ನವದೆಹಲಿ: ಜಾಗತಿಕ ರಕ್ಷಣಾ ವಲಯದಲ್ಲಿ ಸೂಪರ್ ಪವರ್ ಆಗಿ ಹೊರಹೊಮ್ಮುತ್ತಿರುವ ಭಾರತದ ಆಯುಧಾಗಾರಕ್ಕೆ ಈಗ ಮತ್ತೊಂದು ಅತ್ಯಾಧುನಿಕ ತಂತ್ರಜ್ಞಾನ ಸೇರ್ಪಡೆಯಾಗಿದೆ. ಈಗಾಗಲೇ ಆಕಾಶ್, ಬ್ರಹ್ಮೋಸ್, ಅಗ್ನಿ ಮತ್ತು ಎಸ್-400 ನಂತಹ ಶಕ್ತಿಶಾಲಿ ಕ್ಷಿಪಣಿ (Missile) ವ್ಯವಸ್ಥೆಗಳನ್ನು ಹೊಂದಿರುವ ಭಾರತದ ವಾಯುಪಡೆಗೆ (IAF), ಇದೀಗ ಸ್ವದೇಶಿ ನಿರ್ಮಿತ ‘ಅರುದ್ರ’ ಮಧ್ಯಮ ಶ್ರೇಣಿಯ ರೇಡಾರ್ (Medium Power Radar) ವ್ಯವಸ್ಥೆ ಅಧಿಕೃತವಾಗಿ ಸೇರ್ಪಡೆಯಾಗುತ್ತಿದೆ.
ಏನಿದು ಅರುದ್ರ ರೇಡಾರ್ ಶಕ್ತಿ?
ಅರುದ್ರ ಎಂಬುದು ಭಾರತದ ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (DRDO) ವಿನ್ಯಾಸಗೊಳಿಸಿ, ಭಾರತ್ ಎಲೆಕ್ಟ್ರಾನಿಕ್ಸ್ ಲಿಮಿಟೆಡ್ (BEL) ನಿರ್ಮಿಸಿರುವ ಅತ್ಯಾಧುನಿಕ 4D ರೇಡಾರ್ ವ್ಯವಸ್ಥೆಯಾಗಿದೆ. ಇದು ಶತ್ರು ದೇಶಗಳ ಕಣ್ಣುತಪ್ಪಿಸಿ ಬರುವ ಸ್ಟೆಲ್ತ್ ಯುದ್ಧ ವಿಮಾನಗಳು, ಹೆಲಿಕಾಪ್ಟರ್ಗಳು, ಕ್ಷಿಪಣಿಗಳು ಹಾಗೂ ಸಣ್ಣ ಗಾತ್ರದ ಡ್ರೋನ್ ಗಳನ್ನು ಅತ್ಯಂತ ನಿಖರವಾಗಿ ಪತ್ತೆಹಚ್ಚುವ ಸಾಮರ್ಥ್ಯ ಹೊಂದಿದೆ.
ಅರುದ್ರನ ಪ್ರಮುಖ ಸಾಮರ್ಥ್ಯಗಳು:
• ದೂರದೃಷ್ಟಿ ಶಕ್ತಿ: ಗಡಿಯ ಸಮೀಪ ಹಾರಾಡುವ ಶತ್ರುಗಳ ಯಾವುದೇ ವಾಯುಪಡೆಯ ಚಟುವಟಿಕೆಗಳನ್ನು ಸುಮಾರು 100 ರಿಂದ 300 ಕಿಲೋಮೀಟರ್ ದೂರದಲ್ಲಿರುವಾಗಲೇ ಇದು ಪತ್ತೆಹಚ್ಚಬಲ್ಲದು.
• ಡ್ರೋನ್ ಗಳಿಗೆ ಸಿಂಹಸ್ವಪ್ನ: ಇತ್ತೀಚಿನ ದಿನಗಳಲ್ಲಿ ಗಡಿಭಾಗದಲ್ಲಿ ಡ್ರೋನ್ ದಾಳಿಗಳು ಹೆಚ್ಚಾಗುತ್ತಿದ್ದು, ಅಂತಹ ಸಣ್ಣ ಗಾತ್ರದ ಡ್ರೋನ್ಗಳನ್ನು ಕೂಡ ಗುರುತಿಸಿ, ವಾಯುಪಡೆಯ ಕ್ಷಿಪಣಿ ವ್ಯವಸ್ಥೆಗೆ ಸಂದೇಶ ರವಾನಿಸಿ ಅವುಗಳನ್ನು ಹೊಡೆದುರುಳಿಸಲು ಅರುದ್ರ ನೆರವಾಗುತ್ತದೆ.
• ಬಹುಮುಖಿ ಕಾರ್ಯಾಚರಣೆ: ಒಂದೇ ಸಮಯದಲ್ಲಿ ಹಲವು ಗುರಿಗಳನ್ನು (Targets) ಏಕಕಾಲದಲ್ಲಿ ಪತ್ತೆಹಚ್ಚಿ, ಅವುಗಳ ವೇಗ ಮತ್ತು ಚಲಿಸುವ ದಿಕ್ಕನ್ನು ಕಣ್ಗಾವಲಿಡುವ ಅತ್ಯಾಧುನಿಕ ತಂತ್ರಜ್ಞಾನ ಇದಕ್ಕಿದೆ.
ಅಮೆರಿಕಾ, ರಷ್ಯಾ ಮತ್ತು ಚೀನಾದಂತಹ ಬಲಿಷ್ಠ ದೇಶಗಳು ಹೊಂದಿರುವ ರೇಡಾರ್ ತಂತ್ರಜ್ಞಾನಕ್ಕೆ ಪೈಪೋಟಿ ನೀಡುವಂತೆ ಭಾರತ ಇದನ್ನು ‘ಮೇಕ್ ಇನ್ ಇಂಡಿಯಾ’ ಯೋಜನೆಯಡಿ ಯಶಸ್ವಿಯಾಗಿ ಸಿದ್ಧಪಡಿಸಿದೆ. ಗಡಿಯಲ್ಲಿ ಶತ್ರುಗಳು ಭಾರತದ ಮೇಲೆ ದಾಳಿ ಮಾಡಲು ಯತ್ನಿಸಿದರೆ, ಅರುದ್ರ ರೇಡಾರ್ನ ಕಣ್ಣು ತಪ್ಪಿಸಿ ಬರುವುದು ಅಸಾಧ್ಯ ಎನ್ನಲಾಗಿದೆ.
ಮುಂದಿನ ಸಿದ್ಧತೆ:
ಇದರೊಂದಿಗೆ ಭಾರತೀಯ ವಾಯುಪಡೆಯು ತನ್ನ ರಕ್ಷಣಾ ಜಾಲವನ್ನು ಮತ್ತಷ್ಟು ಬಲಪಡಿಸುತ್ತಿದ್ದು, ಗಡಿಭಾಗಗಳಲ್ಲಿ ಕಠಿಣ ಪರಿಸ್ಥಿತಿಗಳಲ್ಲೂ ಸುಲಭವಾಗಿ ಸಂಚರಿಸಬಲ್ಲ ‘ನೆಕ್ಸ್ಟ್-ಜೆನ್ ಆರ್ಮರ್ಡ್ ವೆಹಿಕಲ್’ (Next-Gen Armored Vehicles) ಮತ್ತು ಮೊಬೈಲ್ ರೇಡಾರ್ ವ್ಯವಸ್ಥೆಗಳ ಅಭಿವೃದ್ಧಿಗೂ ಮುಂದಾಗಿದೆ. ಇದು ಭಾರತೀಯ ರಕ್ಷಣಾ ವಲಯ ಸ್ವಾವಲಂಬನೆಯತ್ತ ಇಟ್ಟ ಅತ್ಯಂತ ಹೆಮ್ಮೆಯ ಹೆಜ್ಜೆಯಾಗಿದೆ. ಇದನ್ನು ಹೊರ ಜಗತ್ತಿಗೂ ಕೂಡ ಮಾರಲು ಸಿದ್ದವಾಗಿದೆ.
