ಬಾಗಲಕೋಟೆ: ಭಾರತೀಯ ಕ್ರಿಕೆಟರ್‌ ರಿಷಭ್ ಪಂತ್ (Rishabh Pant) ಅವರು ಕರ್ನಾಟಕದ ಬಾಗಲಕೋಟೆ ಜಿಲ್ಲೆಯ (Bagalkote) ಬಡ ವಿದ್ಯಾರ್ಥಿನಿಯೊಬ್ಬಳ ಶಿಕ್ಷಣಕ್ಕೆ (Education) ಆರ್ಥಿಕ ನೆರವು ನೀಡಿದ್ದಾರೆ. ಈ ಕಾರ್ಯಕ್ಕೆ ಸಾರ್ವಜನಿಕ ವಲಯದಲ್ಲಿ ಭಾರೀ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
ಬಾಗಲಕೋಟೆ ಜಿಲ್ಲೆಯ ಬೀಳಗಿ ತಾಲೂಕಿನ ರಬಕವಿ ಗ್ರಾಮದ ಜ್ಯೋತಿ ಕಣಬೂರಮರ್ ಎಂಬ ವಿದ್ಯಾರ್ಥಿನಿಗೆ ರಿಷಭ್ ಪಂತ್ ಸಹಾಯ ಮಾಡಿದ್ದಾರೆ. ಜ್ಯೋತಿಯು ಪಿಯುಸಿಯಲ್ಲಿ ಶೇಕಡಾ 83ರಷ್ಟು ಅಂಕಗಳನ್ನು ಗಳಿಸಿದ್ದಾಳೆ. ಉನ್ನತ ಶಿಕ್ಷಣದ ಮೂಲಕ ತನ್ನ ಭವಿಷ್ಯವನ್ನು ರೂಪಿಸಿಕೊಳ್ಳಬೇಕೆಂಬುದು ಆಕೆಯ ದೊಡ್ಡ ಕನಸಾಗಿತ್ತು. ಆದರೆ, ಬಡತನದಿಂದ ಕೂಡಿದ ಕುಟುಂಬದ ಹಿನ್ನೆಲೆಯಿಂದಾಗಿ ಈ ಕನಸು ದೂರದ ಕನಸಾಗಿ ಕಾಣುತ್ತಿತ್ತು. ಜ್ಯೋತಿಯ ತಂದೆ ತೀರ್ಥಯ್ಯ ಗ್ರಾಮದಲ್ಲಿ ಒಂದು ಚಿಕ್ಕ ಚಹಾ ಅಂಗಡಿ ನಡೆಸುತ್ತಿದ್ದಾರೆ. ಈ ಅಂಗಡಿಯಿಂದ ಬರುವ ಕಡಿಮೆ ಆದಾಯದಿಂದ ಕುಟುಂಬದ ದೈನಂದಿನ ಖರ್ಚನ್ನೇ ಭರಿಸುವುದು ಕಷ್ಟವಾಗಿತ್ತು. ಇಂತಹ ಪರಿಸ್ಥಿತಿಯಲ್ಲಿ ಮಗಳ ಶಿಕ್ಷಣಕ್ಕೆ ಹಣ ಒದಗಿಸುವುದು ಅವರಿಗೆ ಅಸಾಧ್ಯವಾಗಿತ್ತು.
ಜ್ಯೋತಿಯ ಕುಟುಂಬದ ಈ ಆರ್ಥಿಕ ಸಂಕಷ್ಟವನ್ನು ಗ್ರಾಮದ ಗುತ್ತಿಗೆದಾರ ಅನಿಲ್ ಹುಣಶಿಕಟ್ಟಿ ಗಮನಿಸಿದರು. ಜ್ಯೋತಿಯ ಶಿಕ್ಷಣದ ಬಯಕೆಯನ್ನು ತಿಳಿದ ಅವರು, ಜಮಖಂಡಿಯ ಬಿಎಲ್‌ಡಿಇ ಸಂಸ್ಥೆಯ ಕಾಲೇಜಿನಲ್ಲಿ ಬಿಸಿಎ ಕೋರ್ಸ್‌ಗೆ ಸೀಟ್ ಒದಗಿಸುವ ಜೊತೆಗೆ ಆರ್ಥಿಕ ನೆರವು ನೀಡುವ ಭರವಸೆಯನ್ನು ನೀಡಿದರು. ಅನಿಲ್ ಅವರು ರಿಷಭ್ ಪಂತ್ ಅವರಿಗೆ ಆತ್ಮೀಯರಾಗಿದ್ದರಿಂದ, ಈ ವಿಷಯವನ್ನು ಪಂತ್ ಅವರ ಗಮನಕ್ಕೆ ತಂದರು.
ರಿಷಭ್ ಪಂತ್, ಈ ಕಥೆಯನ್ನು ಕೇಳಿದ ಕೂಡಲೇ ಆರ್ಥಿಕ ನೆರವಿಗೆ ಮುಂದಾದರು. ಜುಲೈ 17ರಂದು ಅವರು ಬಿಎಲ್‌ಡಿಇ ಕಾಲೇಜಿನ ಖಾತೆಗೆ ನೇರವಾಗಿ 40 ಸಾವಿರ ರೂಪಾಯಿಗಳನ್ನು ವರ್ಗಾಯಿಸಿದರು. ಈ ಮೊತ್ತವು ಜ್ಯೋತಿಯ ಮೊದಲ ಸೆಮಿಸ್ಟರ್ ಶುಲ್ಕವನ್ನು ಭರಿಸಿತ್ತು. ಯಾವುದೇ ಪ್ರಚಾರದ ಆಸೆ ಇಲ್ಲದೆ, ಶಿಕ್ಷಣದ ಮಹತ್ವವನ್ನು ಅರಿತ ರಿಷಭ್ ಪಂತ್, ಜ್ಯೋತಿಯ ಕನಸನ್ನು ನನಸಾಗಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದರು.
ಜ್ಯೋತಿಯ ಕುಟುಂಬವು ರಿಷಭ್ ಪಂತ್ ಅವರ ಈ ಉದಾರ ಕಾರ್ಯಕ್ಕೆ ಕೃತಜ್ಞತೆ ಸಲ್ಲಿಸಿದೆ. “ಪಂತ್ ಅವರಿಗೆ ದೇವರು ಆಯುಸ್ಸು, ಆರೋಗ್ಯ ಮತ್ತು ಇನ್ನಷ್ಟು ಬಡವರಿಗೆ ಸಹಾಯ ಮಾಡುವ ಶಕ್ತಿಯನ್ನು ಕೊಡಲಿ. ನಾವು ಯಾವತ್ತೂ ಅವರಿಗೆ ಚಿರಋಣಿಯಾಗಿರುತ್ತೇವೆ,” ಎಂದು ಜ್ಯೋತಿಯ ಕುಟುಂಬ ಭಾವನಾತ್ಮಕವಾಗಿ ಹೇಳಿಕೊಂಡಿದೆ.
