ಕರ್ನಾಟಕದ ಉಪಲೋಕಾಯುಕ್ತ ನ್ಯಾಯಮೂರ್ತಿ ಕೆ.ಎನ್. ಫಣೀಂದ್ರ ಅವರೇ ಆನ್ಲೈನ್ ಶಾಪಿಂಗ್ ವಂಚನೆಗೆ ಬಲಿಯಾಗಿರುವ ಘಟನೆ ಸಾರ್ವಜನಿಕರಲ್ಲಿ ಚರ್ಚೆಗೆ ಕಾರಣವಾಗಿದೆ. ಉನ್ನತ ಹುದ್ದೆಯಲ್ಲಿರುವವರೇ ಇಂತಹ ಮೋಸಕ್ಕೆ ತುತ್ತಾಗಿರುವುದು ಆನ್ಲೈನ್ ವ್ಯಾಪಾರದ ವಿಶ್ವಾಸಾರ್ಹತೆಯ ಮೇಲೆ ಪ್ರಶ್ನೆಗಳನ್ನು ಎತ್ತಿದೆ.
ಫೆಬ್ರವರಿ 4ರಂದು ಗುಡ್ ಮ್ಯಾಕ್ಸ್ ಕಂಪನಿಯ ರೇಜರ್ ಬ್ಲೇಡ್ಗಳನ್ನು ಆನ್ಲೈನ್ ಮೂಲಕ ಆರ್ಡರ್ ಮಾಡಿದ್ದ ಉಪಲೋಕಾಯುಕ್ತರು, ಫೆಬ್ರವರಿ 9ರಂದು ಶ್ಯಾಡೋಫ್ಯಾಕ್ಸ್ ಲಾಜಿಸ್ಟಿಕ್ಸ್ ಮೂಲಕ ಪಾರ್ಸೆಲ್ ಸ್ವೀಕರಿಸಿದರು. ಡೆಲಿವರಿ ಬಾಯ್ ವಿಜಯ್ ಎಂದು ಗುರುತಿಸಿಕೊಂಡ ವ್ಯಕ್ತಿ ₹699 ನಗದು ಪಾವತಿ ಪಡೆದು ಪಾರ್ಸೆಲ್ ನೀಡಿದ್ದ.
ಸಂಜೆ ಮನೆಗೆ ಬಂದು ಪಾರ್ಸೆಲ್ ತೆರೆದಾಗ, ರೇಜರ್ ಬ್ಲೇಡ್ಗಳ ಬದಲು ಹಳೆಯ ಬಟ್ಟೆಗಳ ತುಂಡುಗಳು ಇದ್ದುದನ್ನು ಕಂಡು ಆಘಾತಗೊಂಡರು. ಡೆಲಿವರಿ ಏಜೆಂಟ್ ಜವಾಬ್ದಾರಿ ನಿರಾಕರಿಸಿ, ಆನ್ಲೈನ್ ಕಂಪನಿಯನ್ನು ಸಂಪರ್ಕಿಸಲು ಸೂಚಿಸಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.
ಈ ಘಟನೆಗೆ ಸಂಬಂಧಿಸಿ ಕೇಂದ್ರ ವಿಭಾಗದ ಸೆನ್ ಪೊಲೀಸ್ ಠಾಣೆಯಲ್ಲಿ ಗುಡ್ ಮ್ಯಾಕ್ಸ್ ಕಂಪನಿ, ಶ್ಯಾಡೋಫ್ಯಾಕ್ಸ್ ಲಾಜಿಸ್ಟಿಕ್ಸ್ ಹಾಗೂ ಡೆಲಿವರಿ ವ್ಯಕ್ತಿ ವಿರುದ್ಧ ಪ್ರಕರಣ ದಾಖಲಾಗಿದೆ. ಇತ್ತೀಚಿಗೆ ಆನ್ಲೈನ್ ವಂಚನೆ ಪ್ರಕರಣಗಳು ಹೆಚ್ಚಾಗುತ್ತಿರುವುದರಿಂದ ಗ್ರಾಹಕರು ಎಚ್ಚರಿಕೆ ವಹಿಸಬೇಕು ಎಂಬ ಸಂದೇಶವನ್ನು ಈ ಘಟನೆ ನೀಡುತ್ತಿದೆ.
ಆನ್ಲೈನ್ ಶಾಪಿಂಗ್ನಲ್ಲಿ ಇಂತಹ ಮೋಸಗಳು ಸಾಮಾನ್ಯವಾಗುತ್ತಿರುವುದು ಗ್ರಾಹಕರ ಆತಂಕಕ್ಕೆ ಕಾರಣವಾಗಿದ್ದು, ವೇದಿಕೆಗಳು ಹೆಚ್ಚಿನ ಸುರಕ್ಷತಾ ಕ್ರಮಗಳನ್ನು ಜಾರಿಗೊಳಿಸಬೇಕು ಎಂಬ ಒತ್ತಡ ಹೆಚ್ಚಾಗಿದೆ.
