ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ಮತ್ತು ರಾಜಸ್ಥಾನ ರಾಯಲ್ಸ್ (RR) ತಂಡಗಳು ಜೈಪುರದ ಸವಾಯಿ ಮಾನ್ಸಿಂಗ್ ಕ್ರೀಡಾಂಗಣದಲ್ಲಿ ಐಪಿಎಲ್ 2025ರ ರೋಚಕ ಕದನಕ್ಕೆ ಸಜ್ಜಾಗಿವೆ. ಆರ್‌ಸಿಬಿ ತವರಿನಿಂದ ಹೊರಗೆ ಭರ್ಜರಿ ಪ್ರದರ್ಶನ ನೀಡುತ್ತಿದ್ದರೆ, ರಾಜಸ್ಥಾನ ತವರಿನಲ್ಲಿ ಗೆಲುವಿನ ಲಯ ಕಂಡುಕೊಳ್ಳಲು ಉತ್ಸುಕವಾಗಿದೆ. ಈ ಪಂದ್ಯವು ರಾಯಲ್ಸ್‌ನ ಬೇಟೆಯೂ ಆಗಿರಬಹುದು, ರಾಯಲ್ಸ್‌ನ ರಣಕೇಕೆಯೂ ಆಗಿರಬಹುದು.
ಐಪಿಎಲ್ 2025ರಲ್ಲಿ ಆರ್‌ಸಿಬಿ ತವರಿನಿಂದ ಹೊರಗೆ ಅದ್ಭುತವಾಗಿ ಆಡುತ್ತಿದೆ. ಮುಂಬೈ ಇಂಡಿಯನ್ಸ್ ತಂಡವನ್ನು ವಾಂಖೆಡೆಯಲ್ಲಿ ಸೋಲಿಸಿದ್ದು 10 ವರ್ಷಗಳಲ್ಲಿ ಮೊದಲ ಬಾರಿಗೆ. ಚೆನ್ನೈ ಸೂಪರ್ ಕಿಂಗ್ಸ್ ತಂಡವನ್ನು ಚೆಪಾಕ್‌ನಲ್ಲಿ ಗೆದ್ದದ್ದು 17 ವರ್ಷಗಳಲ್ಲಿ ಮೊದಲ ಸಾಧನೆ. ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ ಈಡನ್ ಗಾರ್ಡನ್ಸ್‌ನಲ್ಲಿ ಗೆದ್ದದ್ದು ಆರ್‌ಸಿಬಿಯ ರಣಕಾಹಳೆಯನ್ನು ಸಾರಿದೆ. ತವರಿನಿಂದ ಹೊರಗೆ ಆರ್‌ಸಿಬಿ ಪ್ರತಿ ವಿಕೆಟ್‌ಗೆ ಸರಾಸರಿ 39.6 ರನ್ ಗಳಿಸಿದ್ದು, ಪ್ರತಿ ಓವರ್‌ಗೆ 10.5 ರನ್ ಬಂದಿದೆ. ಬೌಲಿಂಗ್‌ನಲ್ಲಿ ಸರಾಸರಿ 21.2 ರನ್‌‌ಗೆ ವಿಕೆಟ್ ಪಡೆಯುತ್ತಿದ್ದಾರೆ.
ಆದರೆ, ತವರಿನಲ್ಲಿ ಆರ್‌ಸಿಬಿಯ ಪ್ರದರ್ಶನ ಕೊಂಚ ಕುಸಿದಿದೆ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಪ್ರತಿ ವಿಕೆಟ್‌ಗೆ 22.1 ರನ್ ಮತ್ತು ಪ್ರತಿ ಓವರ್‌ಗೆ 8.3 ರನ್ ಮಾತ್ರ ಗಳಿಸಿದ್ದಾರೆ. ಬೌಲಿಂಗ್‌ನಲ್ಲಿ 56.4 ರನ್‌‌ಗೆ ವಿಕೆಟ್ ಕೊಡುತ್ತಿದ್ದಾರೆ. ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಎರಡು ದಿನಗಳ ಹಿಂದೆ ಸೋತ ಆರ್‌ಸಿಬಿ, ಈಗ ಜೈಪುರದಲ್ಲಿ ಗೆಲುವಿನ ಟ್ರ್ಯಾಕ್‌ಗೆ ಮರಳಲು ತವಕದಲ್ಲಿದೆ.
ರಾಜಸ್ಥಾನದ ಸವಾಲು
ರಾಜಸ್ಥಾನ ರಾಯಲ್ಸ್ಗೆ ಈ ಐಪಿಎಲ್ ಸೀಸನ್ ಸವಾಲಿನದ್ದಾಗಿದೆ. ಗುವಾಹಟಿಯಲ್ಲಿ ಎರಡು ಪಂದ್ಯಗಳನ್ನು ಆಡಿದ್ದ ಅವರು, ಈಗ ಜೈಪುರದ ತವರಿಗೆ ಮರಳಿದ್ದಾರೆ. ಗುಜರಾತ್ ಟೈಟಾನ್ಸ್ ವಿರುದ್ಧ ಇತ್ತೀಚಿನ ಸೋಲಿನಿಂದ ಕಂಗಾಲಾಗಿರುವ ರಾಯಲ್ಸ್, ತಮ್ಮ ಬೌಲಿಂಗ್ ಶಕ್ತಿಯಿಂದ ಆತ್ಮವಿಶ್ವಾಸ ಹೆಚ್ಚಿಸಿಕೊಂಡಿದ್ದಾರೆ. ಜೋಫ್ರಾ ಆರ್ಚರ್ ಫಾರ್ಮ್‌ಗೆ ಮರಳಿದ್ದು, ಸಂದೀಪ್ ಶರ್ಮಾ ಸ್ಥಿರವಾಗಿ ಬೌಲಿಂಗ್ ಮಾಡುತ್ತಿದ್ದಾರೆ. ವಿಶೇಷವಾಗಿ, ಸಂದೀಪ್ ಶರ್ಮಾ ವಿರಾಟ್ ಕೊಹ್ಲಿಯನ್ನು ಐಪಿಎಲ್‌ನಲ್ಲಿ ಏಳು ಬಾರಿ ಔಟ್ ಮಾಡಿದ್ದಾರೆ, ಇದು ಯಾವುದೇ ಬೌಲರ್‌ಗಿಂತ ಹೆಚ್ಚು.
ತಾರಾ ಆಟಗಾರರ ಕದನ
ಈ ಪಂದ್ಯವು ಭಾರತೀಯ ಆಟಗಾರರ ರೋಚಕ ಕದನಕ್ಕೆ ವೇದಿಕೆಯಾಗಲಿದೆ. ರಾಜಸ್ಥಾನ ರಾಯಲ್ಸ್ ತಂಡದಲ್ಲಿ ಸಂಜು ಸ್ಯಾಮ್ಸನ್, ರಿಯಾನ್ ಪರಾಗ್, ನಿತೀಶ್ ರಾಣಾ, ಮತ್ತು ಧ್ರುವ್ ಜುರೆಲ್ ರನ್‌‌‌ಗಳಿಕೆಯ ಜವಾಬ್ದಾರಿಯನ್ನು ಹೊತ್ತಿದ್ದಾರೆ. ಆರ್‌ಸಿಬಿ ತಂಡದಲ್ಲಿ ದೇವದತ್ ಪಡಿಕ್ಕಲ್, ರಜತ್ ಪಾಟಿದಾರ್ ಮತ್ತು ಜಿತೇಶ್ ಶರ್ಮಾ ಬ್ಯಾಟಿಂಗ್‌ನಲ್ಲಿ ಮಿಂಚಲು ಸಿದ್ಧರಿದ್ದಾರೆ. ಈ ಆಟಗಾರರ ಪ್ರದರ್ಶನವು ಪಂದ್ಯದ ಫಲಿತಾಂಶವನ್ನು ನಿರ್ಧರಿಸಬಹುದು.
ಪಂದ್ಯದ ರೋಚಕತೆ
ಆರ್‌ಸಿಬಿ ತವರಿನಿಂದ ಹೊರಗಿನ ಫಾರ್ಮ್‌ನೊಂದಿಗೆ ಜೈಪುರಕ್ಕೆ ಬಂದಿದ್ದು, ರಾಜಸ್ಥಾನ ತವರಿನ ಅನುಕೂಲವನ್ನು ಬಳಸಿಕೊಂಡು ಗೆಲುವಿನ ಖಾತೆ ತೆರೆಯಲು ಉತ್ಸುಕವಾಗಿದೆ. ಸವಾಯಿ ಮಾನ್ಸಿಂಗ್ ಕ್ರೀಡಾಂಗಣದ ಪಿಚ್ ಸಾಮಾನ್ಯವಾಗಿ ಬ್ಯಾಟಿಂಗ್‌ಗೆ ಸಹಕಾರಿಯಾದರೂ, ಸ್ಪಿನ್ ಬೌಲರ್‌ಗಳಿಗೆ ತಿರುವು ಸಿಗಬಹುದು. ಈ ಪಂದ್ಯವು ಬೌಲಿಂಗ್‌ನ ಶಕ್ತಿ ಮತ್ತು ಬ್ಯಾಟಿಂಗ್‌ನ ಚಾಕಚಕ್ಯತೆಯ ನಡುವಿನ ಕಾದಾಟವಾಗಲಿದೆ.
ರಾಯಲ್ಸ್‌ನ ಬೇಟೆಯಾಡುವ ತವಕದಲ್ಲಿ ಆರ್‌ಸಿಬಿಯ ರಣಬೇಟೆಗಾರರು ಗೆಲುವಿನ ಹಾದಿಯನ್ನು ಕಂಡುಕೊಳ್ಳುತ್ತಾರೆಯೇ? ಅಥವಾ ರಾಜಸ್ಥಾನ ತವರಿನಲ್ಲಿ ರಾಯಲ್ ಆಗಿ ಗೆಲ್ಲುತ್ತದೆಯೇ? ಈ ರೋಚಕ ಕದನದ ಫಲಿತಾಂಶಕ್ಕಾಗಿ ಅಭಿಮಾನಿಗಳ ಕಣ್ಣು ಜೈಪುರದತ್ತ ತಿರುಗಿದೆ.
ರಾಜಸ್ಥಾನ ರಾಯಲ್ಸ್ ತಂಡ: ಸಂಜು ಸ್ಯಾಮ್ಸನ್ (ನಾಯಕ), ಯಶಸ್ವಿ ಜೈಸ್ವಾಲ್, ನಿತೀಶ್ ರಾಣಾ, ರಿಯಾನ್ ಪರಾಗ್, ಧ್ರುವ್ ಜುರೆಲ್, ಶಿಮ್ರಾನ್ ಹೆಟ್ಮೆಯರ್, ವನಿಂದು ಹಸರಂಗ, ಜೋಫ್ರಾ ಆರ್ಚರ್, ಮಹೇಶ್ ತೀಕ್ಷಣ, ಸಂದೀಪ್ ಶರ್ಮಾ, ಫಜಲ್ಹಕ್ ಫಾರೂಕಿ.
ಆರ್‌ಸಿಬಿ ತಂಡ: ಫಿಲ್ ಸಾಲ್ಟ್, ವಿರಾಟ್ ಕೊಹ್ಲಿ, ದೇವದತ್ ಪಡಿಕ್ಕಲ್, ರಜತ್ ಪಾಟಿದಾರ್ (ನಾಯಕ), ಲಿಯಾಮ್ ಲಿವಿಂಗ್‌ಸ್ಟೋನ್ ಅಥವಾ ಜೇಕಬ್ ಬೆಥೆಲ್, ಜಿತೇಶ್ ಶರ್ಮಾ, ಟಿಮ್ ಡೇವಿಡ್, ಕೃನಾಲ್ ಪಾಂಡ್ಯ, ಭುವನೇಶ್ವರ್ ಕುಮಾರ್, ಜೋಶ್ ಹ್ಯಾಜಲ್‌ವುಡ್, ಸುಯಾಶ್ ಶರ್ಮಾ.
