ನವದೆಹಲಿ: ಬೆಂಗಳೂರು-ಚೆನ್ನೈ ಎಕ್ಸ್ಪ್ರೆಸ್ವೇ ಕಾಮಗಾರಿಯು ಭೂಸ್ವಾಧೀನದ ವಿಳಂಬ ಸೇರಿದಂತೆ ವಿವಿಧ ಕಾರಣಗಳಿಂದ ನಿಧಾನಗತಿಯಲ್ಲಿ ಸಾಗುತ್ತಿದೆ ಎಂದು ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ ತಿಳಿಸಿದ್ದಾರೆ.
ಲೋಕಸಭೆಯಲ್ಲಿ ಬೆಂಗಳೂರು ಕೇಂದ್ರ ಸಂಸದ ಪಿ.ಸಿ. ಮೋಹನ್ ಕೇಳಿದ ಪ್ರಶ್ನೆಗೆ ಲಿಖಿತ ಉತ್ತರ ನೀಡಿರುವ ಅವರು, ಈ ಯೋಜನೆಯು 2026ರ ಜೂನ್ಗೆ ಪೂರ್ಣಗೊಳ್ಳಲಿದೆ ಎಂದು ದೃಢಪಡಿಸಿದ್ದಾರೆ.
262.4 ಕಿಮೀ ಉದ್ದದ ಈ ಎಕ್ಸ್ಪ್ರೆಸ್ವೇ ಬೆಂಗಳೂರು-ಚೆನ್ನೈ ಕೈಗಾರಿಕಾ ಕಾರಿಡಾರ್ನ ಪ್ರಮುಖ ಭಾಗವಾಗಿದ್ದು, ಕಾಮಗಾರಿ ಪೂರ್ಣಗೊಂಡ ನಂತರ ಎರಡು ನಗರಗಳ ನಡುವಿನ ಪ್ರಯಾಣದ ಅವಧಿಯನ್ನು 6 ಗಂಟೆಗಳಿಂದ ಕೇವಲ 2.5 ಗಂಟೆಗಳಿಗೆ ಇಳಿಸಲಿದೆ. ಒಟ್ಟು ₹15,188 ಕೋಟಿ ವೆಚ್ಚದ ಈ ಯೋಜನೆಯು ಕರ್ನಾಟಕ (71 ಕಿಮೀ), ತಮಿಳುನಾಡು (106.8 ಕಿಮೀ), ಮತ್ತು ಆಂಧ್ರ ಪ್ರದೇಶ (85 ಕಿಮೀ) ಮೂಲಕ ಹಾದುಹೋಗಲಿದೆ. 240 ಕಿಮೀ ಎಂಟು ಪಥದ ಹೆದ್ದಾರಿಯಾಗಿದ್ದು, 22 ಕಿಮೀ ಎತ್ತರಿಸಿದ ಮಾರ್ಗವನ್ನು ಒಳಗೊಂಡಿದೆ. ಯೋಜನೆಗಾಗಿ 2,650 ಹೆಕ್ಟೇರ್ ಭೂಮಿಯನ್ನು ಸ್ವಾಧೀನಪಡಿಸಿಕೊಳ್ಳಲಾಗಿದೆ.
ಪ್ರಸ್ತುತ, ಯೋಜನೆಯ ನಾಲ್ಕು ವಿಭಾಗಗಳ ಕಾಮಗಾರಿ ಪೂರ್ಣಗೊಂಡಿದ್ದು, ಉಳಿದ ವಿಭಾಗಗಳು 53.6% ರಿಂದ 91% ರವರೆಗೆ ಪ್ರಗತಿಯಲ್ಲಿವೆ. ಕರ್ನಾಟಕದ ಬೆಂಗಳೂರು-ಮಾಲೂರು ಮತ್ತು ಮಾಲೂರು-ಬಂಗಾರಪೇಟೆ ವಿಭಾಗಗಳು ಸಂಪೂರ್ಣವಾಗಿ ಮುಗಿದಿವೆ. ಆಂಧ್ರ ಪ್ರದೇಶದ ಬೈರೆಡ್ಡಿಪಲ್ಲಿ-ಬಂಗಾರುಪಾಲೆಂ (70%) ಮತ್ತು ತಮಿಳುನಾಡಿನ ಅರಕ್ಕೋಣಂ-ಕಾಂಚಿಪುರಂ (53.6%) ವಿಭಾಗಗಳು 2026ರ ಜೂನ್ಗೆ ಪೂರ್ಣಗೊಳ್ಳಲಿವೆ. ಕೌಂಡಿನ್ಯ ವನ್ಯಜೀವಿ ಅಭಯಾರಣ್ಯದ ಸಮೀಪದ 10 ಕಿಮೀ ಪರಿಸರ ಸಂವೇದನಾ ವಲಯದಲ್ಲಿ ಅನುಮತಿಗಳನ್ನು ಪಡೆಯುವುದರಲ್ಲಿ ವಿಳಂಬವಾಗಿದೆ.
|
ಯೋಜನೆಯ ವಿಭಾಗ |
ರಾಜ್ಯ |
ಭೌತಿಕ ಪ್ರಗತಿ |
ವೆಚ್ಚ (ಕೋಟಿಗಳಲ್ಲಿ) |
|---|---|---|---|
|
ಬೆಂಗಳೂರು-ಮಾಲೂರು |
ಕರ್ನಾಟಕ |
ಪೂರ್ಣ |
2761 |
|
ಮಾಲೂರು-ಬಂಗಾರಪೇಟೆ |
ಕರ್ನಾಟಕ |
ಪೂರ್ಣ |
1496 |
|
ಬೇತಮಂಗಲ-ಬೈರೆಡ್ಡಿಪಲ್ಲಿ |
ಕರ್ನಾಟಕ/ಆಂಧ್ರ |
90% | 1306 |
|
ಬೈರೆಡ್ಡಿಪಲ್ಲಿ-ಬಂಗಾರುಪಾಲೆಂ |
ಆಂಧ್ರ ಪ್ರದೇಶ |
70% | 2171 |
|
ಬಂಗಾರುಪಾಲೆಂ-ಗುಡಿಪಾಲ |
ಆಂಧ್ರ ಪ್ರದೇಶ |
ಪೂರ್ಣ |
1288 |
|
ಗುಡಿಪಾಲ-ವಾಲಾಜಪೇಟೆ |
ತಮಿಳುನಾಡು |
88% | 1028 |
|
ವಾಲಾಜಪೇಟೆ-ಅರಕ್ಕೋಣಂ |
ತಮಿಳುನಾಡು |
91% | 843 |
|
ಅರಕ್ಕೋಣಂ-ಕಾಂಚಿಪುರಂ |
ತಮಿಳುನಾಡು |
53.6% | 1155 |
|
ಕಾಂಚಿಪುರಂ-ಪೆರಂಬದೂರು |
ತಮಿಳುನಾಡು |
79.0% | 2948 |
ಕರ್ನಾಟಕದಲ್ಲಿ ಭೂಸ್ವಾಧೀನ, ಮರಗಳ ಮೌಲ್ಯಮಾಪನ, ಮತ್ತು ಸ್ಥಳೀಯರ ವಿರೋಧದಿಂದ ಕಾಮಗಾರಿ ವಿಳಂಬವಾಗಿದೆ. ತಮಿಳುನಾಡಿನಲ್ಲಿ ಭೂಮಿ ಸಮತಟ್ಟಾಗಿಸುವ ಅನುಮತಿಗಳು ಮತ್ತು ಕಲ್ಲು ಸ್ಫೋಟದ ತಾಂತ್ರಿಕ ಸಮಸ್ಯೆಗಳಿಂದ ತೊಂದರೆಯಾಗಿದೆ. ಆಂಧ್ರ ಪ್ರದೇಶದಲ್ಲಿ ಕೌಂಡಿನ್ಯ ವನ್ಯಜೀವಿ ಅಭಯಾರಣ್ಯದ ಸಮೀಪ ಕಾಮಗಾರಿಗೆ ಅನುಮತಿಗಳ ವಿಳಂಬವೂ ಸಮಸ್ಯೆಯಾಗಿದೆ. ಈ ಎಲ್ಲ ಸವಾಲುಗಳ ಹೊರತಾಗಿಯೂ, 2026ರ ಜೂನ್ಗೆ ಎಕ್ಸ್ಪ್ರೆಸ್ವೇ ಪೂರ್ಣಗೊಳ್ಳಲಿದೆ ಎಂದು ಗಡ್ಕರಿ ಭರವಸೆ ನೀಡಿದ್ದಾರೆ.
ಈ ಎಕ್ಸ್ಪ್ರೆಸ್ವೇ ಪೂರ್ಣಗೊಂಡರೆ, ಬೆಂಗಳೂರು ಮತ್ತು ಚೆನ್ನೈ ನಡುವಿನ ಸಂಚಾರ ವೇಗವಾಗುವುದರ ಜೊತೆಗೆ, ಲಾಜಿಸ್ಟಿಕ್ಸ್ ವೆಚ್ಚ ಕಡಿಮೆಯಾಗಿ, ವ್ಯಾಪಾರ ಮತ್ತು ಉದ್ಯಮಕ್ಕೆ ಉತ್ತೇಜನ ಸಿಗಲಿದೆ. ಈ ಮಾರ್ಗವು ದಕ್ಷಿಣ ಭಾರತದ ಮೊದಲ ಗ್ರೀನ್ಫೀಲ್ಡ್ ಎಕ್ಸ್ಪ್ರೆಸ್ವೇ ಆಗಿದ್ದು, ಆರ್ಥಿಕ ಕಾರಿಡಾರ್ ಆಗಿ ಕಾರ್ಯನಿರ್ವಹಿಸಲಿದೆ.
