರೆಗೆ ಗಳಿಸುವ ಅವಕಾಶವನ್ನು ಕಲ್ಪಿಸಿದೆ.

ಹೊಸ ವರ್ಷದ ಹಿಂದಿನ ದಿನವಾದ ಇಂದಿನ ಸಂಜೆ 6 ರಿಂದ ಬೆಳಿಗ್ಗೆ 12 ರವರೆಗೆ ಗರಿಷ್ಠ ಮಟ್ಟದ ಪ್ರೋತ್ಸಾಹಧನವನ್ನು ನೀಡುವುದಾಗಿ ಕಂಪನಿ ತಿಳಿಸಿದೆ. ಜನರು ಮನೆಯಲ್ಲೇ ಇದ್ದು ಆಹಾರ ಆರ್ಡರ್ ಮಾಡುವ ಸಾಧ್ಯತೆ ಹೆಚ್ಚಿರುವುದರಿಂದ, ತಡರಾತ್ರಿಯವರೆಗೆ ಲಭ್ಯವಿರುವ ಡೆಲಿವೆರಯ ಬಾಯ್‌ಗಳಿಗೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತಿದೆ.

ಕಂಪನಿಗಳು ನೀಡುತ್ತಿರುವ ಈ ತಾತ್ಕಾಲಿಕ ಪ್ರೋತ್ಸಾಹಧನಗಳು ಕೇವಲ ಕಣ್ಣೊರೆಸುವ ತಂತ್ರ ಎಂದು ಕಾರ್ಮಿಕ ಸಂಘಟನೆಗಳು ಟೀಕಿಸಿವೆ. ನಮಗೆ ಬೇಕಿರುವುದು ಕೇವಲ ಎರಡು ದಿನದ ಬೋನಸ್ ಅಲ್ಲ, ಬದಲಿಗೆ ಕನಿಷ್ಠ ವೇತನದ ಗ್ಯಾರಂಟಿ ಮತ್ತು ಕೆಲಸದ ಅವಧಿಯಲ್ಲಿ ಸುರಕ್ಷತೆ ಎಂದು ಪ್ರತಿಭಟನಾ ನಿರತ ಕಾರ್ಮಿಕರು ಒತ್ತಾಯಿಸುತ್ತಿದ್ದಾರೆ.

ಹೊಸ ವರ್ಷದ ಆರಂಭವಾಗಿರುವುದರಿಂದ ಇಂದು ಆರ್ಡರ್‌ಗಳ ಸುರಿಮಳೆಯ ಇರುತ್ತದೆ, ಈ ಪ್ರೋತ್ಸಾಹಧನಗಳು  ರೈಡರ್‌ಗಳನ್ನು(ಡೆಲಿವೆರಿಯ ಬಾಯ್ಸ್‌) ರಸ್ತೆಗೆ ಇಳಿಸುವಲ್ಲಿ ಯಶಸ್ವಿಯಾಗುತ್ತವೆಯೇ ಅಥವಾ ಕಾರ್ಮಿಕರ ಪ್ರತಿಭಟನೆ ಆಹಾರ ಪ್ರಿಯರ ಸಂಭ್ರಮಕ್ಕೆ ಅಡ್ಡಿಯಾಗಲಿದೆಯೇ ಎಂಬುದನ್ನ ಕಾಡುನೋಡಬೇಕಿದೆ.