ಬಾಲಿವುಡ್ ಮತ್ತು ದಕ್ಷಿಣ ಭಾರತದ ಚಿತ್ರರಂಗದಲ್ಲಿ ‘ಆಪಲ್ ಬ್ಯೂಟಿ’ ಎಂದೇ ಪ್ರಸಿದ್ಧರಾದ ನಟಿ ಹನ್ಸಿಕಾ ಮೊಟ್ವಾನಿ ಚಿತ್ರರಂಗಕ್ಕೆ ಪ್ರವೇಶಿಸಿದಾಗಿನಿಂದಲೂ ಒಂದು ವಿವಾದ ಅವರನ್ನು ಬೆನ್ನಟ್ಟುತ್ತಲೇ ಇದೆ. ಅದೇ “ಬೇಗ ದೊಡ್ಡವಳಾಗಲು ಗ್ರೋತ್ ಹಾರ್ಮೋನ್ ಇಂಜೆಕ್ಷನ್ ತೆಗೆದುಕೊಂಡಿದ್ದಾರೆ” ಎಂಬ ದಶಕಗಳ ಹಳೆಯ ಗುಸುಗುಸು ಸುದ್ದಿ. ಈಗ ಅವರು ಮೌನ ಮುರಿದು ನೇರವಾಗಿ ಉತ್ತರ ನೀಡಿದ್ದಾರೆ.
ಇತ್ತೀಚೆಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಹನ್ಸಿಕಾ ನಗುತ್ತಾ ಹೇಳಿದ್ದು, “ಇದೆಲ್ಲವೂ ಶುದ್ಧ ಸುಳ್ಳು! ಇದು. ಇನ್ನು ನನಗೆ ಇಂಜೆಕ್ಷನ್ ಕಂಡರೆ ಭಯವೇ! ಸಣ್ಣ ಇಂಜೆಕ್ಷನ್ ಹಾಕಿಸಿಕೊಂಡರೂ ಮದ್ದು ಒಣಗುವವರೆಗೂ ನಾನು ಅಳುತ್ತಲೇ ಇರುತ್ತೇನೆ. ಇಂತಹ ಹಾರ್ಮೋನ್ ಚುಚ್ಚುಮದ್ದುಗಳನ್ನು ನಾನು ಏಕೆ ತೆಗೆದುಕೊಳ್ಳುತ್ತೇನೆ?” ಎಂದು ಸ್ಪಷ್ಟಪಡಿಸಿದ್ದಾರೆ.
ತಾಯಿ ಚರ್ಮರೋಗ ತಜ್ಞೆಯಾದರೂ ಮುಖಕ್ಕೆ ಕೈ ಹಚ್ಚುವಂತಿಲ್ಲ! ಹನ್ಸಿಕಾ ಅವರ ತಾಯಿ ಪ್ರಸಿದ್ಧ ಡರ್ಮಟಾಲಜಿಸ್ಟ್. ಆದರೆ ಅವರು ತಮ್ಮ ಮಗಳ ಚರ್ಮದ ಮೇಲೆ ಯಾವುದೇ ಕೆಮಿಕಲ್ ಪ್ರಯೋಗ ಮಾಡಲು ಅನುಮತಿ ನೀಡುವುದಿಲ್ಲ ಎಂದು ಹನ್ಸಿಕಾ ಹೇಳಿದ್ದಾರೆ. “ನನ್ನ ತಾಯಿ ವೈದ್ಯೆಯಾಗಿದ್ದರೂ ನನ್ನ ನೈಸರ್ಗಿಕ ಸೌಂದರ್ಯಕ್ಕೆ ಯಾವುದೇ ಧಕ್ಕೆ ಬರದಂತೆ ನೋಡಿಕೊಳ್ಳುತ್ತಾರೆ” ಎಂದು ಅವರು ಹೇಳಿದ್ದಾರೆ.
ಇಂದಿನ ಸೌಂದರ್ಯದ ಮಾನದಂಡಗಳ ಬಗ್ಗೆಯೂ ಹನ್ಸಿಕಾ ಮಾತನಾಡಿದ್ದಾರೆ. “ಹಿಂದೆ ಒಂದು ನಿರ್ದಿಷ್ಟ ಸೈಜ್ ಅಥವಾ ಲುಕ್ ಇರಬೇಕು ಎಂಬ ಒತ್ತಡವಿತ್ತು. ಆದರೆ ಈಗ ಜನರು ನಮ್ಮನ್ನು ನಾವು ಹೇಗಿದ್ದೇವೋ ಹಾಗೆಯೇ ಒಪ್ಪಿಕೊಳ್ಳುತ್ತಿದ್ದಾರೆ. ಇದು ಇಂಟರ್ನೆಟ್ನ ದೊಡ್ಡ ಪ್ಲಸ್ ಪಾಯಿಂಟ್” ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ವಿಚ್ಛೇದನದ ಬಗ್ಗೆ ಖಡಕ್ ಮಾತು ಸೊಹೈಲ್ ಖತುರಿಯಾ ಅವರೊಂದಿಗಿನ ವಿಚ್ಛೇದನದ ಬಗ್ಗೆಯೂ ಹನ್ಸಿಕಾ ಮಾತನಾಡಿದ್ದಾರೆ. “ತಪ್ಪು ರೈಲು ಹತ್ತಿದ ಮೇಲೆ ಅದರಲ್ಲಿ ಕುಳಿತು ಕಷ್ಟಪಡುವುದಕ್ಕಿಂತ ಸಮಯಕ್ಕೆ ಸರಿಯಾಗಿ ಕೆಳಗಿಳಿಯುವುದು ಉತ್ತಮ. ಆ ನಿರ್ಧಾರದ ಬಗ್ಗೆ ನನಗೆ ಯಾವುದೇ ವಿಷಾದವಿಲ್ಲ. ನನ್ನ ಕುಟುಂಬದ ಸಂಪೂರ್ಣ ಬೆಂಬಲ ನನಗಿದೆ ಮತ್ತು ನಾನು ಇಂದು ಇರುವ ಜಾಗದಲ್ಲಿ ತುಂಬಾ ಸಂತೋಷವಾಗಿದ್ದೇನೆ” ಎಂದು ಅವರು ಹೇಳಿದ್ದಾರೆ.
ಬಾಲ್ಯದಿಂದಲೇ ಬಣ್ಣದ ಲೋಕದಲ್ಲಿ ಬೆಳೆದ ಹನ್ಸಿಕಾ, ಟೀಕೆಗಳು ಮತ್ತು ಸುಳ್ಳು ಸುದ್ದಿಗಳನ್ನು ಧೈರ್ಯವಾಗಿ ಎದುರಿಸುತ್ತಿದ್ದಾರೆ. ‘ಕೋಯಿ ಮಿಲ್ ಗಯಾ’ ಸಿನಿಮಾದ ಪುಟ್ಟ ಹುಡುಗಿ ಇಂದು ಬೋಲ್ಡ್ ಆಗಿ ಮುನ್ನುಗ್ಗುತ್ತಿದ್ದಾರೆ.
