ಭಾರತ ಮತ್ತು ನ್ಯೂಜಿಲೆಂಡ್ ದೇಶಗಳ ಆರ್ಥಿಕ ಸಂಬಂಧದಲ್ಲಿ ಇಂದು ಹೊಸ ಅಧ್ಯಾಯ ಆರಂಭವಾಗಿದೆ. ಉಭಯ ದೇಶಗಳು ಬಹುನಿರೀಕ್ಷಿತ ಮುಕ್ತ ವ್ಯಾಪಾರ ಒಪ್ಪಂದಕ್ಕೆ (FTA) ಅಧಿಕೃತವಾಗಿ ಸಹಿ ಹಾಕಿವೆ. ನವದೆಹಲಿಯಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಭಾರತದ ವಾಣಿಜ್ಯ ಸಚಿವ ಪಿಯೂಷ್ ಗೋಯಲ್ ಮತ್ತು ನ್ಯೂಜಿಲೆಂಡ್ನ ವ್ಯಾಪಾರ ಸಚಿವ ಟಾಡ್ ಮೆಕ್ಕ್ಲೇ ಈ ಮಹತ್ವದ ಒಪ್ಪಂದಕ್ಕೆ ಚಾಲನೆ ನೀಡಿದರು.
ಶೇ. 100ರಷ್ಟು ಸುಂಕ ಮುಕ್ತ ಪ್ರವೇಶ!
ಈ ಒಪ್ಪಂದದ ಅತ್ಯಂತ ದೊಡ್ಡ ಆಕರ್ಷಣೆಯೆಂದರೆ, ನ್ಯೂಜಿಲೆಂಡ್ಗೆ ಭಾರತದಿಂದ ರಫ್ತಾಗುವ ಶೇ. 100ರಷ್ಟು ಉತ್ಪನ್ನಗಳಿಗೆ ಯಾವುದೇ ಆಮದು ಸುಂಕ ಇರುವುದಿಲ್ಲ. ಜವಳಿ, ಚರ್ಮದ ಉತ್ಪನ್ನಗಳು, ಆಭರಣಗಳು, ಎಂಜಿನಿಯರಿಂಗ್ ಸರಕುಗಳು ಮತ್ತು ಸಂಸ್ಕರಿಸಿದ ಆಹಾರ ಪದಾರ್ಥಗಳು ಇನ್ಮೇಲೆ ನ್ಯೂಜಿಲೆಂಡ್ ಮಾರುಕಟ್ಟೆಯಲ್ಲಿ ಶೂನ್ಯ ಸುಂಕದೊಂದಿಗೆ ಸ್ಪರ್ಧಿಸಲಿವೆ. ಇದರಿಂದ ಭಾರತದ ಎಂಎಸ್ಎಂಇ (MSME) ವಲಯಕ್ಕೆ ಭಾರಿ ಬಲ ಸಿಗಲಿದ್ದು, ಲಕ್ಷಾಂತರ ಉದ್ಯೋಗ ಸೃಷ್ಟಿಯಾಗುವ ನಿರೀಕ್ಷೆಯಿದೆ.
20 ಶತಕೋಟಿ ಡಾಲರ್ ಹೂಡಿಕೆಯ ಬದ್ಧತೆ
ವ್ಯಾಪಾರ ಮಾತ್ರವಲ್ಲದೆ ಹೂಡಿಕೆಯಲ್ಲೂ ನ್ಯೂಜಿಲೆಂಡ್ ದೊಡ್ಡ ಭರವಸೆ ನೀಡಿದೆ. ಮುಂದಿನ 15 ವರ್ಷಗಳಲ್ಲಿ ಭಾರತದಲ್ಲಿ ಸುಮಾರು 20 ಶತಕೋಟಿ ಯುಎಸ್ ಡಾಲರ್ (ಅಂದಾಜು 1.6 ಲಕ್ಷ ಕೋಟಿ ರೂ.) ನೇರ ವಿದೇಶಿ ಹೂಡಿಕೆ (FDI) ಮಾಡಲು ನ್ಯೂಜಿಲೆಂಡ್ ಒಪ್ಪಿಕೊಂಡಿದೆ. ಇದು ಭಾರತದ ಮೂಲಸೌಕರ್ಯ ಮತ್ತು ಕೈಗಾರಿಕಾ ಬೆಳವಣಿಗೆಗೆ ಸಹಕಾರಿಯಾಗಲಿದೆ.
ಭಾರತಕ್ಕೆ ಈ ಒಪ್ಪಂದದಿಂದ ಆಗುವ ಪ್ರಮುಖ ಲಾಭಗಳು:
ಉದ್ಯೋಗಾವಕಾಶ: ಭಾರತೀಯ ಐಟಿ ವೃತ್ತಿಪರರು, ಶಿಕ್ಷಕರು ಮತ್ತು ನುರಿತ ಕಾರ್ಮಿಕರಿಗೆ ನ್ಯೂಜಿಲೆಂಡ್ನಲ್ಲಿ ಕೆಲಸ ಮಾಡಲು ಹೊಸ ‘ತಾತ್ಕಾಲಿಕ ಉದ್ಯೋಗ ವೀಸಾ’ ಮಾರ್ಗಗಳು ಲಭ್ಯವಾಗಲಿವೆ.
ಸೇವಾ ವಲಯಕ್ಕೆ ಬೂಸ್ಟ್: ಹಣಕಾಸು ಸೇವೆಗಳು, ಪ್ರವಾಸೋದ್ಯಮ ಮತ್ತು ಶಿಕ್ಷಣ ಕ್ಷೇತ್ರದಲ್ಲಿ ಭಾರತೀಯ ಸಂಸ್ಥೆಗಳಿಗೆ ನ್ಯೂಜಿಲೆಂಡ್ ಮಾರುಕಟ್ಟೆ ಮುಕ್ತವಾಗಲಿದೆ.
ಕೃಷಿ ಮತ್ತು ಶಿಕ್ಷಣ: ಕೃಷಿ ಉತ್ಪಾದಕತೆ ಹೆಚ್ಚಿಸಲು ತಾಂತ್ರಿಕ ಸಹಕಾರ ಮತ್ತು ಉನ್ನತ ಶಿಕ್ಷಣದಲ್ಲಿ ವಿದ್ಯಾರ್ಥಿಗಳಿಗೆ ಹೆಚ್ಚಿನ ಅವಕಾಶಗಳು ಸಿಗಲಿವೆ.
ವೈನ್ ಮತ್ತು ಸ್ಪಿರಿಟ್: ಭಾರತದಿಂದ ರಫ್ತಾಗುವ ವೈನ್ ಉತ್ಪನ್ನಗಳಿಗೆ ಸುಂಕ ವಿನಾಯಿತಿ ಸಿಗಲಿದ್ದು, ನ್ಯೂಜಿಲೆಂಡ್ನಿಂದ ಬರುವ ವೈನ್ಗಳ ಮೇಲಿನ ಸುಂಕವನ್ನು 10 ವರ್ಷಗಳಲ್ಲಿ ಹಂತ ಹಂತವಾಗಿ ಕಡಿಮೆ ಮಾಡಲಾಗುತ್ತದೆ.
