ಏಷ್ಯನ್ ಗೇಮ್ಸ್ ಹುಟ್ಟಿದ್ದು ಹೇಗೆ? ಭಾರತಕ್ಕೆ ಮೊದಲ ಆತಿಥ್ಯ ಸಿಕ್ಕಿದ್ದು ಯಾವಾಗ?

ಏಷ್ಯಾದ ಕ್ರೀಡಾ ಲೋಕದ ಬಹುದೊಡ್ಡ ಕ್ರೀಡಾಕೂಟವಾದ ಏಷ್ಯನ್ ಗೇಮ್ಸ್‌ನ 20ನೇ ಆವೃತ್ತಿಗೆ ಇಂದು ಜಪಾನ್‌ನ ಐಚಿ-ನಗೋಯಾದಲ್ಲಿ ಚಾಲನೆ ಸಿಗಲಿದೆ. ಸೆಪ್ಟೆಂಬರ್ 19ರಿಂದ ಅಕ್ಟೋಬರ್ 4ರವರೆಗೆ ನಡೆಯಲಿರುವ ಈ ಮಹಾಕ್ರೀಡಾಕೂಟದಲ್ಲಿ ಏಷ್ಯಾದ ವಿವಿಧ ದೇಶಗಳು ಮತ್ತು ಪ್ರದೇಶಗಳ ಕ್ರೀಡಾಪಟುಗಳು ಹಲವು ಕ್ರೀಡೆಗಳಲ್ಲಿ ಪದಕಕ್ಕಾಗಿ ಸೆಣಸಲಿದ್ದಾರೆ. ಜಪಾನ್ ಮೂರನೇ ಬಾರಿಗೆ ಏಷ್ಯನ್ ಗೇಮ್ಸ್‌ಗೆ ಆತಿಥ್ಯ ವಹಿಸುತ್ತಿರುವುದು ಈ ಆವೃತ್ತಿಯ ವಿಶೇಷತೆಗಳಲ್ಲೊಂದು.

ಏಷ್ಯನ್ ಗೇಮ್ಸ್ ಹುಟ್ಟಿದ್ದು ಹೇಗೆ?

ಏಷ್ಯನ್ ಗೇಮ್ಸ್ ಅಥವಾ ‘ಏಷ್ಯಾಡ್’ ಎನ್ನುವುದು ಏಷ್ಯಾ ಖಂಡದ ದೇಶಗಳ ಕ್ರೀಡಾಪಟುಗಳು ಭಾಗವಹಿಸುವ ಬಹು-ಕ್ರೀಡಾ ಕೂಟ. ಎರಡನೇ ವಿಶ್ವಯುದ್ಧದ ಬಳಿಕ ಏಷ್ಯಾದ ರಾಷ್ಟ್ರಗಳ ನಡುವೆ ಸ್ನೇಹ, ಸಹಕಾರ ಮತ್ತು ಶಾಂತಿಯ ಸಂದೇಶವನ್ನು ಕ್ರೀಡೆಯ ಮೂಲಕ ಬಲಪಡಿಸುವ ಉದ್ದೇಶದಿಂದ ಈ ಕೂಟದ ಪರಿಕಲ್ಪನೆ ರೂಪುಗೊಂಡಿತು. 1951ರಲ್ಲಿ ನವದೆಹಲಿಯಲ್ಲಿ ಮೊದಲ ಏಷ್ಯನ್ ಗೇಮ್ಸ್ ನಡೆದಿದ್ದು, ಕೇವಲ 11 ದೇಶಗಳು, ಆರು ಕ್ರೀಡೆಗಳು ಮತ್ತು 57 ಸ್ಪರ್ಧಾ ವಿಭಾಗಗಳು ಮಾತ್ರ ಇದ್ದವು.

ಆತಿಥೇಯ ಭಾರತ ಮೊದಲ ಆವೃತ್ತಿಯಲ್ಲೇ 15 ಚಿನ್ನ, 16 ಬೆಳ್ಳಿ ಹಾಗೂ 20 ಕಂಚು ಸೇರಿದಂತೆ ಒಟ್ಟು 51 ಪದಕಗಳನ್ನು ಗೆದ್ದು ಗಮನ ಸೆಳೆದಿತ್ತು.

ವರ್ಷದಿಂದ ವರ್ಷಕ್ಕೆ ವಿಸ್ತರಿಸಿದ ಏಷ್ಯಾಡ್

ಮೊದಲ ಆವೃತ್ತಿಯ ನಂತರ ಏಷ್ಯನ್ ಗೇಮ್ಸ್ ನಾಲ್ಕು ವರ್ಷಕ್ಕೊಮ್ಮೆ ನಡೆಯುತ್ತಾ ಬಂದಿದೆ. ಕೋವಿಡ್-19 ಸಾಂಕ್ರಾಮಿಕದ ಹಿನ್ನೆಲೆಯಲ್ಲಿ 2022ರ ಹ್ಯಾಂಗ್‌ಝೌ ಆವೃತ್ತಿ 2023ಕ್ಕೆ ಮುಂದೂಡಲ್ಪಟ್ಟಿತ್ತು. 2023ರಲ್ಲಿ ಭಾರತ 28 ಚಿನ್ನ, 38 ಬೆಳ್ಳಿ ಮತ್ತು 41 ಕಂಚು ಸೇರಿದಂತೆ ಒಟ್ಟು 107 ಪದಕಗಳನ್ನು ಗೆದ್ದು ಐತಿಹಾಸಿಕ ಸಾಧನೆ ಮಾಡಿತ್ತು.

1951ರಿಂದ 2023ರವರೆಗೆ ಭಾರತ ಒಟ್ಟು 779 ಏಷ್ಯನ್ ಗೇಮ್ಸ್ ಪದಕಗಳನ್ನು ಗೆದ್ದಿದೆ. ಈ ಪೈಕಿ ಅಥ್ಲೆಟಿಕ್ಸ್ ಭಾರತದ ಪ್ರಮುಖ ಪದಕ ಮೂಲವಾಗಿದ್ದು, ಶೂಟಿಂಗ್ ಕೂಡ ಗಮನಾರ್ಹ ಕೊಡುಗೆ ನೀಡಿದೆ. ಮಿಲ್ಖಾ ಸಿಂಗ್, ಜಸ್ಪಾಲ್ ರಾಣಾ, ನೀರಜ್ ಚೋಪ್ರಾ ಸೇರಿದಂತೆ ಹಲವು ಕ್ರೀಡಾ ದಿಗ್ಗಜರು ಏಷ್ಯನ್ ಗೇಮ್ಸ್‌ನಲ್ಲಿ ಭಾರತದ ಹೆಮ್ಮೆ ಹೆಚ್ಚಿಸಿದ್ದಾರೆ.

2026ರ ಏಷ್ಯನ್ ಗೇಮ್ಸ್ ವಿಶೇಷತೆ

ಐಚಿ-ನಗೋಯಾ ಏಷ್ಯನ್ ಗೇಮ್ಸ್‌ನಲ್ಲಿ 43 ಕ್ರೀಡೆಗಳ 469 ಪದಕ ಸ್ಪರ್ಧೆಗಳು ನಡೆಯಲಿವೆ. ಕೆಲವು ಹೊಸ ಕ್ರೀಡೆಗಳೂ ಈ ಬಾರಿ ಸೇರ್ಪಡೆಯಾಗಿವೆ. ಭಾರತದಿಂದ 503 ಕ್ರೀಡಾಪಟುಗಳು ವಿವಿಧ ಸ್ಪರ್ಧೆಗಳಲ್ಲಿ ಪಾಲ್ಗೊಳ್ಳುತ್ತಿದ್ದಾರೆ. ಅಥ್ಲೆಟಿಕ್ಸ್, ಶೂಟಿಂಗ್, ಬಾಕ್ಸಿಂಗ್, ಕುಸ್ತಿ, ಬ್ಯಾಡ್ಮಿಂಟನ್, ಕಬಡ್ಡಿ, ಹಾಕಿ ಹಾಗೂ ಕ್ರಿಕೆಟ್ ಸೇರಿದಂತೆ ಹಲವು ಕ್ರೀಡೆಗಳಲ್ಲಿ ಭಾರತ ಸ್ಪರ್ಧಿಸಲಿದೆ.

ಉದ್ಘಾಟನಾ ಸಮಾರಂಭದಲ್ಲಿ ಮನು ಭಾಕರ್ ಅವರೊಂದಿಗೆ ಕಬಡ್ಡಿ ಆಟಗಾರ ಪವನ್ ಸೆಹ್ರಾವತ್ ಭಾರತದ ಧ್ವಜಧಾರಿಗಳಾಗಿ ತಂಡವನ್ನು ಮುನ್ನಡೆಸಲಿದ್ದಾರೆ. ಆರಂಭದಲ್ಲಿ ಶಾಟ್‌ಪುಟ್ ಪಟು ತಜೀಂದರ್ ಪಾಲ್ ಸಿಂಗ್ ತೂರ್ ಅವರನ್ನು ಧ್ವಜಧಾರಿಯಾಗಿ ಆಯ್ಕೆ ಮಾಡಲಾಗಿತ್ತು. ಆದರೆ ಕೊನೆಯ ಕ್ಷಣದಲ್ಲಿ ಬದಲಾವಣೆ ಮಾಡಲಾಗಿದೆ.

1951ರಲ್ಲಿ 51 ಪದಕಗಳಿಂದ ಆರಂಭವಾದ ಭಾರತದ ಏಷ್ಯನ್ ಗೇಮ್ಸ್ ಪಯಣ, 2023ರಲ್ಲಿ 107 ಪದಕಗಳವರೆಗೆ ತಲುಪಿದೆ. ಇದೀಗ ಐಚಿ-ನಗೋಯಾದಲ್ಲಿ ನಡೆಯಲಿರುವ 20ನೇ ಆವೃತ್ತಿ ಭಾರತದ ಕ್ರೀಡಾ ಸಾಧನೆಯ ಮತ್ತೊಂದು ಮಹತ್ವದ ಅಧ್ಯಾಯವಾಗಲಿದೆ.