ಮುಂಬೈ: ಆಟೋ ರಿಕ್ಷಾ ಚಾಲಕರು ಕಷ್ಟಪಟ್ಟು ದುಡಿದು ಒಳ್ಳೆಯ ಆದಾಯ ಗಳಿಸುತ್ತಾರೆ ಎಂಬುದು ಎಲ್ಲರಿಗೂ ಗೊತ್ತಿರುವ ಸಂಗತಿ. ಆದರೆ, ಕೆಲವೊಮ್ಮೆ ಅವರ ವಿರುದ್ಧ ದೂರುಗಳು ಕೇಳಿಬಂದರೂ, ಬೆಳಗ್ಗೆಯಿಂದ ರಾತ್ರಿಯವರೆಗೆ ಶ್ರಮಿಸಿ ಹಣ ಸಂಪಾದಿಸುವವರೇ ಹೆಚ್ಚು. ಆದರೆ, ಮುಂಬೈನ ಒಬ್ಬ ಆಟೋ ಚಾಲಕ ತನ್ನ ಆಟೋವನ್ನೇ ಓಡಿಸದೆ ತಿಂಗಳಿಗೆ 5 ರಿಂದ 8 ಲಕ್ಷ ರೂಪಾಯಿ ಗಳಿಸುತ್ತಿದ್ದಾನೆ ಎಂಬ ಸುದ್ದಿ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಈ ಚಾಲಾಕಿ ಚಾಲಕನ ಕತೆಯೇ ಒಂದು ವಿಶೇಷತೆ.
ಮುಂಬೈನ ಯುಎಸ್ ಕಾನ್ಸುಲೇಟ್ ಕಚೇರಿಗೆ ಪ್ರತಿದಿನ ಹಲವಾರು ಜನರು ವೀಸಾ ಅಪಾಯಿಂಟ್ಮೆಂಟ್ಗಾಗಿ ಭೇಟಿ ನೀಡುತ್ತಾರೆ. ಆದರೆ, ಕಾನ್ಸುಲೇಟ್ ಆವರಣದೊಳಗೆ ಬ್ಯಾಗ್ಗಳನ್ನು ತೆಗೆದುಕೊಂಡು ಹೋಗಲು ಅನುಮತಿಯಿಲ್ಲ. ಇದರ ಜೊತೆಗೆ, ಮುಂಬೈನಲ್ಲಿ ಲಾಕರ್ ವ್ಯವಸ್ಥೆಯೂ ಲಭ್ಯವಿಲ್ಲ. ಈ ಸಮಸ್ಯೆಯನ್ನು ಗಮನಿಸಿದ ಈ ಆಟೋ ಚಾಲಕ, ಒಂದು ಬ್ಯಾಗ್ಗೆ 1,000 ರೂಪಾಯಿ ಶುಲ್ಕ ವಿಧಿಸಿ, ಗ್ರಾಹಕರ ಬ್ಯಾಗ್ಗಳನ್ನು ತನ್ನ ಬಳಿ ಸುರಕ್ಷಿತವಾಗಿ ಇಟ್ಟುಕೊಳ್ಳುವ ವ್ಯವಹಾರ ಆರಂಭಿಸಿದ್ದಾನೆ. ಪ್ರತಿದಿನ 20 ರಿಂದ 30 ಗ್ರಾಹಕರು ತಮ್ಮ ಬ್ಯಾಗ್ಗಳನ್ನು ಇವನ ಬಳಿ ಇಟ್ಟು ಹೋಗುತ್ತಾರಂತೆ. ಇದರಿಂದಾಗಿ ಈ ಚಾಲಕ ದಿನಕ್ಕೆ 20,000 ರಿಂದ 30,000 ರೂಪಾಯಿಗಳ ಆದಾಯ ಗಳಿಸುತ್ತಾನೆ. ಇದನ್ನು ತಿಂಗಳಿಗೆ ಲೆಕ್ಕ ಹಾಕಿದರೆ, ಅಂದಾಜು 5 ರಿಂದ 8 ಲಕ್ಷ ರೂಪಾಯಿಗಳ ಆದಾಯವಾಗುತ್ತದೆ!
ವೈರಲ್ ಆದ ಕತೆ
ಈ ವಿಷಯವನ್ನು ಮೊದಲಿಗೆ ಸಾಮಾಜಿಕ ಜಾಲತಾಣದಲ್ಲಿ ರೂಪಾನಿ ಎಂಬವರು ಹಂಚಿಕೊಂಡಿದ್ದಾರೆ. ರೂಪಾನಿ ತಮ್ಮ ವೀಸಾ ಅಪಾಯಿಂಟ್ಮೆಂಟ್ಗಾಗಿ ಯುಎಸ್ ಕಾನ್ಸುಲೇಟ್ನ ಹೊರಗೆ ನಿಂತಿದ್ದಾಗ, ಭದ್ರತಾ ಸಿಬ್ಬಂದಿ ತಮ್ಮ ಬ್ಯಾಗ್ನ್ನು ಒಳಗೆ ತೆಗೆದುಕೊಂಡು ಹೋಗಲು ಸಾಧ್ಯವಿಲ್ಲ ಎಂದು ತಿಳಿಸಿದರು. ಆಗಲೇ, ಒಬ್ಬ ಆಟೋ ಚಾಲಕ ಬಂದು, “ಸಾರ್, ನಿಮ್ಮ ಬ್ಯಾಗ್ ಕೊಡಿ. ನಾನು ಅದನ್ನು ಸುರಕ್ಷಿತವಾಗಿ ಇಡುತ್ತೇನೆ. ಇದು ನನ್ನ ದಿನನಿತ್ಯದ ಕೆಲಸ. ಶುಲ್ಕ 1,000 ರೂಪಾಯಿ,” ಎಂದು ಹೇಳಿದ್ದಾನೆ. ಈ ಚಾಲಕ ತನ್ನ ಆಟೋವನ್ನು ಓಡಿಸದೇ, ಯಾವುದೇ ಆ್ಯಪ್, ಫಂಡಿಂಗ್, ಅಥವಾ ತಂತ್ರಜ್ಞಾನವಿಲ್ಲದೇ, ಕೇವಲ ಸರಿಯಾದ ಸಮಯದಲ್ಲಿ ಸರಿಯಾದ ಸ್ಥಳದಲ್ಲಿ ಆಟೋ ಪಾರ್ಕ್ ಮಾಡಿ, ಈ ದೊಡ್ಡ ಆದಾಯ ಗಳಿಸುತ್ತಿದ್ದಾನೆ ಎಂದು ರೂಪಾನಿ ತಮ್ಮ ಪೋಸ್ಟ್ನಲ್ಲಿ ತಿಳಿಸಿದ್ದಾರೆ.
ಈ ಕತೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಸದ್ದು ಮಾಡಿದೆ. ಜನರು ಈ ಆಟೋ ಚಾಲಕನ ಬುದ್ಧಿಚಾತುರ್ಯಕ್ಕೆ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ. ಕೆಲವರು ಇದನ್ನು ಒಂದು ಉದಾಹರಣೆಯಾಗಿ ತೆಗೆದುಕೊಂಡು, ಸಮಸ್ಯೆಗಳನ್ನು ಗುರುತಿಸಿ, ಅವಕಾಶವನ್ನು ಸೃಷ್ಟಿಸಿಕೊಂಡ ಈ ಚಾಲಕನ ಚತುರತೆಯನ್ನು ಶ್ಲಾಘಿಸಿದ್ದಾರೆ.
