ಟೀಮ್ ಇಂಡಿಯಾದ ಮಾಜಿ ಬ್ಯಾಟ್ಸ್ಮನ್ ಮತ್ತು ಕಾಮೆಂಟೇಟರ್ರ ಮಗಳು ಅನಯಾ ಬಂಗಾರ್, ಐಸಿಸಿ ಮತ್ತು ಬಿಸಿಸಿಐಗೆ ವಿಶೇಷ ಮನವಿ ಸಲ್ಲಿಸಿದ್ದಾರೆ. ತೃತೀಯ ಲಿಂಗಿ ಕ್ರಿಕೆಟಿಗರಿಗೆ ಬೆಂಬಲ ನೀಡುವಂತೆ ಮತ್ತು ಮಹಿಳಾ ತಂಡದಲ್ಲಿ ಆಡಲು ಅವಕಾಶ ಕಲ್ಪಿಸುವಂತೆ ಒತ್ತಾಯಿಸಿದ್ದಾರೆ. ತಾನು ಮಹಿಳಾ ತಂಡದಲ್ಲಿ ಆಡಲು ಸಂಪೂರ್ಣ ಅರ್ಹತೆ ಹೊಂದಿದ್ದೇನೆ ಎಂದು ಅನಯಾ ಬಂಗಾರ್ ಹೇಳಿದ್ದಾರೆ.
ಅನಯಾ ಬಂಗಾರ್, ಹಿಂದೆ ಆರ್ಯನ್ ಬಂಗಾರ್ ಎಂಬ ಹೆಸರಿನಲ್ಲಿ ಗಂಡಾಗಿದ್ದರು. ಆದರೆ, ಹಾರ್ಮೋನ್ ರಿಪ್ಲೇಸ್ಮೆಂಟ್ ಥೆರಪಿ (HRT)ಗೆ ಒಳಗಾಗಿ ಈಗ ಅನಯಾ ಆಗಿ ತಮ್ಮ ಗುರುತನ್ನು ಬದಲಾಯಿಸಿಕೊಂಡಿದ್ದಾರೆ. ಒಂದು ವರ್ಷದ HRT ಚಿಕಿತ್ಸೆಯನ್ನು ಪೂರ್ಣಗೊಳಿಸಿದ ಬಳಿಕ, ಮ್ಯಾಂಚೆಸ್ಟರ್ ಮೆಟ್ರೋಪಾಲಿಟನ್ ವಿಶ್ವವಿದ್ಯಾಲಯದ ಸಹಯೋಗದೊಂದಿಗೆ ಅವರ ಕ್ರೀಡಾಪಟು ಪರೀಕ್ಷೆ (Athlete Testing Report) ನಡೆದಿದೆ. ಈ ಪರೀಕ್ಷೆಯಲ್ಲಿ ಅವರ ಸ್ನಾಯು ಶಕ್ತಿ, ಸಹಿಷ್ಣುತೆ, ಗ್ಲೂಕೋಸ್ ಮಟ್ಟ, ಆಕ್ಸಿಜನ್ ಸಾಮರ್ಥ್ಯ ಇವೆಲ್ಲವೂ ಮಹಿಳಾ ಕ್ರೀಡಾಪಟುಗಳಿಗೆ ಸಮಾನವಾಗಿರುವುದು ದೃಢಪಟ್ಟಿದೆ.
ಅನಯಾ ತಮ್ಮ ಅಧಿಕೃತ ಇನ್ಸ್ಟಾಗ್ರಾಮ್ನಲ್ಲಿ 8 ಪುಟಗಳ ಕ್ರೀಡಾಪಟು ಪರೀಕ್ಷಾ ವರದಿಯನ್ನು ವೀಡಿಯೊ ಮೂಲಕ ಹಂಚಿಕೊಂಡಿದ್ದಾರೆ. “ಇದೇ ಮೊದಲ ಬಾರಿಗೆ ಟ್ರಾನ್ಸ್ ವುಮನ್ ಆಗಿ ಬದಲಾದ ನನ್ನ ವೈಜ್ಞಾನಿಕ ವರದಿಗಳನ್ನು ತೋರಿಸುತ್ತಿದ್ದೇನೆ,” ಎಂದು ಅವರು ಹೇಳಿದ್ದಾರೆ. ಈ ವರದಿಯನ್ನು ಐಸಿಸಿ ಮತ್ತು ಬಿಸಿಸಿಐಗೆ ಸಲ್ಲಿಸಿ, ತೃತೀಯ ಲಿಂಗಿ ಕ್ರೀಡಾಪಟುಗಳಿಗೆ ಮಹಿಳಾ ಕ್ರಿಕೆಟ್ನಲ್ಲಿ ಅವಕಾಶ ಕಲ್ಪಿಸುವಂತೆ ಕೋರಿದ್ದಾರೆ.
2023ರ ಏಕದಿನ ವಿಶ್ವಕಪ್ನ ನಂತರ ಐಸಿಸಿ ಮಂಡಳಿಯ ಸಭೆಯಲ್ಲಿ ತೃತೀಯ ಲಿಂಗಿ ಕ್ರಿಕೆಟಿಗರನ್ನು ಮಹಿಳಾ ಕ್ರಿಕೆಟ್ನಿಂದ ನಿಷೇಧಿಸುವ ನಿರ್ಧಾರ ಕೈಗೊಳ್ಳಲಾಗಿತ್ತು. ಆದರೆ, ಅನಯಾ ಈ ನಿರ್ಧಾರವನ್ನು ಸವಾಲು ಮಾಡಿದ್ದಾರೆ. ತಮ್ಮ ವೈಜ್ಞಾನಿಕ ವರದಿಗಳನ್ನು ಆಧರಿಸಿ, ತಾವು ಮಹಿಳಾ ಕ್ರೀಡಾಪಟುವಿನ ಎಲ್ಲಾ ಮಾನದಂಡಗಳನ್ನು ಪೂರೈಸುತ್ತಿದ್ದೇವೆ ಎಂದು ವಾದಿಸಿದ್ದಾರೆ. “ನನ್ನ ಶಕ್ತಿ ಮತ್ತು ಸಾಮರ್ಥ್ಯವು ಮಹಿಳಾ ಕ್ರೀಡಾಪಟುಗಳಿಗೆ ಸಮಾನವಾಗಿದೆ. ಆದ್ದರಿಂದ, ನನಗೆ ಮಹಿಳಾ ತಂಡದಲ್ಲಿ ಆಡಲು ಅವಕಾಶ ನೀಡಬೇಕು,” ಎಂದು ಅವರು ಒತ್ತಾಯಿಸಿದ್ದಾರೆ.
ತೃತೀಯ ಲಿಂಗಿ ಕ್ರಿಕೆಟಿಗರಿಗೆ ಕ್ರೀಡಾಂಗಣದಲ್ಲಿ ಸಮಾನ ಅವಕಾಶ ಕಲ್ಪಿಸುವುದು ಕ್ರೀಡೆಯ ಸಮಾನತೆಯ ಸಂದೇಶವನ್ನು ಮುಂದಿಡುತ್ತದೆ ಎಂದು ಅನಯಾ ಅಭಿಪ್ರಾಯಪಟ್ಟಿದ್ದಾರೆ.
