ಜಾಗತಿಕ ಫಾಸ್ಟ್ಫುಡ್ ಉದ್ಯಮದಲ್ಲಿ ಪ್ರಮುಖ ಬೆಳವಣಿಗೆಯೊಂದರಲ್ಲಿ, ಯಮ್! ಬ್ರಾಂಡ್ಸ್ ಕಂಪನಿ ತನ್ನ ಪ್ರಸಿದ್ಧ ಪಿಜ್ಜಾ ಹಟ್ ವ್ಯವಹಾರವನ್ನು ಎರಡು ಪ್ರತ್ಯೇಕ ಒಪ್ಪಂದಗಳ ಮೂಲಕ ಒಟ್ಟು 2.7 ಬಿಲಿಯನ್ ಡಾಲರ್ ಅಂದರೆ ಸುಮಾರು ₹25,400 ಕೋಟಿ ಗಳಿಗೂ ಅಧಿಕ ರೂ. ಗೆ ಮಾರಾಟ ಮಾಡಲು ನಿರ್ಧರಿಸಿದೆ.
ಪಿಜ್ಜಾ ಹಟ್ ವ್ಯವಹಾರವನ್ನು ಚೀನಾದ ಹೊರಗಿನ ಮಾರುಕಟ್ಟೆ ಮತ್ತು ಚೀನಾ ಮಾರುಕಟ್ಟೆ ಎಂದು ಎರಡು ಭಾಗಗಳಾಗಿ ವಿಂಗಡಿಸಿ ಮಾರಾಟ ಮಾಡಲಾಗುತ್ತಿದೆ. ಈ ನಿರ್ಧಾರವು ಯಮ್ ಬ್ರಾಂಡ್ಸ್ನ ಭವಿಷ್ಯದ ವ್ಯಾಪಾರ ತಂತ್ರದ ಪ್ರಮುಖ ಭಾಗವಾಗಿದೆ ಎಂದು ಹೇಳಲಾಗುತ್ತಿದೆ.
ಚೀನಾದ ಹೊರಗಿನ ಪಿಜ್ಜಾ ಹಟ್ ವ್ಯವಹಾರವನ್ನು ಅಮೆರಿಕ ಮೂಲದ ಖಾಸಗಿ ಇಕ್ವಿಟಿ ಸಂಸ್ಥೆ ಲಾಂಗ್ರೇಂಜ್ ಕ್ಯಾಪಿಟಲ್ ಸುಮಾರು 1.5 ಬಿಲಿಯನ್ ಡಾಲರ್ಗೆ ಖರೀದಿಸುತ್ತಿದೆ. ಚೀನಾದಲ್ಲಿನ ಪಿಜ್ಜಾ ಹಟ್ ಉದ್ಯಮವನ್ನು ಅಲ್ಲಿನ ಪ್ರಮುಖ ರೆಸ್ಟೋರೆಂಟ್ ನಿರ್ವಾಹಕ ಸಂಸ್ಥೆಯಾದ ಯಮ್ ಚೀನಾ ಹೋಲ್ಡಿಂಗ್ಸ್ ಸುಮಾರು 1.2 ಬಿಲಿಯನ್ ಡಾಲರ್ಗೆ ಖರೀದಿಸುತ್ತಿದೆ. ಇಲ್ಲಿ ಯಮ್ ಚೀನಾ ಹೋಲ್ಡಿಂಗ್ಸ್ ಸಂಸ್ಥೆಯು ಯಮ್ ಬ್ರ್ಯಾಂಡ್ಸ್ನ ಎಲ್ಲಾ ಉತ್ಪನ್ನಗಳ ಮಾಸ್ಟರ್ ಫ್ರಾಂಚೈಸಿಯಾಗಿತ್ತು. ಈಗ ಸಂಪೂರ್ಣ ಚೀನಾ ಬ್ಯುಸಿನೆಸ್ನ ಮಾಲಕತ್ವವನ್ನೇ ಪಡೆದುಕೊಂಡಂತಾಗಿದೆ.
ತೆರಿಗೆ ಮತ್ತು ಇತರ ಶುಲ್ಕಗಳನ್ನು ಕಡಿತ ಮಾಡಿದ ಬಳಿಕ ಯಮ್ ಬ್ರಾಂಡ್ಸ್ಗೆ ಈ ಮಾರಾಟದಿಂದ ಸುಮಾರು 2.3 ಬಿಲಿಯನ್ ಡಾಲರ್ ನಗದು ಲಾಭ ಸಿಗುವ ನಿರೀಕ್ಷೆಯಿದೆ. 2026ರ ಮೂರನೇ ತ್ರೈಮಾಸಿಕದಲ್ಲಿ ಈ ಮಾರಾಟ ಪ್ರಕ್ರಿಯೆ ಪೂರ್ಣಗೊಳ್ಳುವ ಸಾಧ್ಯತೆ ಇದೆ.
ಪಿಜ್ಜಾ ಹಟ್ ಮಾರಾಟಕ್ಕೆ ಕಾರಣವೇನು?
ಪಿಜ್ಜಾ ಹಟ್ ಮಾರಾಟಕ್ಕೆ ಪ್ರಮುಖ ಕಾರಣಗಳಲ್ಲಿ ಜಾಗತಿಕ ಮಟ್ಟದ ತೀವ್ರ ಸ್ಪರ್ಧೆಯೂ ಒಂದು. ವಿಶೇಷವಾಗಿ ಡೊಮಿನೋಸ್ನಂತಹ ಬ್ರಾಂಡ್ಗಳ ಪೈಪೋಟಿ, ಆಹಾರ ಡೆಲಿವರಿ ಆ್ಯಪ್ಗಳ ಬೆಳವಣಿಗೆ ಹಾಗೂ ಬದಲಾಗುತ್ತಿರುವ ಗ್ರಾಹಕರ ಆದ್ಯತೆಗಳು ಪಿಜ್ಜಾ ಹಟ್ನ ಬೆಳವಣಿಗೆಯ ಮೇಲೆ ಪರಿಣಾಮ ಬೀರಿವೆ.
ಇದರ ಜೊತೆಗೆ ಕಚ್ಚಾ ವಸ್ತುಗಳ ಬೆಲೆ ಏರಿಕೆ, ಹಣದುಬ್ಬರ ಮತ್ತು ನಿರ್ವಹಣಾ ವೆಚ್ಚ ಹೆಚ್ಚಳವೂ ಫಾಸ್ಟ್ಫುಡ್ ಉದ್ಯಮಕ್ಕೆ ಸವಾಲಾಗಿ ಪರಿಣಮಿಸಿದೆ. ಇತ್ತೀಚಿನ ವರ್ಷಗಳಲ್ಲಿ ಆರೋಗ್ಯಕರ ಆಹಾರದತ್ತ ಗ್ರಾಹಕರ ಒಲವು ಹೆಚ್ಚುತ್ತಿರುವುದು ಕೂಡ ಈ ಕ್ಷೇತ್ರದ ಮೇಲೆ ಪ್ರಭಾವ ಬೀರಿದೆ.
ಪಿಜ್ಜಾ ಹಟ್ ಮಾರಾಟದ ಬಳಿಕ ಯಮ್ ಬ್ರಾಂಡ್ಸ್ ತನ್ನ ಹೆಚ್ಚಿನ ಲಾಭ ತರುವ ಬ್ರಾಂಡ್ಗಳಾದ KFC ಮತ್ತು ಟ್ಯಾಕೋ ಬೆಲ್ ಮೇಲೆ ಹೆಚ್ಚು ಗಮನ ಕೇಂದ್ರೀಕರಿಸಲು ಯೋಜಿಸಿದೆ.
ಈ ಬೆಳವಣಿಗೆಯ ಬೆನ್ನಲ್ಲೇ ಯಮ್ ಬ್ರಾಂಡ್ಸ್ 4 ಬಿಲಿಯನ್ ಡಾಲರ್ ಮೌಲ್ಯದ ಷೇರು ಮರು ಖರೀದಿ ಯೋಜನೆಯನ್ನೂ ಘೋಷಿಸಿದೆ. ಇದರಿಂದ ಹೂಡಿಕೆದಾರರಿಗೆ ಹೆಚ್ಚಿನ ಮೌಲ್ಯ ಸೃಷ್ಟಿಸುವ ಉದ್ದೇಶವನ್ನು ಕಂಪನಿ ಹೊಂದಿದೆ.
ಭಾರತದಲ್ಲಿ ಪಿಜ್ಜಾ ಹಟ್ ಫ್ರಾಂಚೈಸಿ ವ್ಯವಹಾರವನ್ನು ದೇವಯಾನಿ ಇಂಟರ್ನ್ಯಾಷನಲ್ ಮತ್ತು ಸಫೈರ್ ಫುಡ್ಸ್ ಸಂಸ್ಥೆಗಳು ನಿರ್ವಹಿಸುತ್ತಿವೆ. ಜಾಗತಿಕ ಮಾಲೀಕತ್ವ ಬದಲಾವಣೆಯಿಂದ ಭಾರತದ ದಿನನಿತ್ಯದ ಕಾರ್ಯಾಚರಣೆಗೆ ತಕ್ಷಣದ ದೊಡ್ಡ ಪರಿಣಾಮ ಬೀರುವ ಸಾಧ್ಯತೆ ಕಡಿಮೆ. ಆದರೆ ಭವಿಷ್ಯದಲ್ಲಿ ಹೊಸ ತಂತ್ರಜ್ಞಾನ ಮತ್ತು ವಿಸ್ತರಣಾ ಯೋಜನೆಗಳು ಭಾರತೀಯ ಮಾರುಕಟ್ಟೆಯ ಮೇಲೂ ಪ್ರಭಾವ ಬೀರಬಹುದು.
