ಇಂದೋರ್: ವಯಸ್ಸು ಕೇವಲ ದಾಖಲೆಯ ಸಂಖ್ಯೆ ಮಾತ್ರ. ಆಸಕ್ತಿ, ಬದ್ಧತೆ ಮತ್ತು ಕಲಿಯುವ ಹಂಬವಿದ್ದಲ್ಲಿ ಯಾವ ವಯಸ್ಸಿನಲ್ಲೂ ಯಶಸ್ಸನ್ನು ಸಾಧಿಸಬಹುದು. ವೃದ್ಧಾಪ್ಯ ಜೀವನದ ಸಮಯದಲ್ಲಿ ಬಹುತೇಕರು ವಿಶ್ರಾಂತಿಯನ್ನು ಬಯಸಿದರೆ, ಇಲ್ಲೊರ್ವ ಮಹಿಳೆ ಚಿನ್ನದ ಪದಕ ಗೆಲ್ಲುವ ಮೂಲಕ ಅಮೋಘ ಸಾಧನೆ ಮಾಡಿದ್ದಾರೆ. 78 ವರ್ಷದ ಸುಷ್ಮಾ ಮೋಘ ಅವರು ಮಧ್ಯಪ್ರದೇಶದ ದೇವಿ ಅಹಲ್ಯಾ ವಿಶ್ವವಿದ್ಯಾಲಯದಲ್ಲಿ ಎಂ.ಎ (ಮರಾಠಿ) ಪದವಿಯಲ್ಲಿ ಪ್ರಥಮ ಸ್ಥಾನ ಪಡೆದು ಚಿನ್ನದ ಪದಕ ಜಯಿಸಿ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ.
ಫೆಬ್ರವರಿ 17ರಂದು ನಡೆದ ವಿಶ್ವವಿದ್ಯಾಲಯದ ಘಟಿಕೋತ್ಸವ ಸಮಾರಂಭದಲ್ಲಿ ಮಧ್ಯಪ್ರದೇಶದ ರಾಜ್ಯಪಾಲ ಮಂಗುಭಾಯಿ ಪಟೇಲ್ ಅವರು ಸ್ವತಃ ಸುಷ್ಮಾ ಅವರಿಗೆ ಚಿನ್ನದ ಪದಕ ಪ್ರದಾನ ಮಾಡಿ ಗೌರವಿಸಿದರು.
ನಿವೃತ್ತಿ ನಂತರ ಹೊಸ ಪಯಣ
ಸಾಮಾನ್ಯವಾಗಿ ನಿವೃತ್ತಿಯ ನಂತರ ಜನರು ವಿಶ್ರಾಂತಿ ಜೀವನವನ್ನು ಆರಿಸುತ್ತಾರೆ. ಆದರೆ ಸುಷ್ಮಾ ಮೋಘ ಅವರು ತಮ್ಮ ಖಾಲಿ ಸಮಯವನ್ನು ಅರ್ಥಪೂರ್ಣವಾಗಿ ಬಳಸಿಕೊಳ್ಳಬೇಕೆಂದು ನಿರ್ಧರಿಸಿದರು. ತಮ್ಮ ಮಾತೃಭಾಷೆಯಾದ ಮರಾಠಿಯ ಮೇಲಿನ ಪ್ರೀತಿ ಮತ್ತು ಸಾಹಿತ್ಯಾಸಕ್ತಿಯೇ ಅವರನ್ನು ಮತ್ತೆ ವಿದ್ಯಾರ್ಥಿನಿಯಾಗಿ ವಿಶ್ವವಿದ್ಯಾಲಯದ ಗಡಿಪಾಯ ತಲುಪುವಂತೆ ಮಾಡಿತು.
“ಈ ವಯಸ್ಸಿನಲ್ಲಿ ಎಂ.ಎ ಮಾಡಬಹುದು ಎಂಬುದೇ ನನಗೆ ಗೊತ್ತಿರಲಿಲ್ಲ. ಆದರೆ ಅವಕಾಶ ಸಿಕ್ಕಾಗ ಅದನ್ನು ಕೈಚೆಲ್ಲದೆ ಬಳಸಿಕೊಂಡೆ,” ಎಂದು ಅವರು ಸಂತೋಷದಿಂದ ಹೇಳಿದ್ದಾರೆ. ಆನ್ಲೈನ್ ಮತ್ತು ಆಫ್ಲೈನ್ ತರಗತಿಗಳ ಮೂಲಕ ತಮ್ಮ ಅಧ್ಯಯನವನ್ನು ಮುಂದುವರೆಸಿದ ಅವರು, ಶಿಕ್ಷಕರ ಸಹಕಾರವನ್ನು ವಿಶೇಷವಾಗಿ ಸ್ಮರಿಸಿದ್ದಾರೆ.
ಪರಿಶ್ರಮಕ್ಕೆ ಚಿನ್ನದ ಫಲ
ಎಂ.ಎ (ಮರಾಠಿ) ಪರೀಕ್ಷೆಯಲ್ಲಿ ಅಗ್ರಸ್ಥಾನ ಪಡೆಯುವುದು ಸುಲಭದ ವಿಷಯವಲ್ಲ. 78 ವರ್ಷ ವಯಸ್ಸಿನಲ್ಲಿ ಪರೀಕ್ಷೆಗಳಿಗೆ ಸಿದ್ಧರಾಗುವುದು, ಪಠ್ಯಪುಸ್ತಕಗಳನ್ನು ಓದುವುದು, ಆನ್ಲೈನ್ ಕ್ಲಾಸ್ಗಳಿಗೆ ಹಾಜರಾಗುವುದು ಬಹಳ ಕಷ್ಟ. ಸುಷ್ಮಾ ಅವರು ತಮ್ಮ ಪರಿಶ್ರಮ ಮತ್ತು ದೃಢಸಂಕಲ್ಪದಿಂದ ಅದನ್ನು ಸಾಧ್ಯ ಮಾಡಿದರು.
ಈ ಘಟಿಕೋತ್ಸವದಲ್ಲಿ ಒಟ್ಟು 217 ಚಿನ್ನ ಮತ್ತು ಬೆಳ್ಳಿ ಪದಕಗಳನ್ನು ವಿತರಿಸಲಾಯಿತು. ಆದರೆ ಎಲ್ಲರ ಗಮನ ಸೆಳೆದದ್ದು ಸುಷ್ಮಾ ಅವರ ಸಾಧನೆಯೇ ಆಗಿತ್ತು. ವಿಶ್ವವಿದ್ಯಾಲಯದ ಕುಲಪತಿ ಡಾ. ರಾಕೇಶ್ ಸಿಂಫೈ ಅವರು, “ಸುಷ್ಮಾ ಮೋಘ ಅವರು ಅಗ್ರಸ್ಥಾನ ಪಡೆದು ಚಿನ್ನದ ಪದಕ ಗೆದ್ದಿರುವುದು ನಮ್ಮ ಸಂಸ್ಥೆಗೆ ಅಪಾರ ಹೆಮ್ಮೆ ತಂದಿದೆ,” ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಸಾಹಿತ್ಯ ಸೇವೆಯಲ್ಲೂ ಸಕ್ರಿಯ
ಪದವಿಯೊಂದಿಗೆ ಅವರ ಸಾಧನೆ ಮುಗಿದಿಲ್ಲ. ಅವರು ಖ್ಯಾತ ಹಿಂದಿ ಲೇಖಕರ ಕೃತಿಗಳನ್ನು ಮರಾಠಿಗೆ ಅನುವಾದಿಸುವ ಕಾರ್ಯದಲ್ಲಿ ತೊಡಗಿಸಿಕೊಂಡಿದ್ದಾರೆ. ಭಾಷೆಯ ಮೇಲಿನ ಪ್ರೀತಿ ಮತ್ತು ಸಾಹಿತ್ಯದ ಬಗ್ಗೆ ಇರುವ ಆಸಕ್ತಿ ಅವರ ಬದುಕಿನ ಮುಖ್ಯ ಅಂಶವಾಗಿದೆ.
ಯುವಕರಿಗೆ ಸಂದೇಶ
ಸುಷ್ಮಾ ಮೋಘ ಅವರು ತಮ್ಮ ಸಾಧನೆಯ ಮೂಲಕ ಯುವ ಪೀಳಿಗೆಗೆ ಸ್ಪಷ್ಟ ಸಂದೇಶ ನೀಡಿದ್ದಾರೆ. “ಬಿಡುವಿನ ವೇಳೆಯನ್ನು ವ್ಯರ್ಥ ಮಾಡಬೇಡಿ. ಓದಿರಿ, ಕಲಿಯಿರಿ. ಈ ಜಗತ್ತಿನಲ್ಲಿ ತಿಳಿಯಲು ಅನೇಕ ವಿಷಯಗಳಿವೆ.”
ಇಂದಿನ ಡಿಜಿಟಲ್ ಯುಗದಲ್ಲಿ ಅನೇಕ ಅವಕಾಶಗಳು ಲಭ್ಯವಿದ್ದರೂ, ಅದನ್ನು ಸದುಪಯೋಗಪಡಿಸಿಕೊಳ್ಳುವುದು ವ್ಯಕ್ತಿಯ ಮನಸ್ಸಿನ ಮೇಲೆ ಅವಲಂಬಿತವಾಗಿದೆ. ವಯಸ್ಸು ಯಾವುದೇ ಅಡ್ಡಿಯಾಗುವುದಿಲ್ಲ ಎಂಬುದನ್ನು ಸುಷ್ಮಾ ತಮ್ಮ ಜೀವನದಿಂದಲೇ ಸಾಬೀತುಪಡಿಸಿದ್ದಾರೆ.
