ನವದೆಹಲಿ: ದೇಶದ ರಾಜಧಾನಿಯಲ್ಲಿ ಚೂಡಿದಾರ್ ಧರಿಸಿದ್ದ ಒಂದು ದಂಪತಿಗೆ ರೆಸ್ಟೋರೆಂಟ್ ಪ್ರವೇಶವನ್ನು ನಿರಾಕರಿಸಿದ ಘಟನೆ ಭಾರೀ ವಿವಾದಕ್ಕೆ ಕಾರಣವಾಗಿದೆ. ದೆಹಲಿಯ ಪಿತಂಪುರದ ಟುಬಾಟ್ ಬಾರ್ ಆಯಂಡ್ ರೆಸ್ಟೋರೆಂಟ್‌ನಲ್ಲಿ ಆಗಸ್ಟ್ 3ರಂದು ಈ ಘಟನೆ ನಡೆದಿದ್ದು, ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿ, ಸಾರ್ವಜನಿಕರಿಂದ ತೀವ್ರ ಟೀಕೆಗಳಿಗೆ ಗುರಿಯಾಗಿದೆ.
ವಿಡಿಯೋದಲ್ಲಿ, ಪುರುಷ ಟೀ-ಶರ್ಟ್ ಮತ್ತು ಪ್ಯಾಂಟ್ ಧರಿಸಿದ್ದರೆ, ಮಹಿಳೆ ಸಲ್ಮಾರ್-ಕಮೀಜ್ ಧರಿಸಿದ್ದಾರೆ. ರೆಸ್ಟೋರೆಂಟ್ ಸಿಬ್ಬಂದಿಯನ್ನು ಪ್ರಶ್ನಿಸುವ ವ್ಯಕ್ತಿಯೊಬ್ಬರು, “ಪಾಶ್ಚಿಮಾತ್ಯ ಉಡುಗೆ ಧರಿಸಿದವರಿಗೆ ಪ್ರವೇಶವಿದೆ, ಆದರೆ ಭಾರತೀಯ ಉಡುಗೆಗೆ ಏಕೆ ನಿಷೇಧ?” ಎಂದು ಕೇಳಿದ್ದಾರೆ. “ಚೂಡಿದಾರ್ ಕೆಟ್ಟದ್ದೇ?” ಎಂದು ಆಕ್ರೋಶದಿಂದ ಪ್ರಶ್ನಿಸಿದ್ದಾರೆ. ಇದೇ ರೀತಿ, “ಶಾರ್ಟ್ಸ್ ಧರಿಸಿದವರಿಗೆ ಪ್ರವೇಶವಿದೆ, ಆದರೆ ಸಾಂಪ್ರದಾಯಿಕ ಉಡುಗೆಗೆ ಏಕೆ ನಿರಾಕರಣೆ?” ಎಂದು ಕೇಳಿದ್ದಾರೆ.
ಸಾಮಾಜಿಕ ಜಾಲತಾಣದಲ್ಲಿ ಆಕ್ರೋಶ
ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆದ ನಂತರ, ನೆಟ್ಟಿಗರು ರೆಸ್ಟೋರೆಂಟ್‌ನ ಈ ನಿಲುವಿನ ವಿರುದ್ಧ ತೀವ್ರ ಟೀಕೆ ವ್ಯಕ್ತಪಡಿಸಿದ್ದಾರೆ. ಕೆಲವರು, “ಭಾರತೀಯ ಉಡುಗೆಯನ್ನು ಅವಮಾನಿಸುವ ಈ ಧೋರಣೆ ಸರಿಯಲ್ಲ. ನಮ್ಮ ಸಂಸ್ಕೃತಿಯನ್ನು ಗೌರವಿಸಬೇಕು,” ಎಂದು ಹೇಳಿದ್ದಾರೆ. ಇನ್ನೊಬ್ಬರು, “ರಾಷ್ಟ್ರಪತಿಯೇ ಸೀರೆ ಧರಿಸಿ ಬಂದರೆ, ಅವರಿಗೂ ಪ್ರವೇಶ ನಿರಾಕರಿಸುತ್ತೀರಾ?” ಎಂದು ಕಿಡಿಕಾರಿದ್ದಾರೆ.
See what is happening in Delhi restaurant Tubata in Pitampura. A couple was denied entry and not allowed to enter just because they were wearing Indian attire! pic.twitter.com/xCw5bFw0Zb
— Rosy (@rose_k01) August 8, 2025
ರೆಸ್ಟೋರೆಂಟ್‌ನ ಡ್ರೆಸ್ ಕೋಡ್
ರೆಸ್ಟೋರೆಂಟ್‌ನ ಡ್ರೆಸ್ ಕೋಡ್ ನಿಯಮವು ಈ ಘಟನೆಗೆ ಕಾರಣವಿರಬಹುದು ಎಂದು ಊಹಿಸಲಾಗಿದೆ. ಕೆಲವು ರೆಸ್ಟೋರೆಂಟ್‌ಗಳು ಮತ್ತು ಕ್ಲಬ್‌ಗಳು “ಸ್ಮಾರ್ಟ್ ಕ್ಯಾಶುವಲ್” ಅಥವಾ “ಪಾಶ್ಚಿಮಾತ್ಯ ಉಡುಗೆ”ಗೆ ಆದ್ಯತೆ ನೀಡುತ್ತವೆ. ಆದರೆ, ಇದರಿಂದ ಭಾರತೀಯ ಸಾಂಪ್ರದಾಯಿಕ ಉಡುಗೆಯನ್ನು ಧರಿಸುವವರಿಗೆ ತಾರತಮ್ಯ ಉಂಟಾಗುತ್ತಿದೆ ಎಂಬ ಆರೋಪ ಕೇಳಿಬಂದಿದೆ.
ದೆಹಲಿ ಸಚಿವರಿಂದ ಪ್ರತಿಕ್ರಿಯೆ
ವಿಡಿಯೋ ವೈರಲ್ ಆದ ಬಳಿಕ, ದೆಹಲಿ ಸಚಿವ ಕಪಿಲ್ ಮಿಶ್ರಾ ಈ ಬಗ್ಗೆ ತಮ್ಮ ಅಭಿಪ್ರಾಯವನ್ನು Xನಲ್ಲಿ ಹಂಚಿಕೊಂಡಿದ್ದಾರೆ. “ಇನ್ನು ಮುಂದೆ ಡ್ರೆಸ್ ಕೋಡ್‌ಗೆ ಸಂಬಂಧಿಸಿದಂತೆ ಯಾವುದೇ ನಿರ್ಬಂಧವಿರುವುದಿಲ್ಲ. ಭಾರತೀಯ ಉಡುಗೆ ಧರಿಸಿದವರನ್ನೂ ಸ್ವಾಗತಿಸಲಾಗುವುದು ಎಂದು ರೆಸ್ಟೋರೆಂಟ್ ಒಪ್ಪಿಕೊಂಡಿದೆ,” ಎಂದು ಅವರು ತಿಳಿಸಿದ್ದಾರೆ.
