ಬೆಂಗಳೂರು (ಏ.28): ಬೆಂಗಳೂರಿನ ನಂದಿನಿ ಲೇಔಟ್ನಲ್ಲಿ ಭಾನುವಾರ ರಾತ್ರಿ ಲೇಡಿಸ್ ಪಿಜಿಯಲ್ಲಿ ಅಗ್ನಿ ಅವಘಡ ಸಂಭವಿಸಿದೆ. ಎಲ್ಇಡಿ ಬ್ಯಾನರ್ಗಳ ಗೋಡೌನ್ನಲ್ಲಿ ಕಾಣಿಸಿಕೊಂಡಿದ್ದ ಬೆಂಕಿ ಪಕ್ಕದಲ್ಲೇ ಇದ್ದ ಲೇಡೀಸ್ ಪಿಜಿ ಕಟ್ಟಡವನ್ನು ಸಂಪೂರ್ಣವಾಗಿ ಆವರಿಸಿಕೊಂಡಿತು. ಆದರೆ, ಅದೃಷ್ಟವಶಾತ್, ಒಳಗಿದ್ದ 50 ಕ್ಕೂ ಹೆಚ್ಚು ಯುವತಿಯರು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.
ಹೇಗೆ ಆರಂಭವಾಯಿತು ದುರಂತ?
ಕಳೆದ ಭಾನುವಾರ ರಾತ್ರಿ ವೇಳೆ ನಂದಿನಿ ಲೇಔಟ್ನಲ್ಲಿರುವ ಎಲ್ಇಡಿ ಬ್ಯಾನರ್ ಗೋಡೌನ್ನಲ್ಲಿ ಹಠಾತ್ತನೆ ಬೆಂಕಿ ಕಾಣಿಸಿಕೊಂಡಿತು. ಗೋಡೌನ್ನಲ್ಲಿದ್ದ ಬ್ಯಾನರ್ಗಳೆಲ್ಲವೂ ಸುಡುವ ಸಾಮಾಗ್ರಿಯಾಗಿದ್ದ ಕಾರಣ ಬೆಂಕಿ ಸೆಕೆಂಡುಗಳಲ್ಲಿ ಹೊತ್ತಿಕೊಂಡಿತ್ತು. ನಂತರ, ಗೋಡೌನ್ ಪಕ್ಕದಲ್ಲಿದ್ದ ನಾಲ್ಕು ಅಂತಸ್ತಿನ ಪಿಜಿ ಕಟ್ಟಡಕ್ಕೆ ಬೆಂಕಿ ಆವರಿಸಿಕೊಂಡಿದೆ.
ಬೆಂಕಿಯ ನಡುವೆ ಬದುಕಿನ ಹೋರಾಟ
ಪಿಜಿಯಲ್ಲಿದ್ದ ಯುವತಿಯರು ಇದ್ದಕ್ಕಿದ್ದಂತೆ ಯಾರೂ ಸಮಯ ವ್ಯರ್ಥ ಮಾಡದೇ ಕಿರುಚಾಡಿಕೊಂಡು ಮೆಟ್ಟಿಲುಗಳ ಕಡೆ ಓಡಿದರು. ಆದರೆ ಮೆಟ್ಟಿಲುಗಳ ಮಾರ್ಗವೂ ಹೊಗೆಯಿಂದ ಮುಚ್ಚಿಹೋಗಿತ್ತು. ಹೇಗೋ ಪಿಜಿಯಿಂದ ಹೊರ ಬಂದು ಕಾಂಪೌಂಡ್ ಮೇಲಿಂದ ಜಿಗಿದು ಪ್ರಾಣ ಉಳಿಸಿಕೊಂಡಿದ್ದಾರೆ.
ಒಳಗಿದ್ದ 50 ಮಂದಿಯೂ ಸುರಕ್ಷಿತವಾಗಿ ಹೊರಬಂದ ಬಳಿಕವೇ ನಿಟ್ಟುಸಿರು ಯುವತಿಯರು ಬಿಟ್ಟರು. ಕಾಂಪೌಂಡ್ ಜಿಗಿಯುವಾಗ ಕೆಲವು ಯುವತಿಯರಿಗೆ ಸಣ್ಣಪುಟ್ಟ ಗಾಯಗಳಾಗಿದ್ದು, ಯಾರಿಗೂ ಗಂಭೀರ ಗಾಯಗಳಾಗಿಲ್ಲ.
ಅಗ್ನಿಶಾಮಕ ದಳದ ಕಾರ್ಯಾಚರಣೆ
ಸ್ಥಳೀಯರು ತಕ್ಷಣ ಅಗ್ನಿಶಾಮಕ ದಳಕ್ಕೆ ಮಾಹಿತಿ ರವಾನಿಸಿದರು. ಘಟನಾ ಸ್ಥಳಕ್ಕೆ ಆಗಮಿಸಿದ ಸಿಬ್ಬಂದಿ ಸುಮಾರು 2 ಗಂಟೆಗಳ ಕಾಲ ಶ್ರಮವಹಿಸಿ ಬೆಂಕಿಯನ್ನು ಹತೋಟಿಗೆ ತಂದರು. ಅಷ್ಟರಲ್ಲಿ ಪಿಜಿ ಕಟ್ಟಡ ಸಂಪೂರ್ಣ ಸುಟ್ಟು ಕರಕಲಾಗಿತ್ತು. ಎಲ್ಇಡಿ ಗೋಡೌನ್ ಸಂಪೂರ್ಣವಾಗಿ ನೆಲಸಮವಾಯಿತು. ಲ
ಸಿಸಿಟಿವಿ ಕ್ಯಾಮರಾದಲ್ಲಿ ಸೆರೆಯಾದ ರೋಮಾಂಚಕ ದೃಶ್ಯ
ಪಕ್ಕದ ಕಟ್ಟಡದ ಸಿಸಿಟಿವಿ ಕ್ಯಾಮೆರಾದಲ್ಲಿ ಈ ದೃಶ್ಯ ಸೆರೆಯಾಗಿದೆ. ಅದರಲ್ಲಿ ಯುವತಿಯರು ಹೇಗೆ ಕತ್ತಲಲ್ಲಿ ಚೀರಾಡುತ್ತಾ, ಕೈ ಕಟ್ಟಿಕೊಂಡು, ಒಬ್ಬರಿಗೊಬ್ಬರು ನೆರವಾಗುತ್ತಾ ಕಾಂಪೌಂಡ್ ಮೇಲಿಂದ ಜಿಗಿಯುತ್ತಿದ್ದಾರೆ ಎಂಬುದು ಸ್ಪಷ್ಟವಾಗಿ ಕಾಣಿಸುತ್ತದೆ. ಈ ವಿಡಿಯೋ ಈಗ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗಿದೆ.
