ಚೆನ್ನೈ, ಆಗಸ್ಟ್ 04: ತಮಿಳುನಾಡು ವಿರೋಧ ಪಕ್ಷದ ನಾಯಕ ಉದಯನಿಧಿ ಸ್ಟಾಲಿನ್ (Udhayanidhi Stalin) ಅವರ ದಿಢೀರ್ ಬಂಧನದ ಬೆನ್ನಲ್ಲೇ, ‘ಟಿವಿಎಕ್’ (TVK) ಸರ್ಕಾರದ ಮುಖ್ಯಮಂತ್ರಿ ವಿಜಯ್ (CM Vijay) ವಿರುದ್ಧ ಡಿಎಂಕೆ ನಾಯಕ ಎಂ.ಕೆ. ಸ್ಟಾಲಿನ್ (MK Stalin) ಅತ್ಯಂತ ಖಡಕ್ ಹಾಗೂ ಆಕ್ರೋಶಭರಿತ ವಾಗ್ದಾಳಿ ನಡೆಸಿದ್ದಾರೆ.
ಏಕೆ ಈ ಬಂಧನ? ವಿವಾದವೇನು?
ನಟಿ ತ್ರಿಶಾ (Trisha) ಕುರಿತು ಆಕ್ಷೇಪಾರ್ಹ ಹೇಳಿಕೆ ನೀಡಿದ ಆರೋಪದ ಮೇಲೆ ಉದಯನಿಧಿ ಅವರನ್ನು ಪೊಲೀಸರು ಬಂಧಿಸಿದ್ದರು. ತಂಜಾವೂರಿನಲ್ಲಿ ಕಾವೇರಿ ನೀರು ಹಂಚಿಕೆ ವಿಚಾರವಾಗಿ ವಿಜಯ್ ಸರ್ಕಾರದ ವಿರುದ್ಧ ಡಿಎಂಕೆ ಹಮ್ಮಿಕೊಂಡಿದ್ದ ಪ್ರತಿಭಟನೆಯಲ್ಲಿ ಉದಯನಿಧಿ ಸ್ಟಾಲಿನ್ ಮಾತನಾಡಿದ್ದರು. ಈ ವೇಳೆ ಅವರು ಮುಖ್ಯಮಂತ್ರಿ ವಿಜಯ್ ಅವರ ಆಪ್ತ ಸ್ನೇಹಿತೆ ನಟಿ ತ್ರಿಶಾ ಅವರನ್ನು ಪರೋಕ್ಷವಾಗಿ ಗುರಿಯಾಗಿಸಿ ದ್ವಂದ್ವಾರ್ಥದ ಮಾತುಗಳನ್ನಾಡಿದ್ದಾರೆ ಎಂದು ಆರೋಪಿಸಿ ಟಿವಿಎಕ್ ಮಹಿಳಾ ಘಟಕ ದೂರು ನೀಡಿತ್ತು. ಇದರ ಹಿನ್ನೆಲೆ ಪೊಲೀಸರು ಕಾರ್ಯಾಚರಣೆ ನಡೆಸಿ, ಉದಯನಿಧಿ ಅವರನ್ನು ಬಂಧಿಸಿದ್ದರು.
ಸ್ಟಾಲಿನ್ ಖಡಕ್ ವಾಗ್ದಾಳಿ
ಎಂ.ಕೆ. ಸ್ಟಾಲಿನ್ ಅವರು, ಕಾವೇರಿಯಲ್ಲಿ ತಮಿಳುನಾಡಿನ ಹಕ್ಕುಗಳನ್ನು ಸ್ಥಾಪಿಸಲು ಯಾವುದೇ ಸುಳಿವು ಇಲ್ಲದ ಮತ್ತು ಮೇಕೆದಾಟು (Mekedatu) ಅಣೆಕಟ್ಟನ್ನು ತಡೆಯಲು ಯಾವುದೇ ಧೈರ್ಯ ಇಲ್ಲದ ಟಿವಿಕೆ ಸರ್ಕಾರದ ಉದಾಸೀನ ಮತ್ತು ದುರಹಂಕಾರದ ಮನೋಭಾವದ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
“ಈ ಅಸಮರ್ಥ ಡಮ್ಮಿ ಮುಖ್ಯಮಂತ್ರಿಗೆ ಕಾವೇರಿ ನೀರು ತರಲು ಸಾಧ್ಯವಿಲ್ಲ. ಮೇಕೆದಾಟು ಯೋಜನೆಯನ್ನು ತಡೆಯಲು ಧ್ವನಿ ಎತ್ತಲೂ ಆಗುತ್ತಿಲ್ಲ. ರೈತರು ಸಂಕಷ್ಟದಲ್ಲಿದ್ದರೆ, ಈ ಸರ್ಕಾರ ವಿಜಯ್ ಅಭಿನಯದ ‘ಜನ ನಾಯಗನ್’ ಸಿನಿಮಾದ ವಿಮರ್ಶೆಗಳ ಬಗ್ಗೆ ಚಿಂತಿಸುತ್ತಿದೆ” ಎಂದು ಸ್ಟಾಲಿನ್ ಕಿಡಿಕಾರಿದ್ದಾರೆ.
ಅವರು ಮತ್ತಷ್ಟು ಆಕ್ರೋಶ ವ್ಯಕ್ತಪಡಿಸಿ, “ಕಾವೇರಿ ನೀರು ಹಂಚಿಕೆ ವಿಚಾರದಲ್ಲಿ ಮತ್ತು ಕರ್ನಾಟಕದ ಮೇಕೆದಾಟು ಯೋಜನೆ ತಡೆಯುವಲ್ಲಿ ಸರ್ಕಾರ ಅನುಭವಿಸಿರುವ ದೊಡ್ಡ ವೈಫಲ್ಯವನ್ನು ಮುಚ್ಚಿಹಾಕಲು ಪೊಲೀಸರನ್ನು ದುರ್ಬಳಕೆ ಮಾಡಿಕೊಳ್ಳಲಾಗುತ್ತಿದೆ. ಆಡಳಿತಗಾರರು ಅಹಂಕಾರವೇ ವಿನಾಶಕ್ಕೆ ಹಾದಿ ಎಂಬುದನ್ನು ನೆನಪಿಡಬೇಕು” ಎಂದು ಎಚ್ಚರಿಸಿದ್ದಾರೆ.
ಬಂಧನ ರಾಜಕೀಯದ ಆರೋಪ
ಅಧಿಕಾರಕ್ಕೆ ಬಂದಾಗಿನಿಂದ ಮುಖ್ಯಮಂತ್ರಿ ವಿಜಯ್ ಅವರು ತಮ್ಮನ್ನು ಮತ್ತು ತಮ್ಮ ಸರ್ಕಾರವನ್ನು ಟೀಕಿಸುವವರನ್ನು ಬಂಧಿಸುವತ್ತ ಗಮನ ಹರಿಸುತ್ತಿದ್ದಾರೆ ಎಂದು ಸ್ಟಾಲಿನ್ ಆರೋಪಿಸಿದ್ದಾರೆ. “ಅವರು ಟ್ವೀಟ್ ಮಾಡುವವರನ್ನು ಅಥವಾ ವೀಡಿಯೊಗಳಲ್ಲಿ ಮಾತನಾಡುವವರನ್ನು ಬಂಧಿಸುತ್ತಿದ್ದಾರೆ. ಶಾಸಕರಾದ ಅನಿತಾ ರಾಧಾಕೃಷ್ಣನ್ ಮತ್ತು ಮಾರ್ಕಂಡೇಯನ್ ಅವರನ್ನು ಸಹ ಬಂಧಿಸಲಾಯಿತು” ಎಂದು ಅವರು ನುಡಿದಿದ್ದಾರೆ. ತಮಿಳುನಾಡಿನ ಜನರು ಈ ಅನ್ಯಾಯವನ್ನು ಎದುರಿಸುವ ದಿಟ್ಟತನ ಹೊಂದಿದ್ದಾರೆ ಎಂದು ಸ್ಟಾಲಿನ್ ಧೈರ್ಯ ತುಂಬಿದರು.
ಹೈಕೋರ್ಟ್ ಮಧ್ಯಪ್ರವೇಶ
ಈ ಬೆಳವಣಿಗೆಯ ನಡುವೆ, ಮದ್ರಾಸ್ ಹೈಕೋರ್ಟ್ (Madras High Court) ಮಧ್ಯಪ್ರವೇಶಿಸಿ, ವಿಚಾರಣೆಯ ನಂತರ ಉದಯನಿಧಿ ಅವರನ್ನು ಇಂದೇ ಬಿಡುಗಡೆ ಮಾಡಲು ಆದೇಶಿಸಿದೆ, ಆದರೆ ಡಿಎಂಕೆ ಮತ್ತು ಟಿವಿಎಕ್ ಬೆಂಬಲಿಗರ ನಡುವೆ ರಾಜಕೀಯ ಸಮರ ತೀವ್ರಗೊಂಡಿದೆ. ಕೋರ್ಟ್ ತೀರ್ಪು ಡಿಎಂಕೆ ಪಾಳಯದಲ್ಲಿ ಸಮಾಧಾನ ಮೂಡಿಸಿದೆ.
ಉದಯನಿಧಿ ಸ್ಟಾಲಿನ್ ಅವರ ಬಂಧನ ಮತ್ತು ನಂತರದ ಬಿಡುಗಡೆ ತಮಿಳುನಾಡು ರಾಜಕೀಯದಲ್ಲಿ ಹೊಸ ತಿರುವು ನೀಡಿದೆ. ವಿಜಯ್ ಅವರು ಸಿನಿಮಾ ಕ್ಷೇತ್ರದಿಂದ ರಾಜಕೀಯಕ್ಕೆ ಕಾಲಿಟ್ಟ ಮೇಲೆ ಇದು ಮೊದಲ ಬಾರಿಗೆ ಎದುರಾದ ದೊಡ್ಡ ವಿವಾದವಾಗಿದೆ. ಕಾವೇರಿ ನೀರು ವಿವಾದ, ಮೇಕೆದಾಟು ಯೋಜನೆಯಂತಹ ಪ್ರಮುಖ ಸಮಸ್ಯೆಗಳನ್ನು ಮುಂದಿಟ್ಟುಕೊಂಡು ಡಿಎಂಕೆ ಸರ್ಕಾರದ ವಿರುದ್ಧ ಪ್ರಚಾರ ಚಟುವಟಿಕೆಗಳನ್ನು ತೀವ್ರಗೊಳಿಸುವ ಸಾಧ್ಯತೆಯಿದೆ.
ತ್ರಿಶಾ ವಿವಾದದಿಂದ ಹಿಡಿದು ಕಾವೇರಿ ನೀರು ಹಂಚಿಕೆಯವರೆಗೆ, ಈ ಘಟನೆಯು ತಮಿಳುನಾಡಿನ ರಾಜಕೀಯ ಬಿಸಿ ಹೆಚ್ಚಿಸಿದೆ. ಎಂ.ಕೆ. ಸ್ಟಾಲಿನ್ ಅವರ ‘ಡಮ್ಮಿ ಸಿಎಂ’ ಹಾಗೂ ‘ರೀಲ್ಸ್ ಕ್ರಿಯೇಟರ್’ ಎಂಬ ಆರೋಪಗಳು ರಾಜ್ಯದ ರಾಜಕೀಯ ವಲಯದಲ್ಲಿ ಸಾಕಷ್ಟು ಚರ್ಚೆಯನ್ನು ಹುಟ್ಟುಹಾಕಿವೆ.
