ಹಾಂಗ್ಕಾಂಗ್, ನವೆಂಬರ್ 28: ಹಾಂಗ್ಕಾಂಗ್ನ ತೈಪೋ ಪ್ರದೇಶದಲ್ಲಿನ ದೊಡ್ಡ ವಸತಿ ಸಂಕೀರ್ಣದಲ್ಲಿ ಬುಧವಾರ ಸಂಭವಿಸಿದ ಭೀಕರ ಬೆಂಕಿ ದುರಂತದಲ್ಲಿ ಮೃತಪಟ್ಟವರ ಸಂಖ್ಯೆ ಶುಕ್ರವಾರ 130 ದಾಟಿದೆ. ಮೂರು ದಿನಗಳ ನಿರಂತರ ಶೋಧ ಮತ್ತು ರಕ್ಷಣಾ ಕಾರ್ಯಾಚರಣೆಯ ನಂತರ ಸರ್ಕಾರ ಅಧಿಕೃತವಾಗಿ ಈ ಕಾರ್ಯವನ್ನು ಮುಕ್ತಾಯಗೊಳಿಸಿದೆ ಎಂದು ಘೋಷಿಸಿದೆ. ಆದರೆ ಸುಮಾರು 200 ಜನರು ಇನ್ನೂ ಕಾಣೆಯಾಗಿದ್ದು, ಮೃತರ ಸಂಖ್ಯೆ ಮತ್ತಷ್ಟು ಏರುವ ಸಾಧ್ಯತೆಯಿದೆ ಎಂದು ಅಧಿಕಾರಿಗಳು ಆತಂಕ ವ್ಯಕ್ತಪಡಿಸಿದ್ದಾರೆ.
ಈ ದುರಂತ ನಡೆದಿದ್ದು “ಹಾಂಗ್ಕಾಂಗ್ ಟವರ್” ಎಂಬ ಖ್ಯಾತ ವಸತಿ ಕಟ್ಟಡದಲ್ಲಿ ಸಂಭವಿಸಿದೆ. ಒಟ್ಟು 8 ಬ್ಲಾಕ್ಗಳನ್ನೊಳಗೊಂಡ ಈ ಕಟ್ಟಡದಲ್ಲಿ ಸುಮಾರು 2,000 ಫ್ಲ್ಯಾಟ್ಗಳಿದ್ದು, 4,800ಕ್ಕೂ ಹೆಚ್ಚು ನಿವಾಸಿಗಳು ವಾಸಿಸುತ್ತಿದ್ದರು. ಬುಧವಾರ ಮಧ್ಯಾಹ್ನದ ನಂತರ ಆರಂಭವಾದ ಬೆಂಕಿ ಕೆಲವೇ ನಿಮಿಷಗಳಲ್ಲಿ ಭೀಕರ ರೂಪ ಪಡೆಯಿತು.
ಅಗ್ನಿಶಾಮಕ ದಳ ಈ ಬೆಂಕಿಗೆ ನಾಲ್ಕನೇ ತೀವ್ರತೆಯ ಅಲಾರಂ ಘೋಷಿಸಿ, ಸಾವಿರಾರು ಸಿಬ್ಬಂದಿಯನ್ನು ಕ್ಷೇತ್ರಕ್ಕೆ ಇಳಿಸಿತು. ಲ್ಯಾಡರ್ ಟ್ರಕ್ಗಳ ಮೂಲಕ ಮೇಲಿನ ಮಹಡಿಗಳ ಮೇಲೆ ನೀರು ಹಾಕಲಾಯಿತು. ಸುಮಾರು 700 ನಿವಾಸಿಗಳನ್ನು ಸುರಕ್ಷಿತವಾಗಿ ಹೊರತಂದು ತಾತ್ಕಾಲಿಕ ಆಶ್ರಯ ಕೇಂದ್ರಗಳಿಗೆ ಸ್ಥಳಾಂತರಿಸಲಾಯಿತು. ಆದರೆ ಹಲವು ಮಹಡಿಗಳು ಸಂಪೂರ್ಣ ಧ್ವಂಸವಾಗಿದ್ದರಿಂದ ಒಳಗೆ ಸಿಲುಕಿದ್ದವರನ್ನು ತಲುಪುವುದೇ ಕಷ್ಟವಾಯಿತು. ಶುಕ್ರವಾರದವರೆಗೂ ಶೋಧ ಕಾರ್ಯ ಮುಂದುವರಿದಿದೆ.
ಹಾಂಗ್ ಕಾಂಗ್ನಲ್ಲಿ ಭೀಕರ ಅಗ್ನಿ ಅವಘಡ: ಸಾವಿನ ಸಂಖ್ಯೆ 44 ಏರಿಕೆ, 300 ಜನ ನಾಪತ್ತೆ
ಹಾಂಗ್ಕಾಂಗ್, ನವೆಂಬರ್ 27: ಹಾಂಗ್ ಕಾಂಗ್ನ ಉತ್ತರ ಭಾಗದಲ್ಲಿರುವ ತೈ ಪೊ (Tai Po) ಜಿಲ್ಲೆಯಲ್ಲಿ ಬುಧವಾರ ಸಂಭವಿಸಿದ ಭೀಕರ ಅಗ್ನಿ ಅವಘಡವು ನಗರವನ್ನೇ ನಡುಗಿಸಿದೆ. ಬಹುಮಹಡಿ ಕಟ್ಟಡದಲ್ಲಿ ಉಂಟಾದ ಭಾರಿ ಬೆಂಕಿಯಿಂದಾಗಿ ಈಗಾಗಲೇ 44 ಮಂದಿ ಸಜೀವ ದಹನಗೊಂಡಿದ್ದು, 300 ಮಂದಿ ಇನ್ನೂ ಪತ್ತೆಯಾಗಿಲ್ಲ. ಈ ಘಟನೆ ಬಗ್ಗೆ ನಗರ ನಾಯಕ ಜಾನ್ ಲೀ ಮಾಹಿತಿ ಹಂಚಿಕೊಂಡಿದ್ದು, ಘಟನೆ ದಶಕಗಳಿಂದಲೂ ಹಾಂಗ್ ಕಾಂಗ್ ಕಂಡ ಅತ್ಯಂತ ಮಾರಕ ಅಗ್ನಿ ಅವಘಡಗಳಲ್ಲಿ ಒಂದಾಗಿ ಪರಿಣಮಿಸಿದೆ ಎಂದು ಹೇಳಿದ್ದಾರೆ.
“ಈ ಬೆಂಕಿಯಲ್ಲಿ 44 ಜನರು ದುರ್ಮರಣ ಹೊಂದಿದ್ದಾರೆ. ಸುಮಾರು 300ಕ್ಕೂ ಹೆಚ್ಚು ಜನರು ಇನ್ನೂ ನಾಪತ್ತೆಯಾಗಿದ್ದಾರೆ. 29 ಜನರನ್ನು ಗಾಯಾಳುಗಳಾಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಅವರಲ್ಲಿ ಏಳು ಜನರ ಸ್ಥಿತಿ ಅತ್ಯಂತ ಗಂಭೀರವಾಗಿದೆ” ಎಂದು ಜಾನ್ ಲೀ ಬುಧವಾರ ದುಃಖ ವ್ಯಕ್ತಪಡಿಸಿದರು.
ಬುಧವಾರ ಮಧ್ಯಾಹ್ನ ಸುಮಾರು12:30ರ ಸಮಯದಲ್ಲಿ ಪ್ರಾರಂಭವಾದ ಬೆಂಕಿ ತಡರಾತ್ರಿಯವರೆಗೂ ಸಂಪೂರ್ಣವಾಗಿ ನಿಯಂತ್ರಣಕ್ಕೆ ಬರಲಿಲ್ಲ. 40ಮಹಡಿಗಳಿಗಿಂತ ಹೆಚ್ಚು ಎತ್ತರವಿರುವ ಈ ವಸತಿ ಕಟ್ಟಡದಲ್ಲಿ ಸಾವಿರಾರು ಕುಟುಂಬಗಳು ವಾಸಿಸುತ್ತಿದ್ದವು. ಬೆಂಕಿಯಲ್ಲಿ ಕಟ್ಟಡದ ಹಲವು ಮಹಡಿಗಳು ಪೂರ್ತಿಯಾಗಿ ಕುಸಿದು ಬಿದ್ದಿವೆ. ಇದರಿಂದ ರಕ್ಷಣಾ ಕಾರ್ಯಾಚರಣೆ ಇನ್ನಷ್ಟು ಕಠಿಣವಾಗಿದೆ.
ಅಗ್ನಿಶಾಮಕ ದಳದ 200ಕ್ಕೂ ಹೆಚ್ಚು ಸಿಬ್ಬಂದಿ, 50ಕ್ಕೂ ಹೆಚ್ಚು ಅಗ್ನಿಶಾಮಕ ವಾಹನಗಳು ಮತ್ತು ಹೆಲಿಕಾಪ್ಟರ್ಗಳ ಸಹಾಯದಿಂದ ರಾತ್ರಿಯಿಡೀ ರಕ್ಷಣಾ ಕಾರ್ಯ ನಡೆಸಲಾಗುತ್ತಿದೆ. ಆದರೆ ಕಟ್ಟಡದ ಒಳಗೆ ಇನ್ನೂ ಹಲವು ಜನರು ಸಿಲುಕಿರುವ ಸಾಧ್ಯತೆ ಇರುವುದರಿಂದ ಮೃತರ ಸಂಖ್ಯೆ ಮತ್ತಷ್ಟು ಹೆಚ್ಚಾಗಬಹುದು ಎಂಬ ಆತಂಕ ವ್ಯಕ್ತವಾಗಿದೆ.
