ಬೆಂಗಳೂರು, ಅಕ್ಟೋಬರ್ 30: ಸಿಲಿಕಾನ್ ಸಿಟಿಯ ಟ್ರಾಫಿಕ್ ಸಮಸ್ಯೆಗೆ ಪರಿಹಾರವಾಗಿ ಹೊರಹೊಮ್ಮಿದ ನಮ್ಮ ಮೆಟ್ರೋ (Namma Metro) ಈಗ ಜೀವರಕ್ಷಕವೂ ಆಗಿದೆ. ಟ್ರಾಫಿಕ್ ತಡೆಯಿಂದ ಮುಕ್ತವಾದ ಮೆಟ್ರೋ ಮಾರ್ಗವನ್ನು ಬಳಸಿಕೊಂಡು ವೈದ್ಯಕೀಯ ತಂಡಗಳು ಅಂಗಾಂಗಗಳನ್ನು ವೇಗವಾಗಿ ಸಾಗಿಸುವಲ್ಲಿ ಮೂರನೇ ಬಾರಿಗೆ ಯಶಸ್ವಿಯಾಗಿದೆ. ಇತ್ತೀಚೆಗೆ ಶ್ವಾಸಕೋಶವನ್ನು ಕೇವಲ 61 ನಿಮಿಷದಲ್ಲಿ ರವಾನೆ ಮಾಡಿದ ಖ್ಯಾತಿ ನಮ್ಮ ಮೆಟ್ರೋದ ದಾಖಲೆಯಲ್ಲಿ ಸೇರಿದೆ.
ಯಶವಂತಪುರದಿಂದ ನಾರಾಯಣ ಹೆಲ್ತ್ ಸಿಟಿಗೆ ಶ್ವಾಸಕೋಶವನ್ನು ಕೇವಲ 61 ನಿಮಿಷಗಳಲ್ಲಿ ಸಾಗಿಸಲಾಗಿದೆ. ಈ ಕಾರ್ಯಾಚರಣೆಯಲ್ಲಿ ಗ್ರೀನ್ ಲೈನ್ ಮತ್ತು ಯೆಲ್ಲೋ ಲೈನ್ ಮೆಟ್ರೋ ಮಾರ್ಗಗಳನ್ನು ಬಳಸಿಕೊಳ್ಳಲಾಯಿತು. ಯಶವಂತಪುರದಿಂದ ಆರ್.ವಿ ರೋಡ್‌ವರೆಗೆ ಗ್ರೀನ್ ಲೈನ್‌ನಲ್ಲಿ ಸಂಚರಿಸಿದ ವೈದ್ಯರ ತಂಡ, ಆರ್.ವಿ ರೋಡ್‌ನಿಂದ ಬೊಮ್ಮಸಂದ್ರದವರೆಗೆ ಯೆಲ್ಲೋ ಲೈನ್‌ನಲ್ಲಿ ಪಯಣಿಸಿತು. ಬೆಂಗಳೂರಿನ ಟ್ರಾಫಿಕ್ ದಟ್ಟಣೆಯನ್ನು ತಪ್ಪಿಸಲು ಮೆಟ್ರೋ ಆಯ್ಕೆಯಾಯಿತು, ಇದು ಸಮಯ ಉಳಿತಾಯಕ್ಕೆ ನೆರವಾಯಿತು. ವೈದ್ಯಕೀಯ ತಂಡದ ಈ ಸಾಹಸಕ್ಕೆ ಸಾರ್ವಜನಿಕರಿಂದ ಮೆಚ್ಚುಗೆ ವ್ಯಕ್ತವಾಗಿದೆ.
ಹೃದಯ ಸಾಗಾಟದ ಮತ್ತೊಂದು ಯಶಸ್ಸು
ಇದಕ್ಕೂ ಮೊದಲು, ನಮ್ಮ ಮೆಟ್ರೋ ಮೂಲಕ ಹೃದಯವನ್ನು ಯಶಸ್ವಿಯಾಗಿ ಸಾಗಿಸಲಾಗಿತ್ತು. ಗೋರಗುಂಟೆಪಾಳ್ಯ ಮೆಟ್ರೋ ನಿಲ್ದಾಣದಿಂದ ಬನಶಂಕರಿಯವರೆಗೆ 17 ಕಿಲೋಮೀಟರ್ ದೂರವನ್ನು ಕೇವಲ 41 ನಿಮಿಷಗಳಲ್ಲಿ ಸಾಗಿಸಲಾಯಿತು. ಇದೇ ರೀತಿ, ಯಶವಂತಪುರದ ಸ್ಪರ್ಶ್ ಆಸ್ಪತ್ರೆಯಿಂದ ಶೇಷಾದ್ರಿಪುರದ ಅಪೋಲೋ ಆಸ್ಪತ್ರೆಗೆ ಹೃದಯವನ್ನು ಸಾಗಿಸಲಾಯಿತು. ಈ ಕಾರ್ಯಾಚರಣೆಯಲ್ಲಿ ಯಶವಂತಪುರ ಇಂಡಸ್ಟ್ರಿ ಮೆಟ್ರೋ ನಿಲ್ದಾಣದಿಂದ ಸಂಪಿಗೆ ರೋಡ್‌ವರೆಗೆ ಮೆಟ್ರೋ ಬಳಸಲಾಯಿತು. ಆಂಬುಲೆನ್ಸ್ ಮೂಲಕ ಆಸ್ಪತ್ರೆಯಿಂದ ಮೆಟ್ರೋ ನಿಲ್ದಾಣಕ್ಕೆ ತಲುಪಿದ ಹೃದಯವನ್ನು, ಮೆಟ್ರೋದ ಒಂದು ಕೋಚ್‌ನಲ್ಲಿ ಮೀಸಲಿಟ್ಟು ಸಾಗಿಸಲಾಯಿತು. ಸಂಪಿಗೆ ರೋಡ್‌ನಿಂದ ಆಂಬುಲೆನ್ಸ್ ಮೂಲಕ ಅಪೋಲೋ ಆಸ್ಪತ್ರೆಗೆ ರವಾನಿಸಲಾಯಿತು.
ನಮ್ಮ ಮೆಟ್ರೋ ಈ ರೀತಿಯ ಜೀವರಕ್ಷಕ ಕಾರ್ಯಾಚರಣೆಯಲ್ಲಿ ಮೂರನೇ ಬಾರಿಗೆ ಯಶಸ್ವಿಯಾಗಿದೆ. ಟ್ರಾಫಿಕ್ ಸಮಸ್ಯೆಯಿಂದಾಗಿ ರಸ್ತೆ ಸಾರಿಗೆಯಲ್ಲಿ ವಿಳಂಬವಾಗುವ ಸಾಧ್ಯತೆ ಇರುವಾಗ, ಮೆಟ್ರೋ ರೈಲಿನ ವೇಗ ಮತ್ತು ವಿಶ್ವಾಸಾರ್ಹತೆಯು ವೈದ್ಯರಿಗೆ ವರದಾನವಾಗಿದೆ. ಬಿಎಂಆರ್‌ಸಿಎಲ್‌ನ ಸಮಯೋಚಿತ ಸಹಕಾರ ಮತ್ತು ಸಂಘಟಿತ ಕಾರ್ಯಾಚರಣೆಯಿಂದ ಈ ಯಶಸ್ಸು ಸಾಧ್ಯವಾಯಿತು. ಮೆಟ್ರೋದ ಒಂದು ಕೋಚ್‌ನ್ನು ಈ ಉದ್ದೇಶಕ್ಕಾಗಿ ಮೀಸಲಿಡುವ ಮೂಲಕ, ಯಾವುದೇ ಅಡೆತಡೆಯಿಲ್ಲದೆ ಅಂಗಾಂಗ ಸಾಗಾಟವನ್ನು ಸುಗಮಗೊಳಿಸಲಾಯಿತು.
