ಊಟಿ: ಕಾಡಿನ ವಿನಾಶದಿಂದಾಗಿ ಆಹಾರಕ್ಕಾಗಿ ಅರಣ್ಯ ಪ್ರಾಣಿಗಳು ಜನವಸತಿ ಪ್ರದೇಶಗಳತ್ತ ಬರುತ್ತಿರುವ ಘಟನೆಗಳು ಹೆಚ್ಚಾಗುತ್ತಿವೆ. ಇಂತಹ ಘಟನೆಯೊಂದರಲ್ಲಿ, ಊಟಿಯ ಕಟ್ಟಬೆಟ್ಟು ಸಮೀಪದ ಟೀ ಎಸ್ಟೇಟ್‌ನಲ್ಲಿ ಹುಲಿಯೊಂದು ತನ್ನ ಮರಿಗಳೊಂದಿಗೆ ಕಾಣಿಸಿಕೊಂಡಿದ್ದು, ಈ ದೃಶ್ಯದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಈ ವಿಡಿಯೋ ಮಾನವ-ವನ್ಯಜೀವಿ ಸಂಘರ್ಷದ ಬಗ್ಗೆ ಗಂಭೀರ ಚರ್ಚೆಗೆ ಕಾರಣವಾಗಿದೆ.
ಈ ವಿಡಿಯೋವನ್ನು ಇಂಡಿಯನ್ ಫಾರೆಸ್ಟ್ ಸರ್ವೀಸ್ ಅಧಿಕಾರಿ ಸುಸಂತ ನಂದಾ ತಮ್ಮ ಎಕ್ಸ್ ಖಾತೆಯಾದ @susantananda3ನಲ್ಲಿ ಮೇ 28, 2025ರಂದು ಹಂಚಿಕೊಂಡಿದ್ದಾರೆ. “ಹುಲಿಗಳ ಸಂಖ್ಯೆಯನ್ನು ಉಳಿಸಿಕೊಳ್ಳಲು ನಮ್ಮಲ್ಲಿ ಸಾಕಷ್ಟು ಕಾಡುಗಳಿವೆಯೇ? ಇದು ಊಟಿಯ ಕಟ್ಟಬೆಟ್ಟು ಟೀ ಎಸ್ಟೇಟ್‌ನಲ್ಲಿ ತನ್ನ ಮರಿಗಳೊಂದಿಗೆ ಸಂಚರಿಸುತ್ತಿರುವ ಹುಲಿಯ ದೃಶ್ಯ. ಮಾನವ-ವನ್ಯಜೀವಿ ಸಂಘರ್ಷ ಭಯಾನಕವಾಗಿದೆ,” ಎಂದು ಅವರು ಕ್ಯಾಪ್ಶನ್‌ನಲ್ಲಿ ಬರೆದಿದ್ದಾರೆ.
Do we have enough forests to sustain the growing tiger population??
This is near Kattabettu, tea estate,Ooty yesterday. Tigress with cubs. Frightening is the human- wildlife conflict that is likely in such landscapes. pic.twitter.com/98qL29re4d
— Susanta Nanda IFS(R) (@susantananda3) May 28, 2025
ವಿಡಿಯೋದಲ್ಲಿ, ಹುಲಿಯೊಂದು ಟೀ ಎಸ್ಟೇಟ್‌ನ ರಸ್ತೆಯಲ್ಲಿ ಮೆಲ್ಲಗೆ ನಡೆಯುತ್ತಿರುವುದನ್ನು ಕಾಣಬಹುದು. ಇದರ ಹಿಂದೆ ಎರಡು ಮರಿಗಳು ಅದನ್ನು ಹಿಂಬಾಲಿಸುತ್ತಿರುವ ದೃಶ್ಯವು ಎಲ್ಲರ ಗಮನ ಸೆಳೆದಿದೆ. ಈ ವಿಡಿಯೋ 80,000ಕ್ಕೂ ಅಧಿಕ ವೀಕ್ಷಣೆಗಳನ್ನು ಪಡೆದಿದ್ದು, ನೆಟ್ಟಿಗರು ವಿವಿಧ ಕಾಮೆಂಟ್‌ಗಳ ಮೂಲಕ ತಮ್ಮ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿದ್ದಾರೆ.
ಒಬ್ಬ ಬಳಕೆದಾರರು, “ಕಾಡು ಪ್ರಾಣಿಗಳಿಗೆ ಅವುಗಳ ಆವಾಸಸ್ಥಾನವನ್ನು ಮರಳಿ ಕೊಡಿ,” ಎಂದು ಕಾಮೆಂಟ್ ಮಾಡಿದ್ದಾರೆ. ಇನ್ನೊಬ್ಬರು, “ಹುಲಿಗಳ ಸಂಖ್ಯೆ ಹೆಚ್ಚುತ್ತಿರುವುದು ಸಂತೋಷದ ವಿಷಯ, ಆದರೆ ಮಾನವ-ವನ್ಯಜೀವಿ ಸಂಘರ್ಷದ ಬಗ್ಗೆ ಕಳವಳವಿದೆ. ಇದಕ್ಕೆ ಪರಿಹಾರವೇನು?” ಎಂದು ಪ್ರಶ್ನಿಸಿದ್ದಾರೆ. ಮತ್ತೊಬ್ಬರು, “ಈ ಟೀ ಎಸ್ಟೇಟ್‌ಗಳು ಒಂದು ಕಾಲದಲ್ಲಿ ಪ್ರಾಣಿಗಳ ಆವಾಸಸ್ಥಾನವಾಗಿದ್ದವು. ಇವುಗಳನ್ನು ಕಾಡಿನಿಂದ ರೂಪಿಸಲಾಗಿದೆ,” ಎಂದು ತಿಳಿಸಿದ್ದಾರೆ.
