ವಿಶ್ವವಿಖ್ಯಾತ ಮೈಸೂರು ದಸರಾ ಮಹೋತ್ಸವದಲ್ಲಿ ವಿಜಯದಶಮಿ ದಿನ ನಡೆಯುವ ಜಂಬೂ ಸವಾರಿ ಒಂದು ಪ್ರಮುಖ ಆಕರ್ಷಣೆಯಾಗಿದೆ. ಈ ಭವ್ಯ ಮೆರವಣಿಗೆಗೆ ಸಿದ್ಧತೆಯ ಭಾಗವಾಗಿ, ಜಂಬೂ ಸವಾರಿಯಲ್ಲಿ ಪಾಲ್ಗೊಳ್ಳಲಿರುವ ಆನೆಗಳ ಅಲಂಕಾರದ ಕಾರ್ಯಕ್ರಮ ಅರಮನೆ ಆವರಣದಲ್ಲಿ ಚಾಲೂಗಿದೆ.
ಆನೆಗಳ ಸಿಂಗಾರದ ಈ ವಿಶೇಷ ಕಾರ್ಯಕ್ರಮವನ್ನು ಅರಮನೆ ಆವರಣದಲ್ಲಿರುವ ಕೋಡಿ ಸೋಮೇಶ್ವರ ದೇವಸ್ಥಾನದ ನೀರಿನ ತೊಟ್ಟಿ ಬಳಿ ನಡೆಸಲಾಗುತ್ತಿದೆ. ಆನೆಗಳಿಗೆ ಸ್ನಾನ ಮಾಡಿಸಿದ ನಂತರ, ಕಲಾವಿದ ನಾಗಲಿಂಗಪ್ಪ ನೇತೃತ್ವದಲ್ಲಿ ಹುಣಸೂರು ಮೂಲದ ಒಟ್ಟು ಎಂಟು ಜನ ಕಲಾವಿದರು ಗಜಪಡೆಗೆ ವಿಶೇಷ ಬಣ್ಣ ಹಚ್ಚುವ ಕಾರ್ಯದಲ್ಲಿ ನಿರತರಾಗಿದ್ದಾರೆ.ಕಲಾವಿದರು ಆನೆಗಳ ದೇಹದ ವಿವಿಧ ಭಾಗಗಳಲ್ಲಿ ಸಂಕೀರ್ಣವಾದ ಮತ್ತು ಸುಂದರವಾದ ಸಾಂಪ್ರದಾಯಿಕ ಚಿತ್ರಗಳನ್ನು ಬಿಡಿಸುತ್ತಿದ್ದಾರೆ. ಈ ಅಲಂಕಾರದಲ್ಲಿ ಈ ಕೆಳಗಿನ ವಿವರಗಳು ಗಮನಾರ್ಹವಾಗಿವೆ:
ಕಿವಿ ಮೇಲೆ-ಶಂಖ ಮತ್ತು ಚಕ್ರದ ಆಕೃತಿ, ಸೊಂಡಿಲ ಮೇಲೆ-ಪೌರಾಣಿಕ ಗಂಡಭೇರುಂಡದ ಚಿತ್ರದ ಜೊತೆಗೆ ಹೂವು, ಎಲೆ ಮತ್ತು ಬಳ್ಳಿಗಳ ನಕಾಶೆ. ದಂತದ ಹಿಂಭಾಗದಲ್ಲಿ-ಗಿಳಿ, ಎಲೆಗಳ ಚಿತ್ರ. ಕೆನ್ನೆಯ ಮೇಲೆ-ಹೂವು, ಬಳ್ಳಿ ಮತ್ತು ಮೊಗ್ಗುಗಳ ಅಲಂಕಾರ. ಕಾಲುಗಳ ಮೇಲೆ-ವಿವಿಧ ಪಕ್ಷಿಗಳ ಚಿತ್ರಗಳು, ಎಲೆ, ಹೂವು ಮತ್ತು ಬಳ್ಳಿ ನಕ್ಷೆ. ಬಾಲದ ಗಾತ್ರಕ್ಕೆ ತಕ್ಕಂತೆ-ಪಕ್ಷಿ ಚಿತ್ರ ಮತ್ತು ಹೂವು-ಬಳ್ಳಿಗಳ ಅಲಂಕಾರ. ಕಣ್ಣಿನ ಸುತ್ತಲೂ-ಎಲೆಗಳ ಆಕೃತಿಯ ನಕಾಶೆ. ಹಣೆಯ ಮೇಲೆ-ನಾಮ ಮತ್ತು ಸುರುಳಿ ಚಿತ್ರಗಳನ್ನ ಬಿಡಿಸಲಾಗುತ್ತಿದೆ.
ಈ ವಿಶೇಷ ಚಿತ್ತಾರದಿಂದ ಮಧುವಣಗಿತ್ತಿಯಂತೆ ಸಿಂಗಾರಗೊಂಡ ಗಜಪಡೆ, ಜಂಬೂ ಸವಾರಿಯ ದಿನ ದರ್ಶಕರನ್ನು ಮಂತ್ರಮುಗ್ಧಗೊಳಿಸಲಿದೆ. ಈ ಬಾರಿಯ ದಸರಾ ಮಹೋತ್ಸವದಲ್ಲಿ ಒಟ್ಟು 14 ಆನೆಗಳು ಪಾಲ್ಗೊಳ್ಳಲಿವೆ. ಇವುಗಳಲ್ಲಿ ಕ್ಯಾಪ್ಟನ್ ಅಭಿಮನ್ಯು ಎಂಬ 59 ವರ್ಷ ವಯಸ್ಸಿನ ಗಂಡು ಆನೆ ಪ್ರಮುಖವಾಗಿದೆ. ಇದು 750 ಕಿಲೋಗ್ರಾಂ ತೂಕದ ಚಿನ್ನದ ಅಂಬಾರಿಯನ್ನು ಹೊತ್ತು ಮೆರವಣಿಗೆಯನ್ನು ಮುನ್ನಡೆಸಲಿದೆ. ಇದು ಆರನೇ ಬಾರಿ ಈ ಜವಾಬ್ದಾರಿಯನ್ನು ನಿರ್ವಹಿಸಲಿದೆ.
