ದಕ್ಷಿಣ ಕನ್ನಡ (ಆ.11): ಧರ್ಮಸ್ಥಳದ ಶವ ಹೂತಿಟ್ಟ ಪ್ರಕರಣದಲ್ಲಿ ತನಿಖೆಯನ್ನು ತೀವ್ರಗೊಳಿಸಿರುವ ವಿಶೇಷ ತನಿಖಾ ದಳ (SIT) ಈಗ ಹೈಟೆಕ್ ತಂತ್ರಜ್ಞಾನ ಬಳಸಿ ನಿರ್ಣಾಯಕ ಹಂತಕ್ಕೆ ಕಾಲಿಟ್ಟಿದೆ. ನೇತ್ರಾವತಿ ನದಿಯ ದಡದಲ್ಲಿರುವ ‘ಪಾಯಿಂಟ್ ನಂ.13’ ಪ್ರದೇಶದಲ್ಲಿ ನೆಲದಡಿ ಹೂತಿರುವ ಶವಗಳ ಸುಳಿವು ಪಡೆಯಲು ಡ್ರೋನ್-ಮೌಂಟೆಡ್ GPR (Ground Penetrating Radar) ತಂತ್ರಜ್ಞಾನವನ್ನು ಬಳಸಲಾಗುತ್ತಿದೆ.
ಡ್ರೋನ್ GPR ತಂತ್ರಜ್ಞಾನ – ಹೇಗೆ ಕೆಲಸ ಮಾಡುತ್ತದೆ?
ಸಾಮಾನ್ಯವಾಗಿ ನೆಲದೊಳಗಿನ ರಹಸ್ಯ ಚಲನವಲನಗಳನ್ನು ಪತ್ತೆಹಚ್ಚಲು ಬಳಸುವ GPR ಯಂತ್ರವನ್ನು ಡ್ರೋನ್ನ ಕೆಳಭಾಗದಲ್ಲಿ ಅಳವಡಿಸಲಾಗುತ್ತದೆ. ಡ್ರೋನ್ ನೆಲದ ಸಮೀಪದಲ್ಲಿ ಹಾರುತ್ತಾ GPR ಸಿಗ್ನಲ್ಗಳನ್ನು ಕಳುಹಿಸುತ್ತದೆ. ಈ ಸಿಗ್ನಲ್ಗಳು ನೆಲದೊಳಗೆ ಪ್ರವೇಶಿಸಿ ಅಡೆತಡೆಗಳನ್ನು ತಾಕಿ ಮರಳಿ ಬರುತ್ತವೆ. ನಂತರ ಸೆನ್ಸರ್ಗಳು ಅದನ್ನು ದಾಖಲಿಸಿ, ವಿಶೇಷ ಸಾಫ್ಟ್ವೇರ್ ಮೂಲಕ 2D ಅಥವಾ 3D ಚಿತ್ರಗಳಿಗೆ ಪರಿವರ್ತಿಸುತ್ತದೆ. ಈ ವಿಧಾನದಿಂದ ದೊಡ್ಡ ಪ್ರದೇಶವನ್ನು ವೇಗವಾಗಿ, ನಿಖರವಾಗಿ ಪರಿಶೀಲಿಸಲು ಸಾಧ್ಯವಾಗುತ್ತದೆ. ನದಿ ದಡ, ಕಾಡು ಪ್ರದೇಶಗಳಂತಹ ಮಾನವರಿಗೆ ತಲುಪಲು ಕಷ್ಟವಾದ ಜಾಗಗಳಲ್ಲಿ ಇದು ವಿಶೇಷವಾಗಿ ಉಪಯುಕ್ತವಾಗಿದೆ.
ಪಾಯಿಂಟ್ ನಂ.13ನಲ್ಲಿ SIT ತಂಡ
ತನಿಖಾಧಿಕಾರಿ ಜಿತೇಂದ್ರ ದಯಾಮಾ ಅವರ ನೇತೃತ್ವದಲ್ಲಿ ಜಿಪಿಆರ್ ತಂತ್ರಜ್ಞರು, ಫೊರೆನ್ಸಿಕ್ ವೈದ್ಯರು, ಕೂಲಿ ಕಾರ್ಮಿಕರು ಸೇರಿದಂತೆ ಎಸ್ಐಟಿ ತಂಡ ಸ್ಥಳಕ್ಕೆ ಆಗಮಿಸಿದೆ. ಅಲ್ಲದೆ ಬಿಗಿ ಪೊಲೀಸ್ ಭದ್ರತೆಯನ್ನೂ ಏರ್ಪಡಿಸಲಾಗಿದೆ. ಜಿಪಿಆರ್ ಯಂತ್ರವನ್ನು ಜೋಡಿಸುವ ಪ್ರಕ್ರಿಯೆ ಪ್ರಾರಂಭವಾಗಿದ್ದು, ಮೊದಲ ಹಂತದಲ್ಲಿ ಗಿಡ-ಗಂಟಿಗಳನ್ನು ತೆಗೆದು ನೆಲವನ್ನು ಸ್ವಚ್ಛಗೊಳಿಸಲಾಗುತ್ತಿದೆ. ಹುಲ್ಲು ಕತ್ತರಿಸುವ ಯಂತ್ರಗಳ ಸಹಾಯದಿಂದ ಪ್ರದೇಶವನ್ನು ಶೋಧಕ್ಕೆ ಸಿದ್ಧಪಡಿಸಲಾಗುತ್ತಿದೆ.
ಆದರೆ ಈ ಕಾರ್ಯಕ್ಕೆ ಸಂಬಂಧಿಸಿದಂತೆ, ಅನಾಮಿಕ ದೂರುದಾರ ಹಾಗೂ ಸ್ಥಳೀಯ ಸಹಾಯಕ ಕಮಿಷನರ್ (AC) ಇನ್ನೂ ಸ್ಥಳಕ್ಕೆ ಆಗಮಿಸಿಲ್ಲ ಎಂಬ ಮಾಹಿತಿ ಲಭ್ಯವಾಗಿದೆ.
ಜಿಪಿಆರ್ ಸ್ಕ್ಯಾನ್ನಲ್ಲಿ ಯಾವುದೇ ಅಸಹಜ ರಚನೆಗಳು ಅಥವಾ ಮಾನವ ಶವಕ್ಕೆ ಹೊಂದಿಕೊಳ್ಳುವ ಸೂಚನೆಗಳು ಕಂಡುಬಂದರೆ, ಆ ಸ್ಥಳವನ್ನು ಗುರುತಿಸಿ ಉತ್ಖನನ ಪ್ರಕ್ರಿಯೆ ಆರಂಭಿಸಲಾಗುವುದು. ಈ ಹಂತವೇ ಪ್ರಕರಣದ ದಿಕ್ಕು ತೀರ್ಮಾನಿಸುವ ಪ್ರಮುಖ ಘಟ್ಟವಾಗುವ ಸಾಧ್ಯತೆ ಇದೆ.
ಈ ಹೈಟೆಕ್ GPR ಯಂತ್ರವನ್ನು ಬೆಂಗಳೂರಿನ ಖಾಸಗಿ ಕಂಪನಿಯಿಂದ ಬಾಡಿಗೆಗೆ ತರಲಾಗುತ್ತಿದೆ. ದಿನಕ್ಕೆ ಲಕ್ಷಾಂತರ ರೂಪಾಯಿ ಬಾಡಿಗೆಯಿರುವ ಈ ಯಂತ್ರದ ಒಟ್ಟು ವೆಚ್ಚ ಸುಮಾರು ₹20 ಲಕ್ಷ ಆಗಲಿದೆ ಎಂದು ಅಂದಾಜಿಸಲಾಗಿದೆ. ಈ ಭಾರೀ ವೆಚ್ಚ SIT ತಂಡಕ್ಕೆ ಹಣಕಾಸಿನ ಸವಾಲಾಗಿದ್ದರೂ, ತನಿಖೆಯನ್ನು ಯಶಸ್ವಿಗೊಳಿಸಲು ಇದನ್ನು ಅವಶ್ಯವಾಗಿ ಬಳಸಬೇಕಾಗಿದೆ.
ತಂತ್ರಜ್ಞಾನದ ಬಳಕೆಗೆ ಸಂಬಂಧಿಸಿದ ಅಗತ್ಯ ಅನುಮತಿ ಸಿಗುವವರೆಗೆ SIT ತಂಡ ಕಾಯುತ್ತಿದೆ. SIT ಮುಖ್ಯಸ್ಥ ಪ್ರಣವ್ ಮೊಹಾಂತಿ ಅವರು ಈ ಯಂತ್ರದ ಬಳಕೆಗೆ ತಜ್ಞರ ಸಲಹೆ ಪಡೆದಿದ್ದಾರೆ.
ಪ್ರಥಮ ಹಂತದ ಶೋಧ ಕಾರ್ಯ ಮುಗಿದಿದ್ದು, ಎರಡನೇ ಹಂತದಲ್ಲಿ ಡ್ರೋನ್ GPR ಮೂಲಕ ನೆಲದಡಿ ಸ್ಕ್ಯಾನ್ ನಡೆಸಲಾಗುವುದು. ಇದರಿಂದ ಸಿಕ್ಕ ಮಾಹಿತಿಯೇ ಮುಂದಿನ ಕ್ರಮಗಳಿಗೆ ಆಧಾರವಾಗಲಿದೆ.
