ನವದೆಹಲಿ, ಮೇ 20: ಇತ್ತೀಚೆಗೆ ಅಧಿಕ ರಕ್ತದೊತ್ತಡ (High Blood Pressure) ಸಮಸ್ಯೆಯಿಂದ ಬಳಲುತ್ತಿರುವವರ ಸಂಖ್ಯೆ ಹೆಚ್ಚುತ್ತಿದೆ. ವೈದ್ಯಕೀಯ ಲೋಕದಲ್ಲಿ ಇದನ್ನು “ಸೈಲೆಂಟ್ ಕಿಲ್ಲರ್” (Silent Killer) ಎಂದೇ ಕರೆಯಲಾಗುತ್ತದೆ. ಏಕೆಂದರೆ ಇದು ಯಾವುದೇ ಲಕ್ಷಣಗಳು ಕಾಣಿಸಕೊಳ್ಳೋದೆ, ಮೌನವಾಗಿ ನಿಮ್ಮ ಹೃದಯ, ಮಿದುಳು ಮತ್ತು ಮೂತ್ರಪಿಂಡಗಳನ್ನು ಹಾನಿಗೊಳಿಸುತ್ತದೆ. ಕೆಲಸದ ಒತ್ತಡ, ಅನಿಯಮಿತ ಆಹಾರ ಪದ್ಧತಿ ಮತ್ತು ಆಧುನಿಕ ಜೀವನಶೈಲಿಯಿಂದಾಗಿ ಈ ಸಮಸ್ಯೆ ಮಹಾಮಾರಿಯಾಗಿ ಪರಿಣಮಿಸುತ್ತಿದೆ. ಆದರೆ, ನಮ್ಮ ದೈನಂದಿನ ಕೆಲವು ತಪ್ಪು ಅಭ್ಯಾಸಗಳನ್ನು ಗುರುತಿಸಿ ತಿದ್ದುಪಡಿ ಮಾಡಿಕೊಳ್ಳುವ ಮೂಲಕ ನಾವು ಈ ಅಪಾಯವನ್ನು ತಪ್ಪಿಸಬಹುದು.
ನಿಮ್ಮ ರಕ್ತದೊತ್ತಡವನ್ನು ಸದ್ದಿಲ್ಲದೆ ಹೆಚ್ಚಿಸುವ ಪ್ರಮುಖ 5 ದೈನಂದಿನ ಅಭ್ಯಾಸಗಳು ಇಲ್ಲಿವೆ.
1. ದೀರ್ಘಕಾಲ ಕುಳಿತುಕೊಳ್ಳುವುದು (Sedentary Lifestyle)
ಒಂದೇ ಸ್ಥಳದಲ್ಲಿ ಕುಳಿತುಕೊಳ್ಳುವುದು, ಸಾಕಷ್ಟು ದೈಹಿಕ ಚಟುವಟಿಕೆ ಇಲ್ಲದಿರುವುದು ರಕ್ತದೊತ್ತಡಕ್ಕೆ ಪ್ರಮುಖ ಕಾರಣಗಳಲ್ಲಿ ಒಂದಾಗಿದೆ. ನೀವು ಕಚೇರಿಯಲ್ಲಿ ಕೆಲಸ ಮಾಡುವವರಾಗಿದ್ದರೆ ಅಥವಾ ಹೆಚ್ಚು ಸಮಯ ಮನೆಯಲ್ಲೇ ಕುಳಿತುಕೊಳ್ಳುತ್ತಿದ್ದರೆ, ನಿಮ್ಮ ರಕ್ತದ ಹರಿವು ಸರಿಯಾಗಿ ನಡೆಯುವುದಿಲ್ಲ. ಇದರಿಂದ ಬೊಜ್ಜು ಮತ್ತು ಚಯಾಪಚಯ ಸಮಸ್ಯೆಗಳು ಉಂಟಾಗಿ, ಅಂತಿಮವಾಗಿ ರಕ್ತದೊತ್ತಡ ಏರಿಕೆಗೆ ಕಾರಣವಾಗುತ್ತದೆ. ಪ್ರತಿ 30 ನಿಮಿಷಗಳಿಗೊಮ್ಮೆ ಎದ್ದು ನಡೆದಾಡುವುದು, ಸಣ್ಣ ವ್ಯಾಯಾಮಗಳನ್ನು ಮಾಡುವುದು ಅಭ್ಯಾಸ ಮಾಡಿಕೊಳ್ಳಿ.
2. ಅತಿಯಾದ ಉಪ್ಪು ಸೇವನೆ (Excess Salt Intake)
ನಿಮ್ಮ ಊಟದಲ್ಲಿ ರುಚಿಗಾಗಿ ಹಾಕುವ ಹೆಚ್ಚುವರಿ ಉಪ್ಪು, ರಕ್ತನಾಳಗಳ ಒಳಗಿನ ಒತ್ತಡವನ್ನು ತೀವ್ರಗೊಳಿಸುತ್ತದೆ. ಹೆಚ್ಚಿನ ಸೋಡಿಯಂ ದೇಹದಲ್ಲಿ ನೀರನ್ನು ಹಿಡಿದಿಟ್ಟುಕೊಳ್ಳುವುದರಿಂದ ರಕ್ತದ ಪ್ರಮಾಣ ಹೆಚ್ಚಾಗುತ್ತದೆ ಮತ್ತು ಹೃದಯದ ಮೇಲೆ ಒತ್ತಡ ಬೀಳುತ್ತದೆ. ಸಂಸ್ಕರಿಸಿದ ಆಹಾರಗಳು (ಚಿಪ್ಸ್, ಅಚಾರ್), ರೆಸ್ಟೋರೆಂಟ್ ಊಟಗಳು, ಸಾಸ್ಗಳು ಮತ್ತು ಬೇಕರಿ ಉತ್ಪನ್ನಗಳಲ್ಲಿ ಉಪ್ಪಿನ ಪ್ರಮಾಣ ಅತಿಯಾಗಿರುತ್ತದೆ. ಪ್ರತಿದಿನದ ಉಪ್ಪಿನ ಪ್ರಮಾಣವನ್ನು 1 ಚಮಚಕ್ಕಿಂತ ಕಡಿಮೆ ಮಾಡಲು ಪ್ರಯತ್ನಿಸಿ.
3. ಕಳಪೆ ನಿದ್ರೆ (Poor Sleep)
ರಾತ್ರಿ 7-8 ಗಂಟೆಗಳ ಸಾಕಷ್ಟು ಮತ್ತು ಗುಣಮಟ್ಟದ ನಿದ್ರೆ ನಿಮ್ಮ ರಕ್ತದೊತ್ತಡವನ್ನು ನಿಯಂತ್ರಿಸಲು ಅತ್ಯಗತ್ಯ. ನಿದ್ರಾಹೀನತೆಯು ದೀರ್ಘಕಾಲದ ಒತ್ತಡದ ಹಾರ್ಮೋನ್ (ಕಾರ್ಟಿಸೋಲ್) ಬಿಡುಗಡೆಗೆ ಕಾರಣವಾಗುತ್ತದೆ, ಇದು ರಕ್ತದೊತ್ತಡವನ್ನು ಹೆಚ್ಚಿಸುತ್ತದೆ. ಅಲ್ಲದೆ, ಸ್ಲೀಪ್ ಅಪ್ನಿಯಾದಂತಹ ಸಮಸ್ಯೆಗಳು ರಾತ್ರಿ ಹಲವು ಬಾರಿ ಉಸಿರಾಟ ನಿಲ್ಲಲು ಕಾರಣವಾಗಿ, ಹೃದಯದ ಮೇಲೆ ಗಂಭೀರ ಪರಿಣಾಮ ಬೀರುತ್ತವೆ. ಪ್ರತಿದಿನ ಒಂದೇ ಸಮಯಕ್ಕೆ ಮಲಗುವುದು ಮತ್ತು ಮಲಗುವಾಗ ಮೊಬೈಲ್, ಟಿವಿ ಬಳಸದೇ ಇರುವುದು ಉತ್ತಮ ಅಭ್ಯಾಸ.
4. ದೀರ್ಘಕಾಲದ ಒತ್ತಡ (Chronic Stress)
ಕೆಲಸದ ಒತ್ತಡ, ಹಣಕಾಸಿನ ಚಿಂತೆ, ಸಂಬಂಧಗಳ ತೊಂದರೆಗಳು ಮತ್ತು ಸತತ ಡಿಜಿಟಲ್ ಸಂಪರ್ಕ – ಇವೆಲ್ಲವೂ ದೀರ್ಘಕಾಲದ ಒತ್ತಡವನ್ನು ಸೃಷ್ಟಿಸುತ್ತವೆ. ಇದು ನಿಮ್ಮ ದೇಹದಲ್ಲಿ ‘ಫೈಟ್ ಅಥವಾ ಫ್ಲೈಟ್’ ಮೋಡ್ ಅನ್ನು ಸಕ್ರಿಯಗೊಳಿಸಿ, ಅಡ್ರಿನಾಲಿನ್ ಮತ್ತು ಕಾರ್ಟಿಸೋಲ್ ಹಾರ್ಮೋನುಗಳನ್ನು ಹೆಚ್ಚಿಸುತ್ತದೆ. ಇದರಿಂದ ಹೃದಯ ಬಡಿತ ಮತ್ತು ರಕ್ತನಾಳಗಳ ಸಂಕೋಚನ ಹೆಚ್ಚಾಗಿ, ರಕ್ತದೊತ್ತಡ ಏರುತ್ತದೆ. ಧ್ಯಾನ, ಪ್ರಾಣಾಯಾಮ, ವಾಕಿಂಗ್ ಅಥವಾ ಹವ್ಯಾಸಗಳ ಮೂಲಕ ಒತ್ತಡವನ್ನು ನಿರ್ವಹಿಸುವುದು ಅಗತ್ಯ.
5. ಅನಿಯಮಿತ ಊಟದ ಸಮಯ ಮತ್ತು ಅತಿಯಾದ ಮದ್ಯಪಾನ
ಸಮಯಕ್ಕೆ ಸರಿಯಾಗಿ ಊಟ ಮಾಡದೇ ಇರುವುದು, ಹೊಟ್ಟೆ ತುಂಬಾ ಒಂದೇ ಬಾರಿಗೆ ಆಹಾರ ಸೇವಿಸುವುದು ರಕ್ತದಲ್ಲಿನ ಸಕ್ಕರೆ ಮತ್ತು ಕೊಬ್ಬಿನ ಪ್ರಮಾಣದಲ್ಲಿ ಏರುಪೇರು ಉಂಟುಮಾಡುತ್ತದೆ. ಇದರ ಜೊತೆಗೆ, ಅತಿಯಾದ ಮದ್ಯಪಾನ ಮತ್ತು ಕೆಫೀನ್ನ ಅತಿ ಸೇವನೆಯು ತಾತ್ಕಾಲಿಕವಾಗಿ ಮತ್ತು ದೀರ್ಘಕಾಲೀನವಾಗಿ ರಕ್ತದೊತ್ತಡವನ್ನು ಹೆಚ್ಚಿಸಬಲ್ಲದು.
ಈ ತಪ್ಪು ಅಭ್ಯಾಸಗಳನ್ನು ಗುರುತಿಸಿ, ನಿಮ್ಮ ಜೀವನಶೈಲಿಯಲ್ಲಿ ಸಣ್ಣ ಬದಲಾವಣೆಗಳನ್ನು ಮಾಡುವ ಮೂಲಕ ನೀವು ಅಧಿಕ ರಕ್ತದೊತ್ತಡದ ಅಪಾಯದಿಂದ ದೂರವಿರಬಹುದು. ನಿಯಮಿತ ವ್ಯಾಯಾಮ, ಸಮತೋಲಿತ ಆಹಾರ, ಒಳ್ಳೆಯ ನಿದ್ರೆ ಮತ್ತು ಒತ್ತಡ ಮುಕ್ತ ಜೀವನವೇ ನಿಮ್ಮನ್ನು ಸೈಲೆಂಟ್ ಕಿಲ್ಲರ್ನಿಂದ ರಕ್ಷಿಸಬಲ್ಲದು.
