ದೆಹಲಿ ಸರ್ಕಾರ ಶೀಘ್ರದಲ್ಲೇ ಹೊಸ ಅಬಕಾರಿ ನೀತಿಯನ್ನು ಜಾರಿಗೆ ತರಲು ಸಿದ್ಧವಾಗಿದೆ. ಈ ಹೊಸ ನೀತಿಯು ಮದ್ಯ ಮಾರಾಟ ವ್ಯವಸ್ಥೆಯಲ್ಲಿ ಪಾರದರ್ಶಕತೆ, ಆಧುನೀಕರಣ ಮತ್ತು ಗ್ರಾಹಕ ಸ್ನೇಹಿ ವ್ಯವಸ್ಥೆಯನ್ನು ತರಲು ಉದ್ದೇಶಿಸಿದೆ. ವಿಶೇಷವಾಗಿ, ಮದ್ಯವನ್ನು ಮಾಲ್ಗಳು, ಶಾಪಿಂಗ್ ಕಾಂಪ್ಲೆಕ್ಸ್ಗಳು ಮತ್ತು ಆಧುನಿಕ ಮಳಿಗೆಗಳಲ್ಲಿ ಮಾರಾಟಕ್ಕೆ ಅನುಮತಿ ನೀಡುವ ಸಾಧ್ಯತೆಗಳಿವೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.
ದೆಹಲಿಯಲ್ಲಿ ಮದ್ಯ ಮಾರಾಟದ ಹೊಣೆಗಾರಿಕೆ DSIIDC, DTTDC, DSCSC ಹಾಗೂ ದೆಹಲಿ ಕಂಸ್ಯೂಮರ್ ಕೋಆಪರೇಟಿವ್ ಹೋಲ್ಸೇಲ್ ಸ್ಟೋರ್ (DCCWS) ಎಂಬ ನಾಲ್ಕು ಸರ್ಕಾರಿ ಸಂಸ್ಥೆಗಳ ಮೇಲಿದ್ದು, ಒಟ್ಟು 700 ಸರ್ಕಾರಿ ಮದ್ಯದಂಗಡಿಗಳು ಕಾರ್ಯನಿರ್ವಹಿಸುತ್ತಿವೆ. ಹೊಸ ನೀತಿಯು ಈ ಮಳಿಗೆಗಳನ್ನು ಆಧುನೀಕರಿಸಿ, ಗ್ರಾಹಕರಿಗೆ ಸುಲಭ ಅನುಭವ ನೀಡುವ ರೀತಿಯಲ್ಲಿ ಪುನರ್ ವಿನ್ಯಾಸಗೊಳಿಸಲು ಉದ್ದೇಶಿಸಿದೆ.
ಸರ್ಕಾರದ ಉದ್ದೇಶವೆಂದರೆ ಮದ್ಯ ಮಾರಾಟವು ಕೇವಲ ವ್ಯಾಪಾರವಲ್ಲ, ಜವಾಬ್ದಾರಿಯುತ ಹಾಗೂ ನಿಯಂತ್ರಿತ ವ್ಯವಸ್ಥೆಯಾಗಿ ಬೆಳೆಸುವುದು. ಅದಕ್ಕಾಗಿ, ಶಾಲೆ, ಧಾರ್ಮಿಕ ಸ್ಥಳ ಮತ್ತು ವಸತಿ ಪ್ರದೇಶಗಳಿಂದ ನಿರ್ದಿಷ್ಟ ಅಂತರದಲ್ಲೇ ಮದ್ಯದಂಗಡಿಗಳನ್ನು ಸ್ಥಾಪಿಸಬೇಕು ಎಂಬ ನಿಯಮವನ್ನು ಹೊಸ ಕರಡು ಪ್ರಸ್ತಾಪಿಸಿದೆ.
ರೇಖಾ ಗುಪ್ತಾ ನೇತೃತ್ವದ ಸಮಿತಿ
ಹೊಸ ನೀತಿಯ ಕರಡು ತಯಾರಿಕೆಗೆ ಮುಖ್ಯಮಂತ್ರಿ ರೇಖಾ ಗುಪ್ತಾ ನೇತೃತ್ವದ ಸಮಿತಿ ನೇಮಿಸಲಾಗಿದೆ. ಈ ಸಮಿತಿ ದೇಶದ ವಿವಿಧ ರಾಜ್ಯಗಳ ಅಬಕಾರಿ ನೀತಿಗಳ ಅಧ್ಯಯನ ನಡೆಸಿ, ಅವರ ಸಾಧಕ–ಬಾಧಕಗಳನ್ನು ವಿಶ್ಲೇಷಿಸಿದೆ. ಇದರ ಆಧಾರದ ಮೇಲೆ ದೆಹಲಿಗೆ ಸೂಕ್ತವಾದ ಮಾದರಿಯನ್ನು ರೂಪಿಸಲಾಗಿದೆ ಎಂದು ವರದಿಗಳು ತಿಳಿಸಿವೆ.
ಮದ್ಯ ಮಾರಾಟಗಾರರು ಪ್ರತಿಯೊಂದು ಬಾಟಲ್ಗೆ ಭಾರತೀಯ ಬ್ರಾಂಡ್ಗಳಿಗೆ ₹50 ಮತ್ತು ವಿದೇಶಿ ಬ್ರಾಂಡ್ಗಳಿಗೆ ₹100 ನಿಗದಿತ ಲಾಭ ಪಡೆಯುತ್ತಿದ್ದಾರೆ. ಇದರ ಪರಿಣಾಮವಾಗಿ ವ್ಯಾಪಾರಿಗಳು ಉನ್ನತ ಅಥವಾ ಪ್ರೀಮಿಯಂ ಬ್ರಾಂಡ್ಗಳನ್ನು ಸ್ಟಾಕ್ ಮಾಡುವ ಆಸಕ್ತಿ ತೋರಿಸುತ್ತಿಲ್ಲ.
ಹೊಸ ನೀತಿಯ ಪ್ರಕಾರ, ಲಾಭದ ಪ್ರಮಾಣವನ್ನು ಬ್ಯಾಂಡ್ ಮತ್ತು ಬೆಲೆಯ ಆಧಾರದ ಮೇಲೆ ಬದಲಾಯಿಸಲು ಯೋಜಿಸಲಾಗಿದೆ. ಇದು ಪ್ರೀಮಿಯಂ ಮದ್ಯದ ಸ್ಟಾಕ್ ಹೆಚ್ಚಿಸಲು ಹಾಗೂ ಗ್ರಾಹಕರಿಗೆ ಹೆಚ್ಚಿನ ಆಯ್ಕೆಗಳನ್ನು ನೀಡಲು ಸಹಕಾರಿ ಆಗಲಿದೆ.
ಹೊಸ ಅಬಕಾರಿ ನೀತಿಯ ಕರಡು ಕುರಿತು ಹಲವಾರು ಅಂಶಗಳು ಸ್ಪಷ್ಟಗೊಂಡಿವೆ. ಆದರೆ ಮದ್ಯಪ್ರಿಯರ ನಡುವೆ ಹೆಚ್ಚು ಚರ್ಚೆಯಾಗುತ್ತಿರುವ ವಿಷಯವೆಂದರೆ “ಒಂದು ಬಾಟಲ್ ಖರೀದಿಸಿದ್ರೆ ಮತ್ತೊಂದು ಉಚಿತ” ಆಫರ್ ಹೊಸ ನೀತಿಯಲ್ಲಿ ಸೇರಿತೇ ಎಂಬ ಪ್ರಶ್ನೆ ಮೂಡಿದೆ. ಸರ್ಕಾರದಿಂದ ಈ ಕುರಿತು ಅಧಿಕೃತ ಘೋಷಣೆ ಇಲ್ಲದಿದ್ದರೂ, ಅಧಿಕಾರಿಗಳ ಪ್ರಕಾರ ಮಾರಾಟ ಪ್ರಚಾರ ಅಥವಾ ಡಿಸ್ಕೌಂಟ್ ಆಫರ್ಗಳಿಗೆ ಕಾನೂನಾತ್ಮಕ ಸಡಿಲಿಕೆ ನೀಡುವ ಕುರಿತು ಚಿಂತನೆ ನಡೆಯುತ್ತಿದೆ.
2021-22ರಲ್ಲಿ ಆಮ್ ಆದ್ಮಿ ಪಾರ್ಟಿ ಸರ್ಕಾರ ಖಾಸಗಿ ಮದ್ಯದಂಗಡಿಗಳಿಗೆ ಅನುಮತಿ ನೀಡಿದಾಗ, ಭ್ರಷ್ಟಾಚಾರದ ಆರೋಪಗಳು ಉಂಟಾದವು. ನಂತರ ಆ ಯೋಜನೆಯನ್ನು ರದ್ದುಪಡಿಸಿ, ಸರ್ಕಾರಿ ಮಳಿಗೆಗಳನ್ನು ಪುನಃ ಪ್ರಾರಂಭಿಸಲಾಯಿತು. ಈ ವ್ಯವಸ್ಥೆ ಮಾರ್ಚ್ 31, 2026ರವರೆಗೆ ಮುಂದುವರಿಯಲಿದೆ.
