ಪಂಜಾಬ್ನ ರೋಪರ್ ವಲಯದ ಡಿಐಜಿ ಹರ್ಚರಣ್ ಸಿಂಗ್ ಬುಲ್ಲಾರ್ ಭ್ರಷ್ಟಾಚಾರ ಆರೋಪದಲ್ಲಿ ಕೇಂದ್ರೀಯ ತನಿಖಾ ದಳ (ಸಿಬಿಐ) ಬಂಧನಕ್ಕೊಳಗಾಗಿದ್ದಾರೆ. 8 ಲಕ್ಷ ರೂ. ಲಂಚ ಪಡೆಯುವಾಗ ರೆಡ್ಹ್ಯಾಂಡ್ ಆಗಿ ಸಿಕ್ಕಿಬಿದ್ದ ಈ ಐಪಿಎಸ್ ಅಧಿಕಾರಿಯ ಮನೆಯಿಂದ 5 ಕೋಟಿ ರೂ. ನಗದು, 1.5 ಕೆಜಿ ಚಿನ್ನ, ಐಷಾರಾಮಿ ಮರ್ಸಿಡಿಸ್ ಮತ್ತು ಆಡಿ ಕಾರುಗಳು, ದುಬಾರಿ ವಾಚ್ಗಳು ಮತ್ತು ಆಯುಧಗಳು ಸೇರಿದಂತೆ ಅಪಾರ ಅಕ್ರಮ ಸಂಪತ್ತು ಪತ್ತೆಯಾಗಿದೆ. ಈ ಘಟನೆಯಿಂದ ಸಿಬಿಐ ಅಧಿಕಾರಿಗಳೇ ದಿಗ್ಭ್ರಮೆಗೊಂಡಿದ್ದಾರೆ.
2009ರ ಬ್ಯಾಚ್ನ ಐಪಿಎಸ್ ಅಧಿಕಾರಿಯಾಗಿರುವ ಹರ್ಚರಣ್ ಸಿಂಗ್ ಬುಲ್ಲಾರ್, ರೋಪರ್ ವಲಯದ ಡಿಐಜಿಯಾಗಿ ಕಾರ್ಯನಿರ್ವಹಿಸುತ್ತಿದ್ದರು. ಸ್ಕ್ರ್ಯಾಪ್ ವ್ಯಾಪಾರಿಯೊಬ್ಬರಾದ ಆಕಾಶ್ ಬಟ್ಟಾ ವಿರುದ್ಧದ ಕ್ರಿಮಿನಲ್ ಪ್ರಕರಣವನ್ನು ಇತ್ಯರ್ಥಗೊಳಿಸಲು 8 ಲಕ್ಷ ರೂ. ಲಂಚಕ್ಕೆ ಬೇಡಿಕೆ ಇಟ್ಟಿದ್ದರು. ಲಂಚ ನೀಡದಿದ್ದರೆ ಉದ್ಯಮಕ್ಕೆ ತೊಂದರೆಯಾಗುವುದೆಂದು ಬೆದರಿಕೆ ಹಾಕಿದ್ದ ಡಿಐಜಿಯ ವಿರುದ್ಧ ಆಕಾಶ್ ಬಟ್ಟಾ ಸಿಬಿಐಗೆ ದೂರು ನೀಡಿದ್ದರು. ಈ ದೂರಿನ ಆಧಾರದಲ್ಲಿ ಕಾರ್ಯಾಚರಣೆಗಿಳಿದ ಸಿಬಿಐ, ಲಂಚ ಸ್ವೀಕರಿಸುವ ವೇಳೆ ಡಿಐಜಿಯನ್ನು ಮತ್ತು ಮಧ್ಯವರ್ತಿಯಾದ ಕೃಷ್ಣನನ್ನು ಬಂಧಿಸಿತು.
ಡಿಐಜಿಯ ಮನೆಯಲ್ಲಿ ಸಿಕ್ಕಿದ್ದೇನು?
ಸಿಬಿಐ ಶೋಧದ ವೇಳೆ ಡಿಐಜಿಯ ನಿವಾಸದಿಂದ 5 ಕೋಟಿಗೂ ಅಧಿಕ ನಗದು, 1.5 ಕೆಜಿ ಚಿನ್ನಾಭರಣ, ನೂರಾರು ಕೋಟಿ ಮೌಲ್ಯದ ಜಮೀನು-ನಿವೇಶನ ದಾಖಲೆಗಳು, ಮರ್ಸಿಡಿಸ್ ಮತ್ತು ಆಡಿ ಕಾರುಗಳ ಕೀಗಳು, 22 ದುಬಾರಿ ವಾಚ್ಗಳು, 40 ಲೀಟರ್ ಆಮದು ಮದ್ಯ, ಡಬಲ್ ಬ್ಯಾರಲ್ ಶಾಟ್ಗನ್, ಒಂದು ಪಿಸ್ತೂಲ್, ಒಂದು ರಿವಾಲ್ವರ್ ಮತ್ತು ಒಂದು ಏರ್ಗನ್ ವಶಕ್ಕೆ ಪಡೆಯಲಾಗಿದೆ. ಇದರ ಜೊತೆಗೆ ಮಧ್ಯವರ್ತಿಯಾದ ಕೃಷ್ಣನಿಂದ 21 ಲಕ್ಷ ರೂ. ಜಪ್ತಿಯಾಗಿದೆ.
ದಕ್ಷ ಅಧಿಕಾರಿಯ ಮುಖವಾಡ ಕಳಚಿತು:
ಹರ್ಚರಣ್ ಸಿಂಗ್ ಬುಲ್ಲಾರ್ ಡ್ರಗ್ಸ್ ಮಾಫಿಯಾ ವಿರುದ್ಧ “ವಿನಾಶದ ವಿರುದ್ಧ ಯುದ್ಧ” ಎಂಬ ಅಭಿಯಾನದ ಮೂಲಕ ದಕ್ಷ ಅಧಿಕಾರಿಯಾಗಿ ಗುರುತಿಸಿಕೊಂಡಿದ್ದರು. ಈ ಕಾರಣಕ್ಕಾಗಿಯೇ ಅವರಿಗೆ ಡಿಐಜಿಯಾಗಿ ಬಡ್ತಿ ದೊರಕಿತ್ತು. ಆದರೆ, ಈಗ ಅವರ ಭ್ರಷ್ಟಾಚಾರದ ಮುಖವಾಡ ಕಳಚಿಬಿದ್ದಿದೆ. ಸಿಬಿಐ ಶೋಧ ಕಾರ್ಯಾಚರಣೆ ರಾತ್ರಿಯಿಡೀ ಮುಂದುವರಿದಿದ್ದು, ಬಂಧಿತರನ್ನು ಇಂದು ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗುತ್ತದೆ.
ಈ ಘಟನೆಯಿಂದ ಭ್ರಷ್ಟಾಚಾರದ ವಿರುದ್ಧದ ಹೋರಾಟಕ್ಕೆ ಸಿಬಿಐನ ಕಾರ್ಯಾಚರಣೆ ಮತ್ತೊಂದು ಗೀಳನ್ನು ಹಾಕಿದೆ. ಜನರ ವಿಶ್ವಾಸವನ್ನು ದುರ್ಬಳಕೆ ಮಾಡಿಕೊಂಡ ಉನ್ನತ ಅಧಿಕಾರಿಯೊಬ್ಬನ ಅಕ್ರಮ ಸಂಪತ್ತಿನ ಖಜಾನೆಯ ಬಗ್ಗೆ ತಿಳಿದು ಸಾರ್ವಜನಿಕರು ಆಘಾತಕ್ಕೊಳಗಾಗಿದ್ದಾರೆ.
