ನವದೆಹಲಿ: ‘ಅಗ್ರಿ ಗೋಲ್ಡ್’ ಸಂಸ್ಥೆಯು ಹಣ ದ್ವಿಗುಣಗೊಳಿಸುವ ಆಮಿಷವೊಡ್ಡಿ ಲಕ್ಷಾಂತರ ಹೂಡಿಕೆದಾರರನ್ನು ವಂಚಿಸಿದ ಪ್ರಕರಣದ ತನಿಖೆಯ ಭಾಗವಾಗಿ, ಜಾರಿ ನಿರ್ದೇಶನಾಲಯ (ಇ.ಡಿ) ಜಪ್ತಿ ಮಾಡಿದ್ದ ಆಸ್ತಿಗಳನ್ನು ಆಂಧ್ರ ಪ್ರದೇಶ ಸರ್ಕಾರಕ್ಕೆ ಹಿಂದಿರುಗಿಸಿದೆ. ಶುಕ್ರವಾರ, ₹611 ಕೋಟಿ ಮೌಲ್ಯದ ಆಸ್ತಿಗಳನ್ನು (ಪ್ರಸ್ತುತ ಮಾರುಕಟ್ಟೆ ಮೌಲ್ಯ ₹1,000 ಕೋಟಿಗಿಂತ ಹೆಚ್ಚು) ಸರ್ಕಾರಕ್ಕೆ ನೀಡಲಾಗಿದೆ. ಈ ಕ್ರಮವು ವಂಚನೆಗೊಳಗಾದ ಗ್ರಾಹಕರಿಗೆ ಮರುಪಾವತಿಗೆ ನೆರವಾಗಲಿದೆ ಎಂದು ಇ.ಡಿ ತಿಳಿಸಿದೆ.
ಈ ಹಿಂದೆ, ಫೆಬ್ರವರಿ 2025ರಲ್ಲಿ ₹3,339 ಕೋಟಿ ಮೌಲ್ಯದ ಆಸ್ತಿಗಳನ್ನು (ಪ್ರಸ್ತುತ ಮಾರುಕಟ್ಟೆ ಮೌಲ್ಯ ₹6,000 ಕೋಟಿಗಿಂತ ಹೆಚ್ಚು) ಸರ್ಕಾರಕ್ಕೆ ಹಿಂದಿರುಗಿಸಲಾಗಿತ್ತು. ಒಟ್ಟಾರೆ, ₹7,000 ಕೋಟಿ ಮೌಲ್ಯದ ಆಸ್ತಿಗಳನ್ನು ಆಂಧ್ರ ಪ್ರದೇಶ ಸರ್ಕಾರಕ್ಕೆ ವರ್ಗಾಯಿಸುವ ಪ್ರಕ್ರಿಯೆಯನ್ನು ಇ.ಡಿ ಯಶಸ್ವಿಯಾಗಿ ಪೂರ್ಣಗೊಳಿಸಿದೆ ಎಂದು ಅಧಿಕೃತ ಪ್ರಕಟಣೆಯಲ್ಲಿ ವಿವರಿಸಲಾಗಿದೆ.
‘ಅಗ್ರಿ ಗೋಲ್ಡ್’ ಸಮೂಹದ ಕಂಪನಿಗಳು ಅತ್ಯಧಿಕ ಆದಾಯ ಅಥವಾ ವಸತಿ ಪ್ಲಾಟ್ಗಳನ್ನು ನೀಡುವ ಭರವಸೆಯೊಂದಿಗೆ ರಿಯಲ್ ಎಸ್ಟೇಟ್ನಲ್ಲಿ ಹೂಡಿಕೆಗೆ ಜನರನ್ನು ಆಕರ್ಷಿಸಿದ್ದವು. ಸುಮಾರು 19 ಲಕ್ಷ ಗ್ರಾಹಕರಿಂದ (32 ಲಕ್ಷ ಖಾತೆದಾರರು) ₹6,600 ಕೋಟಿಗಿಂತ ಹೆಚ್ಚಿನ ಠೇವಣಿಗಳನ್ನು ಸಂಗ್ರಹಿಸಿ ವಂಚನೆ ಮಾಡಿದ್ದವು ಎಂದು ಇ.ಡಿ ಆರೋಪಿಸಿದೆ. ಈ ಆಸ್ತಿಗಳ ವರ್ಗಾವಣೆಯಿಂದ ಬಾಧಿತರಿಗೆ ನ್ಯಾಯ ಒದಗಿಸುವ ಪ್ರಯತ್ನಕ್ಕೆ ಮತ್ತೊಂದು ಮೈಲಿಗಲ್ಲು ಸಿಕ್ಕಂತಾಗಿದೆ.
