ಬಾಕ್ಸ್ ಆಫೀಸ್‌ನಲ್ಲಿ ಹೊಸ ಇತಿಹಾಸ ಬರೆದ ‘ಇರುಮುಡಿ’

ಬೆಂಗಳೂರು ಆ.29: ಸಿನಿಮಾದ ಬಜೆಟ್ ದೊಡ್ಡದಿದ್ದರೆ ಮಾತ್ರ ಬಾಕ್ಸ್ ಆಫೀಸ್‌ನಲ್ಲಿ ದೊಡ್ಡ ಯಶಸ್ಸು ಸಿಗುತ್ತದೆ ಎಂಬ ಮಾತಿಗೆ ‘ಇರುಮುಡಿ’ ಸಿನಿಮಾ ತಕ್ಕ ತಿರುಗೇಟು ನೀಡಿದೆ. ನೂರಾರು ಕೋಟಿ ರೂಪಾಯಿ ಬಜೆಟ್‌ನ ಪ್ಯಾನ್ ಇಂಡಿಯಾ ಸಿನಿಮಾಗಳ ನಡುವೆ ಕೇವಲ ಸುಮಾರು ರೂ. 40 ಕೋಟಿ ವೆಚ್ಚದಲ್ಲಿ ನಿರ್ಮಾಣವಾಗಿರುವ ಈ ಚಿತ್ರ, ಬಾಕ್ಸ್ ಆಫೀಸ್‌ನಲ್ಲಿ ಭರ್ಜರಿ ಪ್ರದರ್ಶನ ಮುಂದುವರಿಸಿದೆ.

ಆಗಸ್ಟ್ 21ರಂದು ತೆರೆಗೆ ಬಂದ ‘ಇರುಮುಡಿ’ ಸಿನಿಮಾ ಬಿಡುಗಡೆಯಾಗಿ ಎರಡನೇ ವಾರಕ್ಕೆ ಕಾಲಿಟ್ಟಿದ್ದು, ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ಪಡೆಯುತ್ತಿದೆ. ಇದೀಗ ಚಿತ್ರದ ಎರಡನೇ ಶುಕ್ರವಾರದ ಗಳಿಕೆ ಹಲವು ಬಿಗ್ ಬಜೆಟ್ ಸಿನಿಮಾಗಳ ದಾಖಲೆಗಳನ್ನು ಹಿಂದಿಕ್ಕಿದೆ.

ಎರಡನೇ ಶುಕ್ರವಾರವೂ ಭರ್ಜರಿ ಕಲೆಕ್ಷನ್

‘ಇರುಮುಡಿ’ ಸಿನಿಮಾ ಎರಡನೇ ಶುಕ್ರವಾರದಂದು ಸುಮಾರು ರೂ.12 ಕೋಟಿ ಗಳಿಕೆ ಮಾಡಿದೆ ಎನ್ನಲಾಗಿದೆ. ಈ ಮೂಲಕ ‘ಬಾಹುಬಲಿ 2’, ‘ಪುಷ್ಪ 2’ ಹಾಗೂ ‘ಕಲ್ಕಿ 2898 AD’ ಸಿನಿಮಾಗಳ ಎರಡನೇ ಶುಕ್ರವಾರದ ಗಳಿಕೆಯನ್ನು ಈ ಚಿತ್ರ ಮೀರಿಸಿದೆ.

‘ಬಾಹುಬಲಿ 2’ ತನ್ನ ಎರಡನೇ ಶುಕ್ರವಾರ ಸುಮಾರು ರೂ10.5 ಕೋಟಿ ಗಳಿಸಿದ್ದರೆ, ‘ಪುಷ್ಪ 2’ ಮತ್ತು ‘ಕಲ್ಕಿ 2898 AD’ ಕ್ರಮವಾಗಿ ಸುಮಾರು ರೂ.9 ಕೋಟಿ ಮತ್ತು ರೂ.7 ಕೋಟಿ ಗಳಿಸಿದ್ದವು ಎನ್ನಲಾಗಿದೆ. ‘RRR’ ಮಾತ್ರ ಎರಡನೇ ಶುಕ್ರವಾರ ಸುಮಾರು ರೂ.15 ಕೋಟಿ ಗಳಿಕೆಯೊಂದಿಗೆ ಈ ಪಟ್ಟಿಯಲ್ಲಿ ಮುಂದಿದೆ. ಹೀಗಾಗಿ ‘ಇರುಮುಡಿ’ ಇದೀಗ ‘RRR’ ದಾಖಲೆಯ ಸಮೀಪಕ್ಕೆ ಬಂದಿದೆ.

‘ಟಾಕ್ಸಿಕ್’ ಸ್ಪರ್ಧೆಯ ನಡುವೆಯೂ ಗೆಲುವಿನ ಓಟ

‘ಇರುಮುಡಿ’ ಬಿಡುಗಡೆಯಾದ ಸಮಯದಲ್ಲಿ ಯಶ್ ಅಭಿನಯದ ‘ಟಾಕ್ಸಿಕ್’ ಚಿತ್ರದಿಂದ ಪ್ರಬಲ ಸ್ಪರ್ಧೆ ಎದುರಾಗಿದೆ. ಆದರೂ ಚಿತ್ರ ತನ್ನ ಬಾಕ್ಸ್ ಆಫೀಸ್ ಓಟವನ್ನು ಯಶಸ್ವಿಯಾಗಿ ಮುಂದುವರಿಸಿದೆ.

ಕುಟುಂಬ ಸಮೇತ ಪ್ರೇಕ್ಷಕರು ಚಿತ್ರಮಂದಿರಗಳಿಗೆ ಆಗಮಿಸುತ್ತಿರುವುದು ಚಿತ್ರದ ಪ್ರಮುಖ ಪ್ಲಸ್ ಪಾಯಿಂಟ್ ಆಗಿದೆ. ಅದರಲ್ಲೂ ಸಿನಿಮಾದ ಬಗ್ಗೆ ಉತ್ತಮ ವರ್ಡ್ ಆಫ್ ಮೌತ್ ಪ್ರಚಾರ ಸಿಕ್ಕಿರುವುದು ಕಲೆಕ್ಷನ್ ಹೆಚ್ಚಲು ಪ್ರಮುಖ ಕಾರಣವಾಗಿದೆ ಎನ್ನಲಾಗುತ್ತಿದೆ.

ಅಯ್ಯಪ್ಪ ಭಕ್ತನ ಕಥೆ; ಹಲವು ಅಂಶಗಳ ಸಂಗಮ

‘ಇರುಮುಡಿ’ ಚಿತ್ರದಲ್ಲಿ ರವಿತೇಜ ನಾಯಕನಾಗಿ ನಟಿಸಿದ್ದಾರೆ. ಅಯ್ಯಪ್ಪ ಸ್ವಾಮಿ ಭಕ್ತನ ಕಥೆಯನ್ನು ಆಧರಿಸಿರುವ ಚಿತ್ರದಲ್ಲಿ ಅಪ್ಪ ಮಗಳ ಭಾವನಾತ್ಮಕ ಸಂಬಂಧಕ್ಕೂ ಪ್ರಮುಖ ಸ್ಥಾನ ನೀಡಲಾಗಿದೆ.

ಇದರ ಜೊತೆಗೆ ಸಸ್ಪೆನ್ಸ್, ಥ್ರಿಲ್ಲರ್, ಆಕ್ಷನ್ ಹಾಗೂ ಕಾಮಿಡಿ ಅಂಶಗಳನ್ನೂ ಸಿನಿಮಾದಲ್ಲಿ ಬೆರೆಸಲಾಗಿದೆ. ಕೃಪ ನಿರ್ವಾನ ನಿರ್ದೇಶನದ ಈ ಚಿತ್ರಕ್ಕೆ ಮೈತ್ರಿ ಮೂವಿ ಮೇಕರ್ಸ್ ಬಂಡವಾಳ ಹೂಡಿದೆ.

ಕಡಿಮೆ ಬಜೆಟ್‌ನಲ್ಲಿ ನಿರ್ಮಾಣಗೊಂಡರೂ ದೊಡ್ಡ ಸಿನಿಮಾಗಳಿಗೆ ಸೆಡ್ಡು ಹೊಡೆದು ಮುನ್ನುಗ್ಗುತ್ತಿರುವ ‘ಇರುಮುಡಿ’, ಬಾಕ್ಸ್ ಆಫೀಸ್‌ನಲ್ಲಿ ಇನ್ನಷ್ಟು ದಾಖಲೆಗಳನ್ನು ನಿರ್ಮಿಸುತ್ತದೆಯೇ ಎಂಬ ಕುತೂಹಲ ಇದೀಗ ಸಿನಿಪ್ರಿಯರಲ್ಲಿ ಮೂಡಿದೆ.