ವಿಶ್ವದ ಅತ್ಯಂತ ಶಕ್ತಿಶಾಲಿ ಯುದ್ಧವಿಮಾನಗಳಲ್ಲಿ ಒಂದಾದ ರಫೇಲ್ ಫೈಟರ್ ಜೆಟ್‌ನ ಪ್ರಮುಖ ಭಾಗವಾದ ಫ್ಯೂಸಲಾಜ್ ಶೀಘ್ರದಲ್ಲೇ ಭಾರತದಲ್ಲಿ ತಯಾರಾಗಲಿದೆ. ಫ್ರಾನ್ಸ್‌ನ ಡಸ್ಸೋ ಏವಿಯೇಶನ್ ಕಂಪನಿಯೊಂದಿಗೆ ಟಾಟಾ ಅಡ್ವಾನ್ಸ್ಡ್ ಸಿಸ್ಟಮ್ಸ್ ಲಿಮಿಟೆಡ್ (TASL) ನಾಲ್ಕು ಉತ್ಪಾದನಾ ವರ್ಗಾವಣೆ ಒಪ್ಪಂದಗಳಿಗೆ ಸಹಿ ಹಾಕಿದೆ. ಈ ಒಪ್ಪಂದದಡಿ, ರಫೇಲ್ ಯುದ್ಧವಿಮಾನದ ಫ್ಯೂಸಲಾಜ್‌ಗಳನ್ನು ಭಾರತದ ಹೈದರಾಬಾದ್‌ನಲ್ಲಿ ತಯಾರಿಸಲಾಗುವುದು. ಇದು ಫ್ರಾನ್ಸ್‌ನಿಂದ ಹೊರತಾಗಿ ರಫೇಲ್ ಫ್ಯೂಸಲಾಜ್ ತಯಾರಾಗುವ ಮೊದಲ ದೇಶವಾಗಿ ಭಾರತವನ್ನು ಗುರುತಿಸಲಿದೆ, ಇದರಿಂದ ಭಾರತವು ಜಾಗತಿಕ ರಕ್ಷಣಾ ಉತ್ಪಾದನೆಯಲ್ಲಿ ಹೊಸ ಇತಿಹಾಸವನ್ನು ಸೃಷ್ಟಿಸಲಿದೆ.
ಫ್ಯೂಸಲಾಜ್ ಎಂದರೇನು?
ಫ್ಯೂಸಲಾಜ್ ಎಂಬುದು ಯುದ್ಧವಿಮಾನದ ಮುಖ್ಯ ರಚನೆಯಾಗಿದ್ದು, ಇದನ್ನು ಮನುಷ್ಯನ ಅಸ್ಥಿಪಂಜರಕ್ಕೆ ಹೋಲಿಸಬಹುದು. ಇದು ವಿಮಾನದ ಹೊರಕವಚವಾಗಿದ್ದು, ಎಂಜಿನ್, ರೆಕ್ಕೆಗಳು, ಇತರ ಭಾಗಗಳನ್ನು ಒಗ್ಗೂಡಿಸುವ ಕೊಂಡಿಯಾಗಿ ಕಾರ್ಯನಿರ್ವಹಿಸುತ್ತದೆ. ವಿಮಾನದ ಉದ್ದೇಶ ಮತ್ತು ವಿನ್ಯಾಸದ ಆಧಾರದ ಮೇಲೆ ಫ್ಯೂಸಲಾಜ್‌ನ ರೂಪುರೇಷೆಯನ್ನು ರಚಿಸಲಾಗುತ್ತದೆ.
ಹೈದರಾಬಾದ್‌ನಲ್ಲಿ ತಯಾರಿಕಾ ಘಟಕ:
ಟಾಟಾ ಅಡ್ವಾನ್ಸ್ಡ್ ಸಿಸ್ಟಮ್ಸ್ ಹೈದರಾಬಾದ್‌ನಲ್ಲಿ ರಫೇಲ್ ಫ್ಯೂಸಲಾಜ್ ತಯಾರಿಕೆಗಾಗಿ ಅತ್ಯಾಧುನಿಕ ಉತ್ಪಾದನಾ ಘಟಕವನ್ನು ಸ್ಥಾಪಿಸಲಿದೆ. 2027-28ರ ವೇಳೆಗೆ ಈ ಘಟಕದಿಂದ ಮೊದಲ ಫ್ಯೂಸಲಾಜ್ ಉತ್ಪಾದನೆಯಾಗುವ ನಿರೀಕ್ಷೆಯಿದೆ. ವರದಿಗಳ ಪ್ರಕಾರ, ಈ ಘಟಕವು ತಿಂಗಳಿಗೆ ಎರಡು ಫ್ಯೂಸಲಾಜ್‌ಗಳನ್ನು ತಯಾರಿಸುವ ಸಾಮರ್ಥ್ಯವನ್ನು ಹೊಂದಿರಲಿದೆ.
ಡಸ್ಸೋ ಏವಿಯೇಶನ್‌ಗೆ ಬಲ:
ಈ ಒಪ್ಪಂದವು ಡಸ್ಸೋ ಏವಿಯೇಶನ್‌ನ ಜಾಗತಿಕ ಸರಬರಾಜು ಸರಪಳಿಯನ್ನು ಬಲಪಡಿಸಲಿದೆ. ಭಾರತದಲ್ಲಿ ಫ್ಯೂಸಲಾಜ್ ತಯಾರಿಕೆಯಿಂದ ಡಸ್ಸೋದ ಉತ್ಪಾದನಾ ಜಾಲವು ವಿಸ್ತರಣೆಗೊಳ್ಳಲಿದೆ. ಡಸ್ಸೋ ಏವಿಯೇಶನ್‌ನ ಸಿಇಒ ಎರಿಕ್ ಟ್ರಾಪಿಯರ್, “ಭಾರತದಲ್ಲಿ ತಯಾರಾಗುವ ಫ್ಯೂಸಲಾಜ್‌ಗಳು ಜಾಗತಿಕ ಗುಣಮಟ್ಟಕ್ಕೆ ಸಂಪೂರ್ಣವಾಗಿ ಒಗ್ಗಿಕೊಂಡಿರುತ್ತವೆ,” ಎಂದು ಭರವಸೆ ನೀಡಿದ್ದಾರೆ.
ಈ ಒಪ್ಪಂದವು ಭಾರತದ ರಕ್ಷಣಾ ಉತ್ಪಾದನಾ ಕ್ಷೇತ್ರದಲ್ಲಿ ‘ಮೇಕ್ ಇನ್ ಇಂಡಿಯಾ’ ಉಪಕ್ರಮಕ್ಕೆ ದೊಡ್ಡ ಉತ್ತೇಜನವನ್ನು ನೀಡಲಿದೆ. ಜೊತೆಗೆ, ಭಾರತದ ತಂತ್ರಜ್ಞಾನ ಮತ್ತು ಉತ್ಪಾದನಾ ಸಾಮರ್ಥ್ಯವನ್ನು ಜಾಗತಿಕವಾಗಿ ಗುರುತಿಸುವಲ್ಲಿ ಮಹತ್ವದ ಪಾತ್ರವನ್ನು ವಹಿಸಲಿದೆ.
