ಚೀನಾದ ಯಾಂಗ್ ಮತ್ತು ಝಾವೋ ಎಂಬ ಜೋಡಿಯ ಮದುವೆಯು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಇವರ ವಿವಾಹಕ್ಕೆ 200ಕ್ಕೂ ಹೆಚ್ಚು ನಿರಾಶ್ರಿತ ಶ್ವಾನಗಳು ಸಾಕ್ಷಿಯಾದವು. ಈ ಜೋಡಿಯ ಅಪರೂಪದ ಆಯ್ಕೆಯು ವಿಶ್ವಾದ್ಯಂತ ಗಮನ ಸೆಳೆದಿದೆ.
31 ವರ್ಷದ ಯಾಂಗ್ ಒಂದು ಕಾಲದಲ್ಲಿ ಯಶಸ್ವಿ ಉದ್ಯಮಿಯಾಗಿದ್ದರು. ಆದರೆ, 2020ರಲ್ಲಿ ವ್ಯವಹಾರದಲ್ಲಿ ಭಾರೀ ನಷ್ಟ ಅನುಭವಿಸಿದ ಅವರು, ತಮ್ಮ ಮನೆ ಮತ್ತು ಕಾರುಗಳನ್ನು ಮಾರಾಟ ಮಾಡಿ ಉದ್ಯೋಗಿಗಳಿಗೆ ಸಂಬಳ ನೀಡಿದರು. ಈ ಅನುಭವದ ನಂತರ, ಯಾಂಗ್ ನಿರಾಶ್ರಿತ ಬೀದಿ ಶ್ವಾನಗಳಿಗೆ ಆಸರೆ ನೀಡಲು ತೀರ್ಮಾನಿಸಿದರು. ಬಾಲ್ಯದಲ್ಲಿ ತಮ್ಮ ಐದು ನಾಯಿಮರಿಗಳನ್ನು ಅನಾರೋಗ್ಯದಿಂದ ಕಳೆದುಕೊಂಡಿದ್ದ ಯಾಂಗ್, ಶ್ವಾನಗಳ ರಕ್ಷಣೆಗೆ ತಮ್ಮ ಜೀವನವನ್ನೇ ಮೀಸಲಿಟ್ಟರು.
ಹತ್ತು ಶ್ವಾನಗಳಿಂದ ಆರಂಭವಾದ ಆಶ್ರಯತಾಣವು ಇಂದು 200ಕ್ಕೂ ಹೆಚ್ಚು ಶ್ವಾನಗಳಿಗೆ ಆಶ್ರಯವಾಗಿದೆ.
2022ರಲ್ಲಿ 25 ವರ್ಷದ ಝಾವೋ ಈ ಆಶ್ರಯತಾಣದಲ್ಲಿ ಸ್ವಯಂಸೇವಕಿಯಾಗಿ ಸೇರಿಕೊಂಡರು. ಶ್ವಾನಗಳ ರಕ್ಷಣೆಯ ಈ ಕಾರ್ಯದಲ್ಲಿ ಯಾಂಗ್ ಮತ್ತು ಝಾವೋ ಒಟ್ಟಾಗಿ ಕೆಲಸ ಮಾಡುತ್ತಾ, ಪರಸ್ಪರ ಪ್ರೀತಿಯಲ್ಲಿ ಬಿದ್ದರು. ಮೂರು ವರ್ಷಗಳ ಪ್ರೀತಿಯ ನಂತರ ಮೇ 25ರಂದು ಇವರು ತಮ್ಮ ಆಶ್ರಯತಾಣದ ಶ್ವಾನಗಳ ಸಮ್ಮುಖದಲ್ಲಿ ವಿವಾಹವಾದರು.
8days sg ಹೆಸರಿನ ಖಾತೆಯಲ್ಲಿ ಚೀನಾದ ಜೋಡಿಯ ಈ ವಿಶಿಷ್ಟ ಮದುವೆಯ ಫೋಟೋಗಳನ್ನು ಶೇರ್ ಮಾಡಿಕೊಳ್ಳಲಾಗಿದೆ. ಈ ವಿಶಿಷ್ಟ ಮದುವೆಯ ಫೋಟೋಗಳು ಇದೀಗ ಸಾಮಾಜಿಕ ಜಾಲತಾಣದಲ್ಲಿ 30,000ಕ್ಕೂ ಹೆಚ್ಚು ವೀಕ್ಷಣೆಗಳನ್ನು ಪಡೆದಿವೆ.
ನೆಟ್ಟಿಗರು ಈ ಜೋಡಿಯನ್ನು ಮೆಚ್ಚಿದ್ದಾರೆ. “ಶ್ವಾನಗಳ ಆಶೀರ್ವಾದದೊಂದಿಗೆ ಈ ಮದುವೆ ವಿಶೇಷವಾಗಿದೆ,” ಎಂದು ಕೆಲವರು ಕಾಮೆಂಟ್ ಮಾಡಿದ್ದಾರೆ. “ಕಡಿಮೆ ಖರ್ಚಿನಲ್ಲಿ ಅರ್ಥಪೂರ್ಣವಾದ ಮದುವೆ!” ಎಂದು ಮತ್ತೊಬ್ಬರು ಹೇಳಿದ್ದಾರೆ. ಈ ಜೋಡಿಯ ಸರಳ ಮತ್ತು ಅನನ್ಯ ಮದುವೆಯು ಪ್ರಾಣಿಪ್ರೀತಿಯ ಮಹತ್ವವನ್ನು ಎತ್ತಿ ತೋರಿಸಿದೆ.
