ವೈಷ್ಣೋದೇವಿ ದೇಣಿಗೆಯಲ್ಲಿ ಹಗರಣ ಆರೋಪ: ತನಿಖೆ ಆರಂಭ

ಜಮ್ಮು, ಜುಲೈ 18: ದೇಶದ ಅತ್ಯಂತ ಶ್ರೀಮಂತ ಹಾಗೂ ಕೋಟ್ಯಂತರ ಭಕ್ತರು ಭೇಟಿ ನೀಡುವ ಶ್ರೀ ಮಾತಾ ವೈಷ್ಣೋದೇವಿ ದೇವಸ್ಥಾನ ಮತ್ತೊಮ್ಮೆ ವಿವಾದದ ಕೇಂದ್ರಬಿಂದುವಾಗಿದೆ. ಭಕ್ತರು ವರ್ಷಗಳ ಕಾಲ ಅರ್ಪಿಸಿದ ಸುಮಾರು ₹500 ರಿಂದ ₹550 ಕೋಟಿ ಮೌಲ್ಯದ ಬೆಳ್ಳಿ ದೇಣಿಗೆಯಲ್ಲಿ ಭಾರೀ ಅಕ್ರಮ ನಡೆದಿದೆ ಎಂಬ ಗಂಭೀರ ಆರೋಪ ಕೇಳಿಬಂದಿದ್ದು, ಪ್ರಕರಣ ಇದೀಗ ನ್ಯಾಯಾಲಯದ ಮೆಟ್ಟಿಲೇರಿದೆ.

ಲಭ್ಯ ಇರುವ ಮಾಹಿತಿಯ ಪ್ರಕಾರ, ಕಳೆದ 5–6 ವರ್ಷಗಳಲ್ಲಿ ಭಕ್ತರು ಅರ್ಪಿಸಿದ್ದ ಸುಮಾರು 20 ಟನ್ ಬೆಳ್ಳಿಯ ಆಭರಣಗಳು, ನಾಣ್ಯಗಳು ಹಾಗೂ ಬೆಳ್ಳಿ ಛತ್ರಿಗಳನ್ನು ಶುದ್ಧೀಕರಣಕ್ಕಾಗಿ ಜಮ್ಮು-ಕಾಶ್ಮೀರದ ಹೊರಗಿನ ಸರ್ಕಾರಿ ಟಂಕಸಾಲೆಗೆ ಕಳುಹಿಸಲಾಗಿತ್ತು. ಆದರೆ ಅಲ್ಲಿ ಲೋಹದ ಗುಣಮಟ್ಟ ಪರೀಕ್ಷಿಸಿದ ವೇಳೆ ಅಚ್ಚರಿಯ ಸಂಗತಿ ಬೆಳಕಿಗೆ ಬಂದಿದೆ.

ಕೇವಲ ಶೇ.5ರಿಂದ 6ರಷ್ಟು ಮಾತ್ರ ಅಸಲಿ ಬೆಳ್ಳಿ!

ಪರೀಕ್ಷೆಯಲ್ಲಿ ಕರಗಿಸಲಾದ ಒಟ್ಟು ಲೋಹದಲ್ಲಿ ಕೇವಲ ಶೇಕಡಾ 5–6ರಷ್ಟು ಮಾತ್ರ ಶುದ್ಧ ಬೆಳ್ಳಿ ಇರುವುದು ಪತ್ತೆಯಾಗಿದೆ. ಉಳಿದ ಭಾಗದಲ್ಲಿ ಕಬ್ಬಿಣ, ಕ್ಯಾಡ್ಮಿಯಮ್ ಸೇರಿದಂತೆ ವಿವಿಧ ಅಗ್ಗದ ಲೋಹಗಳು ಮಿಶ್ರಣವಾಗಿರುವುದು ಅಧಿಕಾರಿಗಳ ಆತಂಕಕ್ಕೆ ಕಾರಣವಾಗಿದೆ.

ಒಂದು ಉದಾಹರಣೆಯಲ್ಲಿ, ದೇವಾಲಯದ ದಾಖಲೆಗಳ ಪ್ರಕಾರ 70 ಕೆಜಿ ತೂಕದ ಬೆಳ್ಳಿಯ ವಸ್ತುವನ್ನು ಕರಗಿಸಿದಾಗ ಕೇವಲ 3 ಕೆಜಿ ಶುದ್ಧ ಬೆಳ್ಳಿ ಮಾತ್ರ ದೊರೆತಿದೆ ಎಂದು ವರದಿಗಳು ತಿಳಿಸಿವೆ. ಒಂದು ವೇಳೆ ಭಕ್ತರು ಅರ್ಪಿಸಿದ್ದ 20 ಟನ್ ಬೆಳ್ಳಿ ಸಂಪೂರ್ಣ ಶುದ್ಧವಾಗಿದ್ದರೆ, ಅದರ ಇಂದಿನ ಮೌಲ್ಯ ₹550 ಕೋಟಿಗೂ ಅಧಿಕವಾಗುತ್ತಿತ್ತು ಎಂದು ಅಂದಾಜಿಸಲಾಗಿದೆ.

ವಂಚನೆ ಎಲ್ಲಾಯಿತು?

ಪ್ರಕರಣದಲ್ಲಿ ಎರಡು ಪ್ರಮುಖ ಅನುಮಾನಗಳು ವ್ಯಕ್ತವಾಗಿವೆ. ಭಕ್ತರು ದೇವಸ್ಥಾನಕ್ಕೆ ಬರುವ ಮುನ್ನ ಸ್ಥಳೀಯ ವ್ಯಾಪಾರಿಗಳು ಅಥವಾ ಆಭರಣ ಅಂಗಡಿಗಳಿಂದಲೇ ನಕಲಿ ಅಥವಾ ಕಲಬೆರಕೆ ಬೆಳ್ಳಿ ಖರೀದಿಸಿ ದೇಣಿಗೆ ನೀಡಿದ್ದಾರೆಯೇ? ಅಥವಾ ದೇವಸ್ಥಾನದ ಭದ್ರತಾ ಕೊಠಡಿಯಲ್ಲಿ ದೇಣಿಗೆ ಸ್ವೀಕರಿಸಿದ ಬಳಿಕ ಅಸಲಿ ಬೆಳ್ಳಿಯನ್ನು ಬದಲಿಸಿ ನಕಲಿ ಲೋಹ ಇರಿಸಲಾಗಿದೆಯೇ? ಎಂಬ ಪ್ರಶ್ನೆಗಳು ತನಿಖೆಯ ಕೇಂದ್ರಬಿಂದುವಾಗಿವೆ.

ಈ ಸಂಬಂಧ ವಕೀಲ ದೀಪಕ್ ಶರ್ಮಾ ಸಲ್ಲಿಸಿದ್ದ ದೂರಿನ ಮೇರೆಗೆ ಪ್ರಕರಣ ದಾಖಲಿಸಿಕೊಂಡಿರುವ ಅಧಿಕಾರಿಗಳು ತನಿಖೆ ಆರಂಭಿಸಿದ್ದಾರೆ. ಜಮ್ಮು ನ್ಯಾಯಾಲಯವು ಪ್ರಕರಣದ ಎಲ್ಲಾ ಮೂಲ ದಾಖಲೆಗಳೊಂದಿಗೆ ತನಿಖಾ ಅಧಿಕಾರಿಗಳು ಹಾಜರಾಗುವಂತೆ ಸೂಚಿಸಿದ್ದು, ಮುಂದಿನ ವಿಚಾರಣೆಯನ್ನು ಜುಲೈ 29, 2026ಕ್ಕೆ ನಿಗದಿಪಡಿಸಿದೆ.

ಆರೋಗ್ಯದ ಆತಂಕವೂ ಹೆಚ್ಚಳ

ಪತ್ತೆಯಾದ ಮಿಶ್ರಲೋಹಗಳಲ್ಲಿ ಕ್ಯಾಡ್ಮಿಯಮ್ ಇರುವುದರಿಂದ ಆರೋಗ್ಯದ ಆತಂಕವೂ ಎದುರಾಗಿದೆ. ಕ್ಯಾಡ್ಮಿಯಮ್ ಅನ್ನು ಜಾಗತಿಕ ಮಟ್ಟದಲ್ಲಿ ಕ್ಯಾನ್ಸರ್‌ಕಾರಕ ಲೋಹವೆಂದು ಗುರುತಿಸಲಾಗಿದೆ. ಇದನ್ನು ನಿರ್ವಹಿಸುವ ಸಿಬ್ಬಂದಿ ಹಾಗೂ ಟಂಕಸಾಲೆ ಕಾರ್ಮಿಕರ ಆರೋಗ್ಯದ ಮೇಲೂ ದುಷ್ಪರಿಣಾಮ ಉಂಟಾಗುವ ಸಾಧ್ಯತೆ ಇದೆ.

ಪ್ರಕರಣ ಗಂಭೀರ ಸ್ವರೂಪ ಪಡೆಯುತ್ತಿದ್ದಂತೆ ಜಮ್ಮು-ಕಾಶ್ಮೀರದ ಲೆಫ್ಟಿನೆಂಟ್ ಗವರ್ನರ್ ಮನೋಜ್ ಸಿನ್ಹಾ ದೇವಾಲಯ ಮಂಡಳಿಯ ತುರ್ತು ಸಭೆ ನಡೆಸಿದ್ದಾರೆ. ಮುಂದಿನ ದಿನಗಳಲ್ಲಿ ದೇವಸ್ಥಾನಕ್ಕೆ ಬರುವ ಪ್ರತಿಯೊಂದು ದೇಣಿಗೆಯನ್ನು RBI ಮಾರ್ಗಸೂಚಿಗಳು ಹಾಗೂ ತಂತ್ರಜ್ಞಾನದ ನೆರವಿನಿಂದ ಪಾರದರ್ಶಕವಾಗಿ ಪರಿಶೀಲಿಸುವಂತೆ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದಾರೆ.