ರೈಲು ಪ್ರಯಾಣಿಕರಿಗೆ ಭಾರತೀಯ ರೈಲ್ವೆ ಮತ್ತೊಂದು ಮಹತ್ವದ ಮತ್ತು ಉಪಯುಕ್ತ ಸೌಲಭ್ಯವನ್ನು ನೀಡುತ್ತಿದೆ. ವಿಶೇಷವಾಗಿ ದೀರ್ಘ ದೂರ ಪ್ರಯಾಣ ಮಾಡಲು ಬಯಸುವವರಿಗೆ ಇದು ಗುಡ್ ನ್ಯೂಸ್. ನಿಮ್ಮ ರೈಲು ವಿಳಂಬವಾದರೆ, ಇನ್ನು ಮುಂದೆ ಊಟಕ್ಕಾಗಿ ಆತಂಕ ಪಡುವ ಅಗತ್ಯವಿಲ್ಲ. ಏಕೆಂದರೆ ರಾಜಧಾನಿ, ಶತಾಬ್ದಿ ಹಾಗೂ ದುರಂತೋ ಎಕ್ಸ್ಪ್ರೆಸ್ಗಳಲ್ಲಿ ಪ್ರಯಾಣಿಸುವವರಿಗೆ ರೈಲು ತಡವಾದ ಸಂದರ್ಭದಲ್ಲಿ ಉಚಿತ ಊಟ ಮತ್ತು ಆಹಾರ ಸೌಲಭ್ಯ ಲಭ್ಯವಾಗುತ್ತದೆ.
ಇತ್ತೀಚೆಗೆ ರಾಜಧಾನಿ ಎಕ್ಸ್ಪ್ರೆಸ್ ಒಂದು 6 ಗಂಟೆಗೂ ಹೆಚ್ಚು ವಿಳಂಬವಾದಾಗ, ಪ್ರಯಾಣಿಕರಿಗೆ ಉಚಿತ ಊಟ ನೀಡಲಾಗಿತ್ತು. ಆದರೆ ಇದು ಹೊಸ ನಿಯಮವಲ್ಲ. ಭಾರತೀಯ ರೈಲ್ವೆಯ IRCTC Catering Policy ಅಡಿಯಲ್ಲಿ ಈಗಾಗಲೇ ಇರುವ ಅಧಿಕೃತ ನಿಯಮವೇ ಇದಾಗಿದೆ. ಆದರೆ ಬಹುತೇಕ ಪ್ರಯಾಣಿಕರಿಗೆ ಈ ವಿಷಯದ ಬಗ್ಗೆ ಸ್ಪಷ್ಟ ಮಾಹಿತಿ ಇರಲಿಲ್ಲ.
2 ಗಂಟೆ ವಿಳಂಬವಾದರೆ ಉಚಿತ ಊಟ
ಭಾರತೀಯ ರೈಲ್ವೆಯ ಪ್ರೀಮಿಯಂ ರೈಲುಗಳಾದ ರಾಜಧಾನಿ, ಶತಾಬ್ದಿ ಮತ್ತು ದುರಂತೋ ಎಕ್ಸ್ಪ್ರೆಸ್ಗಳಲ್ಲಿ ಟಿಕೆಟ್ ದರದಲ್ಲೇ ಆಹಾರದ ಶುಲ್ಕವನ್ನು ಒಳಗೊಂಡಿರುತ್ತದೆ. ಆದ್ದರಿಂದ ಈ ರೈಲುಗಳು ನಿಗದಿತ ಸಮಯಕ್ಕಿಂತ 2 ಗಂಟೆ ಅಥವಾ ಅದಕ್ಕಿಂತ ಹೆಚ್ಚು ವಿಳಂಬವಾದರೆ, ರೈಲ್ವೆ ಇಲಾಖೆ ಪ್ರಯಾಣಿಕರಿಗೆ ಉಚಿತ ಆಹಾರ ಅಥವಾ ಉಪಾಹಾರ ನೀಡಲೇಬೇಕು.
ವಿಳಂಬವಾಗುವ ಸಮಯದ ಅವಧಿ ಮತ್ತು ವೇಳೆಗೆ ಅನುಗುಣವಾಗಿ ಊಟದ ಸ್ವರೂಪ ಬದಲಾಗುತ್ತದೆ. ಮುಂಜಾನೆ ಅಥವಾ ಸಂಜೆ ಸಮಯದಲ್ಲಿ ರೈಲು ತಡವಾದರೆ, ಪ್ರಯಾಣಿಕರಿಗೆ ಚಹಾ ಅಥವಾ ಕಾಫಿ ಜೊತೆಗೆ ಬಿಸ್ಕತ್ತು ನೀಡಲಾಗುತ್ತದೆ. ಬೆಳಗಿನ ಉಪಾಹಾರ ಸಮಯದಲ್ಲಿ ಬ್ರೆಡ್ ಸ್ಲೈಸ್ಗಳು, ಬೆಣ್ಣೆ ಮತ್ತು ಜ್ಯೂಸ್ ನೀಡಲಾಗುತ್ತದೆ.
ಮಧ್ಯಾಹ್ನ ಅಥವಾ ರಾತ್ರಿ ರೈಲು ವಿಳಂಬವಾದರೆ, ಅನ್ನ, ದಾಲ್ (ಬೇಳೆ ಸಾರು), ರಾಜ್ಮಾ ಅಥವಾ ಚೋಲೆ, ಉಪ್ಪಿನಕಾಯಿ ಮತ್ತು ಕೆಲ ಸಂದರ್ಭಗಳಲ್ಲಿ 7 ಪೂರಿ ಮತ್ತು ಮಿಕ್ಸ್ ವೆಜಿಟೆಬಲ್ ಸಾಗು ಕೂಡ ನೀಡಲಾಗುತ್ತದೆ.
ಆಹಾರ ನೀಡದಿದ್ದರೆ ಕೇಳಿ ಪಡೆಯುವುದು ನಿಮ್ಮ ಹಕ್ಕು
ಕೆಲವೊಮ್ಮೆ ರೈಲ್ವೆ ಸಿಬ್ಬಂದಿ ಸ್ವಯಂಪ್ರೇರಿತವಾಗಿ ಆಹಾರ ನೀಡದಿರುವ ಸಾಧ್ಯತೆ ಇದೆ. ಆದರೆ ಇಂತಹ ಸಂದರ್ಭಗಳಲ್ಲಿ ಪ್ರಯಾಣಿಕರು ಈ ನಿಯಮವನ್ನು ನೆನಪಿಸಿ ಆಹಾರವನ್ನು ಕೇಳಿ ಪಡೆಯುವುದು ಸಂಪೂರ್ಣವಾಗಿ ತಮ್ಮ ಹಕ್ಕು ಎಂದು ರೈಲ್ವೆ ಇಲಾಖೆ ಸ್ಪಷ್ಟಪಡಿಸಿದೆ.
3 ಗಂಟೆಗೂ ಹೆಚ್ಚು ವಿಳಂಬವಾದರೆ ಫುಲ್ ರಿಫಂಡ್
ರೈಲು ತನ್ನ ಪ್ರಾರಂಭಿಕ ನಿಲ್ದಾಣದಿಂದಲೇ 3 ಗಂಟೆಗೂ ಹೆಚ್ಚು ವಿಳಂಬವಾಗಿದ್ದರೆ ಮತ್ತು ನೀವು ಆ ರೈಲಿನಲ್ಲಿ ಪ್ರಯಾಣ ಮಾಡದಿದ್ದರೆ, ನೀವು ನಿಮ್ಮ ಟಿಕೆಟ್ ಅನ್ನು ರದ್ದುಗೊಳಿಸಿ ಪೂರ್ಣ ಹಣವನ್ನು ಮರಳಿ ಪಡೆಯಬಹುದು. ಇದನ್ನು TDR (Ticket Deposit Receipt) ಮೂಲಕ ಆನ್ಲೈನ್ನಲ್ಲಿ ಸಲ್ಲಿಸಬಹುದು.
ಆನ್ಲೈನ್ನಲ್ಲಿ TDR ಸಲ್ಲಿಸುವ ವಿಧಾನ
-
ಮೊದಲು IRCTC ವೆಬ್ಸೈಟ್ ಅಥವಾ ಆಪ್ಗೆ ಲಾಗಿನ್ ಆಗಿ
-
‘My Account’ → ‘My Transactions’ ಕ್ಲಿಕ್ ಮಾಡಿ
-
‘File TDR’ ಆಯ್ಕೆಯನ್ನು ಆರಿಸಿ
-
ಸಂಬಂಧಿತ PNR ಸಂಖ್ಯೆಯನ್ನು ಆಯ್ಕೆಮಾಡಿ
-
ಕಾರಣದಲ್ಲಿ “Train Late More Than Three Hours and Passenger Not Traveled” ಆಯ್ಕೆಮಾಡಿ
-
ಸಲ್ಲಿಸಿದ ಬಳಿಕ ಕನ್ಫರ್ಮೇಷನ್ ಸಂದೇಶ ಬರುತ್ತದೆ
ಹಣ ಯಾವಾಗ ವಾಪಸ್ ಬರುತ್ತದೆ?
TDR ಸಲ್ಲಿಸಿದ ನಂತರ, ಅದನ್ನು ಪರಿಶೀಲಿಸಲು ರೈಲ್ವೆ ಇಲಾಖೆಗೆ ಸಾಮಾನ್ಯವಾಗಿ 15 ರಿಂದ 90 ದಿನಗಳವರೆಗೆ ಸಮಯ ಬೇಕಾಗುತ್ತದೆ. ರಿಫಂಡ್ ಹಣವು ನೀವು ಟಿಕೆಟ್ ಬುಕ್ ಮಾಡಿದಾಗ ಬಳಸಿದ ಅದೇ ಬ್ಯಾಂಕ್ ಖಾತೆಗೆ ನೇರವಾಗಿ ಜಮೆಯಾಗುತ್ತದೆ.
ಇದಲ್ಲದೆ, ರೈಲು ವಿಳಂಬವಾದ ಸಂದರ್ಭದಲ್ಲಿ ನಿಲ್ದಾಣಗಳಲ್ಲಿರುವ ವೇಟಿಂಗ್ ರೂಮ್ಗಳನ್ನು ಉಚಿತವಾಗಿ ಬಳಸಿಕೊಳ್ಳಲು ಸಹ ಅವಕಾಶವಿದೆ. ಚಳಿಗಾಲದಲ್ಲಿ ಮಂಜಿನ ಕಾರಣ ರೈಲುಗಳು ವಿಳಂಬವಾಗುವ ಸಂದರ್ಭಗಳಲ್ಲಿ ಈ ಸೌಲಭ್ಯಗಳು ಪ್ರಯಾಣಿಕರಿಗೆ ತುಂಬಾ ಸಹಕಾರಿಯಾಗುತ್ತವೆ.
