ಐಪಿಎಲ್ ಪಂದ್ಯವೊಂದು ಕ್ರಿಕೆಟ್ ಪ್ರೇಮಿಗಳಿಗೆ ಉಸಿರು ಬಿಗಿಸುವಂತಹ ರೋಚಕ ಕ್ಷಣಗಳನ್ನು ನೀಡಿದ್ದು, ಕೇವಲ 2 ರನ್‌ಗಳಿಂದ ಲಕ್ನೋ ಸೂಪರ್ ಜೈಂಟ್ಸ್ ತಂಡವು ರಾಜಸ್ಥಾನ್ ರಾಯಲ್ಸ್ ವಿರುದ್ಧ ಭರ್ಜರಿ ಜಯವನ್ನು ದಾಖಲಿಸಿದೆ. ಪಂದ್ಯವು ಜೈಪುರದ ಸವಾಯಿ ಮಾನ್ಸಿಂಗ್ ಸ್ಟೇಡಿಯಂನಲ್ಲಿ ನಡೆದಿದ್ದು, ಎರಡೂ ತಂಡಗಳ ನಡುವೆ ತೀವ್ರ ಪೈಪೋಟಿ ಕಂಡುಬಂದಿತು.
ಪಂದ್ಯದಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ನಾಯಕ ರಿಷಭ್ ಪಂತ್ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಲು ನಿರ್ಧಾರ ಕೈಗೊಂಡರು. ಆರಂಭಿಕರಾಗಿ ಮೈದಾನಕ್ಕಿಳಿದ ಮಿಚೆಲ್ ಮಾರ್ಷ್ ಕೇವಲ 4 ರನ್‌ಗೆ ಕ್ಯಾಚ್ ಆಗಿ ಹೊರನಡೆದರು. ಇದರಿಂದಲೇ ಲಕ್ನೋ ತಂಡಕ್ಕೆ ಮೊದಲ ಆಘಾತ ನೀಡಿತ್ತು. ಆದರೆ ಆಘಾತದ ನಂತರ ಎಡಿನ್ ಮಾರ್ಕ್ರಮ್ ಉತ್ತಮ ರೀತಿಯಲ್ಲಿ ಆಟವಾಡಿದರು. ಅವರು 45 ಎಸೆತಗಳಲ್ಲಿ 6 ಬೌಂಡರಿ ಹಾಗೂ 2 ಸಿಕ್ಸರ್‌ಗಳ ಸಹಿತ 66 ರನ್ ಗಳಿಸಿ ತಂಡದ ಇನಿಂಗ್ಸ್‌ಗೆ ನೆಲೆಯಾದರು.
ನಿಕೋಲಸ್ ಪೂರನ್ ಕೇವಲ 11 ರನ್‌ಗಳು, ನಾಯಕ ರಿಷಭ್ ಪಂತ್ ಕೂಡಾ ತಮ್ಮ ಮಿಂಚನ್ನು ತೋರಿಸದೇ ಕೇವಲ 3 ರನ್‌ಗಳಿಗೆ ಔಟಾದರು. ಆದರೆ ಆಯುಷ್ ಬದೋನಿಯ ಅವರ ಶ್ರೇಷ್ಠ ಬ್ಯಾಟಿಂಗ್ ಪ್ರದರ್ಶನದ ಮೂಲಕ ಅರ್ಧಶತಕ ಬಾರಿಸಿದರು. ಅಂತೆಯೇ ಅಬ್ದುಲ್ ಸಮದ್ ಕೂಡಾ ತಮ್ಮ ಸಿಡಿಲಬ್ಬರದ ಬ್ಯಾಟಿಂಗ್ ಮೂಲಕ ಕೇವಲ 10 ಎಸೆತಗಳಲ್ಲಿ 4 ಭರ್ಜರಿ ಸಿಕ್ಸರ್ ಗಳಿಸಿ 30 ರನ್ ಗಳಿಸಿದರು. ಅಂತಿಮವಾಗಿ ಲಕ್ನೋ ತಂಡವು 20 ಓವರ್‌ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 181 ರನ್ ಗಳಿಸಿ ರಾಜಸ್ಥಾನ್‌ಗೆ ಲಕ್ಷ್ಯ ನೀಡಿತು.
ಈ ಟಾರ್ಗೆಟ್‌ ಬೆನ್ನತ್ತಿದ ರಾಜಸ್ಥಾನ್ ರಾಯಲ್ಸ್ ಉತ್ತಮ ಆರಂಭವನ್ನು ಕಂಡಿತು. 14 ವರ್ಷದ ಯುವ ಪ್ರತಿಭೆ ವೈಭವ್ ಸೂರ್ಯವಂಶಿ ಹಾಗೂ ಯಶಸ್ವಿ ಜೈಸ್ವಾಲ್ ಇವರ ಭರ್ಜರಿ ಆಟದ ನೆರವಿನಿಂದ ಆರಂಭದ ವೇಗ ನೀಡಲಾಯಿತು. ವೈಭವ್ ಸೂರ್ಯವಂಶಿ ಅವರ ಚೊಚ್ಚಲ ಪಂದ್ಯದಲ್ಲೇ ಭರ್ಜರಿ ಪ್ರದರ್ಶನ ನೀಡಿದರು. ಅವರು ಕೇವಲ 20 ಎಸೆತಗಳಲ್ಲಿ 2 ಬೌಂಡರಿ ಹಾಗೂ 3 ಸಿಕ್ಸರ್ ಗಳೊಂದಿಗೆ 34 ರನ್ ಬಾರಿಸಿದರು.
ಯಶಸ್ವಿ ಜೈಸ್ವಾಲ್ ಅವರು ತಮ್ಮ ಇನ್ನೊಂದು ಅರ್ಧಶತಕವನ್ನು ದಾಖಲಿಸಿ ತಮ್ಮ ಫಾರ್ಮ್ ಮುಂದುವರಿಸಿಕೊಂಡರು. ಅವರು 52 ಎಸೆತಗಳಲ್ಲಿ 5 ಬೌಂಡರಿ ಹಾಗೂ 4 ಸಿಕ್ಸರ್‌ಗಳೊಂದಿಗೆ 74 ರನ್ ಗಳಿಸಿ ಪ್ರಮುಖ ಆಟಗಾರರಾಗಿ ಕಾಣಿಸಿಕೊಂಡರು. ಆದರೆ ಆವೇಶ್ ಖಾನ್ ಅವರ ಉತ್ತಮ ಬೌಲಿಂಗ್‌ಗೆ ಬಲಿಯಾಗಿ ವಿಕೆಟ್ ಕಳೆದುಕೊಂಡರು.
ನಂತರ ಬಂದ ನಾಯಕ ರಿಯಾನ್ ಪರಾಗ್ ಅವರು 26 ಎಸೆತಗಳಲ್ಲಿ 3 ಬೌಂಡರಿ ಮತ್ತು 2 ಸಿಕ್ಸರ್‌ಗಳ ನೆರವಿನಿಂದ 39 ರನ್ ಗಳಿಸಿ ತಂಡವನ್ನು ಗೆಲುವಿನ ಹತ್ತಿರ ಕರೆದುಕೊಂಡು ಹೋಗುವಲ್ಲಿ ಸಹಾಯ ಮಾಡಿದರು. ಆದರೆ, ಉಳಿದ ಆಟಗಾರರಾದ ಶಿಮ್ರಾನ್ ಹೆಟ್ಮೆಯರ್ (12), ಧೃವ್ ಜುರೆಲ್ (6) ಮತ್ತು ಶುಭಂ ದುಬೆ (3) ಅವರು ನಿರೀಕ್ಷಿತ ಪ್ರದರ್ಶನ ನೀಡಲು ವಿಫಲರಾದರು.
ಕೊನೆ ಓವರ್‌ನಲ್ಲಿ ಕೇವಲ 10 ರನ್ ಬೇಕಾಗಿದ್ದರೂ ಲಕ್ನೋ ತಂಡದ ಬೌಲರ್‌ಗಳು ತೀವ್ರ ಒತ್ತಡ ನಿರ್ಮಿಸಿ ಆಟದ ರೇಖೆ ಬದಲಿಸಿದರು. ಈ ಮೂಲಕ ರಾಜಸ್ಥಾನ್ ತಂಡವು 20 ಓವರ್‌ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 178 ರನ್ ಗಳಿಸಿತ್ತು.
ಹೀಗಾಗಿ ಕೇವಲ 2 ರನ್‌ಗಳ ಅಂತರದಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ರೋಚಕ ಗೆಲುವು ಸಾಧಿಸಿ ಅಂಕಪಟ್ಟಿಯಲ್ಲಿ ತಮ್ಮ ಸ್ಥಾನವನ್ನು ಮತ್ತಷ್ಟು ಬಲಪಡಿಸಿದರು.
