ಡಿವೈನ್ ಸ್ಟಾರ್ ರಿಷಬ್ ಶೆಟ್ಟಿ ತಮ್ಮ ಪ್ಯಾನ್ ಇಂಡಿಯಾ ಸಿನಿಮಾಗಳ ನಡುವೆ ಹೋಮ್ ಪ್ರೊಡಕ್ಷನ್ ಬ್ಯಾನರ್‌‌ನಲ್ಲಿ ಸಿನಿಮಾಗಳನ್ನ ಮಾಡೋಕೆ ಮತ್ತೆ ಮುಂದಾಗಿದ್ದಾರೆ. ಈ ಮೂಲಕ ಹೊಸ ಪ್ರತಿಭೆಗಳಿಗೆ ವೇದಿಕೆ ಮಾಡಿಕೊಡ್ತಿದ್ದು, ಅವ್ರಲ್ಲಿರೋ ಸಿನಿಮೋತ್ಸಾಹಕ್ಕೆ ಕನ್ನಡಿಗರು ಭೇಷ್ ಅಂತಿದ್ದಾರೆ. ಅದಕ್ಕಿಂತ ಮಿಗಿಲಾಗಿ.. ಇತ್ತೀಚೆಗೆ ಅವ್ರ ನೂತನ ಸಿನಿಮಾದ ಕಾಸ್ಟಿಂಗ್ ಕಾಲ್ ಹಾಗೂ ಆಡಿಷನ್‌ಗೆ ನಿರೀಕ್ಷೆಗೂ ಮೀರಿ ಜನ ಆಗಮಿಸಿದ್ದು ಹೈಲೈಟ್.
- ರಿಷಬ್ ಶೆಟ್ಟಿ ಫಿಲಂಸ್ ಆಡಿಷನ್.. 4 ಸಾವಿರ ಮಂದಿ ಜನಸಾಗರ
- ನಿರೀಕ್ಷಿಸಿದ್ದು 400 ಮಂದಿ.. ಓ ಮೈ ಗಾಡ್ ನಡೆದದ್ದು ಮಾತ್ರ ಜಾತ್ರೆ
- ಯಂಗ್ ಟ್ಯಾಲೆಂಟ್ಸ್‌ಗೆ ವೇದಿಕೆ ಮಾಡಿಕೊಡ್ತಿರೋ ರಿಷಬ್ ದಂಪತಿ
- ಪ್ಯಾನ್ ಇಂಡಿಯಾ ಪ್ರಾಜೆಕ್ಟ್ಸ್‌ ಜೊತೆ ಹೋಮ್ ಬ್ಯಾನರ್ ಆ್ಯಕ್ಟೀವ್
ರಿಷಬ್ ಶೆಟ್ಟಿ.. ಕನ್ನಡ ಚಿತ್ರರಂಗದ ಭರವಸೆಯ ಬೆಳಕು. ಹೌದು.. ನಟ, ನಿರ್ದೇಶಕ, ಬರಹಗಾರ ಅಷ್ಟೇ ಅಲ್ಲದೆ.. ನಿರ್ಮಾಪಕರಾಗಿಯೂ ಕಲಾ ಸೇವೆಗೆ ನಿಂತಿರೋ ಅಪರೂಪದ ಕಲಾರಾಧಕರು. ಕಾಂತಾರ ಹಾಗೂ ಕಾಂತಾರ-1 ಸಿನಿಮಾಗಳ ಬಿಗ್ಗೆಸ್ಟ್ ಸಕ್ಸಸ್ ಬಳಿಕ ಡಿವೈನ್ ಸ್ಟಾರ್ ಹಣ, ಆಸ್ತಿ, ಅಂತಸ್ತು ಮಾಡಿಕೊಂಡು ಬದಲಾಗಲಿಲ್ಲ. ಅದಕ್ಕೆ ಪೂರಕವಾಗಿ ಮೊದಲಿನಂತೆ ಸಿನಿಮಾಗಳ ನಿರ್ಮಾಣಕ್ಕೂ ಮುಂದಾಗ್ತಿದ್ದಾರೆ.
ಸದ್ಯ ತೆಲುಗು ನಿರ್ಮಾಣ ಸಂಸ್ಥೆ ಮೈತ್ರಿ ಮೂವಿ ಮೇಕರ್ಸ್ ಜೊತೆ ಜೈ ಹನುಮಾನ್ ಹಾಗೂ ಹಿಂದಿ ಪ್ರೊಡಕ್ಷನ್ ಹೌಸ್‌ ಜೊತೆ ಛತ್ರಪತಿ ಶಿವಾಜಿ ಮಹಾರಾಜ್ ಅನ್ನೋ ಎರಡೆರಡು ಮೆಗಾ ಪ್ಯಾನ್ ಇಂಡಿಯಾ ಪ್ರಾಜೆಕ್ಟ್‌‌ಗಳಿಗೆ ಕೈ ಹಾಕಿದ್ದಾರೆ. ಅದರ ನಡುವೆ ತಮ್ಮ ಪತ್ನಿ ಪ್ರಗತಿ ರಿಷಬ್ ಶೆಟ್ಟಿ ಮೂಲಕ ತಮ್ಮದೇ ಹೋಮ್ ಬ್ಯಾನರ್ ಆಗಿರೋ ರಿಷಬ್ ಶೆಟ್ಟಿ ಫಿಲಂಸ್‌‌ನ ಮತ್ತೆ ಆ್ಯಕ್ಟೀವ್ ಮಾಡ್ತಿದ್ದಾರೆ ಶೆಟ್ರು.
ಯೆಸ್.. ನ್ಯೂ ಟ್ಯಾಲೆಂಟ್ಸ್‌ಗೆ ಅವಕಾಶ ನೀಡುವ ಮೂಲಕ ಸಣ್ಣ ಬಜೆಟ್ ಸಿನಿಮಾಗಳನ್ನ ನಿರ್ಮಿಸೋ ಮೂಲಕ ತಾನು ದುಡಿದ ಕೊಂಚ ಹಣವನ್ನ ಸಿನಿಮಾಗಳ ಮೇಲೆಯೇ ಸುರಿಯುತ್ತಾರೆ ಶೆಟ್ರು. ಕೆರೆಯ ನೀರನ್ನ ಕೆರೆಗೆ ಚೆಲ್ಲಿ ಅನ್ನೋ ಮಾತಿನಂತೆ ಚಿತ್ರರಂಗ ತನಗೆ ಇಷ್ಟೆಲ್ಲಾ ಕೊಡ್ತಿರುವಾಗ.. ತಾನು ಕೂಡ ಚಿತ್ರರಂಗಕ್ಕೆ ರಿಟರ್ನ್ ಗಿಫ್ಟ್ ಆಗಿ ಏನಾದ್ರೂ ಕೊಡಬೇಕು ಅನ್ನೋ ಉದ್ದೇಶದಿಂದ ರಿಷಬ್ ಹೀಗೆ ಮತ್ತೆ ಫಿಲ್ಮ್ ಪ್ರೊಡಕ್ಷನ್‌ಗೆ ಮುಂದಾಗಿದ್ದಾರೆ. ಅದಕ್ಕೆ ಪೂರಕವಾಗಿ ರಿಷಬ್ ಶೆಟ್ಟಿ ಫಿಲಂಸ್ ಇತ್ತೀಚೆಗೆ ಜಯನಗರದಲ್ಲಿ ಫಿಲ್ಮ್ ಆಡಿಷನ್ಸ್ ನಡೆಸಿತು.
ಓ ಮೈ ಗಾಡ್.. ಇಷ್ಟೊಂದು ಜನರನ್ನ ಒಟ್ಟಿಗೆ ನೋಡ್ತಿದ್ರೆ.. ಇದ್ಯಾವುದೋ ಜಾತ್ರೆ ಅನಿಸದೇ ಇರಲ್ಲ. ಆದ್ರೆ ಇದು ಜಯನಗರದ ವಿಜಯ ಕಾಲೇಜ್‌‌ನಲ್ಲಿ ನಡೆದ ಹೊಸ ಸಿನಿಮಾದ ಕಾಸ್ಟಿಂಗ್ ಕಾಲ್ & ಆಡಿಷನ್‌ಗೆ ಸೇರಿರೋ ಜನಸಾಗರ. ಸ್ವತಃ ಪ್ರಗತಿ ರಿಷಬ್ ಶೆಟ್ಟಿ ತಮ್ಮ ಟೀಂ ಜೊತೆ 20-65 ವರ್ಷ ವಯೋಮಾನದ ಪುರುಷರು ಹಾಗೂ 20-60 ವರ್ಷದೊಳಗಿನ ಮಹಿಳೆಯರನ್ನ ಆಡಿಷನ್‌ಗೆ ಆಹ್ವಾನಿಸಿತ್ತು. ಶೆಟ್ರ ಟೀಂನ ನಿರೀಕ್ಷೆ 400 ರಿಂದ 500 ಮಂದಿ ಇತ್ತು. ಆದ್ರೆ ಅಂದು ಅಲ್ಲಿ ನೆರೆದಿದ್ದು ಮಾತ್ರ ಬರೋಬ್ಬರಿ 4 ಸಾವಿರ ಮಂದಿಗೂ ಅಧಿಕ. ಈ ನಿರೀಕ್ಷೆಗೂ ಮೀರಿ ಬಂದ ಜನರನ್ನ ಕಂಡು ಪ್ರಗತಿ & ಶೆಟ್ರ ಟೀಂ ಹೃದಯ ತುಂಬಿ ಬಂದಂತಾಗಿದೆ.
ಸಿನಿಮಾವೊಂದರ ಆಡಿಷನ್‌ಗೆ ಈ ಪಾಟಿ ಜನ ಸೇರಿದ್ದು ಇದೇ ಮೊದಲು ಅನಿಸುತ್ತೆ. ಅಲ್ಲದೆ.. ರಿಷಬ್ ಶೆಟ್ಟಿ ಫಿಲಂಸ್ ಬ್ಯಾನರ್ನಡಿ ಈ ಹಿಂದೆ ಸ ಹಿ ಪ್ರಾ ಶಾಲೆ ಕಾಸರಗೋಡು, ಕಥಾ ಸಂಗಮ, ಹೀರೋ, ಪೆದ್ರೊ, ಶಿವಮ್ಮ, ಲಾಫಿಂಗ್ ಬುದ್ಧ ಸಿನಿಮಾಗಳು ತಯಾರಾಗಿದ್ದವು. ಅವುಗಳ ಸಕ್ಸಸ್ ಹಾಗೂ ಶೆಟ್ರ ಮೇಲೆ ಇರೋ ನಂಬಿಕೆಯೇ ಇಷ್ಟು ದೊಡ್ಡ ಮಟ್ಟದ ಜನಸಾಗರ ಹರಿದು ಬರುವಂತೆ ಮಾಡಿರೋದು ಹೆಮ್ಮೆಯ ವಿಷಯ. ಇದು ಶೆಟ್ರ ಜವಾಬ್ದಾರಿಯನ್ನ ದುಪ್ಪಟ್ಟು ಕೂಡ ಮಾಡಿರೋದು ಸುಳ್ಳಲ್ಲ.
ಬೀರಗಾನಹಳ್ಳಿ ಲಕ್ಷ್ಮೀನಾರಾಯಣ್, ಫಿಲ್ಮ್ ಬ್ಯೂರೋ ಹೆಡ್, ಗ್ಯಾರಂಟಿ ನ್ಯೂಸ್
