ಬಾಲಿವುಡ್ನ ಖ್ಯಾತ ನಟ ಆಮೀರ್ ಖಾನ್ ಅಭಿನಯದ ‘ಸಿತಾರೆ ಜಮೀನ್ ಪರ್’ ಚಿತ್ರವನ್ನು ಬೆಂಗಳೂರಿನ ಮಾಗಡಿ ರಸ್ತೆಯ ವೀರೇಶ್ ಚಿತ್ರಮಂದಿರದಲ್ಲಿ ವಿಶೇಷ ಚೇತನ ಮಕ್ಕಳಿಗಾಗಿ ಉಚಿತವಾಗಿ ಪ್ರದರ್ಶಿಸಲಾಯಿತು. ಡೌನ್ ಸಿಂಡ್ರೋಮ್ ಮತ್ತು ಆಟಿಜಂನಿಂದ ಬಳಲುತ್ತಿರುವ ಮಕ್ಕಳಿಗೆ ಈ ಚಿತ್ರವು ಭರವಸೆಯ ಸಂದೇಶವನ್ನು ನೀಡುವುದರಿಂದ, ಈ ವಿಶೇಷ ಪ್ರದರ್ಶನವನ್ನು ಆಯೋಜಿಸಲಾಗಿತ್ತು.
ವೀರೇಶ್ ಚಿತ್ರಮಂದಿರದ ಮಾಲೀಕ ಕುಶಾಲ್ ಎಲ್. ಸಿ. ಮತ್ತು ಆಯೋಜಕ ಬಿ. ಎಚ್. ಉಲ್ಲಾಸ್ ಗೌಡ ಈ ಉಚಿತ ಶೋವನ್ನು ಆಯೋಜಿಸಿದ್ದರು. ಥಿಯೇಟರ್ನಲ್ಲಿ ತುಂಬಿದ್ದ ವಿಶೇಷ ಮಕ್ಕಳಿಗೆ ಚಿತ್ರವೀಕ್ಷಣೆಯ ಜೊತೆಗೆ ಪಾಪ್ಕಾರ್ನ್, ತಿಂಡಿ-ತಿನಿಸುಗಳನ್ನು ಒದಗಿಸಲಾಯಿತು. ಈ ಕಾರ್ಯಕ್ರಮದಲ್ಲಿ ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿಯ ಮಾಜಿ ಅಧ್ಯಕ್ಷ ಭಾ. ಮ. ಹರೀಶ್ ಸೇರಿದಂತೆ ಚಿತ್ರರಂಗದ ಗಣ್ಯರು ಭಾಗವಹಿಸಿದ್ದರು.
‘ಸಿತಾರೆ ಜಮೀನ್ ಪರ್’ ಚಿತ್ರವು ಬಾಸ್ಕೆಟ್ಬಾಲ್ ಕೇಂದ್ರಿತ ಕಥಾಹಂದರವನ್ನು ಹೊಂದಿದ್ದು, ವಿಶೇಷ ಚೇತನ ಮಕ್ಕಳ ಸಾಮರ್ಥ್ಯವನ್ನು ಎತ್ತಿ ತೋರಿಸುತ್ತದೆ.
ಚಿತ್ರದಲ್ಲಿ ಆಮೀರ್ ಖಾನ್ ಬಾಸ್ಕೆಟ್ಬಾಲ್ ಕೋಚ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ವಿಶೇಷ ಮಕ್ಕಳಿಗೆ ತರಬೇತಿ ನೀಡಿ, ಬಾಸ್ಕೆಟ್ಬಾಲ್ ಟೂರ್ನಮೆಂಟ್ನಲ್ಲಿ ಗೆಲುವು ಸಾಧಿಸುವ ಸವಾಲನ್ನು ಅವರು ಸ್ವೀಕರಿಸುತ್ತಾರೆ. ಈ ಪಯಣವನ್ನು ಹಾಸ್ಯಮಯ ರೀತಿಯಲ್ಲಿ ಚಿತ್ರಿಸಲಾಗಿದ್ದು, ಗಂಭೀರವಲ್ಲದೆ ಎಲ್ಲರಿಗೂ ಆನಂದದಾಯಕವಾಗಿದೆ.
ಚಿತ್ರವನ್ನು ಆರ್. ಎಸ್. ಪ್ರಸನ್ನ ಡೈರೆಕ್ಟ್ ಮಾಡಿದ್ದು, ಆಮೀರ್ ಖಾನ್ ಜೊತೆಗೆ ಜೆನಿಲಿಯಾ ಡಿಸೋಜಾ ಪ್ರಮುಖ ಪಾತ್ರದಲ್ಲಿದ್ದಾರೆ. ಜೂನ್ 20, 2025ರಂದು ರಿಲೀಸ್ ಆದ ಈ ಚಿತ್ರವು ವಿಮರ್ಶಕರಿಂದ ಮೆಚ್ಚುಗೆ ಪಡೆದಿದ್ದು, ಬಾಕ್ಸ್ ಆಫೀಸ್ನಲ್ಲಿ ಉತ್ತಮ ಪ್ರದರ್ಶನ ನೀಡುತ್ತಿದೆ.
ವಿಶೇಷ ಮಕ್ಕಳ ಖುಷಿಯನ್ನು ಕಂಡು ಥಿಯೇಟರ್ ಮಾಲೀಕರು ಮತ್ತು ಸಿಬ್ಬಂದಿ ಕೂಡ ಮಕ್ಕಳ ಜೊತೆಗೆ ಸಂತೋಷದ ಕ್ಷಣಗಳನ್ನು ಕಳೆದರು. ಗುಂಪು ಫೋಟೋಗಳನ್ನು ತೆಗೆಸಿಕೊಂಡು, ಈ ಕಾರ್ಯಕ್ರಮವನ್ನು ಸ್ಮರಣೀಯವಾಗಿಸಿದರು. ಮಕ್ಕಳು ಚಿತ್ರವನ್ನು ಆನಂದಿಸಿದ್ದು, ಈ ವಿಶೇಷ ಶೋ ಎಲ್ಲರಿಗೂ ಮರೆಯಲಾಗದ ಅನುಭವವಾಯಿತು.
