ಗೋಲ್ಡನ್ ಮೆಗಾಸ್ಟಾರ್ ಗಣೇಶ್ ಒನ್ಸ್ ಅಗೈನ್ ಕೃಷ್ಣಂ ಪ್ರಣಯ ಸಖಿ ಡೈರೆಕ್ಟರ್ ಜೊತೆ ಮೋಡಿ ಮಾಡೋಕೆ ಬರ್ತಿದ್ದಾರೆ. ಅದೂ ದಿನಕ್ಕೆ 1200ಕ್ಕೂ ಅಧಿಕ ಶೋಗಳ ಮೂಲಕ ಅನ್ನೋದು ಇಂಟರೆಸ್ಟಿಂಗ್. ಈಗಾಗ್ಲೇ ನರ್ತಕಿ ಥಿಯೇಟರ್ ಮುಂದೆ 72 ಅಡಿ ಮುಗಿಲೆತ್ತರದ ಗಣಿ ಕಟೌಟ್ ತಲೆ ಎತ್ತಿದ್ದು.. ಮೆಟ್ರೋ ಟ್ರೈನ್ನಿಂದ ಹಿಡಿದು ಎಲ್ಲೆಡೆ ಬೃಂದಾವಿಹಾರಿ ಜಪ ಶುರುವಾಗಿದೆ. ಅವೆಲ್ಲದರ ಲೇಟೆಸ್ಟ್ ಸ್ಟೋರಿ ಇಲ್ಲಿದೆ.
- 1200ಶೋ.. 72ಅಡಿ ಕಟೌಟ್.. ಎಲ್ಲೆಲ್ಲೂ ಬೃಂದಾವಿಹಾರಿ ಜಪ
- ಪ್ರೇಮದ ಊರಲಿ ಚಿತ್ರಕ್ಕಾಗಿ ಪೋಸ್ಟ್ಫೊನ್ ಆಗಿದ್ದ ಗಣಿ ಸಿನಿಮಾ
- 224 ಸಿಂಗಲ್ ಸ್ಕ್ರೀನ್.. 83 ಮಲ್ಟಿಪ್ಲೆಕ್ಸ್ಗಳಲ್ಲಿ ಬೃಂದಾವಿಹಾರಿ..!
- ಗೋಲ್ಡನ್ ಸ್ಟಾರ್ ಜೊತೆ ರಾಮ್ಕುಮಾರ್ ಭರ್ಜರಿ ಕಂಬ್ಯಾಕ್
ಬೃಂದಾವಿಹಾರಿ.. ಈ ವರ್ಷದ ಬಹುನಿರೀಕ್ಷಿತ ಸಿನಿಮಾಗಳಲ್ಲೊಂದು. ಯಾಕಂದ್ರೆ ಕೃಷ್ಣಂ ಪ್ರಣಯ ಸಖಿ ಚಿತ್ರದ ಬಳಿಕ ಡೈರೆಕ್ಟರ್ ಶ್ರೀನಿವಾಸ್ ರಾಜು ಹಾಗೂ ಗೋಲ್ಡನ್ ಮೆಗಾ ಸ್ಟಾರ್ ಗಣೇಶ್ ನಟನೆಯ ಎರಡನೇ ಸಿನಿಮಾ. ಈಗಾಗ್ಲೇ ಸಾಂಗ್ಸ್ನಿಂದ ನೋಡುಗರನ್ನ ಮಂತ್ರಮುಗ್ಧಗೊಳಿಸಿರೋ ಬೃಂದಾವಿಹಾರಿ.. ಮಕ್ಕಳಿಂದ ಮುದುಕರ ತನಕ ಇಡೀ ಕಟುಂಬ ಕೂತು ನೋಡುವಂತಹ ಕೌಟುಂಬಿಕ ಚಿತ್ರವನ್ನ ಉಣಬಡಿಸೋಕೆ ಸಜ್ಜಾಗಿದೆ.
ಗೋಲ್ಡನ್ ಮೆಗಾಸ್ಟಾರ್ ಗಣೇಶ್ ಜೊತೆ ದೇವಿಕಾ ಭಟ್ ಹಾಗೂ ಮಾಳವಿಕಾ ಶರ್ಮಾ ಅನ್ನೋ ಇಬ್ಬಿಬ್ಬರು ಗ್ಲಾಮರ್ ಡಾಲ್ಸ್ ಬಣ್ಣ ಹಚ್ಚಿದ್ದು, ಅವ್ರ ರಂಗು ಹಾಡುಗಳಿಂದ ಗುಂಗು ಹಿಡಿಸಿವೆ. ಅದ್ರಲ್ಲೂ ಅಬ್ದುಲ್ ಹೇಶಮ್ ವಹಬ್ ಸಂಗೀತಕ್ಕೆ ಕವಿರತ್ನ ಡಾ ವಿ ನಾಗೇಂದ್ರ ಪ್ರಸಾದ್ ಅವರ ಸಾಹಿತ್ಯ ಹೇಳಿ ಮಾಡಿಸಿದಂತಿದೆ. ದ್ವಿರುಕ್ತಿಗಳನ್ನ ಬಳಸಿ ಬರೆದಿರೋ ಒಂದೊಂದು ಹಾಡಿನ ಸಾಹಿತ್ಯ ಕೂಡ ಮುತ್ತುಗಳನ್ನ ಜೋಡಿಸಿದಂತಿದೆ.
ಪ್ರೇಮದ ಊರಲಿ ಸಿನಿಮಾದಿಂದಾಗಿ ರಿಲೀಸ್ನ ಅಕ್ಟೋಬರ್ 16ರಿಂದ ನವೆಂಬರ್ 20ಕ್ಕೆ ಪೋಸ್ಟ್ಪೋನ್ ಮಾಡಿಕೊಂಡಿದ್ದ ಬೃಂದಾವಿಹಾರಿ ಈ ವಾರ ಮಸ್ತ್ ಮನರಂಜನೆ ನೀಡೋಕೆ ಬರ್ತಿದೆ. ಪ್ರತಿ ದಿನ ಸುಮಾರು 1200 ಶೋಗಳು ಸಿನಿಮಾಗಾಗಿ ಆಯೋಜನೆ ಆಗಿದ್ದು.. 224 ಸಿಂಗಲ್ ಸ್ಕ್ರೀನ್ ಹಾಗೂ 83 ಮಲ್ಟಿಪ್ಲೆಕ್ಸ್ಗಳಲ್ಲಿ ಬೆಳ್ಳಿತೆರೆ ಬೆಳಗಲಿದೆ. ಇಂಟರೆಸ್ಟಿಂಗ್ ಅಂದ್ರೆ ಮೆಜೆಸ್ಟಿಕ್ನ ನರ್ತಕಿ ಥಿಯೇಟರ್ ಮುಂದೆ ಸುಮಾರು 72 ಅಡಿ ಎತ್ತರದ ಗೋಲ್ಡನ್ ಮೆಗಾಸ್ಟಾರ್ ಕಟೌಟ್ ಚಿತ್ರಪ್ರೇಮಿಗಳನ್ನ ಕೈಬೀಸಿ ಕರೆಯಲು ಮುಗಿಲೆತ್ತರ ನಿಂತಿದೆ.
ರಂಗಾಯಣ ರಘು, ಹಿರಿಯ ನಟಿ ಲಕ್ಷ್ಮೀ, ಅಚ್ಯುತ್ ಕುಮಾರ್, ಸಾಧು ಕೋಕಿಲ, ಅವನಾಶ್, ಕುರಿ ಪ್ರತಾಪ್, ಗಿರಿ, ಜಗ್ಗಪ್ಪ.. ಹೀಗೆ ಬಹುದೊಡ್ಡ ಕಲಾವಿದರ ದಂಡು ಬೃಂದಾವಿಹಾರಿಯಲ್ಲಿದೆ. ವಿಶೇಷ ಅಂದ್ರೆ ಬಹಳ ವರ್ಷಗಳ ನಂತ್ರ ನಟಸಾರ್ವಭೌಮ ಡಾ ರಾಜ್ಕುಮಾರ್ ಅವರ ಅಳಿಯ, ಸ್ಯಾಂಡಲ್ವುಡ್ನ ಗತ ಕಾಲದ ಹೀರೋ ರಾಮ್ಕುಮಾರ್ ಕೂಡ ಈ ಚಿತ್ರದಲ್ಲಿ ಬಣ್ಣ ಹಚ್ಚಿದ್ದಾರೆ. ಆ ಮೂಲಕ ಬಿಗ್ಸ್ಕ್ರೀನ್ಗೆ ಭರ್ಜರಿ ಕಂಬ್ಯಾಕ್ ಮಾಡ್ತಿದ್ದಾರೆ.
ವಿಶೇಷ ಅಂದ್ರೆ ಪಕ್ಕದ ಆಂಧ್ರ ಹಾಗೂ ನಾರ್ತ್ ಇಂಡಿಯಾದಲ್ಲಿ ರಿಲೀಸ್ಗೆ ಡಿಮ್ಯಾಂಡ್ ಹೆಚ್ಚಿದ್ದು.. ವಿದೇಶಗಳಲ್ಲಿ ಕೂಡ ಹಂತ ಹಂತವಾಗಿ ಸಿನಿಮಾನ ಬಿಡುಗಡೆ ಮಾಡೋಕೆ ಯೋಜನೆ ರೂಪಿಸಿಕೊಂಡಿದ್ದಾರೆ ನಿರ್ಮಾಪಕರು. ಶಾಸಕ ಕಮ್ ಕ್ರಿಕೆಟ್ ಪ್ರಿಯರಾದಂತಹ ಮುಳಬಾಗಿಲು ಕ್ಷೇತ್ರದ ಸಮೃದ್ಧಿ ಮಂಜುನಾಥ್ ಅವರು ಈ ಚಿತ್ರವನ್ನ ಬಹಳ ಅದ್ಧೂರಿಯಾಗಿ ನಿರ್ಮಾಣ ಮಾಡಿದ್ದು, ಮೆಟ್ರೋ ಟ್ರೈನ್ ಸೇರಿದಂತೆ ಎಲ್ಲೆಡೆ ಭರ್ಜರಿ ಪ್ರಮೋಷನ್ಸ್ ಮಾಡ್ತಿದ್ದಾರೆ. ಕೃಷ್ಣಂ ಪ್ರಣಯ ಸಖಿ ಚಿತ್ರಕ್ಕಿಂತ ದೊಡ್ಡ ಮಟ್ಟದ ಓಪನಿಂಗ್ ಪಡೆಯುವ ಭರವಸೆಯಲ್ಲಿರೋ ಈ ಚಿತ್ರದ ಕ್ಲೈಮ್ಯಾಕ್ಸ್ ಬಗ್ಗೆ ರಿಲೀಸ್ಗೂ ಮೊದಲೇ ಚರ್ಚೆಗಳು ನಡೆಯುತ್ತಿರೋದು ಅಚ್ಚರಿ.
ಬೀರಗಾನಹಳ್ಳಿ ಲಕ್ಷ್ಮೀನಾರಾಯಣ್, ಫಿಲ್ಮ್ ಬ್ಯೂರೋ ಹೆಡ್, ಗ್ಯಾರಂಟಿ ನ್ಯೂಸ್





