ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್ 2025)ನ 52ನೇ ಪಂದ್ಯದಲ್ಲಿ ಸಾಂಪ್ರದಾಯಿಕ ಎದುರಾಳಿಗಳಾದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ (ಸಿಎಸ್‌ಕೆ) ಮುಖಾಮುಖಿಯಾಗಲಿದ್ದಾರೆ. ಬೆಂಗಳೂರಿನ ಎಂ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ನಡೆಯಲಿರುವ ಈ ಪಂದ್ಯಕ್ಕೂ ಮುನ್ನ, ಸಿಎಸ್‌ಕೆ ತಂಡದ ಮಾಜಿ ಆಟಗಾರ ಅಂಬಾಟಿ ರಾಯುಡು ಅವರ ಹೇಳಿಕೆಯು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಈಗಾಗಲೇ ಐಪಿಎಲ್ 2025ರ 8ನೇ ಪಂದ್ಯದಲ್ಲಿ ಆರ್‌ಸಿಬಿಯು ಚೆನ್ನೈನ ಎಂ.ಎ ಚಿದಂಬರಂ ಸ್ಟೇಡಿಯಂನಲ್ಲಿ ಸಿಎಸ್‌ಕೆಯನ್ನು 50 ರನ್‌ಗಳಿಂದ ಸೋಲಿಸಿತ್ತು. ಈಗ ಎರಡನೇ ಮುಖಾಮುಖಿಗೆ ವೇದಿಕೆ ಸಿದ್ಧವಾಗಿದೆ. ಆದರೆ, ಈ ಪಂದ್ಯಕ್ಕೂ ಮುನ್ನ ರಾಯುಡು ಅವರ ಹೇಳಿಕೆಯು ಆರ್‌ಸಿಬಿ ಅಭಿಮಾನಿಗಳ ಕೆಂಗಣ್ಣಿಗೆ ಗುರಿಯಾಗಿದೆ.
ಅಂಬಾಟಿ ರಾಯುಡು ಹೇಳಿಕೆ
ಒಂದು ಚಾನೆಲ್ ಚರ್ಚೆಯಲ್ಲಿ ಮಾತನಾಡಿದ ಅಂಬಾಟಿ ರಾಯುಡು, ಆರ್‌ಸಿಬಿ ಮತ್ತು ಸಿಎಸ್‌ಕೆ ನಡುವೆ ಯಾವುದೇ ಸಾಂಪ್ರದಾಯಿಕ ಪೈಪೋಟಿ ಇಲ್ಲ ಎಂದು ವಿವಾದಾತ್ಮಕ ಹೇಳಿಕೆ ನೀಡಿದ್ದಾರೆ. “ಆರ್‌ಸಿಬಿಯನ್ನು ಸಿಎಸ್‌ಕೆಯ ಸಾಂಪ್ರದಾಯಿಕ ಎದುರಾಳಿಯಾಗಿ ಬಿಂಬಿಸಲಾಗುತ್ತಿದೆ, ಆದರೆ ಅಂತಹದ್ದೇನೂ ಇಲ್ಲ. ಸಿಎಸ್‌ಕೆ ತಂಡವು ಆರ್‌ಸಿಬಿಯನ್ನು ಹಲವು ಬಾರಿ ಸೋಲಿಸಿದ್ದು, ಈ ತಂಡಗಳ ನಡುವೆ ಜಿದ್ದಾಜಿದ್ದಿನ ಕಾದಾಟದ ನಿರೀಕ್ಷೆಯೇ ಇಲ್ಲ. ಸಿಎಸ್‌ಕೆಗೆ ಮುಂಬೈ ಇಂಡಿಯನ್ಸ್‌ನಂತಹ ತಂಡಗಳೇ ನಿಜವಾದ ಎದುರಾಳಿಗಳು. ಆರ್‌ಸಿಬಿಯಂತೂ ಸಿಎಸ್‌ಕೆಗೆ ಸಾಮಾನ್ಯ ತಂಡವಷ್ಟೇ,” ಎಂದು ರಾಯುಡು ಹೇಳಿದ್ದಾರೆ.
ರಾಯುಡು ಈ ಹಿಂದೆಯೂ ಆರ್‌ಸಿಬಿಯನ್ನು ಟೀಕಿಸಿದ್ದರು. ಒಂದು ಚಿಟ್‌ಚಾಟ್ ಕಾರ್ಯಕ್ರಮದಲ್ಲಿ, “ಆರ್‌ಸಿಬಿ ಈ ಬಾರಿ ಕಪ್ ಗೆಲ್ಲಬಾರದು. ಅವರು ನಿರೀಕ್ಷೆಗಳನ್ನು ಹೆಚ್ಚಿಸಿ ವಿಫಲರಾಗುವುದರಿಂದ ಮನರಂಜನೆ ಸಿಗುತ್ತದೆ. ಸಿಎಸ್‌ಕೆಯೇ ಟ್ರೋಫಿ ಗೆಲ್ಲಬೇಕು,” ಎಂದು ಹೇಳಿದ್ದರು. ಇನ್ನೊಂದು ಪಾಡ್‌ಕಾಸ್ಟ್‌ನಲ್ಲಿ, “ಆರ್‌ಸಿಬಿ ಒಂದು ದಿನ ಕಪ್ ಗೆಲ್ಲಬಹುದು, ಆದರೆ ಈ ವರ್ಷ ಗೆಲ್ಲದಿರಲಿ ಎಂದು ಪ್ರಾರ್ಥಿಸುತ್ತೇನೆ,” ಎಂದಿದ್ದರು.
ಆರ್‌ಸಿಬಿಯ ಪ್ರದರ್ಶನ
ಈ ಬಾರಿಯ ಐಪಿಎಲ್‌ನಲ್ಲಿ ಆರ್‌ಸಿಬಿ ಭರ್ಜರಿ ಪ್ರದರ್ಶನ ನೀಡುತ್ತಿದೆ. 10 ಪಂದ್ಯಗಳಲ್ಲಿ 7 ಗೆಲುವುಗಳೊಂದಿಗೆ ಪ್ಲೇಆಫ್‌ಗೆ ಸನಿಹದಲ್ಲಿದೆ. ಸಿಎಸ್‌ಕೆ ವಿರುದ್ಧದ ಈ ಪಂದ್ಯದಲ್ಲಿ ಗೆಲುವು ಸಾಧಿಸಿದರೆ, ಆರ್‌ಸಿಬಿಯ ಪ್ಲೇಆಫ್ ಸ್ಥಾನವು ಬಲಗೊಳ್ಳಲಿದೆ.
