ಬೆಂಗಳೂರಿನಲ್ಲಿ 2026ರ ನ್ಯೂ ಇಯರ್‌ ಪಾರ್ಟಿಗೆ ಇರಲ್ಲ ಪಟಾಕಿ ಸೌಂಡ್..!

ಹೊಸ ವರ್ಷ 2026ರ ಸ್ವಾಗತಕ್ಕೆ ಕೇವಲ 14 ದಿನ ಬಾಕಿ ಇರುವಂತೆಯೇ, ಬೆಂಗಳೂರು ನಗರ ಪೊಲೀಸ್ ಇಲಾಖೆ ಡಿಸೆಂಬರ್ 31ರ ರಾತ್ರಿ ನಡೆಯುವ ಎಲ್ಲಾ ನ್ಯೂ ಇಯರ್ ಕಾರ್ಯಕ್ರಮಗಳಿಗೆ 19 ಅಂಶಗಳ ಕಟ್ಟುನಿಟ್ಟಿನ ಮಾರ್ಗಸೂಚಿಯನ್ನು ಬಿಡುಗಡೆ ಮಾಡಿದೆ. ಗೋವಾದಲ್ಲಿ ನಡೆದ ಭಯಾನಕ ಪಬ್ ದುರ್ಘಟನೆಯ ಹಿನ್ನೆಲೆಯಲ್ಲಿ ಈ ಬಾರಿ ಪಟಾಕಿ ಸಂಪೂರ್ಣ ನಿಷೇಧ, ಮದ್ಯ ಸರಬರಾಜು ನಿಯಂತ್ರಣ, ಭದ್ರತೆ ಮತ್ತು ಶಬ್ದ ಮಿತಿ ಸೇರಿದಂತೆ ಅನೇಕ ಕಟ್ಟುನಿಟ್ಟಿನ ನಿಯಮಗಳನ್ನು ಜಾರಿಗೆ ತರಲಾಗಿದೆ.

ಪೊಲೀಸರ ಪ್ರಮುಖ 19 ಮಾರ್ಗಸೂಚಿಗಳು (ಸಂಕ್ಷಿಪ್ತ ರೂಪ):

1. ಕಾರ್ಯಕ್ರಮಕ್ಕೆ ಸಂಬಂಧಿತ ಎಲ್ಲಾ ಇಲಾಖೆಗಳಿಂದ ಅನುಮತಿ ಕಡ್ಡಾಯ.
2. ನಿಗದಿತ ಸಮಯಕ್ಕಿಂತ ಮೀರಿ ಪಾರ್ಟಿ ನಡೆಸಲು ಬಿಡುವುದಿಲ್ಲ.
3. ಧ್ವನಿ ವರ್ಧಕಕ್ಕೆ ಪರವಾನಿಗಿ ಮತ್ತು  ಶಬ್ದ ಮಿತಿ ಕಡ್ಡಾಯ.
4. ಸ್ಥಳದ ಸಾಮರ್ಥ್ಯಕ್ಕಿಂತ ಹೆಚ್ಚು ಟಿಕೆಟ್ ಮಾರಾಟ ನಿಷೇಧ .  ನೆಲಮಹಡಿ, ಟೆರೇಸ್, ಪಾರ್ಕಿಂಗ್‌ನಲ್ಲಿ ಪಾರ್ಟಿ ಮಾಡುವಂತಿಲ್ಲ.
5. ಬಾಹ್ಯ ಸ್ಕ್ರೀನ್‌ಗಳಲ್ಲಿ ಲೈವ್ ಸ್ಟ್ರೀಮಿಂಗ್ ಸಂಪೂರ್ಣ ನಿಷೇಧ.
6. ಎಲ್ಲಾ ಅತಿಥಿಗಳ ತಪಾಸಣೆ ಕಡ್ಡಾಯ.  ಸಂಶಯಾಸ್ಪದ ವ್ಯಕ್ತಿ/ವಸ್ತು ಕಂಡರೆ ತಕ್ಷಣ ಪೊಲೀಸರಿಗೆ ಮಾಹಿತಿ ನೀಡಬೇಕು.
7. ಅಗ್ನಿಶಾಮಕ ಯಂತ್ರಗಳು ಮತ್ತು ದೊಡ್ಡ ನಿರ್ಗಮನ ಬಾಗಿಲುಗಳು ಕಡ್ಡಾಯ.
8. ಸಿಸಿಟಿವಿ ಕ್ಯಾಮೆರಾ ಮತ್ತು 30 ದಿನಗಳ ಸ್ಟೋರೇಜ್ ಕಡ್ಡಾಯ.
9. ಮಾದಕ ವಸ್ತು ಕಂಡುಬಂದರೆ ತಕ್ಷಣ ಪೊಲೀಸ್‌ಗೆ ಮಾಹಿತಿ ನೀಡಬೇಕು. ದಾಳಿಯಲ್ಲಿ ಸಿಕ್ಕಿಬಿದ್ದರೆ ಮಾಲೀಕ/ಮ್ಯಾನೇಜರ್ ಮೇಲೆ ಕೇಸ್‌ ದಾಖಲಾಗಬಹುದು.
10. ಸಾರ್ವಜನಿಕ ವಾಹನಗಳಿಗೆ ಸ್ವಂತ ಪಾರ್ಕಿಂಗ್ ವ್ಯವಸ್ಥೆ ಕಡ್ಡಾಯ.
11. ಸೆಲೆಬ್ರಿಟಿ/ಡಿಜೆ/ನಟ-ನಟಿಯರ ಮಾಹಿತಿ ಸ್ಥಳೀಯ ಠಾಣೆಗೆ ಕಡ್ಡಾಯ.
12. ಮಹಿಳಾ ಸಿಬ್ಬಂದಿ ಮತ್ತು ಪಾರ್ಕಿಂಗ್ ಬಳಿ ಹೆಚ್ಚು ಮಹಿಳಾ ಸೆಕ್ಯೂರಿಟಿ ಕಡ್ಡಾಯ.
13. ಬೌನ್ಸರ್ ಏಜೆನ್ಸಿ PSARA ನೋಂದಣಿ ಕಡ್ಡಾಯ.
14. ಎಲ್ಲಾ ಸ್ಟಾಫ್‌ಗೆ ಐಡಿ ಕಾರ್ಡ್ ಕಡ್ಡಾಯ.
15. ಲೈಸೆನ್ಸ್ ಇಲ್ಲದ ಔಟ್‌ಡೋರ್ ಸ್ಥಳಗಳಲ್ಲಿ ಮದ್ಯ ಸರಬರಾಜು ನಿಷೇಧ.
16. ಹೋಟೆಲ್ ರೂಮ್‌ಗಳಲ್ಲಿ ಖಾಸಗಿ ಗುಂಪು ಪಾರ್ಟಿ ನಿಷೇಧ.
17. ಗಲಾಟೆ ಆದರೆ ತಕ್ಷಣ ಪೊಲೀಸರಿಗೆ ಕರೆ ಮಾಡಿ.
18. ಪಟಾಕಿ ಸಿಡಿಸುವುದು ಸಂಪೂರ್ಣ ನಿಷೇಧ.
19. ಯಾವುದೇ ಅಹಿತಕರ ಘಟನೆ ನಡೆಯದಂತೆ ಸಂಪೂರ್ಣ ಜವಾಬ್ದಾರಿ ಆಯೋಜಕರ ಮೇಲೆ ಇರುತ್ತದೆ.

ಮಾರ್ಗಸೂಚಿ ಉಲ್ಲಂಘನೆಯಾದರೆ ಕಠಿಣ ಕಾನೂನು ಕ್ರಮ: ಮಾರ್ಗಸೂಚಿ ಉಲ್ಲಂಘಿಸಿದರೆ ಕಾರ್ಯಕ್ರಮ ರದ್ದು, ಲೈಸೆನ್ಸ್ ರದ್ದು, ದಂಡ ಮತ್ತು ಕ್ರಿಮಿನಲ್ ಕೇಸ್ ಸೇರಿದಂತೆ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ಬೆಂಗಳೂರು ಪೊಲೀಸ್ ಆಯುಕ್ತರು ಎಚ್ಚರಿಕೆ ನೀಡಿದ್ದಾರೆ.

ನೀವು ನ್ಯೂ ಇಯರ್ ಪಾರ್ಟಿ ಆಯೋಜಿಸುತ್ತಿದ್ದರೆ ಈ 19 ನಿಯಮಗಳನ್ನು ಕಡ್ಡಾಯವಾಗಿ ಪಾಲಿಸಿ ಸುರಕ್ಷಿತವಾಗಿ ಸಂಭ್ರಮಿಸಿ.