ಏಷ್ಯಾದಾದ್ಯಂತ ಕೋವಿಡ್-19 ವೈರಾಣು ಮತ್ತೆ ವಕ್ಕರಿಸಿದೆ. ಚೀನಾ, ಥೈಲ್ಯಾಂಡ್, ಹಾಂಗ್ ಕಾಂಗ್, ಮತ್ತು ಸಿಂಗಪುರದಂತಹ ದೇಶಗಳಲ್ಲಿ ವೈರಾಣು ತೀವ್ರಗತಿಯಲ್ಲಿ ಹರಡುತ್ತಿದೆ. ಏಪ್ರಿಲ್ 27 ರಿಂದ ಮೇ 3ರ ಒಳಗೆ ಕೇವಲ ಒಂದು ವಾರದಲ್ಲಿ ಕೋವಿಡ್ ಪ್ರಕರಣಗಳು ಶೇ. 16ರಷ್ಟು ಏರಿಕೆಯಾಗಿವೆ. ಒಟ್ಟು ಕೇಸ್‌ಗಳ ಪೈಕಿ ಶೇ. 6ಕ್ಕಿಂತ ಹೆಚ್ಚು ರೋಗಿಗಳು ತೀವ್ರ ನಿಗಾ ಘಟಕದಲ್ಲಿ (ಐಸಿಯು) ಚಿಕಿತ್ಸೆ ಪಡೆಯುತ್ತಿದ್ದಾರೆ. ಸಿಂಗಪುರದಂತಹ ದೇಶಗಳಲ್ಲಿ ಸಾರ್ವತ್ರಿಕ ರಜೆಯಿಂದ ಜನಜಂಗುಳಿ ಏರ್ಪಟ್ಟಿದ್ದು, ಒಂದೇ ಕಡೆ ಹೆಚ್ಚಿನ ಜನರು ಸೇರಿದ ಕಾರಣ ವೈರಾಣು ಹರಡುವಿಕೆ ತೀವ್ರಗೊಂಡಿದೆ. ವಿದೇಶ ಪ್ರವಾಸಿಗರು ಮತ್ತು ಅವರ ಕುಟುಂಬಸ್ಥರಿಗೆ ಸೋಂಕು ತಗುಲುವ ಸಾಧ್ಯತೆಯೂ ಹೆಚ್ಚಾಗಿದೆ.
ಚೀನಾದಲ್ಲಿ ಕೋವಿಡ್‌ನ ಭೀಕರ ರೂಪ
ಚೀನಾದ ಗುವಾಂಗ್‌ಝೂ ಪ್ರಾಂತ್ಯದಲ್ಲಿ ಕೋವಿಡ್‌ನ ಅಪಾಯಕಾರಿ ಪರಿಣಾಮ ಸ್ಪಷ್ಟವಾಗಿದೆ. ಎಂಟು ವರ್ಷದ ಬಾಲಕಿಯೊಬ್ಬಳ ಮೆದುಳಿಗೆ ಕೋವಿಡ್ ವೈರಾಣು ಲಗ್ಗೆ ಇಟ್ಟಿದ್ದು ಬ್ರೈನ್ ಡೆಡ್ ಆದ ಕಾರಣ ಸಾವಿಗೀಡಾಗಿ (ಬ್ರೈನ್ ಡೆಡ್) ದುರ್ಮರಣಕ್ಕೀಡಾದ ಘಟನೆ ಅಂತಾರಾಷ್ಟ್ರೀಯ ಮಾಧ್ಯಮಗಳ ಗಮನ ಸೆಳೆದಿದೆ. ಬಾಲಕಿಗೆ ಆರಂಭದಲ್ಲಿ ಜ್ವರ, ತಲೆನೋವು, ಮೈತುರಿಕೆ, ಗುಳ್ಳೆ, ಮತ್ತು ವಾಂತಿಯಂತಹ ಲಕ್ಷಣಗಳು ಕಾಣಿಸಿಕೊಂಡಿದ್ದವು. ಆದರೆ, ಏಕಾಏಕಿ ಆಕೆಯ ಮೆದುಳು ಕಾರ್ಯನಿರ್ವಹಿಸದೇ ಸಾವನ್ನಪ್ಪಿದಳು.
ಕೋವಿಡ್ ಏರಿಕೆಗೆ ಕಾರಣವೇನು?
ತಜ್ಞರ ಪ್ರಕಾರ, ಮಾನವ ದೇಹದಲ್ಲಿ ಹಳೆಯ ತಳಿಯ ಕೋವಿಡ್ ವೈರಾಣುಗಳಿಗೆ ಮಾತ್ರ ರೋಗ ನಿರೋಧಕ ಶಕ್ತಿ ಇದೆ. ಹೊಸ ತಳಿಯ ವೈರಾಣುಗಳು ಜೀವಕೋಶಗಳಿಗೆ ಸುಲಭವಾಗಿ ಹಾನಿ ಮಾಡಬಲ್ಲವು. ಲಸಿಕೆಗಳು ಕೂಡ ಹಳೆಯ ತಳಿಗಳ ವಿರುದ್ಧ ರಕ್ಷಣೆ ನೀಡುತ್ತವೆಯಾದರೂ, ಕಾಲಾಂತರದಲ್ಲಿ ಅವುಗಳ ಪರಿಣಾಮಕಾರಿತ್ವ ಕಡಿಮೆಯಾಗಿದೆ. ಉಪತಳಿಯ ವೈರಾಣುಗಳ ಹರಡುವಿಕೆಯ ತೀವ್ರತೆಯೂ ಈಗ ಹೆಚ್ಚಾಗಿದೆ. 65 ವರ್ಷಕ್ಕಿಂತ ಮೇಲ್ಪಟ್ಟವರು ಈ ಸೋಂಕಿನಿಂದ ಹೆಚ್ಚಿನ ಅಪಾಯದ ಗುಂಪಿಗೆ ಸೇರಿದ್ದಾರೆ.
ಹೊಸ ರೂಪಾಂತರಿ ವೈರಾಣು: ಓಮಿಕ್ರಾನ್ ಉಪತಳಿಗಳು
ಓಮಿಕ್ರಾನ್ ಬಿಎ.2.86 ಮತ್ತು ಜೆಎನ್.1 ಉಪತಳಿಗಳ ಆರ್ಭಟ ಹೆಚ್ಚಾಗಿದೆ. 2024ರಲ್ಲಿ ಉದ್ಭವವಾದ ಎಲ್‌ಎಫ್.7 ಮತ್ತು ಎನ್‌ಬಿ.1.8 ಉಪತಳಿಗಳು ತೀವ್ರವಾಗಿ ಹರಡುತ್ತಿವೆ. ಓಮಿಕ್ರಾನ್ ಈಗಾಗಲೇ 30ಕ್ಕೂ ಹೆಚ್ಚು ಉಪತಳಿಗಳನ್ನು ಸೃಷ್ಟಿಸಿದೆ. ಕೋವಿಡ್ ಎಂಡೆಮಿಕ್ ಆಗಿದ್ದರೂ, ಆಗಾಗ ಹೊಸ ತಳಿಗಳ ರೂಪಾಂತರವು ಉಲ್ಬಣವಾಗುತ್ತದೆ ಎಂದು ತಜ್ಞರು ಎಚ್ಚರಿಸಿದ್ದಾರೆ.
ಭಾರತದಲ್ಲಿ ಕೋವಿಡ್ ಸ್ಥಿತಿಗತಿ
ಭಾರತ ಸರ್ಕಾರದ ಪ್ರಕಾರ, ದೇಶದಲ್ಲಿ ಕೋವಿಡ್ ಸ್ಥಿತಿ ನಿಯಂತ್ರಣದಲ್ಲಿದೆ. ಸದ್ಯ 257 ಸಕ್ರಿಯ ಪ್ರಕರಣಗಳಿದ್ದು, ಕೇರಳ, ಮಹಾರಾಷ್ಟ್ರ, ಮತ್ತು ತಮಿಳುನಾಡು ರಾಜ್ಯಗಳಲ್ಲಿ ಹೆಚ್ಚಿನ ಕೇಸ್‌ಗಳು ಕಂಡುಬಂದಿವೆ. ಮೇ 12 ರಿಂದ 164 ಹೊಸ ಕೇಸ್‌ಗಳು ದಾಖಲಾಗಿವೆ. ಕೇರಳದಲ್ಲಿ 69, ಮಹಾರಾಷ್ಟ್ರದಲ್ಲಿ 52, ತಮಿಳುನಾಡಿನಲ್ಲಿ 34, ಮತ್ತು ಕರ್ನಾಟಕದಲ್ಲಿ 8 ಸಕ್ರಿಯ ಪ್ರಕರಣಗಳಿವೆ. ಮಹಾರಾಷ್ಟ್ರದಲ್ಲಿ ಜನವರಿಯಿಂದ ಈವರೆಗೆ ಎರಡು ಕೋವಿಡ್ ಸಾವುಗಳು ಸಂಭವಿಸಿವೆ.
ಕೋವಿಡ್ ಲಕ್ಷಣಗಳು ಮತ್ತು ತಡೆಗಟ್ಟುವಿಕೆ
ಹೊಸ ಕೋವಿಡ್ ಸೋಂಕಿನ ಲಕ್ಷಣಗಳೆಂದರೆ ಜ್ವರ, ಕೆಮ್ಮು, ಕಫ, ಮೈ-ಕೈ ನೋವು, ಮತ್ತು ತಲೆನೋವು. ಚೀನಾದಲ್ಲಿ ಕೆಲವು ರೋಗಿಗಳಲ್ಲಿ ಕಾಲು-ಕೈಗಳಲ್ಲಿ ಗುಳ್ಳೆ ಕಾಣಿಸಿಕೊಂಡಿವೆ. ಸೋಂಕಿನ ತೀವ್ರತೆ ಹೆಚ್ಚಾದರೆ ಉಸಿರಾಟದ ಸಮಸ್ಯೆ ಕಾಣಿಸಿಕೊಳ್ಳಬಹುದು. ತಡೆಗಟ್ಟುವಿಕೆಗಾಗಿ ಜನಜಂಗುಳಿ ಪ್ರದೇಶಗಳಲ್ಲಿ ಮಾಸ್ಕ್ ಧರಿಸಿ, ಸ್ಯಾನಿಟೈಸರ್ ಬಳಸಿ, ಕೈಯಿಂದ ಕಣ್ಣು, ಮೂಗು, ಬಾಯಿಯನ್ನು ಮುಟ್ಟಿಕೊಳ್ಳಬೇಡಿ. ಕೋವಿಡ್ ಪಾಸಿಟಿವ್ ಬಂದರೆ ಐಸೋಲೇಟ್ ಆಗಿ, ಅನುಮಾನ ಬಂದರೆ ಆರ್‌ಟಿಪಿಸಿಆರ್ ಟೆಸ್ಟ್ ಮಾಡಿಸಿಕೊಳ್ಳಿ.
