ಸಂಖ್ಯಾಶಾಸ್ತ್ರ ಭವಿಷ್ಯ: ಇಂದು ನಿಮ್ಮ ಜನ್ಮಸಂಖ್ಯೆ ಏನು ಹೇಳುತ್ತದೆ ತಿಳಿಯಿರಿ!

ನಿಮ್ಮ ಜನ್ಮಸಂಖ್ಯೆಯ ಆಧಾರದಲ್ಲಿ ಆಗಸ್ಟ್ 7, 2025ರ ಗುರುವಾರದ ದಿನದ ಭವಿಷ್ಯವನ್ನು ಇಲ್ಲಿ ವಿವರಿಸಲಾಗಿದೆ. ಜನ್ಮಸಂಖ್ಯೆಯನ್ನು ತಿಳಿಯಲು, ನಿಮ್ಮ ಜನ್ಮ ದಿನಾಂಕದ ಅಂಕಿಗಳನ್ನು ಒಟ್ಟುಗೂಡಿಸಿ ಒಂದಂಕಿಯ ಸಂಖ್ಯೆಗೆ ಇಳಿಸಿ (ಉದಾಹರಣೆಗೆ, 19=1+9=10=1+0=1). ಕೆಳಗಿನ ಭವಿಷ್ಯವು ಜನ್ಮಸಂಖ್ಯೆ 1 ರಿಂದ 9 ರವರೆಗಿನವರಿಗೆ ಒದಗಿಸಲಾಗಿದೆ.

ಜನ್ಮಸಂಖ್ಯೆ 1 (1, 10, 19, 28ನೇ ತಾರೀಕು ಹುಟ್ಟಿದವರು)

ಶಿಕ್ಷಣ ಕ್ಷೇತ್ರದಲ್ಲಿರುವವರಿಗೆ ಕೆಲಸದ ಒತ್ತಡ ಹೆಚ್ಚಾಗಿರಲಿದೆ. ಮುಖ್ಯ ಜವಾಬ್ದಾರಿಯ ಹುದ್ದೆಯಲ್ಲಿರುವವರಿಗೆ ಇತರರ ತಪ್ಪಿನಿಂದ ತೊಂದರೆ ಉಂಟಾಗಬಹುದು. ನಿಮ್ಮ ಸಲಹೆಯನ್ನು ಸಂಬಂಧಿತರು ಕೇಳದಿರಬಹುದು. ಕೌಟುಂಬಿಕವಾಗಿ ಕೆಲವು ಯೋಜನೆಗಳು ಯಶಸ್ವಿಯಾಗದೆ, ಜಗಳಗಳು ಉದ್ಭವಿಸಬಹುದು. ಆಪ್ತರ ಪ್ರೀತಿ, ಪ್ರೇಮ ಅಥವಾ ಮದುವೆ ವಿಷಯಗಳಲ್ಲಿ ಹಸ್ತಕ್ಷೇಪ ಮಾಡದಿರಿ. ಉಳಿತಾಯ ಅಥವಾ ಹೂಡಿಕೆಯನ್ನು ಇತರರಿಗಾಗಿ ಬಳಸದಿರಿ. ಭಾವನಾತ್ಮಕವಾಗಿ ಒತ್ತಡಕ್ಕೊಳಗಾದ ವ್ಯಕ್ತಿಯ ಸಮಸ್ಯೆಯನ್ನು ವಿಶ್ಲೇಷಿಸದೆ ತೀರ್ಮಾನಕ್ಕೆ ಬರಬೇಡಿ.

ಜನ್ಮಸಂಖ್ಯೆ 2 (2, 11, 20, 29ನೇ ತಾರೀಕು ಹುಟ್ಟಿದವರು)

ಉದ್ಯೋಗಾವಕಾಶಗಳು ನಿಮ್ಮನ್ನು ಹುಡುಕಿಕೊಂಡು ಬರಲಿವೆ. ಈ ಹಿಂದೆ ನೀವು ಸಹಾಯ ಮಾಡಿದವರು ಈಗ ನಿಮಗೆ ನೆರವಾಗಬಹುದು. ದೊಡ್ಡ ಯೋಜನೆಗೆ ಹಣದ ಕೊರತೆಯಿದ್ದರೆ, ಸ್ನೇಹಿತರ ಶಿಫಾರಸಿನಿಂದ ಸಾಲ ದೊರೆಯಬಹುದು. ನೆಟ್‌ವರ್ಕ್ ಮಾರ್ಕೆಟಿಂಗ್‌ನಂತಹ ಯೋಜನೆಗಳಿಂದ ದೂರವಿರಿ. 15 ವರ್ಷ ಮೇಲ್ಪಟ್ಟ ಮಕ್ಕಳ ಶೈಕ್ಷಣಿಕ ಪ್ರಗತಿಯು ಸಂತೋಷ ತರಲಿದೆ. ಸ್ವತಃ ಶಿಕ್ಷಣದಲ್ಲಿ ತೊಡಗಿರುವವರಿಗೆ ಈ ದಿನ ಹೆಮ್ಮೆಯ ಕ್ಷಣಗಳನ್ನು ತರಲಿದೆ.

ಜನ್ಮಸಂಖ್ಯೆ 3 (3, 12, 21, 30ನೇ ತಾರೀಕು ಹುಟ್ಟಿದವರು)

ಸಾಮಾಜಿಕ ಮಾಧ್ಯಮದಲ್ಲಿ ನಿಮ್ಮ ಪೋಸ್ಟ್ ಅಥವಾ ವಿಡಿಯೋ ಚರ್ಚೆಗೆ ಕಾರಣವಾಗಲಿದೆ. ಸ್ನೇಹಿತರು ಇದನ್ನು ತಪ್ಪೆಂದು ಭಾವಿಸಬಹುದು. ಉದ್ದೇಶಪೂರ್ವಕವಾಗಿಯೋ ಅಥವಾ ಅಜಾಗರೂಕತೆಯಿಂದಲೋ, ಕೆಲಸದ ಸ್ಥಳದಲ್ಲಿ ಮೇಲಧಿಕಾರಿಗಳ ಸಿಟ್ಟಿಗೆ ಗುರಿಯಾಗಬಹುದು. ಮನೆಯ ಕಾರ್ಯಕ್ರಮದ ಖರ್ಚು ಊಹಿಸದಷ್ಟು ಹೆಚ್ಚಾಗಲಿದೆ. ಪ್ರತಿಷ್ಠೆಗಾಗಿ ದುಬಾರಿ ಖರೀದಿಗೆ ಮುಂದಾಗಿ, ಸಾಲ ಅಥವಾ ಕ್ರೆಡಿಟ್ ಕಾರ್ಡ್ ಬಳಸಿ, ತುರ್ತು ವೆಚ್ಚಕ್ಕೆ ಹಣಕ್ಕಾಗಿ ಪರದಾಡಬಹುದು.

ಜನ್ಮಸಂಖ್ಯೆ 4 (4, 13, 22, 31ನೇ ತಾರೀಕು ಹುಟ್ಟಿದವರು)

ಪ್ರೀತಿಯಲ್ಲಿರುವವರು ಮಹತ್ವದ ತೀರ್ಮಾನಕ್ಕೆ ಬರಲಿದ್ದಾರೆ. ಮನೆಯವರಿಗೆ ನಿಮ್ಮ ಪ್ರೀತಿಯ ವಿಷಯ ತಿಳಿಯದಿದ್ದರೆ, ಈ ದಿನ ಗೊತ್ತಾಗಬಹುದು. ಆಸ್ತಿ ವ್ಯಾಜ್ಯ ಸಮಾಧಾನವಾಗದೆ ಸಂಕೀರ್ಣವಾಗಬಹುದು. ಸಂಬಂಧವಿಲ್ಲದವರ ಹಸ್ತಕ್ಷೇಪದಿಂದ ಗೊಂದಲ ಉಂಟಾಗಬಹುದು. ವ್ಯಾಜ್ಯ ಇತ್ಯರ್ಥವಾಗದಿದ್ದರೆ, ಹಣಕಾಸಿನ ತೀರ್ಮಾನಗಳನ್ನು ತೆಗೆದುಕೊಳ್ಳಬೇಡಿ. ನೀರಿನ ವ್ಯವಹಾರದಲ್ಲಿರುವವರು ಪರವಾನಗಿ ರಿನೀವಲ್ ಖಾತರಿಪಡಿಸಿಕೊಳ್ಳಿ. ಈ ದಿನ ದಂಡ ಪಾವತಿಯ ಯೋಗವಿದೆ.

ಜನ್ಮಸಂಖ್ಯೆ 5 (5, 14, 23ನೇ ತಾರೀಕು ಹುಟ್ಟಿದವರು)

ವಾದ-ವಿವಾದದಿಂದ ಕೆಲಸಗಳು ಆಗದು ಎಂಬುದು ಈ ದಿನ ಗೊತ್ತಾಗಲಿದೆ. ಸಾಮಾನ್ಯ ಕೆಲಸದ ವಿಧಾನಕ್ಕಿಂತ ಭಿನ್ನವಾಗಿ ಕಾರ್ಯನಿರ್ವಹಿಸಲಿದ್ದೀರಿ. ಸಾಮ-ದಾನ-ಭೇದ-ದಂಡ ತಂತ್ರಗಳನ್ನು ತ್ವರಿತವಾಗಿ ಆಯ್ಕೆ ಮಾಡಲಿದ್ದೀರಿ. ಉಳಿತಾಯವನ್ನು ಬೇರೆ ಉದ್ದೇಶಕ್ಕೆ ಬಳಸುವ ಸನ್ನಿವೇಶ ಉಂಟಾಗಲಿದೆ. ಹೊಸ ಕೌಶಲ ಕಲಿಯಲು ಮುಂದಾಗಲಿದ್ದೀರಿ. ಮರೆತುಹೋಗಿದ್ದ ಸ್ನೇಹಿತರಿಂದ ಮಹತ್ವದ ಸಲಹೆ ಸಿಗಲಿದ್ದು, ಭವಿಷ್ಯದಲ್ಲಿ ದೊಡ್ಡ ಲಾಭವನ್ನು ತರಲಿದೆ.

ಜನ್ಮಸಂಖ್ಯೆ 6 (6, 15, 24ನೇ ತಾರೀಕು ಹುಟ್ಟಿದವರು)

ಕೆಲವು ವಿಷಯಗಳನ್ನು ಚರ್ಚಿಸದಂತೆ ತಡೆಯಲು ನೀವು ತೀವ್ರ ಪ್ರಯತ್ನ ಮಾಡಲಿದ್ದೀರಿ. ಆಪ್ತರ ಹೆಸರು ಪ್ರಸ್ತಾಪವಾಗದಂತೆ ಆಕ್ಷೇಪಗಳನ್ನು ಸ್ವೀಕರಿಸಲಿದ್ದೀರಿ. ಹೋಟೆಲ್ ವ್ಯವಹಾರದಲ್ಲಿರುವವರಿಗೆ ಅನಿರೀಕ್ಷಿತ ನಷ್ಟ ಉಂಟಾಗಬಹುದು. ಹೊಸ ಕಾರ್ಯತಂತ್ರದಿಂದ ಫಲಿತಾಂಶ ಕಾಣಲಿದ್ದೀರಿ. ಐಟಿ/ಬಿಪಿಒ ಕ್ಷೇತ್ರದವರಿಗೆ ಗಮನಕ್ಕೆ ಬಾರದ ನೀತಿಗಳಿಂದ ಆತಂಕ ಉಂಟಾಗಬಹುದು. ಕಿವಿನೋವಿನ ಸಮಸ್ಯೆ ಉಲ್ಬಣಿಸಬಹುದು.

ಜನ್ಮಸಂಖ್ಯೆ 7 (7, 16, 25ನೇ ತಾರೀಕು ಹುಟ್ಟಿದವರು)

ಸಹಾಯದ ಭರವಸೆ ನೀಡುವ ಮೊದಲು ಎಚ್ಚರಿಕೆಯಿಂದ ಆಲೋಚಿಸಿ. ಇಲ್ಲದಿದ್ದರೆ, ಹಣದ ತೊಂದರೆಯಾಗಬಹುದು. ದೂರದ ಪ್ರಯಾಣಕ್ಕೆ ಸಿದ್ಧತೆಯಲ್ಲಿ ಒತ್ತಡ ಉಂಟಾಗಲಿದೆ. ಕೊನೆ ಕ್ಷಣದಲ್ಲಿ ಸೇರಿಕೊಳ್ಳುವ ವ್ಯಕ್ತಿಯಿಂದ ನಕಾರಾತ್ಮಕತೆ ಉಂಟಾಗಬಹುದು. ಅತಿಯಾದ ಉತ್ಸಾಹದಿಂದ ಗುರಿಗಳನ್ನು ನಿಗದಿಪಡಿಸಿದರೆ, ಸಮರ್ಥನೆಯ ಸನ್ನಿವೇಶ ಎದುರಾಗಲಿದೆ. ಮಾತಿನ ಮೇಲೆ ಹಿಡಿತ ಇರಲಿ. ಹಿಂದಿನ ಅನುಭವಗಳು ಈ ದಿನ ಸಹಾಯಕವಾಗದಿರಬಹುದು.

ಜನ್ಮಸಂಖ್ಯೆ 8 (8, 17, 26ನೇ ತಾರೀಕು ಹುಟ್ಟಿದವರು)

ನಿಮ್ಮ ಜ್ಞಾನ ಮತ್ತು ಕೌಶಲವು ಮೇಲಧಿಕಾರಿಗಳ ಗಮನ ಸೆಳೆಯಲಿದೆ. ತಾತ್ಕಾಲಿಕವಾಗಿ ಸವಾಲಿನ ಜವಾಬ್ದಾರಿಯೊಂದು ಒದಗಬಹುದು, ಇದನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದರೆ ಭವಿಷ್ಯದಲ್ಲಿ ಲಾಭವಾಗಲಿದೆ. ಕುಟುಂಬದಿಂದ ಉತ್ತಮ ಬೆಂಬಲ ಸಿಗಲಿದೆ. ಮದುವೆಯ ಪ್ರಯತ್ನದಲ್ಲಿರುವವರಿಗೆ ಪರಿಚಿತರಿಂದ ಪ್ರಸ್ತಾವ ಬರಲಿದೆ. ತೀರ್ಮಾನವನ್ನು ಮುಂದೂಡಿದರೆ, ನಂತರ ಪಶ್ಚಾತ್ತಾಪವಾಗಬಹುದು. ಈಶ್ವರನಿಗೆ ಜಲಾಭಿಷೇಕ ಮಾಡಿಸಿದರೆ ಒಳಿತು.

ಜನ್ಮಸಂಖ್ಯೆ 9 (9, 18, 27ನೇ ತಾರೀಕು ಹುಟ್ಟಿದವರು)

ಅತಿಯಾದ ಆತ್ಮವಿಶ್ವಾಸ ಈ ದಿನ ಇರಲಿದೆ. ಕೃಷಿ ಜಮೀನು ಅಥವಾ ತೋಟದ ಖರೀದಿಗೆ ಒಳ್ಳೆಯ ಅವಕಾಶ ದೊರೆಯಲಿದೆ. ಆಗಾಗ ಉದ್ಯೋಗ ಬದಲಾಯಿಸಿದವರಿಗೆ ಪ್ರತಿಷ್ಠಿತ ಕಡೆಯಿಂದ ಆಫರ್ ಬರಲಿದೆ. ಆಹಾರ ಪಥ್ಯದ ಬಗ್ಗೆ ಎಚ್ಚರಿಕೆ ವಹಿಸಿ, ವಿಶೇಷವಾಗಿ ಮಸಾಲೆ ಪದಾರ್ಥಗಳಿಂದ ದೂರವಿರಿ. 30-40 ವರ್ಷದೊಳಗಿನವರಿಗೆ ಸೆಕೆಂಡ್ ಹ್ಯಾಂಡ್ ವಾಹನ ಖರೀದಿಯ ಯೋಗವಿದೆ.