ಹಾಲಿ ಚಾಂಪಿಯನ್‌ ಆರ್‌ಸಿಬಿ ತಂಡ ಉಳಿಸಿಕೊಳ್ಳುವ ಮತ್ತು ಕೈಬಿಡುವ ಆಟಗಾರರ ಪಟ್ಟಿ ಹೀಗಿದೆ!

ಬೆಂಗಳೂರು: 2026ರ ಇಂಡಿಯನ್ ಪ್ರೀಮಿಯರ್ ಲೀಗ್‌ (IPL 2026) ಮಿನಿ ಹರಾಜು ಡಿಸೆಂಬರ್ ಮಧ್ಯಭಾಗದಲ್ಲಿ ಅಬುಧಾಬಿಯಲ್ಲಿ ನಡೆಯುವ ಸಾಧ್ಯತೆ ಇದೆ. ಈ ಹಿಂದೆ ನಡೆದ IPL 2025ನಲ್ಲಿ ಅದ್ಭುತ ಪ್ರದರ್ಶನ ನೀಡಿದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡವು ಇತಿಹಾಸದಲ್ಲೇ ಮೊದಲ ಬಾರಿಗೆ ಟ್ರೋಫಿ ಗೆದ್ದು, 18 ವರ್ಷಗಳ ಪ್ರಶಸ್ತಿ ಗೆದ್ದಿತ್ತು.

ಈಗ ಹೊಸ ಹರಾಜಿಗೂ ಮುನ್ನ ಫ್ರಾಂಚೈಸಿಗಳು ತಮ್ಮ ರಿಟೇನ್ ಹಾಗೂ ರಿಲೀಸ್ ಪಟ್ಟಿಯನ್ನು ಪ್ರಕಟಿಸಲು ಸಿದ್ಧವಾಗಿವೆ. ನವೆಂಬರ್ 15 ಅಂತಿಮ ದಿನಾಂಕವಾಗಿದ್ದು, ಆರ್‌ಸಿಬಿ ಕೂಡ ಕೆಲವು ಪ್ರಮುಖ ಆಟಗಾರರನ್ನು ಉಳಿಸಿಕೊಳ್ಳುವ ಜೊತೆಗೆ ಕೆಲವು ಆಟಗಾರರನ್ನು ಕೈಬಿಡುವ ನಿರ್ಧಾರಕ್ಕೆ ಬಂದಿದೆ ಎಂದು ಮೂಲಗಳು ತಿಳಿಸುತ್ತಿವೆ.

ಕಳೆದ ಹರಾಜಿನಲ್ಲಿ ಆರ್‌ಸಿಬಿ, ಇಂಗ್ಲಿಷ್ ಆಲ್‌ರೌಂಡರ್ ಲಿಯಾಮ್ ಲಿವಿಂಗ್‌ಸ್ಟೋನ್ ಅವರನ್ನು 8.75 ಕೋಟಿ ರೂ.ಗೆ ಖರೀದಿಸಿತ್ತು. ಆದರೆ ಅವರ ಪ್ರದರ್ಶನ ನಿರೀಕ್ಷಿತ ಮಟ್ಟಕ್ಕೆ ತಲುಪಲಿಲ್ಲ. ಅವರು ಕೇವಲ 16 ಸರಾಸರಿಯಲ್ಲಿ 112 ರನ್ ಗಳಿಸಿದ್ದರು. ಆರ್‌ಸಿಬಿಯ ಮಧ್ಯಮ ಕ್ರಮಾಂಕದಲ್ಲಿ ಟಿಮ್ ಡೇವಿಡ್, ಜಿತೇಶ್ ಶರ್ಮಾ, ರೊಮಾರಿಯೋ ಶೆಫರ್ಡ್, ಜಾಕೋಬ್ ಬೆಥೆಲ್ ಹಾಗೂ ಕೃನಾಲ್ ಪಾಂಡ್ಯ  ಉತ್ತಮ ಪ್ರದರ್ಶನ ನೀಡುವ ಆಟಗಾರರು ಲಭ್ಯವಿರುವುದರಿಂದ, ಲಿವಿಂಗ್‌ಸ್ಟೋನ್ ಅವರನ್ನು ಬಿಡುಗಡೆ ಮಾಡುವ ಸಾಧ್ಯತೆ ಇದೆ ಎನ್ನಲಾಗಿದೆ.

2025ರ ಅಂತಿಮ ಹಂತಗಳಲ್ಲಿ ಯಶ್ ದಯಾಳ್ ಅವರ ಬೌಲಿಂಗ್‌ನಲ್ಲಿ ಕುಸಿತ ಕಂಡುಬಂತು. 27 ವರ್ಷದ ಈ ವೇಗಿ ಇದೀಗ ಮೈದಾನದ ಹೊರಗೂ ವಿವಾದದಲ್ಲಿ ಸಿಲುಕಿದ್ದಾರೆ. ಮದುವೆಯ ನೆಪದಲ್ಲಿ ಮಹಿಳೆಯೊಬ್ಬರನ್ನು ಶೋಷಿಸಿದ್ದಾರೆ ಎಂಬ ಆರೋಪ ಎದುರಾಗಿದ್ದು, ಫ್ರಾಂಚೈಸಿ ಈ ಪ್ರಕರಣದ ಬೆಳವಣಿಗೆಗೆ ತೀವ್ರ ಗಮನ ಹರಿಸಿದೆ. ಹೀಗಾಗಿ, ಅವರನ್ನು ಬಿಡುಗಡೆ ಮಾಡುವ ಸಾಧ್ಯತೆಗಳು ಹೆಚ್ಚು ಎಂದು ಮೂಲಗಳು ಹೇಳುತ್ತಿವೆ.

ಜಮ್ಮು-ಕಾಶ್ಮೀರದ ಯುವ ವೇಗಿ ರಸಿಕ್ ಸಲಾಂ ದಾರ್ ಅವರನ್ನು IPL 2025 ಹರಾಜಿನಲ್ಲಿ ಆರ್‌ಸಿಬಿ 6 ಕೋಟಿ ರೂ.ಗೆ ಖರೀದಿಸಿತ್ತು. ಆದರೆ ಅವರು ಕೇವಲ ಎರಡು ಪಂದ್ಯಗಳಲ್ಲಿ ಮಾತ್ರ ಆಡಿದರು ಮತ್ತು ಪ್ರಭಾವ ಬೀರುವಲ್ಲಿ ವಿಫಲರಾದರು. ಅತಿ ಹೆಚ್ಚು ಸಂಭಾವನೆ ಪಡೆದ ಭಾರತೀಯ ಆಟಗಾರರಾಗಿದ್ದರೂ, ಆರ್‌ಸಿಬಿಯ ತಂತ್ರಜ್ಞರು ಅವರನ್ನು ಮುಂದಿನ ಸೀಸನ್‌ಗೆ ಬಿಡುವ ನಿರೀಕ್ಷೆ ಇದೆ.

ಒಂದು ವೇಳೆ ಲಿವಿಂಗ್‌ಸ್ಟೋನ್, ದಯಾಳ್ ಹಾಗೂ ರಸಿಕ್ ಮೂವರನ್ನೂ ಆರ್‌ಸಿಬಿ ಹೊರಗುಳಿಸಿದರೆ, ಮಿನಿ ಹರಾಜಿನಲ್ಲಿ ತಂಡದ ಬಳಿ ಸುಮಾರು 19.75 ಕೋಟಿ ರೂ. ಖರ್ಚು ಮಾಡಲು ಲಭ್ಯವಾಗಲಿದೆ. ಇದರಿಂದ ಹೊಸ ವಿದೇಶಿ ವೇಗಿ ಅಥವಾ ಫಿನಿಷರ್ ಖರೀದಿಸಲು ಅವಕಾಶ ದೊರೆಯಲಿದೆ.

ರಿಟೇನ್ ಪಟ್ಟಿಯಲ್ಲಿರುವ ಪ್ರಮುಖ ಆಟಗಾರರು

ಆರ್‌ಸಿಬಿಯ ಯಶಸ್ಸಿನ ಪ್ರಮುಖ ಆಟಗಾರರಾದ ವಿರಾಟ್ ಕೊಹ್ಲಿ, ರಜತ್ ಪಾಟಿದಾರ್, ವಿಕೆಟ್ ಕೀಪರ್ ಫಿಲ್ ಸಾಲ್ಟ್, ಯುವ ತಾರೆ ದೇವದತ್ತ್ ಪಡಿಕ್ಕಲ್, ಹಾಗೂ ಫಿನಿಷರ್ ಟಿಮ್ ಡೇವಿಡ್ ಅವರನ್ನು ತಂಡ ಉಳಿಸಿಕೊಂಡಿದೆ.

ಬೌಲಿಂಗ್ ವಿಭಾಗದಲ್ಲಿ ಜೋಶ್ ಹ್ಯಾಜಲ್‌ವುಡ್, ಭುವನೇಶ್ವರ್ ಕುಮಾರ್, ಲುಂಗಿ ಎನ್‌ಗಿಡಿ, ಮತ್ತು ನುವಾನ್ ತುಷಾರ ಅವರನ್ನು ಉಳಿಸಿಕೊಳ್ಳುವ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಅಲ್ಲದೆ ಕೃನಾಲ್ ಪಾಂಡ್ಯ, ರೊಮಾರಿಯೋ ಶೆಫರ್ಡ್, ಜಾಕೋಬ್ ಬೆಥೆಲ್, ಸುಯಶ್ ಸಿಂಗ್, ಹಾಗೂ ಯುವ ಪ್ರತಿಭೆ ಸ್ವಸ್ತಿಕ್ ಚಿಕಾರ ಕೂಡ ತಂಡದ ಭಾಗವಾಗಿರುತ್ತಾರೆ.

ಬಿಡುಗಡೆಗೊಳ್ಳಬಹುದಾದ ಆಟಗಾರರ ಪಟ್ಟಿ

• ಲಿಯಾಮ್ ಲಿವಿಂಗ್‌ಸ್ಟೋನ್

• ಯಶ್ ದಯಾಳ್

• ರಸಿಕ್ ಸಲಾಂ ದಾರ್

• ಮೋಹಿತ್ ರಾಥೀ

• ಅಭಿನಂದನ್ ಸಿಂಗ್