ದೇಶದ ಪ್ರಮುಖ ಟೆಲಿಕಾಂ ಕಂಪನಿಗಳಾದ ರಿಲಯನ್ಸ್ ಜಿಯೋ (Jio), ಭಾರ್ತಿ ಏರ್ಟೆಲ್ (Airtel) ಮತ್ತು ವೊಡಾಫೋನ್ ಐಡಿಯಾ (Vi) ಶೀಘ್ರದಲ್ಲೇ ತಮ್ಮ ಪ್ರಿಪೇಯ್ಡ್ ಮತ್ತು ಪೋಸ್ಟ್ಪೇಯ್ಡ್ ಯೋಜನೆಗಳ ದರವನ್ನು ಹೆಚ್ಚಿಸಲು ಸಿದ್ಧತೆ ನಡೆಸಿವೆ. 2026ರ ಮಧ್ಯಭಾಗದ ವೇಳೆಗೆ, ಅಂದರೆ ಜೂನ್ ಅಥವಾ ಜುಲೈ ತಿಂಗಳಿನಲ್ಲಿ ಮೊಬೈಲ್ ರೀಚಾರ್ಜ್ ಬೆಲೆಗಳು ಶೇ. 15 ರಿಂದ 20 ರಷ್ಟು ಏರಿಕೆಯಾಗುವ ಸಾಧ್ಯತೆಯಿದೆ ಎಂದು ತಿಳಿದುಬಂದಿದೆ.
ದರ ಏರಿಕೆಯ ಹಿಂದಿನ ಅಸಲಿ ಕಾರಣವೇನು ?
ಟೆಲಿಕಾಂ ಕಂಪನಿಗಳು ಪ್ರಮುಖವಾಗಿ ತಮ್ಮ ಸರಾಸರಿ ಪ್ರತಿ ಬಳಕೆದಾರ ಆದಾಯ (ARPU) ಅನ್ನು ಹೆಚ್ಚಿಸಿಕೊಳ್ಳಲು ದರ ಏರಿಕೆ ಮಾಡಿದೆ. ಪ್ರಸ್ತುತ ಕಂಪನಿಗಳು ಪಡೆಯುತ್ತಿರುವ ಆದಾಯವು, ಅವುಗಳು 5G ತಂತ್ರಜ್ಞಾನ ಮತ್ತು ನೆಟ್ವರ್ಕ್ ವಿಸ್ತರಣೆಗಾಗಿ ಮಾಡಿರುವ ಬೃಹತ್ ಹೂಡಿಕೆಗೆ ಹೋಲಿಸಿದರೆ ತೀರಾ ಕಡಿಮೆ ಇದೆ.
ವಿಶೇಷವಾಗಿ ಏರ್ಟೆಲ್ ಸಂಸ್ಥೆಯು ತನ್ನ ARPU ಅನ್ನು ಸದ್ಯದ ಮಟ್ಟದಿಂದ 300 ರೂಪಾಯಿಗಳಿಗೆ ಕೊಂಡೊಯ್ಯುವ ಗುರಿಯನ್ನು ಹೊಂದಿದೆ. ಈ ಗುರಿ ತಲುಪಬೇಕಾದರೆ ಸುಂಕದ ಏರಿಕೆ ಅನಿವಾರ್ಯವಾಗಿದೆ. ಕಂಪನಿಗಳ ಲಾಭದಂಶವನ್ನು ಸುಧಾರಿಸಲು ಮತ್ತು ಗುಣಮಟ್ಟದ ಸೇವೆ ನೀಡಲು ಈ ಸುಂಕ ಮರುಹೊಂದಿಸುವಿಕೆ (Tariff Hike) ಅಗತ್ಯ ಎಂದು ಕಂಪನಿಗಳು ಸಮರ್ಥಿಸಿಕೊಳ್ಳುತ್ತಿವೆ.
5G ಉಚಿತ ಸೇವೆಗೆ ಬೀಳಲಿದೆಯೇ ಬ್ರೇಕ್ ?
ಇಲ್ಲಿಯವರೆಗೆ ಜಿಯೋ ಮತ್ತು ಏರ್ಟೆಲ್ ಗ್ರಾಹಕರಿಗೆ ಆಫರ್ ರೂಪದಲ್ಲಿ ನೀಡುತ್ತಿದ್ದ ಅನಿಯಮಿತ 5G ಡೇಟಾ ಸೇವೆಗೆ ಈ ಬಾರಿ ನಿರ್ಬಂಧ ಬೀಳುವ ಸಾಧ್ಯತೆ ಹೆಚ್ಚಿದೆ. ಕಂಪನಿಗಳು ಇನ್ಮುಂದೆ 5G ಸೇವೆಗಾಗಿ ಪ್ರತ್ಯೇಕ ಬೆಲೆಯ ಪ್ಲಾನ್ಗಳನ್ನು ಪರಿಚಯಿಸಬಹುದು ಅಥವಾ ದೈನಂದಿನ ಡೇಟಾ ಬಳಕೆಯ ಮೇಲೆ ಮಿತಿ ಹೇರಬಹುದು. ಇದರಿಂದ ದೀರ್ಘಕಾಲದಿಂದ ಉಚಿತ 5G ಬಳಸುತ್ತಿದ್ದ ಗ್ರಾಹಕರಿಗೆ ಆಘಾತವಾಗಿದೆ.
ಗ್ರಾಹಕರ ಮೇಲೆ ಬೀರುವ ಪರಿಣಾಮಗಳೇನು?
-
ಕನಿಷ್ಠ ರೀಚಾರ್ಜ್ ಹೆಚ್ಚಳ: ಸಾಮಾನ್ಯ ಗ್ರಾಹಕರು ಬಳಸುವ ಕನಿಷ್ಠ ಬೆಲೆಯ ಪ್ಯಾಕ್ಗಳ ದರವೂ ಏರಿಕೆಯಾಗಲಿದ್ದು, ಜನಸಾಮಾನ್ಯರ ಬಜೆಟ್ ಮೇಲೆ ಪರಿಣಾಮ ಬೀರಲಿದೆ.
-
ದೈನಂದಿನ ಡೇಟಾ ಪ್ಲಾನ್: ನಿತ್ಯ 1.5GB ಅಥವಾ 2GB ಡೇಟಾ ನೀಡುವ ಯೋಜನೆಗಳ ಬೆಲೆ 50 ರಿಂದ 100 ರೂಪಾಯಿಗಳವರೆಗೆ ಹೆಚ್ಚಾಗಬಹುದು.
ಭಾರತವು ವಿಶ್ವದಲ್ಲೇ ಅತಿ ಕಡಿಮೆ ದರದಲ್ಲಿ ಡೇಟಾ ನೀಡುವ ದೇಶಗಳಲ್ಲಿ ಒಂದಾಗಿದೆ. ಆದರೆ ಸತತ ಬೆಲೆ ಏರಿಕೆಯು ಮಧ್ಯಮ ವರ್ಗದವರ ಮೇಲೆ ಆರ್ಥಿಕ ಹೊರೆ ಹೇರುತ್ತಿದೆ. ಬೆಲೆ ಏರಿಕೆಯ ಆಘಾತದಿಂದ ತಪ್ಪಿಸಿಕೊಳ್ಳಲು ಬಯಸುವ ಗ್ರಾಹಕರು, ದರ ಏರಿಕೆಯಾಗುವ ಮೊದಲೆ (ಜೂನ್ ತಿಂಗಳ ಮೊದಲು) ಒಂದು ವರ್ಷದ ಅವಧಿಯ ಲಾಂಗ್ ಟರ್ಮ್ ಪ್ಲಾನ್ ಗಳೊಂದಿಗೆ ರೀಚಾರ್ಜ್ ಮಾಡಿಕೊಳ್ಳುವುದು ಉತ್ತಮ ಎಂದು ಆರ್ಥಿಕ ತಜ್ಞರು ಸಲಹೆ ನೀಡಿದ್ದಾರೆ.
