ಗೋಲ್ಡನ್ ಸ್ಟಾರ್ ಸಿನಿ ಜರ್ನಿಗೆ ಇಪ್ಪತ್ತರ ಸಂಭ್ರಮ: “ಚೆಲ್ಲಾಟ” ಚಿತ್ರ ಬಿಡುಗಡೆಯಾಗಿ ಇಪ್ಪತ್ತು ವರ್ಷ

ಕನ್ನಡ ಚಿತ್ರರಂಗದ ‘ಗೋಲ್ಡನ್ ಸ್ಟಾರ್’ ನಟ ಗಣೇಶ್ ಅವರು ನಾಯಕ ನಟನಾಗಿ ಬೆಳ್ಳಿತೆರೆಗೆ ಪದಾರ್ಪಣೆ ಮಾಡಿ ಇಂದಿಗೆ (ಏಪ್ರಿಲ್ 21, 2026) 20 ವರ್ಷ ಪೂರೈಸಿದೆ. 2006ರ ಏಪ್ರಿಲ್ 21ರಂದು ಎಂ.ಡಿ.ಶ್ರೀಧರ್ ನಿರ್ದೇಶನದ ‘ಚೆಲ್ಲಾಟ’ ಚಿತ್ರದ ಮೂಲಕ ಹೀರೋ ಆಗಿ ಎಂಟ್ರಿ ಕೊಟ್ಟ ಗಣೇಶ್, ಅಂದಿನಿಂದ ಇಂದಿನವರೆಗೂ ತಮ್ಮ ವಿಶಿಷ್ಟ ಅಭಿನಯದಿಂದ ಕನ್ನಡಿಗರ ಮನಗೆದ್ದಿದ್ದಾರೆ.

ಮುಂಗಾರು ಮಳೆಯ ಐತಿಹಾಸಿಕ ಯಶಸ್ಸು
ಅದೇ ವರ್ಷ ಡಿಸೆಂಬರ್‌ನಲ್ಲಿ ಬಿಡುಗಡೆಯಾದ ‘ಮುಂಗಾರು ಮಳೆ’ ಚಿತ್ರವು ಕನ್ನಡ ಚಿತ್ರರಂಗದ ಇತಿಹಾಸದಲ್ಲೇ ಮೈಲಿಗಲ್ಲಾಯಿತು. ಈ ಚಿತ್ರದ ಅಪಾರ ಯಶಸ್ಸು ಗಣೇಶ್ ಅವರಿಗೆ ‘ಗೋಲ್ಡನ್ ಸ್ಟಾರ್’ ಎಂಬ ಬಿರುದನ್ನು ತಂದುಕೊಟ್ಟಿತ್ತು. ನಂತರ ‘ಚೆಲುವಿನ ಚಿತ್ತಾರ’, ‘ಗಾಳಿಪಟ’, ‘ಕೃಷ್ಣ’, ‘ರೋಮಿಯೋ’, ‘ಚಮಕ್’ ಮತ್ತು ಇತ್ತೀಚಿನ ಬ್ಲಾಕ್‌ಬಸ್ಟರ್ ‘ಕೃಷ್ಣಂ ಪ್ರಣಯ ಸಖಿ’ ಸೇರಿದಂತೆ ಸಾಲು ಸಾಲು ಯಶಸ್ವಿ ಚಿತ್ರಗಳನ್ನು ನೀಡಿದ್ದಾರೆ. ಕಿರುತೆರೆಯ ‘ಕಾಮಿಡಿ ಟೈಮ್’ ಮೂಲಕ ಜನಪ್ರಿಯರಾಗಿದ್ದ ಗಣೇಶ್, ಇಂದು ಸ್ಯಾಂಡಲ್‌ವುಡ್‌‌ನ ಪ್ರಮುಖ ನಟರಾಗಿ ಎರಡು ದಶಕಗಳನ್ನು ಪೂರೈಸಿದ ಸಂಭ್ರಮದಲ್ಲಿದ್ದಾರೆ.

ಅಭಿಮಾನಿಗಳಿಗೆ ಗಣೇಶ್ ಧನ್ಯವಾದ
ಈ ವಿಶೇಷ ಸಂದರ್ಭದಲ್ಲಿ ನಟ ಗಣೇಶ್ ಅವರು ತಮ್ಮ ಅಭಿಮಾನಿಗಳಿಗೆ ಭಾವುಕ ಧನ್ಯವಾದಗಳನ್ನು ಅರ್ಪಿಸಿದ್ದಾರೆ. “ಇಂದು ನನ್ನ ಜೀವನದ ಅತ್ಯಂತ ವಿಶೇಷ ಮೈಲಿಗಲ್ಲು. ಚಿತ್ರರಂಗದಲ್ಲಿ 20 ಸುಂದರ ವರ್ಷಗಳು. ‘ಚೆಲ್ಲಾಟ’ ಬಿಡುಗಡೆಯಾದ ದಿನ. ನನ್ನ ಕನಸುಗಳಿಗೆ ರೆಕ್ಕೆ ಸಿಕ್ಕ ದಿನ. ಒಂದು ಸಾಧಾರಣ ಆರಂಭದಿಂದ ಇಂದು ನಿಮ್ಮ ಪ್ರೀತಿಯ ‘ಗೋಲ್ಡನ್ ಸ್ಟಾರ್’ ಆಗುವವರೆಗಿನ ಈ ಪಯಣ ನಿಮ್ಮಿಂದಾದ ಅದ್ಭುತ” ಎಂದು ಗಣೇಶ್ ಹೇಳಿದ್ದಾರೆ.

“ನನ್ನ ಅಭಿಮಾನಿ ದೇವದೂತರಿಗೆ ನನ್ನ ಶಕ್ತಿ, ನನ್ನ ಎದೆಬಡಿತ ನೀವು. ಪ್ರತಿ ಫ್ರೇಮ್ ಅನ್ನು ಸಂಭ್ರಮವಾಗಿಸಿದ ನನ್ನ ಪ್ರೀತಿಯ ವೀಕ್ಷಕರಿಗೆ… ನನ್ನ ಮೇಲೆ ನಂಬಿಕೆ ಇಟ್ಟು ರೂಪಿಸಿದ ಚಿತ್ರರಂಗಕ್ಕೆ… ಸದಾ ನನ್ನ ಧ್ವನಿಯನ್ನು ಜನರಿಗೆ ತಲುಪಿಸಿದ ಮಾಧ್ಯಮ ಮಿತ್ರರಿಗೆ ನನ್ನ ಹೃದಯಾಂತರಾಳದಿಂದ ಧನ್ಯವಾದಗಳು” ಎಂದರು.

‘ಇದು ಕೇವಲ ಆರಂಭವಷ್ಟೇ’
ಗಣೇಶ್ ಅವರು ತಮ್ಮ ಸಂದೇಶದಲ್ಲಿ ಅಭಿಮಾನಿಗಳಿಗೆ ಮತ್ತೊಂದು ಸಂದೇಶವನ್ನು ನೀಡಿದ್ದಾರೆ. “ನೀವು ಹಾಕಿದ ಪ್ರತಿ ಶಿಳ್ಳೆ, ಪ್ರತಿ ಚಪ್ಪಾಳೆ, ಹರಿಸಿದ ಪ್ರತಿ ಹನಿ ಕಣ್ಣೀರು ಅದನ್ನು ನಾನು ಅನುಭವಿಸಿದ್ದೇನೆ, ಬದುಕಿದ್ದೇನೆ ಮತ್ತು ಹೆಮ್ಮೆಯಿಂದ ಹೊತ್ತು ಸಾಗುತ್ತಿದ್ದೇನೆ. ಮತ್ತೊಂದು ಮಾತು ನೆನಪಿರಲಿ ಇದು ಕೇವಲ ಆರಂಭವಷ್ಟೇ. ನಾನು ನಿಮಗೆ ಮಾತು ಕೊಡುತ್ತೇನೆ. ಇನ್ನು ಹೆಚ್ಚಿನ ಉತ್ಸಾಹ, ಹೆಚ್ಚಿನ ಶ್ರದ್ಧೆ ಮತ್ತು ನೇರವಾಗಿ ಹೃದಯಕ್ಕೆ ಮುಟ್ಟುವ ಎಮೋಷನ್ಸ್ ಮೂಲಕ ನಿಮ್ಮನ್ನು ರಂಜಿಸುತ್ತಲೇ ಇರುತ್ತೇನೆ. ಈ ಪಯಣ ಕೇವಲ ನನ್ನೊಬ್ಬನದಲ್ಲ, ಇದು ನಿಮ್ಮೆಲ್ಲರದು” ಎಂದು ಗಣೇಶ್ ಬರೆದುಕೊಂಡಿದ್ದಾರೆ.

Today marks a very special milestone in my life — 20 beautiful years in cinema ❤️

April 21… the day Chellata released — the day my dream found its wings ❤️
From a humble beginning to being called your “Golden Star”… this journey is nothing short of a miracle powered by YOU!… pic.twitter.com/KzltKGUFRd

— Ganesh (@Official_Ganesh) April 21, 2026

ಚಿತ್ರರಂಗ ಮತ್ತು ಅಭಿಮಾನಿಗಳ ಪ್ರತಿಕ್ರಿಯೆ
ಈ ಸಂದರ್ಭದಲ್ಲಿ ಚಿತ್ರರಂಗದ ಗಣ್ಯರು, ನಿರ್ದೇಶಕರು, ನಟ-ನಟಿಯರು ಮತ್ತು ಅಭಿಮಾನಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಗಣೇಶ್ ಅವರಿಗೆ ಶುಭಾಶಯಗಳನ್ನು ತಿಳಿಸುತ್ತಿದ್ದಾರೆ. ‘ಗೋಲ್ಡನ್ ಸ್ಟಾರ್’ನ ಅಭಿಮಾನಿ ಬಳಗವು ಅವರಿಗೆ ವಿಶೇಷ ಅಭಿನಂದನೆಗಳನ್ನು ಸಲ್ಲಿಸಿದೆ.