ಅಮೆರಿಕಾದಲ್ಲಿ ಮಕ್ಕಳು ಮಾಡಿಕೊಂಡರೆ ತಾಯಿಗೆ ಬೋನಸ್

ಜಗತ್ತಿನ ಹಲವು ಶ್ರೀಮಂತ ರಾಷ್ಟ್ರಗಳಂತೆ, ಅಮೆರಿಕವೂ ಕೂಡ ಜನಸಂಖ್ಯೆಯಲ್ಲಿ ಕುಸಿತ ಕಂಡುಬಂದಿದೆ. ಹೆಚ್ಚು ಜನ ಆರ್ಥಿಕ ಮತ್ತು ಸಾಮಾಜಿಕ ಕಾರಣಗಳಿಂದ ಮದುವೆಯಾಗದೆಯೇ ಉಳಿಯುತ್ತಾರೆ ಅಥವಾ ಮಕ್ಕಳನ್ನು ಹೊಂದಲು ಹಿಂಜರಿಯುತ್ತಾರೆ. ಈ ಹಿನ್ನಲೆಯಲ್ಲಿ, ಅಮೆರಿಕ ಸರ್ಕಾರ ಹೊಸ ಯೋಜನೆಗಳ ಮೂಲಕ ಜನರನ್ನು ಮದುವೆಯಾಗಿ ಹೆಚ್ಚು ಮಕ್ಕಳನ್ನು ಹೊಂದುವಂತೆ ಪ್ರೋತ್ಸಾಹಿಸಲು ಮುಂದಾಗಿದೆ.

2024ರಲ್ಲಿ ಎರಡನೇ ಬಾರಿ ಅಧ್ಯಕ್ಷರಾಗಿ ಅಧಿಕಾರ ಸ್ವೀಕರಿಸಿದ ಡೊನಾಲ್ಡ್ ಟ್ರಂಪ್ ನೇತೃತ್ವದ ಆಡಳಿತ, ದೇಶದಲ್ಲಿ ಜನನ ಪ್ರಮಾಣವನ್ನು ಹೆಚ್ಚಿಸುವ ನಿಟ್ಟಿನಲ್ಲಿ ಹಲವು ಗಂಭೀರ ಚಿಂತನೆಗಳನ್ನು ನಡೆಸುತ್ತಿದೆ. ಈ ಕುರಿತಂತೆ ವೈಟ್ ಹೌಸ್‌ನ ತಜ್ಞರು, ಸಂಪ್ರದಾಯವಾದಿ ಗುಂಪುಗಳು ಮತ್ತು ನೀತಿ ನಿರ್ಧಾರಕರೊಂದಿಗೆ ವಿವಿಧ ಸಭೆಗಳನ್ನು ನಡೆಸಿದ್ದಾರೆ.

ಬೇಬಿ ಬೋನಸ್ ಯೋಜನೆಗೆ ಚಿಂತನೆ

ಈ ವಿಷಯಕ್ಕೆ ಸಂಬಂಧಿಸಿದಂತೆ ‘ಬೇಬಿ ಬೋನಸ್’ ಎಂಬ ಯೋಜನೆಯ ಕುರಿತು ಚಿಂತನೆ ನಡೆಯುತ್ತಿದೆ. ಈ ಯೋಜನೆಯಡಿಯಲ್ಲಿ, ಮಗು ಜನಿಸಿದ ತಕ್ಷಣ ತಾಯಿಗೆ 5,000 ಡಾಲರ್ (ಸುಮಾರು ₹4.25 ಲಕ್ಷ) ನಗದು ಸಹಾಯ ನೀಡುವ ಯೋಜನೆ ರೂಪಗೊಳ್ಳುತ್ತಿದೆ. ಇದು ಸಂಪೂರ್ಣ ತೆರಿಗೆ ಮುಕ್ತವಾಗಿರಲಿದೆ ಎಂದು ವರದಿಗಳು ಸೂಚಿಸುತ್ತಿವೆ. ಈ ಯೋಜನೆಯ ಉದ್ದೇಶವು ಯುವ ದಂಪತಿಗಳು ಮಕ್ಕಳನ್ನು ಹೊಂದಲು ಆರ್ಥಿಕ ಭೀತಿಯಿಂದ ಹಿಂಜರಿಯದಂತೆ ಮಾಡುವುದಾಗಿದೆ.

ಅಲ್ಲದೇ, ಮಹಿಳೆಯರ ಅಂಡೋತ್ಪತ್ತಿ ಮತ್ತು ಪ್ರಜನನ ಆರೋಗ್ಯದ ಬಗ್ಗೆ ಅರಿವು ಮೂಡಿಸಲು ಶಿಕ್ಷಣ ಕಾರ್ಯಕ್ರಮಗಳನ್ನು ಪ್ರಾರಂಭಿಸುವ ಪ್ರಸ್ತಾಪವೂ ಮಂಡನೆಯಲ್ಲಿದೆ. ಮಹಿಳೆಯರಿಗೆ ಮುಟ್ಟಿನ ಚಕ್ರದ ವಿಜ್ಞಾನ, ಗರ್ಭಧಾರಣೆಯು ಹೇಗೆ ನಡೆಯುತ್ತದೆ, ಯಾವ ವರ್ಷದಲ್ಲಿ ಗರ್ಭಧಾರಣೆಗೆ ಉತ್ತಮ ಅವಕಾಶ ಇರುತ್ತದೆ ಎಂಬ ಬಗ್ಗೆ ಶಿಕ್ಷಣ ನೀಡುವುದು ಇದರ ಉದ್ದೇಶ.

ಅಮೆರಿಕದ ಅತ್ಯಂತ ಹೆಸರಾಂತ ಫುಲ್‌ಬ್ರೈಟ್ ವಿದ್ಯಾರ್ಥಿವೇತನ ಯೋಜನೆಯಲ್ಲಿ ಶೇ.30ರಷ್ಟು ಸ್ಥಾನಗಳನ್ನು ಮದುವೆಯಾಗಿರುವವರು ಅಥವಾ ಮಕ್ಕಳುಳ್ಳವರಿಗೆ ಮೀಸಲಿಡುವ ಪ್ರಸ್ತಾಪವಿದೆ. ಇದರಿಂದ ಮದುವೆಯಾದ ಯುವಕರು ಅಥವಾ ಮಕ್ಕಳನ್ನು ಹೊಂದಿರುವವರು ತಮ್ಮ ವಿದ್ಯಾಭ್ಯಾಸ ಮುಂದುವರಿಸಲು ಹೆಚ್ಚಿನ ಪ್ರೋತ್ಸಾಹ ಪಡೆಯುತ್ತಾರೆ.

ಜನನ ಪ್ರಮಾಣದಲ್ಲಿ ಇಳಿಕೆಗೆ ಕಾರಣಗಳು

CDC (Centers for Disease Control and Prevention) ನೀಡಿದ ವರದಿಯ ಪ್ರಕಾರ, 2023ರಲ್ಲಿ ಅಮೆರಿಕದ ಪ್ರತಿ ಮಹಿಳೆಗೆ ಸರಾಸರಿ 1.62 ಮಕ್ಕಳ ಜನನ ಪ್ರಮಾಣವಿದೆ. ಆದರೆ, ಜನಸಂಖ್ಯೆ ಸ್ಥಿರವಾಗಿರಲು ಪ್ರತಿ ಮಹಿಳೆಗೆ ಕನಿಷ್ಠ 2.1 ಜನನ ಪ್ರಮಾಣ ಇರಬೇಕಾಗುತ್ತದೆ. ಈ ಇಳಿಕೆಗೆ ಕಾರಣವೆಂದರೆ ಹೆಚ್ಚುತ್ತಿರುವ ಜೀವನ ವೆಚ್ಚ, ಮಹಿಳೆಯರ ಉದ್ಯೋಗದಲ್ಲಿ ತೊಡಗಿಸಿಕೊಂಡಿರುವುದು, ಮದುವೆಯ ವಯಸ್ಸಿನಲ್ಲಿ ವಿಳಂಬ ಮತ್ತು ಸಮಾಜದ ಮೌಲ್ಯಗಳಲ್ಲಿ ಬದಲಾವಣೆ. ಇವು ಜನನ ಪ್ರಮಾಣದಲ್ಲಿ ಇಳಿಕೆಗೆ ಕಾರಣವಾಗಿದೆ.

ಕೆಲ ವಿಮರ್ಶಕರು ಈ ಯೋಜನೆ ಕುರಿತಾಗಿ ಪ್ರಶ್ನೆಗಳನ್ನು ಎಬ್ಬಿಸುತ್ತಿದ್ದಾರೆ. ಅಮೆರಿಕದಂತಹ ಶ್ರೀಮಂತ ರಾಷ್ಟ್ರದಲ್ಲಿ 5000 ಡಾಲರ್ ಸಹಾಯಧನವು ಸಾಕ್ಷಾತ್ ಪರಿಹಾರವಲ್ಲ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. “ಇದು ತಾತ್ಕಾಲಿಕ ಉತ್ಸಾಹ ನೀಡಬಹುದಾದರೂ, ದೀರ್ಘಕಾಲಿಕವಾಗಿ ಜನನ ಪ್ರಮಾಣ ಹೆಚ್ಚಿಸುವಲ್ಲಿ ಎಷ್ಟು ಪರಿಣಾಮಕಾರಿಯಾಗುತ್ತದೆ ಎಂಬುದನ್ನು ಕಾದು ನೋಡಬೇಕು,” ಎನ್ನುತ್ತಾರೆ ತಜ್ಞರು.