ಅಹಮದಾಬಾದ್: 18ನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್)ನಲ್ಲಿ ಆರ್ಸಿಬಿ ಫೈನಲ್ ಪ್ರವೇಶಿಸಿ 3 ದಿನಗಳಾಗಿವೆ. ಫೈನಲ್ನಲ್ಲಿ ಆರ್ಸಿಬಿಗೆ ಎದುರಾಳಿ ಯಾರಾಗಲಿದ್ದಾರೆ ಎಂಬ ಕುತೂಹಲಕ್ಕೆ ಭಾನುವಾರ ತೆರೆ ಬೀಳಲಿದೆ. ಅಹಮದಾಬಾದ್ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆಯಲಿರುವ ಕ್ವಾಲಿಫೈಯರ್-2 ಪಂದ್ಯದಲ್ಲಿ 5 ಬಾರಿ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ಮತ್ತು ಮೊದಲ ಟ್ರೋಫಿ ಗೆಲುವಿನ ಆಸೆಯಲ್ಲಿರುವ ಪಂಜಾಬ್ ತಂಡಗಳು ಮುಖಾಮುಖಿಯಾಗಲಿವೆ.
ಗೆದ್ದ ತಂಡ ಜೂನ್ 3ರಂದು ಆರ್ಸಿಬಿ ವಿರುದ್ಧ ಅಹಮದಾಬಾದ್ನಲ್ಲಿ ಟ್ರೋಫಿಗಾಗಿ ಸೆಣಸಾಡಲಿದೆ. ಆದರೆ ಸೋತ ತಂಡ ಟೂರ್ನಿಯಿಂದ ಹೊರಬೀಳಲಿದೆ. ಶ್ರೇಯಸ್ ಅಯ್ಯರ್ ನಾಯಕತ್ವದ ಪಂಜಾಬ್ ಗುಂಪು ಹಂತದಲ್ಲಿ ಅಗ್ರಸ್ಥಾನಿಯಾಗಿ ಕ್ವಾಲಿಫೈಯರ್-1ಗೆ ಪ್ರವೇಶಿಸಿತ್ತು. ಆದರೆ ಆರ್ಸಿಬಿ ವಿರುದ್ಧ ಸೋಲಿನಿಂದ ಕ್ವಾಲಿಫೈಯರ್-2ರಲ್ಲಿ ಆಡಲಿದೆ. ಹಾರ್ದಿಕ್ ಪಾಂಡ್ಯ ನೇತೃತ್ವದ ಮುಂಬೈ ತಂಡ ಹಂತದಲ್ಲಿ 4ನೇ ಸ್ಥಾನ ಪಡೆದು, ಎಲಿಮಿನೇಟರ್ನಲ್ಲಿ ಗುಜರಾತ್ ಟೈಟಾನ್ಸ್ನ ಮಣಿಸಿ ಕ್ವಾಲಿಫೈಯರ್-2ಕ್ಕೆ ಬಂದಿದೆ.
ಮುಂಬೈನ ಆತ್ಮವಿಶ್ವಾಸ: ಅನುಭವಿ ಆಟಗಾರರು, ಪಂದ್ಯ ಗೆಲ್ಲಿಸಬಲ್ಲ ತಾರೆಯರಾದ ರೋಹಿತ್ ಶರ್ಮಾ, ಸೂರ್ಯಕುಮಾರ್, ತಿಲಕ್ ವರ್ಮಾ, ಹಾರ್ದಿಕ್ ಪಾಂಡ್ಯರನ್ನೊಳಗೊಂಡ ಮುಂಬೈ ತಂಡ ಆತ್ಮವಿಶ್ವಾಸದಲ್ಲಿದೆ. ಗುಜರಾತ್ ವಿರುದ್ಧದ ಪ್ರದರ್ಶನ ಪಂಜಾಬ್ಗೆ ಒತ್ತಡ ಹೇರಿದೆ. ಜಸ್ಪ್ರೀತ್ ಬುಮ್ರಾ ನೇತೃತ್ವದ ಬೌಲಿಂಗ್, ಜಾನಿ ಬೇರ್ಸ್ಟೋವ್ ಮತ್ತು ರಿಚರ್ಡ್ ಗ್ರೀಸನ್ರಂತಹ ಬದಲಿ ಆಟಗಾರರ ಫಾರ್ಮ್ ತಂಡಕ್ಕೆ ಬಲ ತಂದಿದೆ.
ಪಂಜಾಬ್ನ ಸವಾಲು: ಲೀಗ್ನಲ್ಲಿ ಮುಂಬೈನ ಸೋಲಿಸಿದ್ದರೂ, ಯಾನ್ಸನ್ರ ಅಲಭ್ಯತೆ ಮತ್ತು ಚಹಲ್ರ ಗಾಯ ಪಂಜಾಬ್ಗೆ ಹಿನ್ನಡೆಯಾಗಿದೆ. ಬೌಲಿಂಗ್ ದುರ್ಬಲವಾಗಿದ್ದು, ಅರ್ಶ್ದೀಪ್ಗೆ ಇತರರ ಬೆಂಬಲ ನಿರ್ಣಾಯಕ. ಬ್ಯಾಟಿಂಗ್ನಲ್ಲಿ ಪ್ರಬ್ಸಿಮ್ರನ್, ಪ್ರಿಯಾನ್ ಆರ್ಯ, ಶ್ರೇಯಸ್, ಜೋಶ್ ಇಂಗ್ಲಿಸ್ ಮತ್ತು ಮಾರ್ಕಸ್ ಸ್ಟೋನ್ನಿಸ್ರಿಂದ ದೊಡ್ಡ ಇನಿಂಗ್ಸ್ನ ಒತ್ತಡವಿದೆ. ಸಮತೋಲಿತ ಆಟವಾಡಿದರೆ ಮಾತ್ರ ಫೈನಲ್ಗೇರಬಹುದು.
ಫೈನಲ್ ರೇಸ್: ಮುಂಬೈ 11ನೇ ಬಾರಿ ಪ್ಲೇ-ಆಫ್ನಲ್ಲಿ ಆಡುತ್ತಿದ್ದು, 7ನೇ ಫೈನಲ್ಗೇರಲು ತವಕಿಸುತ್ತಿದೆ. ತಂಡ 2013, 2015, 2017, 2019, 2020ರಲ್ಲಿ ಚಾಂಪಿಯನ್ ಆಗಿದೆ. ಪಂಜಾಬ್ 2ನೇ ಬಾರಿ ಫೈನಲ್ ಗುರಿಯಾಗಿದ್ದು, 2014ರಲ್ಲಿ ರನ್ನರ್-ಅಪ್ ಆಗಿತ್ತು.
