ಆಂಧ್ರಪ್ರದೇಶದ ಪುಟ್ಟಪರ್ಥಿಯಲ್ಲಿ ನಡೆದ ಶ್ರೀ ಸತ್ಯ ಸಾಯಿ ಬಾಬಾ ಅವರ ಜನ್ಮ ಶತಮಾನೋತ್ಸವ (ಸೆಂಟನರಿ) ಆಚರಣೆಯು ಬಹಳ ಅದ್ಭುತವಾಗಿ, ಅಚ್ಚುಕಟ್ಟಾಗಿ ನಡೆದಿದೆ. ನವೆಂಬರ್ 19, 2025 ರಂದು ಈ ಐತಿಹಾಸಿಕ ಕಾರ್ಯಕ್ರಮಕ್ಕೆ ಪ್ರಧಾನಿ ನರೇಂದ್ರ ಮೋದಿ, ಕ್ರಿಕೆಟ್ ಆಟಗಾರ ಸಚಿನ್ ತೆಂಡೂಲ್ಕರ್, ಕೇಂದ್ರ ಸಚಿವ ರಾಮ್ ಮೋಹನ್ ನಾಯ್ಡು ಕಿಂಜರಪು, ಜಿ. ಕಿಶನ್ ರೆಡ್ಡಿ, ಆಂಧ್ರ ಮುಖ್ಯಮಂತ್ರಿ ಎನ್. ಚಂದ್ರಬಾಬು ನಾಯ್ಡು, ಉಪಮುಖ್ಯಮಂತ್ರಿ ಪವನ್ ಕಲ್ಯಾಣ್, ರಾಜ್ಯ ಸಚಿವ ನಾರಾ ಲೋಕೇಶ್ ಸೇರಿದಂತೆ ಅನೇಕ ಗಣ್ಯರು ಹಾಜರಾದರು. ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಬಾಲಿವುಡ್ ನಟಿ ಐಶ್ವರ್ಯಾ ರೈ ಬಚ್ಚನ್ ಅವರ ಭಾಷಣ ಮತ್ತು ಪ್ರಧಾನಿ ಮೋದಿ ಅವರ ಕಾಲು ಮುಟ್ಟಿದ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿ ಸುನ್ಸ್.
ಸತ್ಯ ಸಾಯಿ ಬಾಬಾ ಅವರು 1926ರ ನವೆಂಬರ್ 23 ರಂದು ಪುಟ್ಟಪರ್ಥಿಯಲ್ಲಿ ಜನಿಸಿದ್ದು, 2011ರ ಏಪ್ರಿಲ್ 24 ರಂದು 84 ವರ್ಷ ವಯಸ್ಸಿನಲ್ಲಿ ಬಹು ಅಂಗಾಂಗ ವೈಫಲ್ಯದಿಂದ ನಿಧನರಾದರು. ಶಿರಡಿ ಸಾಯಿ ಬಾಬಾ ಅವರ ಅವತಾರವೆಂದು ಹೇಳಿಕೊಂಡ ಅವರು, ‘ಪ್ರೀತಿ ಮಾಡು, ಸೇವೆ ಮಾಡು’ ಎಂಬ ತತ್ವಗಳ ಮೂಲಕ ಲಕ್ಷಾಂತರ ಭಕ್ತರ ಹೃದಯಗಳನ್ನು ಗೆದ್ದಿದ್ದರು. ಈ ಶತಮಾನೋತ್ಸವದಲ್ಲಿ ಅವರ ಜೀವನ ಮತ್ತು ಉಪದೇಶಗಳನ್ನು ಸ್ಮರಿಸಲು ವಿಶೇಷ ನಾಣ್ಯ ಮತ್ತು ಸ್ಟ್ಯಾಂಪ್ಗಳನ್ನು ಬಿಡುಗಡೆ ಮಾಡಲಾಯಿತು. ಪ್ರಧಾನಿ ಮೋದಿ ಅವರು ಮಹಾಸಮಾಧಿ ದರ್ಶನ ಮಾಡಿ, ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ನೋಡಿ, ಭಕ್ತರೊಂದಿಗೆ ಸಂವಾದ ನಡೆಸಿದ್ದಾರೆ.
ವೇದಿಕೆಯಲ್ಲಿ ಹಾಜರಾದ ಐಶ್ವರ್ಯಾ ರೈ ಅವರು ಸಾಂಪ್ರದಾಯಿಕ ಉಡುಗೆಯಲ್ಲಿ ಕಂಗೊಳಿಸುತ್ತಾ, ಜಗತ್ತಿನಲ್ಲಿ ಒಂದೇ ಜಾತಿ ಇದೆ, ಅದು ಮಾನವೀಯತೆ. ಒಂದೇ ಧರ್ಮ ಇದೆ, ಅದು ಪ್ರೀತಿ. ಒಂದೇ ಭಾಷೆ ಇದೆ, ಅದು ಹೃದಯದ ಭಾಷೆ. ದೇವರು ಒಬ್ಬನೇ, ಅವರು ಸರ್ವವ್ಯಾಪಿ ಎಂದು ಹೇಳಿ, ಸಾಯಿ ಬಾಬಾ ಅವರ ಉಪದೇಶಗಳನ್ನು ನೆನಪಿಸಿದರು. ಇದರೊಂದಿಗೆ ಅವರು ಸಾಯಿ ಬಾಬಾ ವಿಕಾಸ ಕಾರ್ಯಕ್ರಮದ ಮಾಜಿ ವಿದ್ಯಾರ್ಥಿಯಾಗಿ, ಬಾಬಾ ಅವರ ಪಂಚ “ಡಿ”ಗಳನ್ನು (ಡಿಸಿಪ್ಲಿನ್, ಡೆಡಿಕೇಷನ್, ಡೆವೋಷನ್, ಡೆಟರ್ಮಿನೇಷನ್, ಡಿಸ್ಕ್ರಿಮಿನೇಷನ್) ಉಲ್ಲೇಖಿಸಿ, ಇವುಗಳು ಆಧ್ಯಾತ್ಮಿಕ ಜೀವನಕ್ಕೆ ಅತ್ಯಗತ್ಯ ಎಂದು ಹೇಳಿದರು.
ಪ್ರಧಾನಿ ಮೋದಿ ಅವರ ಬಗ್ಗೆ ಐಶ್ವರ್ಯಾ ರೈ ಮಾತನಾಡಿ, ಈ ವಿಶೇಷ ಸಂದರ್ಭದಲ್ಲಿ ನಮ್ಮೊಂದಿಗೆ ಇರುವುದಕ್ಕಾಗಿ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಹೃದಯಪೂರ್ವಕ ಧನ್ಯವಾದಗಳು. ನಿಮ್ಮ ಸ್ಫೂರ್ತಿದಾಯಕ ಮಾತುಗಳನ್ನು ಕೇಳಲು ನಾನು ಎದುರುನೋಡುತ್ತಿದ್ದೇನೆ. ನಿಮ್ಮ ಉಪಸ್ಥಿತಿ ಈ ಶತಮಾನೋತ್ಸವಕ್ಕೆ ಪವಿತ್ರತೆ ಮತ್ತು ಸ್ಫೂರ್ತಿಯನ್ನು ನೀಡುತ್ತದೆ. ನಿಜವಾದ ನಾಯಕತ್ವವೇ ಸೇವೆ. ಮನುಷ್ಯನಿಗೆ ಸೇವೆ ಮಾಡುವುದು ದೇವರಿಗೆ ಸೇವೆ ಮಾಡಿದಂತೆ ಎಂದು ಹೇಳಿದರು. ಭಾಷಣದ ನಂತರ ಐಶ್ವರ್ಯಾ ಅವರು ವೇದಿಕೆಯಲ್ಲಿ ಮೋದಿ ಅವರ ಬಳಿ ತೆರಳಿ, ಅವರ ಕಾಲು ಮುಟ್ಟಿ ನಮಸ್ಕರಿಸಿದರು. ಪ್ರಧಾನಿ ಮೋದಿ ಅವರು ಐಶ್ವರ್ಯಾ ಅವರ ತಲೆಯ ಮೇಲೆ ಕೈ ಇಟ್ಟು ಆಶೀರ್ವಾದ ಮಾಡಿದರು. ಈ ಸುಂದರ ಕ್ಷಣದ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಡಿದ್ದು, ಲಕ್ಷಾಂತರ ವೀಕ್ಷಣೆಗಳನ್ನು ಪಡೆದಿದೆ.
ಸಚಿನ್ ತೆಂಡೂಲ್ಕರ್ ಸಹ ಈ ಬಗ್ಗೆ ಮಾತನಾಡಿ, ಸಾಯಿ ಬಾಬಾ ಅವರೊಂದಿಗಿನ ವೈಯಕ್ತಿಕ ಸ್ಮರಣೆಗಳನ್ನು ಹಂಚಿಕೊಂಡರು. ಸಾಯಿ ಬಾಬಾ ಅವರು ಪ್ರೀತಿ ಮಾಡು, ಸೇವೆ ಮಾಡು’ ಎಂದು ಹೇಳಿದ್ದರು. ಇದು ನಮ್ಮ ಜೀವನದ ಮೂಲ ತತ್ವ ಎಂದು ಹೇಳಿದರು. ಇವರ ಭಾಷಣಗಳ ಕಾರ್ಯಕ್ರಮದಲ್ಲಿ ಸಾಂಸ್ಕೃತಿಕ ನೃತ್ಯ, ಸಂಗೀತ ಕಾರ್ಯಕ್ರಮಗಳು ನಡೆದವು.
