ಚಳಿಗಾಲದಲ್ಲಿ ಆಯಾಸ, ಸ್ನಾಯು ನೋವುಗಳಿಗೆ ಈ ಕೊರತೆಯೇ ಪ್ರಮುಖ ಕಾರಣ!

ಚಳಿಗಾಲ (Winter) ಆರಂಭವಾಗುತ್ತಿದ್ದಂತೆ ಹಲವರಿಗೆ ಅಸಹಜ ಆಯಾಸ, ಆಲಸ್ಯ, ಸೋಮಾರಿತನ ಮತ್ತು ದೇಹದಲ್ಲಿ ಶಕ್ತಿ ಕಡಿಮೆಯಾದ ಅನುಭವವಾಗುತ್ತದೆ. ಇದನ್ನು ಸಾಮಾನ್ಯವಾಗಿ ಹವಾಮಾನ ಬದಲಾವಣೆಯ ಪರಿಣಾಮ ಎಂದು ನಿರ್ಲಕ್ಷ್ಯ ಮಾಡಲಾಗುತ್ತದೆ. ಆದರೆ ಆರೋಗ್ಯ ತಜ್ಞರ ಪ್ರಕಾರ, ಚಳಿಗಾಲದಲ್ಲಿ ಈ ರೀತಿಯ ಸಮಸ್ಯೆಗಳು ಹೆಚ್ಚಾಗಲು ಪ್ರಮುಖ ಕಾರಣ ವಿಟಮಿನ್ ಡಿ ಕೊರತೆ ಆಗಿರಬಹುದು.

ವಿಟಮಿನ್ ಡಿ ದೇಹಕ್ಕೆ ಅತ್ಯಂತ ಅಗತ್ಯವಾದ ಪೌಷ್ಟಿಕಾಂಶಗಳಲ್ಲಿ ಒಂದು. ಇದು ಮೂಳೆಗಳನ್ನು ಗಟ್ಟಿಯಾಗಿಡಲು, ಕ್ಯಾಲ್ಸಿಯಂ ಶೋಷಣೆಗೆ ಸಹಾಯ ಮಾಡಲು ಮತ್ತು ರೋಗನಿರೋಧಕ ಶಕ್ತಿಯನ್ನು ಬಲಪಡಿಸಲು ಬಹುಮುಖ್ಯ ಪಾತ್ರ ವಹಿಸುತ್ತದೆ. ಅಷ್ಟೇ ಅಲ್ಲ, ದೇಹದ ಶಕ್ತಿ ಮಟ್ಟವನ್ನು ಕಾಪಾಡಿಕೊಳ್ಳಲು ಹಾಗೂ ಮನಸ್ಸಿನ ಆರೋಗ್ಯವನ್ನು ಉತ್ತಮವಾಗಿಡಲು ಸಹ ವಿಟಮಿನ್ ಡಿ ಅಗತ್ಯ.

ಚಳಿಗಾಲದಲ್ಲಿ ವಿಟಮಿನ್ ಡಿ ಕೊರತೆ ಏಕೆ ಹೆಚ್ಚಾಗುತ್ತದೆ?

ವಿಟಮಿನ್ ಡಿ ಯ ಪ್ರಮುಖ ಮೂಲ ಸೂರ್ಯನ ಬೆಳಕು. ಸಾಮಾನ್ಯವಾಗಿ ಚರ್ಮಕ್ಕೆ ನೇರವಾಗಿ ಸೂರ್ಯನ ಬೆಳಕು ಬೀಳುವಾಗ ದೇಹವೇ ವಿಟಮಿನ್ ಡಿ ಉತ್ಪಾದಿಸುತ್ತದೆ. ಆದರೆ ಚಳಿಗಾಲದಲ್ಲಿ ಸೂರ್ಯೋದಯ ತಡವಾಗಿ ಆಗುವುದು, ಸೂರ್ಯನ ತೀವ್ರತೆ ಕಡಿಮೆಯಾಗಿರುವುದು ಮತ್ತು ಶೀತ ವಾತಾವರಣದಿಂದಾಗಿ ಹೆಚ್ಚಿನವರು ಮನೆಯೊಳಗೇ ಹೆಚ್ಚು ಸಮಯ ಕಳೆಯುತ್ತಾರೆ. ಇದರಿಂದ ದೇಹಕ್ಕೆ ಬೇಕಾದಷ್ಟು ಸೂರ್ಯನ ಬೆಳಕು ಸಿಗುವುದಿಲ್ಲ.

ಹೆಚ್ಚುವರಿಯಾಗಿ, ಚಳಿಗಾಲದಲ್ಲಿ ದಪ್ಪ ಬಟ್ಟೆಗಳನ್ನು ಧರಿಸುವುದು, ಮಾಲಿನ್ಯ, ಮೋಡ ಮುಸುಕಿದ ವಾತಾವರಣ ಇವೆಲ್ಲವೂ ಸೂರ್ಯನ ಕಿರಣಗಳು ಚರ್ಮವನ್ನು ತಲುಪುವುದನ್ನು ತಡೆಯುತ್ತವೆ. ವಯಸ್ಸು ಹೆಚ್ಚಾಗುವುದು, ಅತಿಯಾದ ತೂಕ (ಬೊಜ್ಜು), ಪೌಷ್ಟಿಕ ಆಹಾರದ ಕೊರತೆ ಮತ್ತು ಕೆಲವು ಆರೋಗ್ಯ ಸಮಸ್ಯೆಗಳು ಕೂಡ ವಿಟಮಿನ್ ಡಿ ಮಟ್ಟವನ್ನು ಇಳಿಸುವ ಪ್ರಮುಖ ಕಾರಣಗಳಾಗಿವೆ.

ವಿಟಮಿನ್ ಡಿ ಕೊರತೆಯ ಲಕ್ಷಣಗಳು

ಚಳಿಗಾಲದಲ್ಲಿ ವಿಟಮಿನ್ ಡಿ ಕೊರತೆಯಾದಾಗ ದೇಹ ಹಲವು ರೀತಿಯ ಎಚ್ಚರಿಕೆ ಸಂಕೇತಗಳನ್ನು ನೀಡುತ್ತದೆ. ನಿರಂತರ ಆಯಾಸ, ಸ್ನಾಯು ನೋವು, ದೇಹದಲ್ಲಿ ಶಕ್ತಿ ಇಲ್ಲದಂತಾಗುವುದು, ಆಲಸ್ಯ, ಮೂಳೆಗಳು ದುರ್ಬಲವಾಗುವುದು ಪ್ರಮುಖ ಲಕ್ಷಣಗಳು ಕಾಣಿಸಬಹುದು. ಕೆಲವರಿಗೆ ಆಗಾಗ ಶೀತ, ಕೆಮ್ಮು, ಸೋಂಕುಗಳು ಕಾಣಿಸಿಕೊಳ್ಳುತ್ತವೆ. ಇದಲ್ಲದೆ ಕೂದಲು ಉದುರುವಿಕೆ, ಮನಸ್ಥಿತಿಯಲ್ಲಿ ಬದಲಾವಣೆ, ಕೋಪ ಅಥವಾ ಮನೋನೊಂದು ಹೆಚ್ಚಾಗುವುದು ಕೂಡ ವಿಟಮಿನ್ ಡಿ ಕೊರತೆಯ ಸೂಚಕವಾಗಿರಬಹುದು.

ಮಕ್ಕಳು ಮತ್ತು ವೃದ್ಧರಲ್ಲಿ ಈ ಕೊರತೆ ಇದ್ದರೆ ಮೂಳೆ ಸಂಬಂಧಿತ ಸಮಸ್ಯೆಗಳು ಮತ್ತು ರೋಗನಿರೋಧಕ ಶಕ್ತಿ ಕುಗ್ಗುವ ಸಾಧ್ಯತೆ ಹೆಚ್ಚು.

ಚಳಿಗಾಲದ ಆಲಸ್ಯವನ್ನು ತಡೆಯುವುದು ಹೇಗೆ?

ಚಳಿಗಾಲದಲ್ಲಿ ವಿಟಮಿನ್ ಡಿ ಕೊರತೆಯನ್ನು ತಡೆಯುವುದು ಕಷ್ಟವಲ್ಲ. ಪ್ರತಿದಿನ ಬೆಳಿಗ್ಗೆ ಅಥವಾ ಮಧ್ಯಾಹ್ನ 15 ರಿಂದ 20 ನಿಮಿಷ ಸೂರ್ಯನ ಬೆಳಕಿನಲ್ಲಿ ಕುಳಿತುಕೊಳ್ಳುವುದು ಅತ್ಯಂತ ಪರಿಣಾಮಕಾರಿ ವಿಧಾನ. ಕೈಗಳು, ಮುಖ ಮತ್ತು ಕಾಲುಗಳಿಗೆ ಸೂರ್ಯನ ಬೆಳಕು ತಾಗುವಂತೆ ನೋಡಿಕೊಳ್ಳಬೇಕು.

ಆಹಾರದಲ್ಲೂ ವಿಟಮಿನ್ ಡಿ ಇರುವ ಪದಾರ್ಥಗಳನ್ನು ಸೇರಿಸಿಕೊಳ್ಳುವುದು ಮುಖ್ಯ. ಹಾಲು, ಮೊಸರು, ಚೀಸ್, ಮೊಟ್ಟೆ, ಅಣಬೆಗಳು ಮತ್ತು ವಿಟಮಿನ್ ಡಿ ಬಲವರ್ಧಿತ ಆಹಾರಗಳನ್ನು ಸೇವಿಸುವುದು ಸಹಕಾರಿ. ಅಗತ್ಯವಿದ್ದರೆ ವೈದ್ಯರ ಸಲಹೆಯಂತೆ ವಿಟಮಿನ್ ಡಿ ಪೂರಕಗಳನ್ನು ತೆಗೆದುಕೊಳ್ಳಬಹುದು.

ಇದಕ್ಕೆ ಜೊತೆಗೆ ನಿಯಮಿತ ಲಘು ವ್ಯಾಯಾಮ, ನಡಿಗೆ, ಯೋಗ ಮಾಡುವುದರಿಂದ ದೇಹ ಚುರುಕಾಗಿರುತ್ತದೆ. ತೂಕವನ್ನು ನಿಯಂತ್ರಣದಲ್ಲಿ ಇಟ್ಟುಕೊಳ್ಳುವುದು ಕೂಡ ವಿಟಮಿನ್ ಡಿ ಮಟ್ಟವನ್ನು ಸಮತೋಲನದಲ್ಲಿಡಲು ಸಹಾಯ ಮಾಡುತ್ತದೆ. ವಿಶೇಷವಾಗಿ ಮಕ್ಕಳು ಮತ್ತು ವೃದ್ಧರು ಸೂರ್ಯನ ಬೆಳಕಿಗೆ ಒಡ್ಡಿಕೊಳ್ಳುವಂತೆ ನೋಡಿಕೊಳ್ಳುವುದು ಅತ್ಯಂತ ಅಗತ್ಯ.