ಸಿಡ್ನಿ: ಸಿಡ್ನಿಯ ಸಿಡ್ನಿ ಕ್ರಿಕೆಟ್ ಗ್ರೌಂಡ್ನಲ್ಲಿ ನಡೆದ ಭಾರತ-ಆಸ್ಟ್ರೇಲಿಯಾ ನಡುವಿನ ಮೂರನೇ ಮತ್ತು ಕೊನೆಯ ಏಕದಿನ ಅಂತಾರಾಷ್ಟ್ರೀಯ (ODI) ಪಂದ್ಯದಲ್ಲಿ ಟೀಂ ಇಂಡಿಯಾ ಭರ್ಜರಿ ಪ್ರದರ್ಶನ ನೀಡಿ 9 ವಿಕೆಟ್ಗಳಿಂದ ಗೆದ್ದು ಬೀಗಿದೆ. ಆದರೆ ಮೂರು ಪಂದ್ಯಗಳ ಸರಣಿಯನ್ನು ಆಸ್ಟ್ರೇಲಿಯಾ 2-1ರಿಂದ ತನ್ನದಾಗಿಸಿಕೊಂಡಿದೆ.
ಮೊದಲ ಎರಡು ಪಂದ್ಯಗಳನ್ನು ಗೆದ್ದು ಸರಣಿ ಜಯಿಸಿದ್ದ ಆಸೀಸ್, ಕೊನೆಯ ಪಂದ್ಯದಲ್ಲಿ ಭಾರತದ ಆಕ್ರಮಣಕ್ಕೆ ತತ್ತರಿಸಿತು. ಈ ಪಂದ್ಯ ಭಾರತದ ನಾಯಕ ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ ಅವರಿಬ್ಬರೂ ಅದ್ಭುತ ಪ್ರದರ್ಶನ ನೀಡಿ ಅಭಿಮಾನಿಗಳನ್ನು ರಂಜಿಸಿದರು.
ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಆಯ್ದುಕೊಂಡ ಆಸ್ಟ್ರೇಲಿಯಾ ತಂಡ ಭಾರತದ ಬೌಲರ್ಗಳ ಎದುರು ತತ್ತರಿಸಿತು. 46.4 ಓವರ್ಗಳಲ್ಲಿ ಎಲ್ಲಾ ವಿಕೆಟ್ ಕಳೆದುಕೊಂಡು 236 ರನ್ಗಳಷ್ಟೇ ಕಲೆಹಾಕಿತು. ಆರಂಭದಲ್ಲಿ ಪ್ಲೇಯಿಂಗ್ ಇಲೆವೆನ್ನಲ್ಲಿ ಯುವ ಬೌಲರ್ ಹರ್ಷಿತ್ ರಾಣಾ ಸೇರಿದ್ದರಿಂದ ಅಭಿಮಾನಿಗಳಲ್ಲಿ ಕುತೂಹಲ ನಿರ್ಮಾಣವಾಗಿತ್ತು. ಮತ್ತು ಆತ ಅದಕ್ಕೆ ತಕ್ಕ ಪ್ರತಿಫಲ ನೀಡಿದ್ದ.
ರಾಣಾ ಕೇವಲ ನಿಖರ ಬೌಲಿಂಗ್ ಮಾತ್ರವಲ್ಲದೆ ನಿರ್ಣಾಯಕ ಕ್ಷಣಗಳಲ್ಲಿ ವಿಕೆಟ್ಗಳನ್ನೂ ಪಡೆದರು. ಅವರು 4 ವಿಕೆಟ್ ಪಡೆದು ಆಸ್ಟ್ರೇಲಿಯಾದ ಬ್ಯಾಟಿಂಗ್ ಕ್ರಮವನ್ನೇ ಮುರಿದರು. ವಾಷಿಂಗ್ಟನ್ ಸುಂದರ್ 2 ವಿಕೆಟ್ ಪಡೆದರೆ, ಸಿರಾಜ್, ಪ್ರಸಿದ್ಧ ಕೃಷ್ಣ, ಕುಲ್ದೀಪ್ ಯಾದವ್ ಮತ್ತು ಅಕ್ಸರ್ ಪಟೇಲ್ ತಲಾ ಒಂದು ವಿಕೆಟ್ ಬಾಚಿದರು.
237 ರನ್ಗಳ ಸರಾಸರಿ ಗುರಿ ಭಾರತಕ್ಕೆ ಕಷ್ಟಕರವಲ್ಲದಿದ್ದರೂ, ಸರಣಿಯ ಗೌರವ ಉಳಿಸುವ ಹೋರಾಟವಾಗಿತ್ತು. ಈ ಒತ್ತಡದ ಸಂದರ್ಭದಲ್ಲಿ ನಾಯಕತ್ವದ ಶೈಲಿಯೊಂದಿಗೆ ರೋಹಿತ್ ಶರ್ಮಾ ಮತ್ತು ಹಿರಿಯ ಬ್ಯಾಟರ್ ವಿರಾಟ್ ಕೊಹ್ಲಿ ಇಬ್ಬರೂ ಕಣಕ್ಕಿಳಿದರು. ಆರಂಭಿಕ ಆಟಗಾರರಾದ ಶುಭಮನ್ ಗಿಲ್ ಮತ್ತು ರೋಹಿತ್ ಉತ್ತಮ ಆರಂಭ ಒದಗಿಸಿದರು. 10.2 ಓವರ್ಗಳಲ್ಲಿ ಗಿಲ್ (24 ರನ್, 26 ಬಾಲ್) ಔಟ್ ಆದ ನಂತರ ಕ್ರೀಸ್ಗೆ ಬಂದ ಕೊಹ್ಲಿ, ಸ್ಥಿರತೆಯಿಂದ ಆಡಿದರು.
ಹಿಟ್ಮ್ಯಾನ್ ರೋಹಿತ್ ಶರ್ಮಾ ಇಂದು ನಿಜಕ್ಕೂ ಅದ್ಭುತ ಪ್ರದರ್ಶನ ನೀಡಿದರು. ಪೇಸ್ ಬೌಲರ್ಗಳ ವಿರುದ್ಧ ಕಟಿಂಗ್ ಹಾಗೂ ಪುಲ್ ಶಾಟ್ಗಳ ಮೂಲಕ ಅವರು ಬೌಲರ್ಗಳನ್ನು ಒತ್ತಡಕ್ಕೊಳಪಡಿಸಿದರು. 96.80 ಸ್ಟ್ರೈಕ್ ರೇಟ್ನಲ್ಲಿ ಕ್ರೀಸ್ನಲ್ಲಿ ಅಜೇಯವಾಗಿ ಉಳಿದ ರೋಹಿತ್, 3 ಸಿಕ್ಸರ್ ಮತ್ತು 13 ಬೌಂಡರಿಗಳೊಂದಿಗೆ 121 ರನ್ ಬಾರಿಸಿದರು. ಅವರ ಈ ಶತಕ ಅಭಿಮಾನಿಗಳಿಗೆ ಖುಷಿಯ ವಿಷಯವಾಯಿತು.
ಇತ್ತ, ರೋಹಿತ್ಗೆ ಉತ್ತಮ ಬೆಂಬಲ ನೀಡಿದ ವಿರಾಟ್ ಕೊಹ್ಲಿ 81 ಬಾಲ್ಗಳಲ್ಲಿ 71 ರನ್ಗಳಿಸಿ ಆಟದ ಆಧಾರವಾಗಿ ನಿಂತರು. ಇಬ್ಬರ ಅಪ್ರತಿಮ ಬ್ಯಾಟಿಂಗ್ ಭಾರತಕ್ಕೆ ಸುಲಭ ಗೆಲುವು ತಂದುಕೊಟ್ಟಿತು. ಕೇವಲ ಒಂದು ವಿಕೆಟ್ ಕಳೆದುಕೊಂಡು ಭಾರತ 237 ರನ್ ಗುರಿಯನ್ನು ತಲುಪಿತು.
